အားရောအားကြရဲ့လား (ဝတ္ထုတို)
.....
"ကဲ ဒီကအစ်ကိုကြီး။ ပြန်ထွက်လို့ရပါပြီ" တာဝန်ကျ မီးသဂြိုဟ်လုပ်သားရဲ့ စကားအဆုံး
မီးတောက်တွေကြားက ကျုပ်သူငယ်ချင်းရဲ့
ရုပ်အလောင်းကိုကျောခိုင်းပြီး တံခါးပေါက်ကနေ
ပြန်ထွက်လာခဲ့တယ်။
ကျုပ်လေ ရင်ထဲမကောင်းလိုက်တာဗျာ။ဝမ်း
နည်းလွန်းလို့ ရှိုက်ကြီးတငင် ငိုချလိုက်ချင်ပေမယ့် မျက်ရည်တွေက မဆိုစလောက်လေးပဲ စိမ့်ထွက်လာတယ်။အခေါင်းတစ်ခုလုံးကို ရဲရဲတောက်နေတဲ့ မီးညွန့်တွေအပေါ် တုတ်ပိုင်းကြီး
နဲ့ ထိုးတင်လိုက်တာများ အေးခင်တို့သားအမိတွေမြင်ရင် ခံနိုင်ရည်တောင် ရှိနိုင်ပါ့မလားလို့
ကျုပ်တွေးမိတယ်။အင်းလေ ဒါကြောင့်မို့လည်း
သူတို့သားအမိတွေ ဝင်မကြည့်ကြတာတူပါရဲ့။
မီးရှို့တဲ့အခန်းထဲ ကွယ်လွန်သူရဲ့မိသားစုဝင်
တစ်ယောက်နှစ်ယောက်ဝင်ကြည့်ဖို့ခေါ်တော့
စိတ်မခိုင်လို့ဆိုပြီး သူတို့က ဝင်မကြည့်ကြဘူးလေ။သူငယ်ချင်းအရင်းကြီးဖြစ်တဲ့ ကျုပ်ကိုပဲ
ဝင်ကြည့်လိုက်ပါတဲ့။
သူငယ်ချင်း မျိုးမင်းရေ။ဟောဒီ
ရေဝေးသုဿန်ရဲ့ မီးတောက်တွေကြားထဲက
ပြာမှုန့်ကလေးတွေထဲမှာ မင်းရဲ့ခန္ဓာ နိဋ္ဌိတံသွားတော့မှာပေါ့။မင်းရဲ့မိန်းမနဲ့ မင်းရဲ့သမီးသုံးယောက်။ပြီးတော့ ကျုပ်။ပြီးတော့
ဟောဒီသတ္တလောကကြီးထဲမှာရှိနေတဲ့ သက်ရှိ
လူသားတွေအားလုံးဟာ တစ်နေ့နေ့တော့
မင်းနောက်ကို မုချမလွဲ လိုက်လာကြမှာပါ။
ဘယ်အချိန်၊ ဘယ်နေရာ၊ ဘယ်လိုပုံစံမျိုးနဲ့သာ
မသိသေးတာပါ။လိုက်လာရမှာတော့ ဧကန်ပဲလေ။
ရှိုက်ကြီးတငင် ငိုကျွေးနေတဲ့ အေးခင်တို့
သားအမိကိုကြည့်ပြီး ကျုပ်ဘယ်လိုနှစ်သိမ့်ရမလဲ လို့ တွေးကြည့်မိတယ်။ဒါပေမယ့် သေချာတာတစ်ခုက ကျုပ်ကိုယ်ကျုပ်တောင်
မနှစ်သိမ့်တတ်သေးဘူးလေ။
လက်ထဲမှာကိုင်ထားတဲ့ ယပ်တောင်ကလေးကိုငုံ့ကြည့်လိုက်တော့ မျက်ရည်တွေကြား
ကနေ ခပ်ဝါးဝါးတွေ့လိုက်တယ်။ ဦးမျိုးမင်း အသက်(၄၅)နှစ်တဲ့။ အဲဒါ ကျုပ်သူငယ်ချင်းကြီး
ပေါ့။ကျုပ်နဲ့ ဟိုး လေးငါးနှစ်သား အရွယ်ကတည်းက ပုခုံးဖက်ပြီးပေါင်းလာကြတဲ့ ငယ်သူ
ငယ်ချင်း အရင်းကြီးပေါ့ဗျာ။
သူဟာ တကယ်တော်တဲ့ လူတော်တစ်ယောက်ပါ။ဟိုးအရင်ခပ်ငယ်ငယ် ကျောင်းသား
ဘဝကတည်းက အချိန်ကို အကျိုးရှိရှိ အသုံးချ
တတ်ခဲ့တဲ့ လူတစ်ယောက်ပေါ့။ အပျော်အပါး
အလေအလွင့်စိတ်ဆိုတာ သူ့ဆီမှာ တစ်ခါမှ မတွေ့ခဲ့ဖူးဘူး။ ဘာမှလုပ်စရာမရှိရင်တောင် စာဖတ်နေတဲ့ လူစားမျိုး။ကျောင်းသားဘဝ တုန်း
ကပေါ့။
အသက်ကလေးရလာလို့ အိမ်ထောင်တွေ
ဘာတွေကျတော့လည်း ကြိုတင်အစီအစဉ်ချထားတဲ့ ရှေ့ဆက်လုပ်စရာတွေက သူ့ဆီမှာ
မနည်းမနော။အလုပ်နဲ့လက်နဲ့ကိုမပြတ်တာ။
"သူငယ်ချင်း မင်းကြည့်ရတာ ပင်ပန်းလိုက်တာ
ကွာ"
အဲဒီလို ကျုပ်ပြောတော့ သူဘာပြန်ပြောတယ်
ထင်သလဲ။
"အရွယ်ရှိတုန်း ကြိုးစားထားရမယ် သူငယ်ချင်း။
အခုချိန် အပင်ပန်းခံမှ နောင်တစ်ချိန် သက်သာ
မှာ။မင်းလည်း ကြားဖူးပါတယ်။ အရိပ်လိုချင်
နေပူထဲကစောင့် ဆိုတာလေ။ အသက်ကြီးမှ
နောင်တမရချင်ဘူးကွာ။"
သူပြောတာလည်း ဟုတ်သားဗျ။ဒါကြောင့် သူတို့
မိသားစု အဆင်ပြေပြေ နေနိုင်တာ။ကျုပ်ကဖြင့်
အဲလိုမဟုတ်ပေါင်။အခွင့်အရေးရရင် ရသလို
အပျော်အပါးက ခပ်များများရယ်။ အနာဂါတ်
အစီအစဉ်ဆိုတာလည်း ကျုပ်ဆီမှာ လုံးဝ မရှိခဲ့
ဖူးဘူး။ဒါကြောင့်မို့ထင်ပါရဲ့။ဆင်းရဲတဲ့မိသားစုတွေဆီက ကြီးပြင်းလာကြသူချင်းအတူတူ
သူကပဲ တဟုန်ထိုး တိုးတက်သွားတယ်။ကျုပ်မှာ
ဖြင့် နည်းနည်းချင်းပဲ စုဆောင်းနိုင်ခဲ့တယ် ။တစ်ခါတစ်လေ ကျုပ်အခက်အခဲရှိရင် သူ့ဆီကတောင် ပြန်ချေးငှါးနေရသေး။အဲဒီအချိန်မျိုးဆို သူပြောတတ်တာ တစ်ခုရှိတယ်။
"အချိန်တွေကို အကျိုးရှိရှိအသုံးချစမ်းပါကွာ"တဲ့။
တစ်ခါတုန်းကလည်း တရားပွဲသွားမလို့ဆိုပြီး
သူ့ကိုကျုပ် ခေါ်ဖူးသေးတယ်။ညပိုင်းလုပ်စရာ
အရေးကြီးတဲ့ကိစ္စတွေရှိလို့ဆိုပြီး သူငြင်းခဲ့တယ်။
"အူမတောင့်မှ သီလစောင့်နိုင်မှာ သူငယ်ချင်း။
အူမတောင့်ဖို့အတွက် ကြုံတုန်းလေး ဖြည့်ထားပါ
ရစေဦး"တဲ့။
အင်းလေ။သူ အဲဒီလို စီးပွားရေး လုံးပမ်းခဲ့လို့လည်း သူတို့မိသားစု မတောင့်မတ မကြောင့်မကြ နေနိုင်တာထင်ပါရဲ့။ကျုပ်အမျိုးသမီးကဆို သူ့ကိုအရမ်းချီးကျုးတာ။
"ကိုမျိုးမင်းဟာ တော်တော် အလုပ်လုပ်နိုင်တယ်နော် အံ့ရော။သူ့ကြည့်လိုက်ရင် အလုပ်နဲ့လက်
ပြတ်တာ မမြင်ဖူးသလ်ိုပဲ"
အဲဒီလိုများပြောရင် ကျုပ်စိတ်ထဲ သိပ်မကြိုက်ချင်ဘူး။ ဒါပေမယ့် ကျုပ်ကိုလည်း အပြစ်ပြောပြီး ဝေဖန်တာမျိုးတော့ မရှိဘူး။ကိုယ့်
ကိုကိုယ်မို့ ပြောတာမဟုတ်ဘူး ကျုပ်လည်း တာ
ဝန်ကျေတဲ့ အိမ်ထောင်ဦးစီးတစ်ယောက်ပါ။တစ်ခါတစ်လေ အခက်အခဲ ရှိလို့ စီးပွားရေးလေး
မဆိုစလောက် ကျပ်တည်းတတ်တာကလွဲပြီး
ချို့ချို့တဲ့တဲ့တော့ မဟုတ်ပါဘူး။ ကျုပ်သူငယ်ချင်းလို အုတ်ခံတိုက်အိမ်မျိုးနဲ့ မထားနိုင်ခဲ့ပေမယ့် ပျဉ်ထောင်သွပ်မိုးထက်တော့ မနိမ့်ခဲ့ပါဘူး။ဆီအပြည့် ဆန်အပြည့်နဲ့ ရွှေခံရွှေရံလေး
လောက်တော့ အပိုအလျှံရှိပြီးသား။ ဘာပဲဖြစ်ဖြစ်တော့ ကျုပ်နဲ့ ကျုပ်သူငယ်ချင်းက နံ့သာဆီနဲ့
အီး။
ကျုပ်သူငယ်ချင်းမှာ ရွှေဖြူ၊ရွှေဝါ၊ရွှေခင်ဆိုပြီးတော့ သမီးသုံးယောက်ရှိတယ်။သူအခု
ကြိုးစားလုပ်နေရတာ အိမ်ထောင်မကျသေးတဲ့ သူ့သမီးတွေ နောင်ရေးအတွက်တဲ့။ဖခင်ကောင်း
ပီသတာများ ပြောပါတယ်။သူ့နောက်ဆုံးရည်မှန်းချက်က သူမသေခင် သူ့သမီးသုံးယောက်အတွက် အိမ်နဲ့ခြံ တစ်ယောက်တစ်ကွက်စီ ဝယ်ပေးထားနိုင်ဖို့တဲ့။ တော်တော်တောင် နီးစပ်နေပြီ
ပြောတယ်။အဲဒီရည်မှန်းချက်နဲ့ပဲ သူ့ရဲ့အချိန်ဇယားထဲမှာ အားလပ်ချိန်ဆိုတဲ့စာသား ပျောက်နေခဲ့တယ်။
ဟော အခုကြည့်။ သူ့ရည်မှန်းချက်တွေမပြည့်ခင် ရုတ်တရက်ကြီး ဆုံးပါးသွားခဲ့ပြီ။
မအားလပ်တဲ့ကြားကပဲ ထားသွားရက်ခဲ့ပြီ။
သူငယ်ချင်းရေ ကောင်းရာသုဂတိ လားပါစေကွာ။မင်းမရှိတဲ့နောက်ပိုင်း မင်းမိသားစု တဖြည်းဖြည်း အသားကျသွားမှာပါ။ စိတ်ဖြောင့်
ဖြောင့်သာ သွားပေတော့။
ရေဝေးသုသာန်ကြီးကတော့ မီးခိုးလုံးကြီးတွေ၊ မျက်ရည်ပေါက်ကြီးငယ်တွေ၊ ဝမ်းနည်းပူ
ဆွေး မျက်နှာတွေ၊ အော်ဟစ်ငိုယိုသံတွေနဲ့ ကြိတ်ကြိတ်တိုးလို့ပေါ့။နောက်ထပ်နောက်ထပ်
ရောက်လာကြတဲ့ အသက်မဲ့ခန္ဓာတွေထည့်ထား
တဲ့ ခေါင်းတလားအပြင်ဘက်တွေမှာ ဦး၊ဒေါ်၊ကို၊
မနဲ့ နာမည်တွေအမျိုးမျိုး ရေးထိုးထားကြတယ်။ အသက်အရွယ်တွေကလည်း ကိန်းဂဏန်း အစုံအလင်။
ဪ....သူတို့တွေလည်း ဒီကိုရောက်လာ
ကြတာ အားရောအားကြရဲ့လား။
နတ်စောင်း(ကျိုက်ထို)
No comments:
Post a Comment