" ကြယ်တာရာ "
==========
#မင်းလူ
သူသည် ပြိုင်မြင်းပျိုလေးတစ်ကောင်လို ကဆုန်ပေါက်ပြီး ပြေးလာတတ်သည်။ သူ့ရင်ဘတ်က နိမ့်ချည်မြင့်ချည် ဖြစ်နေ၏။ ထို့နောက် သူသိချင်နေတာတွေကို တရစပ်မေးလေတော့သည်။ မေးခွန်းဆိုသော်လည်း အများစုမှာ အဖြေ တွဲလျက်ပါပြီးသားဖြစ်၏။ "ဒီကိစ္စနဲ့ ပတ်သက်ပြီး ဒီလိုထင်တယ်၊ ဟုတ်သလား"ဆိုတာမျိုး။ ကျွန်တော်က ဟုတ်ပါတယ်ဟု အတည်ပြုပေးရုံသာရှိ၏။ ထိုအခါ ကျေနပ်သွားဟန်ဖြင့် ပြုံးစေ့စေ့လုပ်ပြီး လှစ်ခနဲ ပြေးထွက်သွားသည်။ တစ်ခါတလေ သူပြောသည်ကို သဘောမတူလို့ ငြင်းချက်ထုတ်မိသောအခါ စိတ်ကောက်သွားသော ကလေးငယ်တစ်ယောက်လို မှုန်တေတေ ပေစောင်းစောင်း ကြည့်နေပြီးမှ ချာခနဲလှည့်ထွက်သွားတတ်သည်။
တချို့မေးခွန်းတွေကျတော့ တစ်ခါမှ မကြားဖူးသော ထူးထူးဆန်းဆန်းတွေ။ ကြောင်တောင်တောင် နိုင်တယ်လို့လည်း ပြောနိုင်သည်။ ပေါက်ပေါက်ရှာရှာ ကတ်သီးကတ်သတ် လျှောက်တွေးလေ့ရှိသော ကျွန်တော့်လိုကောင်မျိုးတောင် မစဉ်းစားမိသော ကိစ္စတွေ။ ထို့ကြောင့် ချက်ချင်းမဖြေနိုင်သေးဘူးဆိုပြီး နောက်ရက်ကို ချိန်းရသည်။ သူမေးထားတာကို စေ့စေ့စပ်စပ် သုံးသပ်ကြည့်လိုက်တော့ ကျွန်တော်ကိုယ်တိုင်လည်း သိချင်နေသော မေးခွန်းမျိုးဖြစ်နေကြောင်း တွေ့ရှိလာရတတ် ပြန်လေသည်။ နောက်တစ်နေ့ကျတော့ ကျွန်တော်ဥာဏ်မီသလောက် အဖြေထုတ်ပေးလိုက် သည်။ သူ သိပ်ကျေနပ်ပုံမရ။ ဒါဖြင့် ခင်ဗျားကကော ဘယ်လိုထင်လို့လဲဟု ပြန်မေးတော့ သူ့အမြင်ကို ပြောသည်။ သူ့ဟာသူလည်း သိပ်ဘ၀င်ကျဟန်မတူ။
တစ်ခါတရံမှာတော့ အဖြေချင်းဆန့်ကျင်ဘက်ဖြစ်ပြီး ညှိလို့မရသည့်ရက်ပေါင်းများစွာ မျောနေတတ်ပြန်သည်။ မေ့သလောက်ရှိတော့မှ အလစ်အငိုက်မှာ ရုတ်တရက်ပေါ်လာပြီး သူ စဉ်းစားထားသော အဖြေကို ပြောပြသည်။ ကျွန်တော် ပြန်မငြင်းနိုင်ခင်မှာပင် အနိုင်နှင့်ပိုင်းပြီး လှစ်ခနဲ ထွက်ပြေးသွားလေသည်။
*****
ထို့နောက် လပေါင်းအတော်ကြာအောင် သူနှင့် မတွေ့ဖြစ်ဘဲရှိခဲ့သည်။ နောက်တော့ သူ စာတွေ ပြန်ရေးနေကြောင်း သိရ၏။ အရင်ကလောင်အမည် (ရွှေဘုန်းလူ) မဟုတ်တော့။ ‘တာရာမင်းဝေ’ ဖြစ်သွားပြီ။ တစ်ရက်မှာ (မူလ)သရဖူမဂ္ဂဇင်းကို ဦးစီးတည်းဖြတ်နေသော ဆရာမောင်မြင့်မြတ်နှင့် ဆုံသည်။ ဆရာက မေးသည်။
"တာရာမင်းဝေဆိုတာ သိလား"
"သိတာပေါ့ အစ်ကိုရ၊ ပေကတ်ကတ်နဲ့လေ"
"အံမယ်၊ မင်းကပဲ ပြောရတယ်ရှိသေး"
"ဒီကောင်က ပိုဆိုးတယ်ဗျ"
"အေးလေ ငါတို့ ငယ်ငယ်ကလည်း ဒီလိုပါပဲ။ ဒါနဲ့ သူ့စာတွေ မင်းဖတ်ဖူးသလား"
"ကဗျာတွေတော့ ဖတ်ဖူးတယ်"
"ဒီကောင် တော်တယ်ကွ၊ သူ့ကို ငါ ဖြစ်အောင်တင်မယ်"
ချွန်ချွန်ထက်ထက် ကလောင်သစ်တစ်ချောင်းကို တွေ့လိုက်ရသောအခါ ၀မ်းသာအားရ ဖြစ်သွား တတ်သော အယ်ဒီတာတစ်ယောက်လေသံဖြင့် ပြောသည်။ ဆရာမောင်မြင့်မြတ်ဆိုတာ မြန်မာ စာပေလောကတွင် အအောင်မြင်ဆုံး နံပါတ်တစ်ဖြစ်ခဲ့သော ရှုမ၀မဂ္ဂဇင်းကြီးကို တာဝန်ခံအယ်ဒီတာအဖြစ် နှစ်ပေါင်းများစွာ ကိုင်တွယ်လာခဲ့သူဖြစ်၏။ သူစင်တင်ပေးခဲ့၍ နာမည်ကြီး စာရေးဆရာဖြစ်လာသူတွေ အမြောက်အမြားရှိသည်။ ကျွန်တော်တို့တုန်းကဆိုလျှင် ‘မဆိုးဘူး’ဟု မှတ်ချက်ပေးခံရတာလောက်ကိုပင် စာပေဆုရသလောက် ၀မ်းသာကျေနပ်ခဲ့ရတာ။ ဆရာ့နှုတ်က ‘တော်တယ်’ဟု ထုတ်ပြောခံရခြင်းမှာ နှယ်နှယ်ရရ မဟုတ်။
မကြာခင်မှာပင် သရဖူ၊ စာပေဂျာနယ် အပါအ၀င် မဂ္ဂဇင်းများတွင် သူ့ဝတ္ထု၊ ကဗျာ၊ အက်ဆေးတွေ ဆက်တိုက်ပါဝင်လာသည်။ ‘အာလူးစားသူများ’ ၀တ္ထုတိုဖြင့် ‘ဖြူးမိတ်ဆွေများ စာကြည့်အသင်း’၏ စာပေဆုကို ရရှိသည်။ ‘ပန်းခေတ်က လမင်း’ လုံးချင်းဝတ္ထု ထွက်လာသည်။ သူသည် တစ်နှစ်အတွင်းမှာပင် ထိပ်ဆုံးသို့ ထိုးထွက်လာသည်။ စာပေနယ်ထဲမှာ အချိန်တိုတိုအတွင်း ခုလိုဖြစ်လာဖို့မလွယ်လှ။ အထူးသဖြင့် အနုပညာအပိုင်းမှာရော ဈေးကွက်အရပါ တစ်ပြိုင်တည်း အောင်မြင်ဖြစ်ထွန်းဖို့ အလွန်ခက်သည်။
ဒါမျိုးက စိုးရိမ်စရာလည်းကောင်းသည်။ အနုပညာလောကမှာ ရုတ်တရက် ‘ဟုန်းခနဲ’ ထတောက်ပြီး သိပ်မကြာခင်မှာ ‘ဟုတ်ခနဲ’ ပြန်ငြိမ်းသွားတာမျိုး ဖြစ်တတ်၏။ မီးငြိမ်းပုံ အမျိုးမျိုးရှိသည်။ ဖယောင်းတိုင်မီးကို မှုတ်လိုက်သလို ချက်ချင်းငြိမ်းသွားတာ၊ ဖွဲမီးလို တငွေ့ငွေ့ တဖြည်းဖြည်း ငြိမ်းသွားတာ။ သူကတော့ ဓာတ်ငွေ့အိုး ပေါက်ကွဲသလို ‘၀ုန်းခနဲ’ ငြိမ်းသွားခြင်းသာ ဖြစ်လေ၏။
*****
နှုတ်ခမ်းကို တင်းတင်းစေ့ပြီး ပြုံးတုံးတုံး လုပ်နေပြီဆိုလျှင် သူလိုချင်တာ တစ်ခုခုရရှိထားလို့ ဖြစ်ကြောင်း သိနိုင်သည်။ တစ်ရက်မှာတော့ သူသည် ကျွန်တော့ဆီသို့ ထိုအပြုံးမျိုးနှင့် ရောက်ရှိလာ၏။ တစ်ယောက်တည်းမဟုတ်။ ကောင်မလေး တစ်ယောက်လည်း ပါလာသည်။ ကောင်မလေးက ဖြူဖြူ၊ သွယ်သွယ်၊ ချောချောလေး။ မျက်နှာက ကြောင်ပေါက်စလေးနှင့် တူသည်။ အသံကလည်း ကြောင်လေးတစ်ကောင် လိုပါပဲ။
တာရာမင်းဝေက-
"သူက မနော်ဟရီတဲ့၊ ဟင်းဟင်း"
ဟု မပွင့်တပွင့်ရယ်ရင်း မိတ်ဆက်ပေးသည်။ (သူ့ရယ်သံက ထူးခြားသည်။ ‘ဟဲဟဲ’ ဟု အသံမထွက်ဘဲ ‘ဟင်းဟင်း’ ဟု မြည်တတ်၏။)
ထို့နောက် ကောင်မလေး၏ အိတ်ကို ပိုင်စိုးပိုင်နင်း လှမ်းယူလိုက်ပြီး မှတ်စုစာအုပ်လေးတစ်အုပ်ကို ဆွဲထုတ်သည်။ ကျွန်တော့်ကို ကမ်းပေးပြီး-
"တစ်ခုခု ရေးပေးလိုက်ပါ"
ဟု ပြောသည်။ အော်တိုစာအုပ်ထဲမှာ သူများတွေ ရေးထားတာ လျှောက်လှန်ဖတ်ကြည့်သည်။တစ်နေရာတွင် ကဗျာတိုလေးတစ်ပုဒ်ရေးပြီး အောက်မှာ တာရာမင်းဝေ ဟု လက်မှတ်ထိုးထားတာ တွေ့ရ၏။ ဘေးမှာ စာတစ်မျက်နှာ လွတ်နေသည်။ ကျွန်တော်က တစ်ဖက်စာမျက်နှာဆီ မြားထိုးညွှန်ပြပြီး ‘အဲဒီအတိုင်းပဲ’ဟု ရေးပေးလိုက်သည်။ကာယကံရှင်ဖြစ်သော မနော်ဟရီက ဖတ်ကြည့်ပြီး ရယ်မောနေပါလျက် သူကတော့ နှုတ်ခမ်းစူလိုက်ပြီး-
"ကောင်းကောင်းလည်း ရေးမပေးဘူး" ဟု မကျေမနပ်လေသံဖြင့် ပြောလေ၏။
နောက်လအနည်းငယ် ကြာသောအခါ သူတို့နှစ်ယောက် ရောက်လာပြန်သည်။ မင်္ဂလာဆောင်ဖိတ်စာ လာပေးခြင်းဖြစ်၏။ "ဖိတ်စာထဲမှာ မင်္ဂလာဆောင် ကျင်းပမယ့် အိမ်လိပ်စာမြေပုံ အညွှန်းပါတယ်"ဆိုသဖြင့် အသေးစိတ် မမေးတော့ဘဲ အမှတ်တမဲ့ နေလိုက်မိသည်။ မင်္ဂလာဆောင်နေ့ရောက်၍ လိပ်စာကိုကြည့်တော့ ဘုရင့်နောင်(လမ်းသွယ်ဆိုလား၊ (၁)လမ်းဆိုလား မမှတ်မိတော့)ဟု ရေးထားသည်။ မြေပုံအညွှန်းကို ကြည့်တော့လည်း ပြည့်ပြည့်စုံစုံမပါ။ ထုံးစံအတိုင်း ရန်ကုန်ဘက်မှလာသော လမ်းကြောင်း(တောင်မှမြောက်သို့) ပြမထားဘဲ မြောက်မှတောင်သို့သာ ဦးစားပေးဆွဲထားသည်။ ဘယ်လိုစိတ်ကူးလဲတော့မသိ။ ဘယ်လိုင်းကို စီးပြီး ဘယ်မှတ်တိုင်မှာ ဆင်းပါဆိုတာမျိုးလည်း မပါ။
ကျွန်တော်လည်း ကိုယ့်စိတ်ကူးနှင့်ကိုယ်လမ်းကြောင်း ဆွဲရသည်။ ဈေးဆိုလျှင်တော့ အကြားအမြင်များမှာပဲ ဆိုပြီး ဘုရင့်နောင်ဈေးအထိ သွားလိုက်၏။ ဆိုင်တွေ၊ ဆိုက်ကားဆရာတွေ၊ ကားသမားတွေမေးကြည့်တော့ "ဘုရင့်နောင်လမ်းသွယ်တို့၊ ၁-လမ်းတို့ဆိုတာ တစ်ခါမှ မကြားဖူးပါ"ဟု ဆိုသည်။ "ချောင်းဝနားမှာ ထင်တယ်"ဟု မရေမရာပြောသည့်လူလည်း ရှိသည်။
ဘုရင့်နောင်လမ်းဆိုတာက အရှည်ကြီး။ လိပ်စာထဲမှာ သဲလွန်စတစ်ခုပဲ တွေ့သည်။ မရန်းကုန်းမြို့နယ်။
ထို့ကြောင့် ကျွမ်းကျင်နှံ့စပ်သူတစ်ဦးကို မေးမြန်ပြီး ဘုရင့်နောင်လမ်းကြီး၏ မရမ်းကုန်းအပိုင်းအတွင်းမှာ ရှာရသည်။
တောင်ဘက်ခြမ်းမှစပြီး မြောက်ဘက်သို့ ဘတ်စ်ကားစီးသည်။ နှစ်မှတ်တိုင်တစ်ခါလောက် ဆင်းပြီး စုံစမ်းသည်။ ဘုရင့်နောင်လမ်းနှင့် ထိစပ်နေသော မရမ်းကုန်းမြို့နယ်အပိုင်းက သိပ်မရှည်၍ တော်တော့သည်။ ဒါတောင် ဟိုလျှောက် ဒီလျှောက်မေးရတာနှင့် လူက အတော်ထိနေပြီ။ ဘယ်မှာမှလည်း စုံစမ်းလို့မရ။ နောက်ဆုံးတော့ ဘုရင့်နောင်တံတားထိပ်နားရှိ အငှားယာဉ်ဂိတ်တစ်ခုမှ လည်လည်ဝယ်ဝယ်ရှိပုံရသော ကားဆရာ တစ်ယောက်ကို အကူအညီတောင်းရသည်။
"ဒီလိပ်စာကို ရအောင် ရှာပြီး ပို့ပေးပါ။ ကျသလောက် ပေးပါ့မယ်"
ကားဆရာက- "ကျွန်တော် ဒီလမ်းကြောမှာ ဆွဲနေတာ ကြာပါပြီဗျာ၊ ခင်ဗျားလိပ်စာက အမှားကြီးထင်ပါတယ်"
"မမှားပါဘူးဗျ၊ ဒီမှာ လမ်းညွှန်မြေပုံတောင် ပါသေးတာပဲ"
"ဟင်း၊ မြေပုံကလည်း ဘာသဘောနဲ့ ဒီလိုဆွဲထားမှန်း မသိဘူး။ သူ့အိမ်ကို ရှာဖို့ထက် သူ့အိမ်ကနေ အပြင်ကို ပြန်ထွက်ဖို့ လမ်းညွှန်ထားသလို ဖြစ်နေတယ်"
ဟု ပြောရင်း ဖိတ်စာပေါ်က နာမည်ကို တွေ့သွားတော့မှ-
"သြော် … တာရာမင်းဝေရဲ့ မင်္ဂလာဆောင်လား၊ ဒါကြောင့်ကိုး" ဟု မှတ်ချက်ပေးရင်း ရယ်မောနေလေ၏။
မင်္ဂလာဆောင်ကို မရောက်ရောက်အောင် သွားမယ်ဆိုသော စိတ်ကူးကို လက်လျှော့လိုက်ရသည်။မင်္ဂလာအချိန်က ညနေပိုင်း။ အခု နေတောင် ၀င်စပြုပြီ။ လူကလည်း တော်တော်ပင်ပန်းနေပြီ။ တကယ်တော့ သူတို့ညွှန်းသည့် ဘုရင့်နောင်လမ်း ဆိုတာက မြောက်ဥက္ကလာအစပ်နားမှာ။ ကျွန်တော် သွားရှာသည့်နေရာနှင့်ဆို အရှေ့နှင့်အနောက် တခြားစီပဲ။ ဘုရင့်နောင်ဆိုတာကလည်း လူကသာ တစ်ယောက်တည်း၊ လမ်းတွေက အများသားကလား။ (နောက်မှ သိရတာက ကျွန်တော့်လိုပဲ အိမ်လိပ်စာ ရှာမတွေ့တဲ့သူ လေး၊ ငါး၊ ဆယ်ယောက်လောက် ရှိသတဲ့။)
*****
"တာရာမင်းဝေက ဆောင့်ကြွားကြွားနိုင်တယ်" ဟု တချို့က ပြောသည်။
အင်း..ဟုတ်သင့်သလောက်လည်း ဟုတ်တာပဲဟု ၀န်ခံရမည်။ ကျွန်တော်တို့ အချင်းချင်းကြားမှာတောင် "ခုတလော ရွှေဘုန်းတစ်ကောင် ကြွစောင်းစောင်း ဖြစ်နေတယ်။ ကြည့်ပြောထားဦး"ဟု တစ်ခါတစ်ခါ သတိပေးခံရတတ်သည်။ ထိုအခါမျိုးတွင် ကျွန်တော်က "မန်ယူဘောလုံးအသင်းက ရွန်နီတို့၊ စီရော်နယ်ဒိုတို့ လိုပေါ့ဗျာ"ဟု ကာပြောပြောပေးရ၏။
သူကလည်း သူပဲ။ ၀တ္ထုတွေ၊ ကဗျာတွေသာမက စာပေသဘောတရားဆောင်းပါးတွေလည်း ရေးသည်။ ဝေဖန်ရေးလည်းလုပ်သည်။ သဘောထား မတိုက်ဆိုင်သူတွေနှင့်ပဲ တိုက်ပွဲဆင်သည်။ သူက အငြင်းလည်း သန်သည်။ သူတို့၏မော်ဒန်၊ ပို့စ်မော်ဒန်ဆိုတာတွေကလည်း တစ်ယောက်တည်းနှင့် တောင် ကိုယ့်ဘာသာကိုယ် ပြန်ငြင်းရတတ်တာ မျိုးပဲကိုး။
"သူသဘောကျတဲ့စာရင်းထဲမှာပါတယ်"ဆိုသော ကျွန်တော့်ကိုတောင် အလွန်ပေးသည်မဟုတ်။ ကျွန်တော့်ဝတ္ထုတွေထဲက သူမကြိုက်သည့် အချက်တွေကို ထောက်ပြပြီး ဒီလိုမရေးသင့်ဘူး၊ ဟိုလိုရေးရမှာ" စသဖြင့် ဝေဖန်ရင်း ဆရာလုပ်ချင်သေးသည်။ ထိုအခါ -
"ခင်ဗျားကတော့ အတတ်ကြူးနေပြီ" ဟု ကျွန်တော်က သာသာနှင့်နာနာပြန်နှက်ရသည်။ (ခုလို စေ့စေ့စပ်စပ် ဖတ်တယ်ဆိုကတည်းက ကျွန်တော့်စာတွေ အပေါ်မှာ သူ အလေးအနက် ထားကြောင်းတော့ သိသာပါသည်)
သူ့စာဖတ်အားကလည်း လန့်စရာတောင် ကောင်းသည်။ တချို့တွေလို ကိုယ်သန်ရာသန်ရာ ရွေးဖတ်တာမျိုးမဟုတ်။ အကြောင်းအရာမျိုးစုံ၊ ဘာသာရပ်ပေါင်းစုံကို မွှေနှောက်ဖတ်ထားခဲ့တာ။ တဲရော့ကတ်နှင့် ဗေဒင်ဟောနည်းစာအုပ်ကို အင်္ဂလိပ်ဘာသာဖြင့်ဖတ်ပြီး မြန်မာလို ပြန်ရှင်းပြနိုင်သည်။ အဂ္ဂိရတ်ကျမ်းတွေ၊ သိုက်စာပေါင်းချုပ် စာအုပ်တွေကော ဖတ်ခဲ့သေးသလား မသိ။ ကမ္ဘာနှင့်မြန်မာ့ ဂန္ထ၀င်စာကြီးပေကြီးတွေ ဘယ်လောက် လေ့လာ ဖတ်ရှုခဲ့ပြီးပြီလဲ။ မဟာလေးချိုးကြီးတွေ၊ ရတုတွေ၊ တေးထပ်တွေ ဘယ်နှစ်ပုဒ် အာဂုံဆောင်ထားခဲ့သလဲ။ သူမရှိတော့သဖြင့် သက်သေမပြနိုင်တော့ပါ။ တကယ်တော့ သူသည် ပို့စ်မော်ဒန်သမား သက်သက်မဟုတ်။ သူက ၀ါဒတစ်ခုခု၏ လောင်းရိပ်အောက်မှာ ခိုလှုံနေချင်သူ မဟုတ်။ ကိုယ်ပိုင်အတွေးအမြင်၊ အယူအဆတစ်ခုကို တည်ဆောက်လိုသူသာဖြစ်၏။ တစ်ခုခုကိုများ သူတွေ့သွားသေးသလား။ ဒါကြောင့်ပဲ သူ့ဝသီအတိုင်း အနိုင်နဲ့ပိုင်းပြီးထွက်သွားခဲ့တာလား။ ဒါမှမဟုတ်... သိုင်းဇာတ်လမ်းတွဲတွေ၊ စုံထောက်ဇာတ်ကားတွေ၊ စပိုင်ဝတ္ထုတွေထဲမှာ ကြားရ၊ ဖတ်ရလေ့ရှိသော စကားတစ်ခွန်းကို သွားသတိရမိ၏။
"မင်းသိတာ သိပ်များနေပြီ"
*****
ဇနီးမောင်နှံဆိုသည်မှာ သဘောထားချင်း အမြဲတမ်းတစ်ထပ်တည်းကျနေတာမဟုတ်။ နှစ်ယောက်စလုံးက ရုပ်ရည်ချောမောလှပကြ၍ စိတ်ချင်းလည်း အကြိုက်ညီကြလိမ့်မည်ပြောလို့မရ။ တစ်ချိန်မဟုတ်တစ်ချိန်တော့ ငြိစရာလေးတွေ ရှိကြမှာပဲ။ တစ်ခါမဟုတ် တစ်ခါတော့ သည်းညည်းမခံနိုင်ဘဲ ကတောက်ကဆတ်ဖြစ်ကြတာ ဓမ္မတာပါပဲ။ သူတို့လင်မယား စိတ်ကောက်ကြပြီဆိုလျှင် ကျွန်တော် တယ်လီဖုန်းအကြာကြီးပြောရလေ့ရှိ၏။ နှစ်ယောက်စလုံးအပေါ်မှာ သံယောဇဉ်ရှိသောကြောင့် ကျွန်တော် ဘယ်သူ့ကိုမှ ဘက်မလိုက်။ ချော့ချော့မော့မော့ ပြောလျှင်လည်း ရောင့်တက်တတ်ကြသဖြင့် -
"တစ်ယောက်ကလည်း မိန်းမကို အနိုင်ကျင့်တယ်၊ တစ်ယောက်ကလည်း စွာကျယ်ကျယ်နဲ့၊ နှစ်ယောက်စလုံး အချိုးကိုမပြေဘူး"
ဟု အရင်ဦးအောင် ငေါက်ပစ်လိုက်ရသည်။ တစ်ခါတစ်ခါတော့ စိတ်ပေါက်ပေါက်ရှိသဖြင့်-
"ဒီမှာ၊ ဒါဟာ တကယ့်လက်တွေ့ဘ၀ဗျ။ ၀တ္ထုရေးနေတာမဟုတ်ဘူး။ ကိုယ်ကြိုက်သလို ဇာတ်လမ်းဆင်၊ ကိုယ်လိုချင်သလို ဇာတ်ကွက်ချလို့ ရတာမဟုတ်ဘူး။ ၀တ္ထုရေးတဲ့အခါမှာတောင် တစ်ခါတလေကျရင် ဇာတ်ကောင်တွေက ကိုယ့်ကိုပြန်ပြီး အာခံတာမျိုး ကြုံရသေးတာပဲ"
ဟု ပြောမိ၏။
တကယ်တော့ ကံကြမ္မာဆိုတာ လောကမှာ အတော်ဆုံး ပို့စ်မော်ဒန်ဆရာကြီးတစ်ဆူဖြစ်ကြောင်း ကျွန်တော်တို့ မရိပ်မိခဲ့ကြ။ "ရှိမှုမသေချာခြင်း" အကြောင်းကို သူ့လောက်ကျွမ်းသည့်လူ ဘယ်မှာရှိပါ့မလဲ။
*****
မိုးတစိမ့်စိမ့်အေးနေသော ညဦးပိုင်းတစ်ခုမှာ တယ်လီဖုန်းလာသည်။ ငါတို့စာပေမှ စန်းမွန်အောင် ဆက်ခြင်းဖြစ်၏။
"ကိုရွှေဘုန်း ဆုံးပြီ"
သူ့အသံက တိမ်ဝင်နေသည်။ သူ့စကားကို သူ့ဘာသာလည်း စိတ်ချဟန်မတူ။ နောက်တစ်ကြိမ် ထပ်ပြောသည်။ ကျွန်တော် ရုတ်တရက် တုန်လှုပ်ချောက်ချားသွားတာ မှန်သော်လည်း တအံ့တသြ တော့မဖြစ်မိ။ ဒီအကြောင်းကို စောစောကတည်းက ကြိုတင်သိနှင့်ခဲ့ပြီးသားဟု ထင်နေမိတာ ထူးဆန်းသည်။ ပြီးမှ တစ်ခုသွားသတိရ၏။
လွန်ခဲ့သော ရက်အနည်းငယ်က တာရာမင်းဝေနှင့် ကျွန်တော် တယ်လီဖုန်းပြောဖြစ်သည်။ သူသည် ကျွန်တော်ပြောသမျှကို ခါတိုင်းလို စောဒကမတက်ဘဲ "ဟုတ်ကဲ့၊ ဟုတ်ကဲ့"ဟု ရိုသေလေးစားစွာတုံ့ပြန်သည်။ "ဒီကောင် ထူးထူးဆန်းဆန်း အတော် အပိုးကျိုး နေပါလား"ဟု ထင်မိသည်။ တစ်ပြိုင်နက်တည်းမှာပင် ခုပြောနေတာ သူမဟုတ်သလို တစ်မျိုးကြီး ခံစားရသည်။ အမှန်တော့ သူသည် ကျွန်တော့်ကို နောက်ဆုံးနှုတ်ဆက်စကား ပြောနေခဲ့ခြင်းပင် ဖြစ်လေသည်။ တယ်လီဖုန်း မြည်လာပြန်သည်။
"ကျွန်တော် အကြည်တော်ပါ"
ဟု တစ်ဖက်က ပြောသည်။ ကျွန်တော်က -
"ခင်ဗျားလည်း သိပြီးပြီပေါ့"
"ဟုတ်ကဲ့။ အဲဒါ ကျွန်တော် ဘာလုပ်ရမလဲ"
"ခင်ဗျားက အရင်ဦးအောင်မေးတော့ ကျွန်တော် ဘယ်လိုဖြေရမလဲ"
"ကျွန်တော် ဘာလုပ်လို့လုပ်ရမှန်းမသိဘူးအစ်ကို၊ ထိုင်ရမလို ထရမလို အိမ်မှာလည်း နေလို့မရဘူး။ ဒါကြောင့် လမ်းပေါ်မှာ လျှောက်သွားနေမိတယ်"
"ဘာ၊ ဒီလောက်မိုးအေးနေတဲ့အချိန် လမ်းပေါ်မှာ လျှောက်သွားနေတယ် ဟုတ်လား။ ကျုပ်တို့မှာ လူနည်းနေရတဲ့ကြားထဲ ခင်ဗျားပါ လိုက်သွားချင်သေးလို့လား"
ကျွန်တော် တစ်ယောက်ယောက်ကို တစ်ခုခုပြောချင်နေတုန်းမှာ သူ့ဖုန်းက ကွက်တိဝင်လာခြင်းဖြစ်၏။ သူကလည်း ဒါမျိုး အပြောခံချင်သောကြောင့် တမင်တကာ ဆက်ခြင်းဖြစ်လိမ့်မည်။ ထို့ကြောင့် -
"ဟုတ်ကဲ့၊ ကျွန်တော်အခုပဲ အိမ်ပြန်ပါတော့မယ် အစ်ကို" ဟု ပြန်ပြောသည်။
"ဒါနဲ့ ခင်ဗျားက အခုဘယ်ရောက်နေတာလဲ"
ဟု မေးလိုက်တော့-
"အစ်ကို့အိမ်ရှေ့မှာ"
ကျွန်တော်ဖုန်းချပြီး အိမ်ပေါ်မှဆင်းသည်။ ခြံဝင်းအ၀ကို သွားသည်။ မိုးမှုန်တွေကျဆင်းနေသောလမ်းပေါ်မှာ ရှင်းနေသည်။ လူတစ်ယောက်မျှမရှိ။ ခပ်လှမ်းလှမ်းကို ကြည့်လိုက်တော့ ဆိုက်ကားတစ်စင်းကို မြင်သည်။ ကျွန်တော့်ဘက်ကို ကျောပေးပြီး သွားနေသည်။ ခရီးသည်တစ်ယောက်ပါသည်။ အဲဒါ အကြည်တော်ပဲလား။ စောစောက ဖုန်းထဲမှာ သူပြောတာ တကယ်ပဲလား။ အစ်ကို့အိမ်ရှေ့မှာလို့ ပြောတာလား၊ အစ်ကို့အိမ်ရှေ့တောင် ရောက်ခဲ့သေးတယ်လို့ ပြောတာလား။ မသေချာ။ ကျိန်းသေတာ တစ်ခုကတော့ နောက်ထပ် လူဘယ်နှစ်ယောက်လောက်က ဘယ်နှစ်ခါလောက် ဖုန်းဆက်အကြောင်းကြားသည်ဖြစ်စေ အဖြေက ပြောင်းလဲမှာမဟုတ်။ ပြီးတော့ တာရာမင်းဝေဆိုတာကလည်း တစ်ခါထက်ပိုပြီး အသေခံမှာမဟုတ်။
*****
သူသည် လဲလျောင်းနေရင်းက နှုတ်ခမ်းကို တင်းတင်းစေ့ထားသည်။ တစ်ခုခုအလိုမကျလို့ နှုတ်ခမ်းစူထားတာလား။ သူလိုချင်တာကိုရလိုက်လို့ ပြုံးစေ့စေ့ လုပ်နေတာလား။ ဝေခွဲမရ။သူ့နောက်ဆုံးခရီးသည် စည်ကားလှသည်။ သူ့သူငယ်ချင်းတွေ၊ လုပ်ဖော်ကိုင်ဖက်တွေ၊ စာပေလောကသားတွေ၊ ပရိသတ်တွေ အစုံအလင်ရောက်ရှိလာကြသည်။ ဒီထဲမှာ မော်ဒန်၊ ပို့စ်မော်ဒန်သမားတွေလည်းပါသည်။ ဂန္ထ၀င်တွေ၊ ရှေးရိုးစွဲတွေ၊ သရုပ်မှန်တွေ၊ သရုပ်ဖော်တွေ၊ မတူကွဲပြားသော အရောင်အသွေးမျိုးစုံ ပါဝင်သည်။ သို့ရာတွင် ၀မ်းနည်းခြင်းဆိုသည်မှာ အယူဝါဒတစ်ခုမဟုတ်။ ကျွန်တော်ကတော့ ထိုမြင်ကွင်းကို ကမ္ဘာပေါ်မှာ ကြေကွဲစရာအကောင်းဆုံး၊ အလှပဆုံး၊ အနုပညာအမြောက်ဆုံး "ပါဖောမင့်"ပြကွက်တစ်ခုဟု ထင်မြင်နေမိလေသည်။
(ဒီစာကိုရေး၍ပြီးတော့ ညသန်းခေါင်ကျော်နေပြီ။ ကျွန်တော်သည် ပြတင်းပေါက်မှာသွားရပ်ပြီး ကောင်းကင်ကို မော့ကြည့်လိုက်သည်။ ဒီညကျမှ ကြယ်တွေကလည်း များလိုက်တာ။ တိတိကျကျ သိရှိပြီးဖြစ်ပါလျက် ခုနစ်စဉ်ကြယ်ကို တစ်လုံးချင်း ရေတွက်ကြည့်နေမိပြန်လေ၏။
မင်းလူ
(၈-၃-၂၀၀၈)
နိုဝင်ဘာလ ရွှေအမြုတေမဂ္ဂဇင်း ၂၀၁၄
No comments:
Post a Comment