" စမ္ပာနဂိုရ် ပြားသွားပြီ "
============
မောင်ရင့်မာ (ကျောင်းကုန်း)
“ပြားသွားပြီ … အကုန်လုံး ပြားသွားပြီ”
သေချာတယ်၊ ဒါ သာဝရဲ့ အသံပဲ။ ငသောင်းတို့ ထန်းတဲမှာ ငှက်ခါးတောင်လေးနဲ့ ဆက်ရက်မင်းစည်းစိမ် စံစားနေခဲ့တဲ့ မောင်တင့်၊ ဇော်ထွီးနဲ့ အောင်ဘုတို့သုံးယောက် အသံကြားကြားချင်း ထွက်ကြည့်လိုက်တယ်။ သင်္ချိုင်းကုန်းကို ဖြတ်ပြီး ရွာဘက် ဖုန်တထောင်းထောင်း ထအောင် ပြေးဝင်သွားတဲ့ သာဝရဲ့ ကျောပြင်ကိုပဲ မြင်လိုက်ရတော့တယ်။ ဒါပေမယ့် သေချာတယ် … ဒါ သာဝရဲ့အသံပဲ။ သချိုင်းကုန်းကနေ အဲဒီလို ကဆုန်ပေါက် ပြေးလာရင်းက စမ္ပာနဂိုရ် တစ်ရွာလုံးကို လန့်ဖျပ်သွားအောင် အော်ပစ်နိုင်တဲ့သူဆိုလို့ ဒီရွာမှာ သာဝတစ်ယောက်ပဲ ရှိတယ်။ ဧကန္တ သာဝတစ်ယောက် သုသာန်ကျောင်းဘက်က ပြန်လာတာပဲ ဖြစ်ရမယ်။ ဟုတ်တယ်လေ …။ အဲဒီလို သင်္ချိုင်းကုန်းကို ဖြတ်ပြေးလာရင်းက ငယ်သံငယ်ရင်း ပါအောင် သာဝ အော်ဟစ်ခဲ့တာ ဒါ ပထမဆုံးအကြိမ်မှ မဟုတ်ဘဲကိုး။
* * *
တမြန်နှစ် မိုးအကုန် ဆောင်းဦးပေါက်လောက် ဖြစ်မယ်ထင်တယ်။ အင်္ချိုင်းကုန်းကို ဖြတ်ပြေးလာရင်း ငယ်သံငယ်ရင်း ပါအောင် အော်ဟစ်လိုက်တဲ့ သာဝအသံကြောင့် စမ္ပာနဂိုရ်တစ်ရွာလုံး အကြီးအကျယ် ထိတ်လန့်သွားခဲ့တယ်။ ဘာတဲ့လဲ့ … ဘယ်သူ ပြောတာတဲ့လဲ၊ လှိုင်းကြီး လာပြီဆိုတာ … “တတိယလှိုင်း” ဆိုပဲ။
ဘယ်သူပြောလဲ မေးမနေနဲ့။ သာဝ အော်သွားတာ မကြားဘူးလား၊ မြန်မြန်လုပ်၊ ချောင်းညာဘက်မှာ မိုးတွေ ညှို့နေပြီ။ ရွာအောက်ပိုင်းက ဟန်ရွှေနဲ့ ထွန်းအံ့တို့တောင် ကောက်လှိုင်းတွေ ရွှေ့နေပြီ။ တစ်ယောက်တစ်ပေါက် ပြောရင်း စမ္ပာနဂိုရ် တစ်ရွာလုံး ကောက်လှိုင်းသယ်ကြ၊ တလင်းပြေးကြနဲ့ ရုတ်ရုတ်သဲသဲ ဖြစ်ကြတယ်။ ဟုတ်တယ်လေ …။ တတိယလှိုင်း ဆိုတဲ့အသံကို တစ်ရွာလုံး ဘယ်သူမှ မကြားချင်တော့ဘူး။ မိုးဦးနဲ့ မိုးလယ်မှာ လှိုင်းတွေ၊ ရေတွေ နှစ်ကြိမ်တောင် ကြီးခဲ့လို့ အိမ်ခေါင်မိုး တက်ပြီး မြွေပါးကင်းပါးနဲ့ အတူနေရ၊ ပျိုးတွေ ပြန်ပစ်ရ၊ လယ်တွေ ပြန်စိုက်ရနဲ့ ဒုက္ခသုက္ခ ရောက်ခဲ့ပြီးပြီ။ တစ်ရွာလုံး ရေသံလှိုင်းသံကို ဘယ်သူမှ ထပ်မကြားချင်ကြတော့ဘူး။ ရိတ်သိမ်းချိန် ရောက်ခါမှတော့ ဘယ်သူမှ ထပ်ပြီး အမြုပ်မခံနိုင်တော့ဘူး။ လှိုင်းဆိုတာ လူမဟုတ်လို့သာပေါ့။ နို့မို့များ …။
ဆိုပါစို့ …။ အဲဒီ ညက တတိယလှိုင်း ဆိုတဲ့အသံကြောင့် စမ္ပာနဂိုရ် တစ်ရွာလုံး ယောက်ယက်ခတ်ပြီး ခြေကုန်လက်ပန်း ကျသွားခဲ့တယ်။ အနိမ့်ပိုင်းက ကောက်လှိုင်းတွေ အမြင့်ရွှေ့ရ၊ အောက်ဘက်က စပါးပုံတွေ အထက်ဘက်ရွှေ့ရ။ တစ်ရွာလုံး ဖတ်ဖတ်မော သွားတယ်။ ချောင်းနား ဆင်းပြီး ရေအခြေအနေ စောင့်ကြည့်နေတဲ့ ဒူးကြီးတို့ဆီကလည်း လူလွှတ် မေးလိုက်တိုင်း ရေက ငြိမ်လို့ချည်းပဲ ပြောတယ်။ တဖြည်းဖြည်း စမ္ပာနဂိုရ်က လူတွေ စိတ်မရှည်ကြတော့ဘူး။ နေပါဦး၊ ဘယ်ကောင် ပြောတာလဲကွ။ တတိယလှိုင်းကြီး ဆိုတာ …။
အဲဒီ ည စမ္ပာနဂိုရ်ရွာသားတွေဟာ သောကနဲ့ မောရတဲ့အထိ ဒေါသတွေ အလိပ်လိပ် တက်တော့တယ်။ စမ္ပာနဂိုရ်သူကြီး ဦးအောင်ဗလတောင်မှ မျက်ထောင့်ကြီး နီရဲလာပြီး ဖြောင်းခနဲ တက်ခေါက်လိုက်တယ်။ ပြီးတော့ …
“သွားခေါ်စမ်း သာဝကို … သွားခေါ်ပြီး ခြောက်ပေါက်ထဲ ထည့်လိုက်စမ်း” ပြောလိုက်တယ်။
အင်မတန် ခြေမြန်လက်မြန်ရှိတဲ့ မောင်တင့်နဲ့ ဇော်ထွီးက သာဝကို ကုပ်ဆွဲခေါ်လာပြီး ခြောက်ပေါက်ထဲ ထည့်တော့ သာဝရယ် အော်လိုက်တာလေ၊ သာဝ အအော်ရပ်တော့မှ အောင်ဘုနဲ့ ထွန်းအံ့က သေသေချာချာ စစ်တော့တာ။
သာဝ အဆိုကတော့ တတိယလှိုင်းအကြောင်း ပြောတာ သူ မဟုတ်ပါဘူးတဲ့။ ကိုဟန်တင် ဆိုလား၊ ဟာဗားနား ဆေးပြင်းလိပ် ခဲထားတဲ့ ပါမောက္ခကြီးက ပြောတာပါတဲ့။ ဒါဆို အဲဒီ ကိုဟန်တင် ဆိုတဲ့လူ သွားခေါ်စမ်းဆိုတော့ ကိုဟန်တင်ကို သူ မသိပါဘူးတဲ့။ ကိုဟန်တင်တို့၊ တောဖလားတို့ ရေးတဲ့စာတွေကို သုသာန်ကျောင်းက ကပ္ပိယ စိန်ပေါက်က ဖတ်ပြီး သူ့ကို ပြန်ပြောပြတာပါတဲ့။ အစကတော့ တတိယလှိုင်းကို စပြောတာ “တောဖလား” ပါတဲ့။ နောက်မှ ကိုဟန်တင်က ပြောတာတဲ့။ ဒါပေမယ့် ကိုဟန်တင် ပြောတာနဲ့ တောဖလား ပြောတာနဲ့ မတူဘူးတဲ့။ ကိုဟန်တင် ဆိုတာကလည်း ယဉ်ကျေးမှုတွေဟာ ကြီးတော်တို့ အိမ်က ချိုကုပ်နဲ့ ချိုထောင်နဲ့ ဝှေ့ခတ် တိုးတိုက်ကုန်ပြီလို့ ပြောခဲ့တဲ့လူပါပဲတဲ့။
သာဝ ပြောတာတွေကို သူကြီးအောင်ဗလက နားထောင်ပြီး စိတ်တိုသထက် တိုလာတယ်။ ဒီကောင် အစကတည်းက “မရူးမကောင်း” ဆိုတာလည်း တစ်ရွာလုံး အသိ။ သူကြီး စိတ်တိုတိုင်း “နားပန်ကျင်း” နေရပြန်ရင်လည်း သာဝ အရိုးနဲ့အရေပဲ ကျန်တော့မယ်။
“ကိုင်း … သွားခေါ်စမ်းကွာ … သုသာန်ကျောင်းက ကပ္ပိယစိန်ပေါက် ဆိုတဲ့ လူကို”
ဒါမျိုးဆို အလွန်ဖင်ပေါ့တဲ့ မောင်တင့်နဲ့ ဇော်ထွီးက ထလိုက်တော့ အောင်ဘုက သူလည်း လိုက်မယ် ဆိုပြီး ထလိုက်သွားတယ်။ ဟန်ရွှေနဲ့ ထွန်းအံ့က သူကြီး မျက်နှာရိပ် မျက်နှာပဲ လှမ်းကြည့်လိုက်ပြီး စိန်ပေါက်တွက် ခြောက်ပေါက်တစ်ခု အသင့် လုပ်ထားလိုက်တယ်။ စမ္ပာနဂိုရ် ရွာသားတွေလည်း ပွဲကောင်းကြည့်ရတော့မယ် ဆိုပြီး စောင့်စားနေခဲ့ကြတယ်။
ဟော … လာပြီ။
ကွမ်းနှစ်ယာညက်လောက် အကြာမှာ ရွာသားတွေ ကြားကနေ တိုးဝှေ့ဖြဲခွဲပြီး လူတစ်ယောက် ဝင်လာတယ်။ အသားညိုညို၊ မျက်မှန်ထူထူ၊ မုတ်ဆိတ်ကျင်စွယ်နဲ့ အသက် ၄၀ အရွယ် လူတစ်ယောက် ဝင်လာတယ်။ သူ့နှာခေါင်းပေါ် လျှောကျနေတဲ့ မျက်မှန်ထူထူကြီးက လွဲရင် သူ့ပုံစံက စမ္ပာနဂိုရ်သားတွေနဲ့ သိပ်မထူးပါဘူး။ သိတဲ့အတိုင်း … ဒီမှာက ဒီလို ပုလင်းဖင်ကွဲလောက် မျက်မှန်ကြီးကို ဘယ်သူမှ မတပ်ခဲ့ကြဘူး။ ရွာသားတွေက သူကြီးရဲ့ ဒေါသအိုး ပေါက်ကွဲထွက်မယ့် အချိန်ကို ငံ့လင့်နေတုန်းမှာပဲ သူကြီးဆီက အသံထွက် မလာဘဲ ထူးဆန်းလှစွာ မျက်မှန်ကြီးဆီက အသံထွက်လာခဲ့တယ်။
“ဦးလေး အောင်ဗလ မဟုတ်လား … ကျွန်တော် ဦးလေး သူငယ်ချင်း ကိုဆင်ပေါက် သားလေ”
“ဟေ …”
အောက်လင်းမီးရောင်ထဲ စိန်ပေါက် မျက်နှာကို ထင်းထင်းမြင်ဖို့ စူးစိုက်ကြည့်နေတဲ့ သူကြီး မျက်နှာကြီး အဲဒီ တစ်ခွန်းနဲ့ပဲ ဝင်းခနဲ လက်သွားတယ်။ ထင်တော့ထင်သား။ လက်စသတ်တော့ ဆင်ပေါက်သား ကိုး။
ကိုစိန်ပေါက် ပြောတာကတော့ တတိယလှိုင်း ဆိုတာ စမ္ပာနဂိုရ် ရေကြီးတာကို ဆိုလိုတာ မဟုတ်ပါဘူးတဲ့။ အယ်ဗင် တော်ဖလာက လှိုင်းသုံးလှိုင်း အကြောင်း စပြောခဲ့ပြီးနောက်မှ ဟားဗက်တက္ကသိုလ် ပါမောက္ခ ဟန်တင်တန်က တတိယလှိုင်းအကြောင်း ပြောတာပါတဲ့။ အဲဒီ ဧရာမပုဂ္ဂိုလ်ကြီးတွေရဲ့ အင်မတန် ခမ်းနားကြီးကျယ်တဲ့ ဟောချက်တွေကို ကျွန်တော်တို့ရဲ့ “စာတော်ပြန်” တွေက အသေအချာ စောင့်ကြည့်ပြီး သူတို့ အနက်ပေါက်သလို ဖြည့်စွက်မွမ်းမံ ပြန်ဆိုပါသတဲ့။ အဲဒါကို ကပ္ပိယ စိန်ပေါက်က စောင့်ဖတ်ပြီး သာဝရှေ့ လွှတ်ခနဲ ပြောမိရာက ခုလို အုတ်အော်သောင်းတင်း ဖြစ်ခဲ့ရတာ ပါတဲ့။ လှိုင်းဆိုတာ တကယ်တော့ ပညာရှင်ကြီးတွေက လူ့အဖွဲ့အစည်းကို ပိုင်းခြား သုံးသပ်ပြီး ပြောတာပါတဲ့။
ကိုစိန်ပေါက် ပြောလိုက်တာက တစ်မျိုး၊ သာဝ နားလည်သွားတာက တစ်မျိုး ဖြစ်တာဟာ “ပါရာဒိုင်း” ရွှေ့သွားတဲ့ သဘောပါပဲတဲ့။ ဒါမျိုး ကမ္ဘာမှာ မဆန်းတော့ပါဘူး။ စမ္ပာနဂိုရ်မှာသာ ဆန်းနေတာပါတဲ့။ သို့သော် ကမ္ဘာ ဆိုပေမယ့်လည်း ကမ္ဘာဟာ စမ္ပာနဂိုလို ရွာကြီးတစ်ရွာ ဖြစ်နေပါပြီတဲ့။ ဂလိုဘယ်ခေတ်မှာ ကမ္ဘာဟာလည်း “ဂလိုဘယ်ဘဲလိခ်ျ” ဆိုလား ဖြစ်သွားပါပြီတဲ့။
စိန်ပေါက်က “ဂလို” ပြောလိုက်တာကို သူကြီးနဲ့ ရွာသားတွေက ရုတ်တရက် နားမလည် လိုက်ပေမယ့် စကားလုံး မျက်လှည့်ဆရာတွေရဲ့ လက်ထဲမှာ “ဟေ့ ... ကမ္ဘာကြီးဆိုတာ တို့ စမ္ပာနဂိုရ်လို ရွာကြီးတစ်ရွာ ဆိုပဲကွ” လို့ ကိုယ့်မွေးရပ် ဇာတိမြေအတွက် ကိုယ်စီ ကိုယ်စီ အားမနာတမ်း ဂုဏ်ယူလိုက်ကြပြီး မောမောနဲ့ ပြန်အိပ်ခဲ့ကြတယ်။ သူကြီး ဦးအောင်ဗလကတော့ ပြောလိုက်သေးတယ်။
“အေးပါ ... မောင်စိန်ပေါက်ရာ … နောက်ဆို မင်း ဖတ်ထား မှတ်ထားတာလေး ပြန်ပြောချင်ရင် တို့ရွာက ဥပုသ်ကျောင်းကို လာခဲ့ပါကွာ ... သာဝရှေ့တော့ အထူးအဆန်းတွေကို အရမ်းအရမ်း မပြောလိုက်ပါနဲ့”
သူကြီးရဲ့ အဲဒီ စကားတစ်ခွန်းတည်းနဲ့ ကပ္ပိယ စိန်ပေါက်ဟာ စမ္ပာနဂိုရ်မှာ တော်တော် လူရာဝင်သွားတယ်။ သူကြီးရဲ့ ခြောက်ပေါက်ကို ပြန်လည် နေရာ ချထားနေတဲ့ မောင်တင့်၊ ဇော်ထွီးနဲ့ အောင်ဘုတို့က စိန်ပေါက်ရဲ့ မျက်နှာကို အထင်ကြီး လေးစားတဲ့ မျက်လုံးတွေနဲ့ ကြည့်လိုက်တယ်။ တကယ်တော့ သူတို့ သုံးယောက်စလုံးက ထစ်ခနဲရှိ တုတ်ဆွဲ ဓားဆွဲ ဗလအားကိုး မိုက်လွန်းလို့ သူကြီးက အသာချော့ပြီး လက်သပ် မွေးထားတာ။ ဗလကြီး ခေါင်းသေး ဆိုပေမယ့် သူတို့လည်း လူရာဝင်ချင်ကြတယ်။ တစ်နေ့ တစ်နေ့ ငသောင်း ထန်းတဲမှာချည်း အချိန်ကုန်တာနဲ့ စာရင် ကိုစိန်ပေါက်ဆီ တပည့်ခံရ ကောင်းမလား စဉ်းစားကြတယ်။ သူတို့အတွက် စိန်ပေါက်က “ဟီးရိုး”။
* * *
စိန်ပေါက်ဆိုတာ တကယ်တော့ သူကြီး ဦးအောင်ဗလတို့ရဲ့ သူငယ်ချင်း ကိုဆင်ပေါက်ရဲ့ တစ်ဦးတည်းသော သားပဲ။ သူ့အဖေ ကိုဆင်ပေါက်က သား စိန်ပေါက်ကို စမ္ပာနဂိုရ် ရွာကျောင်းမှာ လေးတန်းအထိ “တန်းကုန်”အောင် ထားခဲ့ပြီး လိမ္မာအောင်၊ ယဉ်ကျေးအောင် ဆိုတဲ့ ရည်ရွယ်ချက်နဲ့ ပျံလွန်တော်မူခဲ့တဲ့ ဆရာတော် ဦးသောဘိတ ကျောင်းမှာ နမက္ကာရ၊ ပရိတ်ကြီး၊ ရတနာရွှေချိုင့်၊ အတွင်းအောင်ခြင်း၊ အပြင်အောင်ခြင်း စတာတွေ သင်ကြားစေခဲ့တယ်။ ဦးပဉ္ဇင်းလေး ဣန္ဒာဝဿကလည်း ဆရာတော် ခိုင်းတဲ့အတိုင်း စိန်ပေါက်ကို ကိုယ်ဖိရင်ဖိ သင်ပေးတယ်။ သဂြုင်္ိဟ်ကိုးပိုင်း တက်မယ့်အချိန်လည်း ရောက်ရော စိန်ပေါက်လည်း ရွာကနေ ထွက်ပြေးသွားရော ဆိုတော့ သူ့အဖေ ကိုဆင်ပေါက်ဟာ အကြီးအကျယ် ဒေါသူပုန်ထခဲ့တယ်။ စိန်ပေါက် တစ်ယောက် မြို့ပေါ်မှာ ပညာ ဆက်သင်သလား၊ မသင်ဘူးလား အသေအချာ မသိရပေမယ့် မြို့ပေါ်မှာပဲ အိုးအိမ်ထူ၊ အိုးအိမ်ပျက် ဖြစ်ခဲ့တာတွေကို ရွာက သဲ့သဲ့ကြားခဲ့ရတယ်။ အနှစ်နှစ်ဆယ် နီးပါးကြာလို့ စိန်ပေါက်တစ်ယောက် ရွာပြန်ရောက်လာတဲ့ အခါမှာတော့ သူ့အဖေ ကိုဆင်ပေါက် မရှိရှာတော့ဘူး။ လယ်တွေ ကိုင်းတွေလည်း မရှိတော့တာနဲ့ စိန်ပေါက်ဟာ စမ္ပာနဂိုရ် ရွာကို ပြန်မလာ ဖြစ်တော့ဘဲ သုသာန်ကျောင်းက သူ့ဘဒွေး ဘုန်းကြီးအိုကြီး ဆီမှာပဲ ကပ္ပိယ လုပ်နေတော့တယ်။
သုသာန်ကျောင်း ဆိုပေမယ့် သဲပွက်၊ ရိုးဖျား၊ အုန်းပင်စု ရွာတွေနဲ့ သူ့ဂေါစကံနဲ့သူ ရှိနေတာ တစ်ကြောင်း၊ သုသာန်ကျောင်းနဲ့ စမ္ပာနဂို ရွာအကြား သင်္ချိုင်းကုန်းတစ်ခု ခြားနေတာ တစ်ကြောင်းကြောင့် စမ္ပာနဂိုရ်က လူတွေဟာ သုသာန်ကျောင်းဘက် အရောက်အပေါက် နည်းတယ်။ သုသာန်ကျောင်း ဘုန်းတော်ကြီးနဲ့ ဆွေရိပ်မျိုးရိပ် မကင်းတဲ့ သာဝ တစ်ယောက်သာပဲ မကြာမကြာ သွားရာက ကပ္ပိယ စိန်ပေါက်နဲ့ ရင်းနှီးပြီး မထော်မငန်း ပြန်ပြန် အော်နေတာ။
ခက်တာက သာဝဟာ ငယ်ငယ်ကတည်းက ဝမ်းတွင်းရူး ဆိုတော့ကာ စိန်ပေါက်ဟာ ထူးထူးဆန်းဆန်း တစ်ခုခု ပြောလိုက်တယ် ဆိုရင်ပဲ ချက်ချင်း သင်္ချိုင်းကုန်းကို ဖြတ်ပြေးပြီး ငယ်သံငယ်ရင်း ပါအောင် အော်တော့တာ။ တစ်ခါတည်း …
“ပြိုသွားပြီ … ပြိုကျသွားပြီ”
သာဝ အော်ပြေးလာတာ မြက်ရိတ်သွားရာက ပြန်လာတဲ့ ဒူးကြီးတို့ တစ်သိုက်က ကြားလိုက်မိတာနဲ့ ဦးပဉ္ဇင်းလေး ဣန္ဒဝဿရဲ့ ဆွမ်းစားကျောင်းဆီ ပြေးကြတာပေါ့။ စမ္ပာနဂိုရ်မှာ ပြိုကျလုဆဲဆဲ အဆောက်အဦ ဆိုလို့ ဦးပဉ္ဇင်းလေးရဲ့ ဆွမ်းစားကျောင်းပဲ ရှိတာ။ ဘုန်းကြီး ဦးသောဘိတ ပျံလွန်တော် မမူခင်ကတည်းက ဆွမ်းစားကျောင်း ပြင်ပေးဖို့ သူကြီး အောင်ဗလကို တဖွဖွ ပြောနေခဲ့တာ။ ခု ဦးပဉ္ဇင်းလေး လက်ထက် ရောက်တော့လည်း မပြင်ဖြစ်သေးဘူး။ တစ်နှစ် ပြင်မယ်၊ တစ်နှစ် ပြင်မယ်နဲ့ ခုတော့ ပြင်ရင်လည်း ဘာမှ မထူးဘူး။ ပြန်ဆောက်မှကို ဖြစ်တော့မှာ။ အဲဒီတော့ ပြောရရင် ရွာမှာ ပြိုကျတော့မယ့် အဆောက်အဦ ဆိုလို့ ဆွမ်းစားကျောင်းပဲ ရှိတော့ ဒူးကြီးတို့က အဲဒီကို စိုးရိမ်တကြီး ပြေးကြည့်ကြတာပေါ့။ မရှေးမနှောင်း ဆိုသလိုပဲ သူကြီး လွှတ်လိုက်တဲ့ ဇော်ထွီးတို့၊ အောင်ဘုတို့လည်း ရောက်လာတော့တာပေါ့။
ဆွမ်းစားကျောင်း ဘာမှ မဖြစ်ဘူး ဆိုတာလည်း သေချာရော ရွာကို ထိတ်လန့်အောင် လုပ်ခဲ့တဲ့ သာဝ တစ်ယောက်တည်း သူကြီးအိမ်က ခြောက်ပေါက်ထဲ ဝင်ရပါလေရော။ သာဝ မျက်ရည်လည်ရွဲနဲ့ ဖြစ်နေတာကို ဇော်ထွီးနဲ့ အောင်ဘုက ကြည့်ကောင်းကောင်းနဲ့ အားရအောင် ကြည့်နေသေးတယ်။
ပြီးတော့မှ မေးတယ်။
“ဆွမ်းစားကျောင်း ဘာမှ မဖြစ်ဘဲနဲ့၊ နေပါဦး … မင်းက ဘာပြိုလို့ အော်ပြေးတာလဲ”
“ဆွမ်းစားကျောင်း မပြိုပါဘူးဗျ … ပြိုတာက ဘာလင်တံတိုင်းပါဗျ”
“ဟေ … ဟုတ်လား … ဘာလင်တံတိုင်းကြီး ဘယ်တုန်းက ပြိုသွားတာလဲ”
အမှန်တော့ ဇော်ထွီးနဲ့ အောင်ဘုတို့က ဘာတင်တံတိုင်း ဆိုတာ ဘယ်နားရှိလဲ သေသေချာချာ သိတာ မဟုတ်ဘူး။ သာဝလို ဝမ်းတွင်းရူးက သိပြီး၊ သူတို့က မသိဘူးဆိုရင် ညံ့ရာကျမှာ စိုးလို့ မေးမိမေးရာ လျှောက်မေးနေတာ။ သာဝက ခြောက်ပေါက်ထဲ နေရတဲ့ကောင် ဆိုတော့ ရိုရိုသေသေ ဖြေတာပေါ့။
“ဘာလင်တံတိုင်း ပြိုသွားတာ ဆယ် …. ဆယ့်ရှစ်နှစ်လောက် ရှိပြီတဲ့ဗျ”
“နင့်မေကလွှား … ဆယ့်ရှစ်နှစ်က ကိစ္စ ခုမှ ဘာလို့ ထအော်နေတာလဲ” မေးမြန်းရော။
“ဒါ … ဒါတော့ ဘယ်သိမလဲဗျ … ဖွတ်ကလိရာမက ဒါပဲ ပြောနေတဲ့ဟာကို”
ဇော်ထွီးနဲ့ အောင်ဘုတို့ တစ်ယောက်မျက်နှာ တစ်ယောက် ကြည့်လိုက်ကြသည်။ ဘယ်သူလဲ “ဖွတ်ကလိရာမ” ဆိုတာ ဘယ်သူလဲ။ သူတို့နှစ်ယောက် ဧရာမ အကျပ်အတည်း ဖြစ်နေတာကို ရိပ်မိတဲ့ ဒူးကြီးက စဉ်းစဉ်းစားစားနဲ့ ထင်မြင်ချက် ပေးလိုက်တယ်။
“ဖွတ်ကလိရာမ ဆိုတာ ကြိုးကြာကွင်းက အင်ဒူစမြားရဲ့ ယောက်ဖ ကိုရာမ ပြောတာ ဖြစ်မှာပေါ့”
အဲဒီ တော့ ဇာတ်လမ်းက ပိုရှုပ်ကုန်တယ်။ သူကြီး အချိန်မီ ရောက်လာခဲ့ပြီး မေးတော့မှ ဖွတ်ကလိရာမ ဆိုတာ စိန်ပေါက် ပြောတာတွေကို သာဝက နားစွန်နားဖျား ကြားပြီး ထင်ရာမြင်ရာ လျှောက်အော် နေတာလို့ သိလိုက်ရတယ်။
“ကဲ … စိန်ပေါက် ခေါ်ချေစမ်းကွာ” ဆိုတော့ ဇော်ထွီးနဲ့ အောင်ဘုတို့ သုသာန်ကျောင်းဘက် ပြေးရပြန်တယ်။
စိန်ပေါက် ရောက်လာတော့မှပဲ ဖွတ်ကလိရာမ ဆိုတာ အင်ဒူစမြား ယောက်ဖ ကိုရာမ မဟုတ်ဘဲ နိုင်ငံရေးသိပ္ပံ ပါရဂူကြီး ဖရန်စစ် ဖူကာယားမား ဆိုတဲ့ ပုဂ္ဂိုလ်ကြီးလို့ သိလိုက်ရတာ ။ အံမာ အဲဒီ ဧရာမကြီးက တယ်စွမ်းသတဲ့။ သူကြီးလည်း အံ့ဩလွန်းလို့ မျက်လုံးကြီး ပြူးကြည့်နေလိုက်တယ်။
စိန်ပေါက် တစ်ခေါက် လာလိုက်တာနဲ့ မကြားဖူးတာ တစ်ခါ ထပ်ကြားရ၊ တစ်ခါ ဗဟုသုတ တိုးရ ဆိုတော့ သူကြီး စဉ်းစားတယ်။ စိန်ပေါက်ကို ဥပုသ်ကျောင်းသာမက ရွာထဲမှာ အလှူအတန်း ရှိရင်လည်း လာဖို့ ဖိတ်ထားရ ကောင်းမလားပေါ့။ တစ်ချိန်တည်းမှာပဲ ဇော်ထွီးနဲ့ အောင်ဘုတို့ကလည်း စိန်ပေါက်ဆီ တပည့်ခံထားရင် နောင်အခါ အခုထက်ပိုပြီး လူရာဝင်မလား စဉ်းစားကြသတဲ့။ ဇော်ထွီးက မောင်တင့်နဲ့အတူ မြို့ကျောင်းမှာ ခုနှစ်တန်းလောက်အထိ ဒွတ်ဒက် ရွှတ်ယှက် လုပ်ခဲ့ဖူးသေး မဟုတ်လား။
ဒီလိုနဲ့ မောင်တင့်၊ ဇော်ထွီးနဲ့ အောင်ဘုတို့ သုံးယောက်ဟာ ပညာရှိ စိန်ပေါက်ဆီမှာ တပည့်ခံဖို့ အခွင့်အရေး ရသွားတယ်။ ဥပုသ်နေ့တို့၊ အလှူအတန်း ရွာထဲမှာ လုပ်တဲ့နေ့တို့ဆို သူတို့သုံးယောက်က စိန်ပေါက်ကြီး အနားကကို မခွာတော့ဘူးတဲ့။ တောက်တဲ့ကပ် ကပ်ပြီး စိန်ပေါက် ပြောသမျှ လိုက်မှတ်နေတော့တာ။ တချို့နေ့များဆို သုသာန်ကျောင်းပဲ သွားနေတော့တာ။ စိန်ပေါက် ရောက်မလာနိုင်တဲ့ ဥပုသ်နေ့တွေကျတော့ ဥပုသ်ကျောင်းမှာ သူတို့သုံးယောက်က တော်တော်စွာ ဆိုပဲ။ ဒွတ်ဒက် ရွှတ်ယှက်နဲ့ ပြောနေလိုက်တာများ စမ္ပာနဂိုရ် တစ်ရွာလုံးက ငေးကြည့် နေရတာတဲ့။
တလောကတော့ ဥပုသ်ကျောင်းကို စိန်ပေါက် ရောက်မလာနိုင်တဲ့ နေ့တစ်နေ့မှာ ဇော်ထွီးတို့ သုံးယောက် သံလွင်ပင် လက်လီလက္ကား စပ်ရောင်းတဲ့ ဖရိုင်းမင်း အကြောင်း ပြောတာ တော်တော် နားထောင် ကောင်းသတဲ့။ ဖရိုင်းမင်း ဆိုလို့ ဇော်ထွီးက သူ့လူတွေကို …
“မင်းတို့က ဖရိုင်းမင်း … ဖရိုင်းမင်း ဆိုပြီး လူတွေ နားရှုပ်အောင် မပြောပါနဲ့ကွာ” လို့ ပြောသတဲ့။
မောင်တင့်က “ဒါဆို ဖရိုင်းမင်းကို ဘယ်လို ပြောမလဲ” ဆိုတော့ …
ဇော်ထွီးက “ဖရိုင်းဒ် ဆိုတာ ကြော်တာလေကွာ … ဖရိုင်းဒ်မင်း ဆိုတော့ အကြော်ကြော်တဲ့သူ … အကြော်သည်ပေါ့” လို့ ပြောလိုက်တယ်။
ဒါကို အားကျတဲ့ မျက်လုံးတွေနဲ့ ငေးကြည့်နေတဲ့ ဟန်ရွှေနဲ့ ထွန်းအံ့က “ဇော်ထွီးတော့ တော်တော်တောင် တတ်နေမှပဲ” ဆိုပြီး အထင်ကြီး လေးစားတဲ့မျက်လုံးတွေနဲ့ ပြူးကြည့် နေခဲ့သတဲ့။ အဲဒီနေ့က စိန်ပေါက် ရောက်မလာခဲ့ပေမယ့် စမ္ပာနဂိုရ် ရွာသားတွေ ကောင်းကောင်းကြီး ဗဟုသုတ ရသွားကြတယ်လေ။
* * *
“ပြားသွားပြီ … အကုန်လုံး ပြားသွားပြီ”
သင်္ချိုင်းကုန်း ဘက်ကနေ ရွာထဲ အော်ပြေးလာတဲ့ သာဝကို ဟန်ရွှေနဲ့ ထွန်းအံ့က ဆီးဖမ်းလိုက်ပြီး သူကြီး ဦးအောင်ဗလဆီ ခေါ်သွားတယ်။ အမှန်က သူကြီး စဉ်းစားနေတာ။ တစ်ခါတုန်းကလည်း သာဝက ပြိုသွားပြီလို့ အော်ခဲ့ဖူးတယ်။ ဒါပေမယ့် ဆွမ်းစားကျောင်း မဟုတ်ခဲ့ဘူး။ ဘာလင်တံတိုင်းတဲ့။ ဒီတစ်ခါတော့ ပြားသွားပြီတဲ့။ ပြားသွားနိုင်တာလည်း ဒီရွာမှာ ဦးပဉ္ဇင်းလေးရဲ့ ဆွမ်းစားကျောင်းပဲ ဖြစ်ရမယ်။ သာဝ ရောက်လာတော့ ငိုသံပါကြီးနဲ့ ပြောတော့တယ်။
“သူကြီးရေ … ဒီတစ်ခါ ပြားသွားတာလည်း ဆွမ်းစားကျောင်း မဟုတ်ဘူးဗျ … ဒီတစ်ခါ ပြားသွားတာကတော့ ကမ္ဘာကြီးဗျ”
ကမ္ဘာကြီး လုံးနေတယ်လို့ တစ်သက်လုံး သင်ကြား မှတ်သားခဲ့တဲ့ သူကြီးက ဘယ်လက်ခံနိုင်ပါ့မလဲ။ ဟန်ရွှေနဲ့ ထွန်းအံ့ကလည်း လက်မလျှော့ဘူး။ သာဝကလည်း ဒီတစ်ခါ မခံဘူး။
“ကမ္ဘာကြီးဟာ ရိုက်ချက် ၁၀ ချက်ကြောင့် ပြားသွားတာပါ” လို့ သာဝက ဆက်ပြောနေတော့ သူကြီးက လုံးဝ လက်မခံဘူး။
“နင့်မေကလွှားတဲ့မှပဲ … တစ်သက်လုံး လုံးနေတဲ့ ကမ္ဘာကြီးဟာ ဆယ်ချက်မကလို့ အချက်တစ်ရာပဲ ရိုက်ရိုက် နံပြား မဟုတ်ဘဲ ဘာလို့ ပြားရမှာလဲ” ဆိုပြီး သာဝကို ဖြောင်းခနဲ နားရင်းအုပ်ပစ် လိုက်တယ်။ သာဝက သူ့နားထင်ကလေးသူ လက်ဝါးနဲ့ အသာအုပ်ရင်း …
“အံမယ်လေးဗျာ … ကျွန်တော်ပြောတာ မဟုတ်ပါဘူးဗျာ” နဲ့ ထုံးစံအတိုင်း လုပ်ပြန်တယ်။ ဒါဖြင့် ဘယ်သူပြောတာလဲ ဆိုတော့ …
“ဂျာနယ်လက်ပွေ့ ရောင်းတဲ့သူ …၊ နေပါဦး သူ့နာမည်က ရုတ်တရက် မေ့နေလို့၊ အဲဒီ လူက ၁၉၈၉ ခုနှစ်ကတည်းက ကမ္ဘာမှာ 'တံတိုင်းတွေ ပြို၊ ဝင်းဒိုးတွေ ပွင့်' ခဲ့တာတဲ့၊ အဲဒါ ပထမရိုက်ချက်တဲ့၊ ဪ ... ပြောတဲ့လူ သတိရပြီ။ ဂျာနယ် လက်ပွေ့ရောင်းတဲ့ ဖရိုင်းမင်းတဲ့”
အဲဒီလို ပြောတာကိုပဲ ငသောင်းရဲ့ ထန်းတဲကနေ ပြန်ရောက်လာတဲ့ မောင်တင့်၊ ဇော်ထွီးနဲ့ အောင်ဘုတို့က ကြားသွားတယ်။ ဖရိုင်းမင်း ဆိုတာ ဂျာနယ် လက်ပွေ့ရောင်းသူ မဟုတ်ဘဲ ဂျာနယ်လစ်တစ်ဦး ဖြစ်တဲ့အကြောင်း၊ သူ့ရဲ့နာမည်ကို တိုက်ရိုက် မြန်မာမှုပြုရင် “အကြော်သည်” လို့ အဓိပ္ပါယ်ရကြောင်း ဇော်ထွီးက ပြောတယ်။ အဲဒီမှာတင် စိန်ပေါက်ကို အရင် ဆရာတင်ခဲ့တဲ့ သာဝက သူ့နောက်မှ ဆရာတင်ခွင့်ရတဲ့ ဇော်ထွီးဟာ သူ့ထက်ကျော်ပြီး တတ်နေ သိနေရ ကောင်းလား ဆိုပြီး အကြီးအကျယ် “ဒီဘိတ်“ လုပ်တော့တယ်။ ဇော်ထွီးကတော့ ဖရိုင်းမင်းကို အကြော်သည်လို့ မြန်မာမှု ပြုလိုက်တဲ့အတွက် စမ္ပာနဂိုရ်မှာ (စိန်ပေါက်က လွဲရင်) သူ့လောက် တတ်တဲ့လူ တစ်ယောက်မှ မရှိတော့ဘူးဆိုတဲ့ မျက်နှာမျိုးနဲ့ အပေါ်စီးကလေ။
ကမ္ဘာကြီး ပြားသွားတယ် ဆိုတာကို ဘယ်လိုမှ လက်မခံနိုင်တော့ဘဲ သူကြီး ဦးအောင်ဗလကတော့ “နားပူ” မခံနိုင်တော့တဲ့ အဆုံး “သွားကြစမ်း … သွားကြစမ်း … သုသာန်ကျောင်း သွားကြစမ်းကွာ” လို့ သူ့တပည့်တွေကို မောင်းထုတ်လိုက်တော့တယ်။
နွေဦးရာသီရဲ့ တစ်ခုသောနေ့ရက်မှာ ဦးပဉ္ဇင်းလေး ဣန္ဒာဝဿရဲ့ ဆွမ်းစားကျောင်းဟာ တအိအိ ပြိုကျသွားခဲ့တယ်။ အဲဒီနေ့မှာ သာဝကလည်း ငယ်သံငယ်ရင်း ပါအောင် မအော်ခဲ့ဘူး။ တစ်ရွာလုံးလည်း အထိတ်အလန့် မဖြစ်ခဲ့ဘူး။ ဆွမ်းစားကျောင်းကတော့ မြေပေါ်မှာ အပုံလိုက် ပြိုကျ ပိပြားသွားခဲ့ပြီ။
ဘာတင်တံတိုင်း ပြိုသလောက် အုတ်အော်သောင်းတင်း မဖြစ်ခဲ့ဘူး။ ကမ္ဘာကြီး ပြားသွားသလောက် ထိတ်လန့်တကြား မရှိခဲ့ဘူး။ စမ္ပာနဂိုရ်ကို အင်မတန် သံယောဇဉ်ကြီးတဲ့ သူကြီး ဦးအောင်ဗလကတော့ အိုမင်းမစွမ်း ဖြစ်လာချိန်မှာ ကျောင်းကြီး ပြိုသွားခဲ့တာကို စိတ်လက်မချမ်းမသာ ဖြစ်ပြီး …
“မင်းတို့ လူငယ်တွေ ကြည့်လုပ်ကြစမ်းပါဦးကွာ …” လို့ စိန်ပေါက်၊ မောင်တင့်နဲ့ ဇော်ထွီးတို့ အဖွဲ့ကို လွှဲအပ်လိုက်တယ်။
ပြောရရင် အဲဒီလို လွှဲအပ်လိုက်တဲ့ အကြောင်းတွေ ရှိတယ်။
ဆွမ်းစားကျောင်း ပြိုကျမသွားခင် လေးငါးလကတည်းက စမ္ပာနဂိုရ်က ကာလသား တော်တော်များများဟာ သုသာန်ကျောင်းက ကပ္ပိယ စိန်ပေါက်ရဲ့ အန္တဝေါသိက တပည့်တွေ ဖြစ်သွားခဲ့သည်။ စမ္ပာနဂိုရ်ရဲ့ အစဉ်အဆက် တစ်ခါမှ မကြားခဲ့ဖူးတဲ့ စကားလုံးတွေကိုလည်း စမ္ပာနဂိုရ် ကာလသားတွေ ကိုယ်တိုင် လှိုင်လှိုင်ကြီး သုံးစွဲပြောဆို တတ်နေပြီ။ သူကြီး အောင်ဗလတို့လို လူကြီးပိုင်းက ကြားရတာ နားယားလှပါပြီ ဆိုတဲ့ သိုးဆောင်းလိုလို၊ ပါဠိလိုလို၊ ပေါရာဏလိုလို၊ မဂဓလိုလို ပဉ္စလက်ဆန်ဆန် စကားလုံးတွေကို သုံးစွဲပြောဆို နေကြပြီ။
ဒီတော့ သူကြီး အောင်ဗလက “လုပ်ကြည့်စမ်းလကွယ်” ဆိုတဲ့ သဘောနဲ့ “ကြည့်လုပ်စမ်းပါ” လို့ လွှဲအပ်လိုက်တာလေလား။
ဘာပဲဖြစ်ဖြစ် ကပ္ပိယ စိန်ပေါက်က သူကြီးပေးတဲ့ အာဏာနဲ့ စမ္ပာနဂိုရ် ရွာသားတွေကို ဆွမ်းစားကျောင်း နေရာမှာ လာရောက်စုရုံးဖို့ ဆင့်ခေါ်လိုက်တယ်။ မောင်တင့်၊ ဇော်ထွီးနဲ့ အောင်ဘုတို့က ရွာဖျား ရွာဆုံး လိုက်လံပြီး “ဗျိုးဟစ်” လိုက်တယ်။ ဟန်ရွှေနဲ့ ထွန်းအံ့က မောင်းတဒူဒူ ထုပေးတယ်။
ဆွမ်းစားကျောင်း ပြန်ဆောက်ဖို့ ကိစ္စအတွက် စုရုံးတာပဲလို့ သိနေကြတဲ့ စမ္ပာနဂိုရ် ရွာသားတွေက ပေါက်တူးတွေ၊ ဓားတွေ၊ တူရွင်းတွေ ကိုင်ဆွဲပြီး ဆွမ်းစားကျောင်းဘက် ရောက်လာကြတယ်။
လူတော်တော်စုံပြီ ဆိုတာနဲ့ ကပ္ပိယ စိန်ပေါက်က ပရိသတ်ရှေ့မှာ မတ်တတ်ရပ်ပြီး ချောင်းဟန့်လိုက်တယ်။ စမ္ပာနဂိုရ် ရွာသားတွေက ဘယ်သူ ဝါးခုတ်ရမလဲ၊ ဘယ်သူ ဓနိပျစ်ရမလဲ။ ဘယ်သူ တိုင်တွင်းတူးရမလဲ။ ဘာပဲဖြစ်ဖြစ် ကပ္ပိယ စိန်ပေါက် တာဝန် ပေးရင်တော့ တို့ဦးပဉ္ဇင်းလေးကျောင်း ပြန်ကောင်းဖို့ ကိစ္စ လုပ်ရတော့မှာပဲလို့ မျှော်လင့်နေခဲ့ကြသည်။ ဒါပေမယ့် …
“စမ္ပာနဂိုရ် ရွာသားတို့ … ဘာလင်တံတိုင်းကြီး ပြိုကျသွားခဲ့ပြီး နှစ်ပေါင်း နှစ်ဆယ်နီးပါး အကြာမှာ ကမ္ဘာကြီးဟာ ပြားသွားပြီ ဖြစ်တဲ့အတွက် ဦးပဉ္ဇင်းလေးရဲ့ ဆွမ်းစားကျောင်း ပြိုကျသွားခဲ့တာဟာ မဟာပြိုကွဲမှုကြီးလို့ မဆိုနိုင်ပါဘူး”
ကပ္ပိယ စိန်ပေါက်ရဲ့ နိဒါန်းစကား ကြားလိုက်ရတော့ စမ္ပာနဂိုရ် ရွာသားတွေက “မဟာပြိုကွဲမှုလို့ ဘယ်သူ ပြောလိုက်ပါလိမ့်” ဆိုပြီး ဇဝေဇဝါ ဖြစ်သွားခဲ့ကြတယ်။ ဒါပေမယ့် ကပ္ပိယ စိန်ပေါက်က အာပေါင်အာရင်း သန်သန်နဲ့ ဆက်ပြောနေတာကို နားထောင် ကောင်းကောင်းနဲ့ ဆက်ပြီး နားထောင်နေကြတယ်။
ဆွမ်းစားကျောင်း ပြိုသွားတာဟာ မဟာပြိုကွဲမှုကြီးလို့ မဆိုနိုင်ပေမယ့် စမ္ပာနဂိုရ် ရွာသားတွေ အဖို့တော့ “စိန်ခေါ်မှု” ဖြစ်ကြောင်း၊ ဒါကြောင့် ဆွမ်းစားကျောင်း ပြန်ဆောက်ဖို့ ကိစ္စအတွက် “တက်ကနိုလိုဂျီ” အသစ်၊ “နည်းဗျူဟာ” အသစ်တွေ ချမှတ်ဆောင်ရွက်ဖို့ လိုကြောင်း ဩဝါဒစကား စပြောတယ်။ သူ့စကားကို မောင်တင့်နဲ့ ဇော်ထွီးက ထောက်ခံတယ်။ ပြန်ဆောက်ဖို့ ကိစ္စကို အိုင်ဒီယော်လော်ဂျီသစ်နဲ့ “ဦးနှောက် မုန်တိုင်းဆင်” နိုင်ဖို့ လိုကြောင်း မောင်တင့်က ပြောလိုက်တယ်။ ဟုတ်တယ်၊ ဒီကိစ္စက “စပိ” မြန်မှ ဖြစ်မယ်လို့ ဇော်ထွီးက ပြောတယ်။ ဇော်ထွီးကို ကြည့်မရတဲ့ သာဝက ပရိသတ်ထဲကနေ ထပြီး “ဟေ့ … မင်းတို့ ယဉ်ယဉ်ကျေးကျေး ပြောကွာ” လို့ သတိပေးလိုက်တယ်။ အောင်ဘုက ကျောင်းကြီး ပြိုကျသွားတာဟာ “ကိစ္စကောင်း” မဟုတ်သလို၊ “ကိစ္စဆိုး” လည်း မဟုတ်ကြောင်း၊ ရွာသားအားလုံးက ပြန်လည် ပြုပြင် တည်ဆောက်ဖို့ “တိမ်းညွတ်မှု” ရှိတယ်ဆိုရင် စမ္ပာနဂိုရ်ရဲ့ “ပတိရူပ အနာဂတ်” ကို မုချတွေ့ရဖို့ သေချာလှတဲ့ အကြောင်း ပြောတယ်။ ဒါကို စိတ်မရှည်နိုင်တော့ဘဲ ငသောင်းက ထတဲ့ပြီး …
“ဟေ့ အောင်ဘု … မင်း သမူဟဖြစ်အောင် သင်္ခေပပြောကွာ … ငါတို့က ထန်းတဲက ဘိဇနက်ကို ဖျက်ပြီး လာရတာကွ … ဂလိုဘယ်ခေတ်မှာ နောလိတ်ကို ရှဲလုပ်တယ်ဆိုတာ အက်ပိဖနီဖြစ်ဖို့ လိုသလို … လိုတိုရှင်း ဖြစ်ဖို့လည်း လိုသကွ …. လိုတိုရှင်း စာအုပ်တွေ ရှာဖတ်ကွာ”
အောင်ဘု ရုတ်တရက် ကြောင်ပြီး မတုံ့ပြန်နိုင်သေးခင်း ထွန်းအံ့က ဝင်ထိန်းလိုက်တယ်။
“မလောကြပါနဲ့ကွာ … ဒီကိစ္စဟာ ဒိုင်မင်းရှင်းစုံမှ ဂလိုဘယ်ဆပ်ပလိုင်းချိန်းထဲက ကီးပလေယာတွေဟာ ပရောဂျက် အောင်မြင်ဖို့အတွက် မဟာတိမ်းညွှတ်မှုနဲ့ ဦးနှောက်ကို ဆွရမှာ မဟုတ်လား”
“ဆွမှာဖြင့် မြန်မြန်ဆွကွာ … ငါ့လယ်ထဲမှာတော့ ကောက်ဆွတို့၊ ထွန်ခြစ်တို့ အစုံရှိတယ်။ ဘယ်သူ့ခေါင်း ဘယ်လောက်ရှုပ်ရှုပ် ငါ့ကောက်ဆွနဲ့ ဆွလို့ဖြစ်ရင် လာယူ”
ဒူးကြီးက ဘုမသိ ဘမသိ ဝင်ပြောတော့ “ဒီကောင် ခြောက်ပေါက်ထဲ ရောက်တော့မှာပဲ” လို့ တချို့က စိုးရိမ်သွားတယ်။ ဒါပေမယ့် ထွန်းအံ့ ကိုယ်တိုင်လည်း သူ့စကားသူ နားလည်ပုံမရသေးဘူး။
ဒီလို …. နဲ့။
တူရွင်း၊ ဓား၊ ပေါက်တူး စတဲ့ ရရာလက်နက်ကိရိယာတွေ ကိုင်ဆွဲလာတဲ့ စမ္ပာနဂိုရ် ရွာသားတွေဟာ တစ်နေ့တစ်နေ့ “တောက်ပြောင်” ၊ “ခမ်းနား”၊ “ဆန်းပြား”၊ “ကြီးကျယ်” တဲ့ ဧရာမ စကားလုံးကြီးတွေကို နားထောင်ရင်း အားအင်တွေ ကုန်ခန်းလာခဲ့တယ်။ ညနေ နေဝင်ရီတရော ဆိုရင် မူးမူးဝေဝေနဲ့ အိမ်ပြန်လာခဲ့တယ်။ နေ့တွေ ရက်တွေ ကုန်လွန်ခဲ့ပေမယ့်လည်း ဝါးတစ်လုံး မခုတ်ရသေးဘူး။ ဓနိတစ်ရွက် မပျစ်ရသေးဘူး။ တိုင်းတွင်းတစ်တွင်း မတူးရသေးဘူး။ နှီးတစ်စိတ် မဖြာရသေးဘူး။ တစ်နေ့ထက်တစ်နေ့ သူတို့အသက်တွေ ကြီးရင့်လာခဲ့ပေမယ့် ဆွမ်းစားကျောင်း ပြန်ဆောက်ဖို့ အလုပ်မစနိုင်သေးဘူး။
“စကားလုံး” တွေနဲ့ ဆောက်လို့ ရနိုင်မှတော့ ဦးပဉ္ဇင်းလေးရဲ့ ဆွမ်းစားကျောင်းဟာ ဝေဇယန္တာ နန်းပြသာဒ်လောက် ဖြစ်ရောပေါ့။ ခုလို အပြားလိုက်ကြီး ပုံပြီး ဘယ်ဇာတ်မျော နေတော့မလဲ။
မောင်ရင့်မာ (ကျောင်းကုန်း)
ရွှေအမြုတေ၊ မတ်၊ ၂၀၀၇။
No comments:
Post a Comment