""နွေအလွမ်း"
========
#ခင်ခင်ထူး
ရွက်ဝါတွေ ကြွေလူးသည့် နွေဦးသို့ ရောက်တိုင်း အညာက ရွာကလေးကို ကျွန်မ သတိရမိနေမြဲ ဖြစ်ပါသည်။ အထူးသဖြင့် သည်နှစ်မှာ နွေဦးက စောသည်ထင့်။ ကျွန်မစိတ်ထဲ ထင်တာလည်း ဖြစ်နိုင်ပါသည်။ ဖေဖော်ဝါရီလ ထဲမှာပင် ကျွန်မတို့ တိုက်တန်းရှေ့ရှိ လက်ပံပင်ကြီး အဖူးနီနီကလေးတွေ ပြနေလေပြီ။ နွေ၏ ထုံသောရနံ့ မပြင်းမစူးသေး သော်လည်း ကျွန်မ၏ အာရုံမှာတော့ နွေနံ့တို့ လှိုင်လှိုင်ထလို့ လာနေသည်။ တာရိုးလမ်းပေါ် ကားတစ်စင်း ဖြတ်မောင်းသွားတိုင်း တာရိုးကြီးဆီမှ ဖုန်ငွေ့တွေ တောမီးကြီး လောင်သလို အခိုးတွေ ထသွား တတ်သည်ကို ကျွန်မ ငေးမောကြည့် နေမိပါသည်။ ကားတွေက မဆုံးနိုင်တော့ ဖုန်ခိုးတွေကလည်း မဆုံးနိုင်။ ခပ်လှမ်းလှမ်းရှိ ကမ်းနား သစ်တောအုပ် ကလေးသည်ပင် ရော်ရွက်တို့ဖြင့် သွေ့ခြောက်နေသည်။
ကျွန်မ ငယ်စဉ်က ဆိုလျှင် သည်လို နွေဦးရောက်တိုင်း ရွာကို ကဆုန်စိုင်း၍ ပြန်လေ့ ရှိပါသည်။ တစ်မိုးလုံး၊ တစ်ဆောင်းလုံး ကျောင်းစာများဖြင့် နပန်းလုံးခဲ့ ရလေသမျှ နွေကိုရောက်တိုင်း အတိုးချကာ ဆော့ကစား ခဲ့ရသည့် နွေဦး ကျောင်းပိတ်ချိန် ဘဝတွေကို မနေ့တစ်နေ့ ကလို ပြန်လည်မြင်ယောင် လာမိတတ်သည်။
နွေကို ကျွန်မတို့ ပိုင်ဆိုင်သည်။ နွေသည် ကျွန်မအဖို့ အပျော်ရွှင်ရဆုံး ရာသီအဖြစ် တပ်မက်ရသည်။ နွေ၏ သရုပ်သည် ကျွန်မ နှလုံးသားကို ဆွဲကိုင် လှုပ်ရမ်းနိုင်စွမ်း လှပါဘိ။ အထူးသဖြင့် လွပ်လပ် ကျယ်ပြန့်သော ကျေးလက်၏ ရင်ခွင်တွင် ကျွန်မ တစ်မှေးတစ်ရေး အနားယူ ရသောကြောင့် နွေကို ကျွန်မ ချစ်တာလည်း ဖြစ်နိုင်ပါ၏။
ကျွန်မတို့ ရွာကလေးသည် ဧရာဝတီမြစ်ကမ်း ဘေးမှာ ဆိုတော့ မြစ်ရေကြီးချိန် (ရေကြီးခါ) တွင် ရေဝင်ရွာကလေး ဖြစ်ပါသည်။ သီတင်းကျွတ်လ မြစ်ရေတွေ လျှောကျသည်နှင့် ထွန်ယက် စိုက်ပျိုး ထားကြသော သီးနှံပေါ်ချိန်တွင် တစ်ဆောင်းလုံး မြေတွင်းမှာ တိတ်တိတ်ကလေး ကျိတ်သီး နေကြသော ခိုအောင်းထားသမျှ မြေပဲဥကလေးများကို ဖော်ကြပြီ။
မြေသီးချွေသည့် နွေ ...။
သင်္ဘောဆိပ်မှ ရွာသို့အလာ လမ်းတစ်လျှောက်လုံး စိမ်းညို့နေသော မြေပဲခင်း ခဲခဲသဲသဲ မည်းမည်းကြီးတွေက ကျွန်မကို ဆီးကြိုတတ်မြဲ ဖြစ်ပါသည်။ မြေပဲစိုက်သော ယာမြေကွက်တွေက ရွာအပြင်မှာ ရှိသည်။ ရွာအပြင်မှာ ဆိုသော်လည်း မဝေးလှဘဲ ရွာနှင့် တစ်ဆက်တည်း ဖြစ်ပါသည်။ သည်လို သစ်စေ့ သစ်နှံ စိုက်ခင်းတွေကို ကျွန်မတို့ဆီက “တော” ဟု ခေါ်ကြသည်။ တောအလုပ် ဝင်တယ်၊ တောအလုပ် သွားတယ်၊ တောအလုပ် သိမ်းပြီ စသဖြင့် သုံးတတ်ကြ၏။ သီးနှံသိမ်းချိန် အခုလို နွေရာသီဆိုလျှင် လင်းကြက် မတွန်မီကပင် ရွာကလေးက တလှုပ်လှုပ် ဖြစ်နေပြီ။ တစ်ယောက်ပြီး တစ်ယောက် တကြော်ကြော် ခေါ်ထူးသံတွေ၊ တဘူးဘူး တဘဲဘဲ နွားအော်သံတွေ၊ တဂျောင်းဂျောင်း တအီအီ လှည်းမြည်သံတွေနှင့် တစ်ရွာလုံး ညံလို့ နေသည်။ မိုးလင်းလျှင်တော့ ကျီးစောင့် ကြက်နှင် အဘိုးအဘွားများနှင့် ကလေးသူငယ်များမှ လွဲ၍ ရွာထဲမှာ လူမကျန်တော့ သလောက် ခြောက်ကပ် နေတတ်ပါသည်။ တောထဲက မြေပဲခင်းတွေထဲ လူတွေ ဖွေးဖွေးလှုပ်လှုပ်။
တောထဲ မြေပဲခင်းတွေမှာ ကိုယ့်တာနှင့်ကိုယ် ငန်းတိုက်၍ ကုန်းကုန်းရုန်းရုန်း မြေပဲ နှုတ်နေကြသော လူတွေ အခင်းတိုင်း လိုလိုမှာ ပြည့်နေသည်။ မြေပဲပင်များကို နုတ်ပြီး ပုံထားသော အသီးဥတွေ တန်းလန်း မြေပဲပင်ပုံကြီးမှာ တောင်ပို့ မောက်မောက်ကြီးနှင့် တူသည်။ မြေပဲရွက်စိမ်းစိမ်း မည်းမည်းတွေ အောက်က အမြစ်ဖွားဖွားမှာ ဥကလေးတွေက တွဲလောင်းကျ နေတတ်သည်။ မြေပဲပင်များ နုတ်ပြီးမှ မြေပဲပုံနားမှာပဲ အရိပ် အမိုးထိုးကာ မြေပဲဆွတ် ကြရသည်။ တချို့ကလည်း မြေပဲပင်များကို တစ်ဖက်ကကိုင် တစ်ဖက်က လိမ်ချွေတာမျိုးဖြင့် အသီးဆွတ် ကြရသည်။ တချို့ကလည်း မြေပဲတွေ စဉ်မထွက်အောင် ရိုင်ပတ်ဖြင့် ကာ၍ တန်းထောင်ကာ ရိုက်ဆွတ် ကြပါသည်။ သီချင်းဆိုသံ၊ ပြဇာတ် ခင်းသံတို့ဖြင့် မြိုင်မြိုင်ဆိုင်ဆိုင် ရှိလှ၏။ အပျော်များဖြင့် ပြည့်သိပ် နေသောကြောင့် ပင်ပန်းသည် မထင်ကြပါ။ မြေပဲ တစ်တောင်းရလျှင် မြေပဲဆွတ်သူက မြေပဲဆွတ်ခ နှစ်ပြည် ပြန်ရသည်။ ကျွန်မတို့ ရွာမှာ မြေပဲဆွတ်ခသည် ငွေသားမဟုတ်။ ရှေးကတည်းက ရှိခဲ့သည့် အစဉ်အလာကို မဖျက်ကြ။
ကျွန်မတို့ ကလေးတွေက မြေပဲ ဆွတ်ပြီးသား အခင်းဟောင်းတွေ ထဲက ကွင်းကျန်မြေပဲ ကောက်သင်းကောက် ကြသည်။ တကယ်ဆိုလျှင် ပဲသင်းကောက်သည် ဖြစ်သင့်ပါသည်။
ကျွန်မကတော့ ကောက်သင်းကောက် ဖို့ထက် မြေပဲသီးအစိုတွေကို မီးဖုတ်တမ်း ကစားဖို့လောက်သာ စိတ်စော နေတတ်ပါသည်။ တောထဲက ထင်းခြောက်တွေကို စုပြီး တောထဲမှာ မီးဖိုပြီးတော့ မြေပဲသီးတွေကို မီးတောက်ထဲ ပစ်ထည့်။ တောထဲမှာ မြေပဲသီး အညှော်နံ့တွေက ညှော်ကြီး သင်းကြီး တိုက်နေတော့သည်။ ကျက်လောက်ပြီ ထင်သောအခါ မီးတွေကို မြေစိုင်ခဲတွေနှင့် တဖုန်းဖုန်း ထုပြီး မီးသတ်ရသည်။ မည်းမည်းသည်းသည်း မြေပဲသီး မစိုမကျက်တွေကို ပူပူလောင်လောင် စားရသည့် အရသာကို ကျွန်မ မမေ့နိုင်။ အာသာပြေသည် လို့လည်း မရှိ။ စားသလောက် ကြိုက်သည်။ ကြိုက်သလောက် စားသည်။
ပြီးတော့ မြေပဲဆန်များကို ကျွန်မတို့ ခြံမြောက်ကုန်း ထိပ်က ဆီဆုံမှာ ဆီကြိတ် ကြသောအခါ ဆီဆုံလှည်း စီးရသည့် အရသာကိုလည်း ကျွန်မ မမေ့နိုင်ပါ။ သည်တုန်းက ဆီဆုံကြီးထဲကို မြေပဲဆန်တွေ လောင်းထည့်ပြီး နွားဖြင့် လှည့်ဆွဲကာ ဆီကြိတ် ကြရသည်။ ချားလို အဝိုက်လိုက်ကြီး နှေးနှေးလေးလေး ပတ်လှည့်နေသော ဆီဆုံတန်းပေါ်တွင် ထိုင်၍ ဆီဆုံစီးတမ်း ကစားခဲ့ကြသည်။ မြေပဲဆံ မကြေ့တကြေ အဖတ်တွေကို ထန်းလျက်နှင့် ဆုပ်ဆုပ်စားခဲ့ရသည့် မြေပဲ ထန်းလျက်ဆုပ်ကိုလည်း ကျွန်မ ကြိုက်ပါသည်။
“အမေတို့ ငယ်ငယ်တုန်းက အခါမကောင်းချိန်၊ ကျွဲညီနောင် လေယာဉ်ပျံသံ ကြားရင် ဗုံးကျင်းထဲ ဝင်ပြေးကြရတာအေ့၊ ဗုံးကျင်းထဲ ကလေးတွေ ငြိမ်အောင်လို့ ဆိုပြီးတော့ တို့အမေတို့က မြေပဲထန်းလျက် ဆုပ်ပေးပြီး ကျင်းထဲ ထည့်ထားတာ၊ စားလိုက်ရတာ ဆိုတာများ အေ၊ ပါးစပ်ကို အစေးပေါက်လို့”
အမေက မြေပဲ ထန်းလျက်ဆုပ်ကို မြင်တိုင်း ဒုတိယ ကမ္ဘာစစ်ကြီးတုန်းက သူ့ငယ်ဘဝ အကြောင်းကို တစ်ခုတ်တရ ပြန်ပြော နေတတ်ပါသည်။ ကျွန်မတို့ခေတ် ရောက်လာတော့ စစ်ကာလ မဟုတ်တော့ သော်လည်း မြေပဲ ထန်းလျက်ဆုပ် ကိုတော့ ကျွန်မတို့ရွာတွင် အခုထိ အစေးပေါက်အောင် စားနေကြရတုန်းပဲ ဖြစ်သည်။
ထောပတ်ပဲ၊ စွန်တာနီပဲ၊ ပဲစာဥ၊ ပဲကြား စသည့် ပဲပင်တွေကိုတော့ တောထဲမှာ မဆွတ်ကြရပါ။ ပဲပင်များကို အနွယ်လိုက် ရိတ်ပြီး အလုံးလိုက် အထွေးလိုက် လှည်းဖြင့် တိုက်ယူလာ၊ ကိုယ့်အိမ်တလင်း ပြောင်ပြောင်မှာ ပုံပြီး အခြောက်ခံ ထားတတ်ကြသည်။ ပဲနွယ်များကို ပဲမှော်ကောက်ဆွ ခက်ရင်းဖြင့် ဆွဆွပြီး ထက်အောက် လှန်ပေးကာ နှစ်နေ သုံးနေ သွေ့နေအောင် လှန်းကြရသည်။ ပဲသီးတွေ ခြောက်အက်ကွဲကျ လာလျှင်တော့ တလင်းတွင် ဖြန့်၍ နွားဖြင့် ငန်းတိုက် နယ်ကြသည်။ နွားပါးစပ်တွင် ထန်းလျှော်ဖြင့် ပြုလုပ်ထားသော စွပ်ခြင်းကလေးတွေ စွပ်ထားတတ်ကြ၏။ ပဲမှော်များကို နွားများ ငုံ့စားမှာ စိုးသောကြောင့် ဖြစ်သည်။ ကလေးတုန်းကတော့ သည်နွားပါးစပ် ခြင်းကလေး အကြောင်းကို သေသေချာချာ စဉ်းစား မကြည့်ခဲ့မိဖူးပါ။ သည်ပဲမှော်များမှာ ရေဝင်ချိန် အပါအဝင် နှစ်ပေါက်စာ နွားစာအတွက် ပြန်သိမ်းထား တတ်ကြသော်လည်း ပဲနယ်နေစဉ် နွားများကို အစားမခံတာ ကလည်း ထူးဆန်းသလို ခံစားရသည်။
ကျွန်မတို့ ရွာတွင် ခိုင်းနွားများကို ကိုယ်ခြံပေါက်နွား အဖြစ် တကန်တက မွေးယူ တတ်ကြသည်။ ခြံပေါက်နွားမှ ပိုအားရသည်။ သံယောဇဉ် ပိုကြီး တတ်ကြသည်။ ရွာထဲမှာ တစ်အိမ်အိမ်က နွားမွေးသံ ကြားလျှင် တစ်ရွာလုံးက ဝမ်းသာ နေတတ်ကြသည်။ နွားကလေး ဘဝ ကတည်းက အရိပ် တကြည့်ကြည့် မွေးမြူလာခဲ့ရာ နဖားကျိုး ထိုးနိုင်သည့် အရွယ်တွင် ယာထဲတောထဲ ခိုင်းကြစေကြ သော်လည်း ကျောတသပ်သပ်၊ ရင်တသပ်သပ်၊ စုပ်တသပ်သပ်ဖြင့် ချော့ကာ မော့ကာ ခိုင်းကြလေ့ ရှိ၏။ နွားဟု ဆိုသော်လည်း လူနှင့်မခြား စောင့်ရှောက် တတ်ကြ၏။ နွားတစ်ကောင်နှင့် ပတ်သက်ပြီး ကိုယ့်အသက်ကို စွန့်လွှတ်၍ ချစ်ခင် စုံမက်ခဲ့သည့် သာဓကတစ်ခု ကျွန်မတို့ရွာတွင် ရှိပါသည်။
ကျွန်မတို့ ရွာတွင် ဧရာဝတီမြစ်ရေ အလွန်ကြီးသည့် နှစ်ကဖြစ်ပါသည်။ ခါတိုင်း ရေကြီးခါ နှစ်များမှာ ခြေတံရှည် အိမ်ကြမ်းပြင်ကို မထိတတ်သော မြစ်ရေတွေက ထိုနှစ်ကတော့ အိမ်ကြမ်းပြင်တွေ အပေါ်အထိ လျှံတက်လာသည်။ အိမ်ပေါ်တွင် ခုတင်များ ဆင့်၍ လူတွေက ဖြစ်သလို နေကြသော်လည်း နွားများ ထားစရာ ကုန်းမြင့် မရှိတော့သဖြင့် အတော်ဝေးသော ရေမရောက်သည့် အရှေ့ကြည်းတော ရွာများသို့ နွားများ သွားထား ကြရသည်။ ကျွန်မအစ်ကို ကိုဖိုးထောင်ခမျာ သူ့ခိုင်းနွားကြီး နှစ်ကောင်ကို လှေဖြင့် တစ်ကောင်စီ ကဲ့ကာ ကုန်းပိုင်း ကျရာဘက်သို့ နွားသွားပို့စဉ် မိုးချောင်းတွေ တအား စီးဝင်လာသည်။ နွားတစ်ကောင်က ကုန်းပေါ် ရောက်သွားသော်လည်း ကျန်နွား တစ်ကောင်နှင့် ကိုဖိုးထောင်မှာ လှေပေါ်တွင် လူးလာဆန်ခတ်ဖြင့် မြုပ်သွားတော့၏။ ကိုဖိုးထောင်က လှေကို လွှတ်၍ ရေကူးသွားလျှင် လွတ်နိုင်သော်လည်း နွားကြီး ချောင်းရေထဲ မျောပါသွားခြင်းကို မကြည့်ရက်နိုင်သဖြင့် မရမက လိုက်၍ ဆယ်ရှာသည်။ ရေစီးသန်သန် စီးကြောင်းထဲ မျောပါသွားသော နွားကို အမီလိုက်ရင်း သူ့အသက်ကိုပါ ပေးစွန့်သွားခဲ့သည်။
"တောက် ကွာ၊ ဖိုးထောင်ရာ ဖြစ်မှ ဖြစ်ရလေခြင်းကွာ"
တစ်ရွာလုံး ယူကြုံးမရ တသသ ပြောကျန်ရစ်ခဲ့ ကြသည်မှာ ယနေ့အချိန် အထိ ဖြစ်ပါသည်။ အကြောင်း တိုက်ဆိုင်တိုင်း ဖိုးထောင်နှင့် သူ့နွားကြီးကို အမှတ်တရ ရှိနေကြဆဲ ဖြစ်၏။
ကျွန်မ ကိုယ်တိုင်လည်း နွားနှင့် နှီးနွယ်သော သံယောဇဉ် ဇာတ်လမ်း တစ်ပုဒ်ကို ဝတ္ထုတိုကလေး ရေးဖွဲ့ခဲ့ဖူး ပါသည်။ ကျွန်မတို့ ငယ်စဉ်က ကျေးလက်နေ ကလေးပီပီ နေ့စဉ် နွားကျောင်း ထွက်ရသည့် ဓလေ့ ရှိပါသည်။ နွားကျောင်းရင်း တောထဲ တောင်ထဲက သရက်သီးစိမ်းတွေ ခဲဖြင့်ထုကာ ထဘီခါးပုံထဲ အသင့်ထည့် ယူလာခဲ့သည့် ဆားဖြင့် တို့တို့စားသည့် အလေ့ ရှိပါသည်။ တစ်ခါတစ်ရံ နှုတ်ခမ်း ပတ်လည်တွင် သရက်သီးအစေး ပူလောင်ကာ အနာများပင် ပေါက်လာတတ်သေး၏။ သွားတွေလည်း ကျိမ်း၊ နေလည်းစောင်း၊ နွားတွေလည်း အစာဝပြီ ဆိုလျှင် ကျွန်မတို့ တောထဲမှ ပြန်ခဲ့ကြသည်။ နွားများကို အိမ်တန်း မမောင်းဘဲ ရွာဆိပ်ကမ်း ဧရာဝတီ မြစ်ဆိပ် သောင်ပြန့်ကို ဖြတ်ကာ နွား ရေတိုက် ဆင်းကြပါသည်။ နွား ရေသောက်ချိန်တွင် ကျွန်မတို့က မြစ်ကြီးထဲ ကူးခတ် ဆော့ကစား ကြပြန်သည်။ ကျွန်မ အများဆုံး ကျောင်းခဲ့ရသည့် နွားကြီးမှာ “ပေစိ” ဆိုသော နွားကြီးဖြစ်၏။
ပေစိကြီး အိုနာဖြင့် ဆုံးတော့ အဘက မြို့မှာ ကျောင်းတက်နေသော ကျွန်မတို့ကို စာရေးပြီး လှမ်းခေါ်သည်။ ပေစိကြီး ဆုံးသံ ကြားကတည်းက ကျွန်မ ဝမ်းနည်းစွာ ငိုကြွေးမိ၏။ ကျွန်မ ရွာပြန်ရောက်တိုင်း ကျွန်မနှင့် ဆော့ဖော်ဆော့ဖက် သူငယ်ချင်းတစ်ယောက် ဆုံးရှုံး သွားရသလို ခံစားခဲ့ရသည်။ ကျွန်မတို့ ရွာကိုရောက်တော့ ပေစိကြီး အလုံးအထည်ဖြင့် မရှိတော့ပါ။ ကားကြက်ကာ နေလှမ်းထားသော သားရေချပ်ကြီး ဖြစ်သွားခဲ့ပါပြီ။ ထိုပေစိ၏ သားရေချပ်ကြီးကို အဘက ဆွမ်းခံကြွလာသော ဦးပဉ္ဇင်းများကို ခင်းပေးတတ်ပါသည်။
“အော် ပေစိကြီးတို့များ တစ်သက်လုံး ကုန်းရုန်း လုပ်ကျွေးခဲ့ရုံ မကဘူး၊ သေတဲ့နောက်တောင် သူ့သားရေကို ခင်းထိုင် နေရသေးတယ်၊ အသုံးကျချက်တော့၊ သေတာတောင် သားရေထိုင် ဘဝနဲ့ ကုသိုလ် ယူရှာသေးတယ်။ တွေ့လား ငါ့မြေးတို့”
အဘက သူ့အချစ်တော် ပေစိကြီး၏ သားရေချပ်ကြီးကို ပြပြီး ကျွန်မတို့ကို ဆုံးမခဲ့ဖူးသော စကားဖြစ်ပါသည်။
အခုလို နွေရာသီ ဆိုလျှင် ကျွန်မ အမြဲ လွမ်းနေတတ်ခဲ့သည့် ပုံရိပ်များတွင် ဘုန်းကြီးပျံပွဲများလည်း ပါဝင်ပါသည်။ ကျွန်မတို့ မြင်းခြံမြောက်လက် ရွာကလေးများသည် ဘုန်းကြီးပျံပွဲများကို သူ့ရွာ ကိုယ့်ရွာ မခွဲခြားဘဲ တစ်နယ်လုံး သိုက်သိုက်ဝန်းဝန်း ပူဇော်တတ်ကြသည်။ ထိုစဉ်က ကျေးလက် ဘုန်းတော်ကြီး ကျောင်းများသည် ကျေးလက် ပညာရေးကို အထောက်အကူ ပြုခဲ့ကြသော တက္ကသိုလ်ကြီးများ ဖြစ်ခဲ့၏။ ထို့ကြောင့် ဆရာ ဘုန်းကြီး ပျံလွန်တော် မူသည့်အခါ တပည့်တပန်းများက အားကုန်စိုက်၍ ပူဇော်ကြမြဲ။ မည်သည့် အချိန်တွင် ဆရာတော် ပျံလွန်တော်မူသည် ဖြစ်စေ ဘုန်းကြီးပျံပွဲကို နွေရာသီ ခြေခင်းလက်ခင်း သာချိန်၊ သီးနှံပေါ်ချိန် ရောက်မှ စည်ကား သိုက်မြိုက်စွာ ကျင်းပတတ်မြဲ ဖြစ်၏။
ဘုန်းကြီးပျံ ကွင်းလုပ်မည့် စိုက်ခင်းများမှ သီးနှံများကို စောစောသိမ်း ကြရသည်။ ပွဲရက်တွင် ပဲငုတ်တွေ စူးသည့်ကြားက ပြဿာဒ် သိုင်းနင်းတာတွေ၊ ဧယဉ်ကျူးတာတွေ လျှောက်ကြည့် ရသည်မှာ တကယ့်ကို ပျော်စရာ ကောင်းသည်။ တည်းကျောင်း (ဧည့်ခံမဏ္ဍပ်) ကြီးတွေကလည်း ဆယ့်နှစ်ကျောင်း၊ ဆယ့်သုံးကျောင်း အပြိုင်အဆိုင်။ လော်စပီကာတွေက ရွာပေါက်စေ့ တည်းကျောင်းတွေက ပွက်ပွက်ညံအောင် ဖွင့်ထား တတ်ကြသည်။ ဖုန်ထူ နေပူ အသံတွေ ဗလောင်ဆူ နေသည့်ကြားက ချွေးစေးတွေ ပြန်နေသော အနီရဲ ဝမ်းဆက်၊ ဆနွမ်းဝါ ဝမ်းဆက်များဖြင့် နွေနေပူ ကျဲကျဲမှာ ဖိတ်ဖိတ်တောက် နေကြသော မစာဥတို့ မဂွက်ထော်တို့ တစ်တွေကလည်း တစ်နှစ်ကုန် တစ်နှစ်ဆန်း နောက်တစ်ပြန် မသေချာသော ဇာတ်ပွဲ ကြည့်ရဖို့ အရေး နေ့လယ်လောက်ကြီး ကတည်းက ထီးတွေ ဆောင်းပြီး နေရာဦး ထားတတ်ပြန်သည်။ မျက်နှာချေများဖြင့် ပြာနှမ်းနေသော ကျေးတောသူ လုံမများ၏ မျက်နှာ ထူထူကြမ်းကြမ်းတွေ ပေါ်က အပျော်တွေကိုလည်း ကျွန်မ မမေ့နိုင်ပါ။
ကျွန်မတို့ ကလေးတွေက တစ်နေကုန် တစ်နေခန်း ဘုန်းကြီးပျံကွင်း ပူပူကြီးထဲ လျှောက်ကြည့် ရသည်နှင့် ညတွင် ပွဲခင်းထဲ ခေါင်းမထူနိုင်တော့။ ပွဲဦးပတ်မကြီး ဗေထိဆော် ကတည်းက တခူးခူးနှင့် အိပ်လိုက်သည်မှာ မိုးလင်းကတ္တီပါ ကားလိပ်ကြီး ဇာတ်ခုံပေါ် ကျကာ ပတ်စာ ခွာတော့မှ လူကြီးတွေက ရိုက်နှက် နှိုးကြလေသည်။ မျက်လုံးကို ပွတ်၊ ထဘီကို စွန်တောင်ဆွဲကာ ကမူးကစူးနှင့် အိမ်ပြန်လာတော့ နေရောင်တောင် စူးစူးရှရှကလေး ထိုးနေပါပြီ။
သည်ဘက်ပိုင်းမှာ ကျွန်မ ရွာပြန် မရောက်တာ နှစ်အတော် ကြာသွားခဲ့ပြီ။ သို့သော် တမြန်နှစ် နွေကတော့ ကျွန်မ ရွာကို ရောက်ဖြစ်ခဲ့သေး၏။ ကျွန်မတို့ ဘကြီး ဘုန်းကြီး ပျံတော်မူသည့် အတွက် ပူဇော် ကန်တော့ရန် ဖြစ်သည်။ သို့သော် စည်စည်ကားကား သဲကြီးခဲကြီး ဘုန်းကြီးပျံပွဲတော့ မဟုတ်တော့ပါ။ ကျွန်မလည်း ဆရာတော် ရုပ်ကလပ်ကို ဝပ်ချပြီး သစ်ခင်းများ ရှိရာ တောထဲ ထွက်ခဲ့သည်။ ငယ်ငယ်တုန်းကလို ကျွန်မကို ဆီးကြိုနေမည့် အစိမ်းရောင် မြေပဲခင်းကြီးတွေ ပဲခင်းကြီးတွေကို မတွေ့ရတော့ ဝမ်းနည်းသွားမိသည်။ ရိတ်သိမ်းပြီစ အစိမ်းဖျော့ တောကလေးကတော့ ကျွန်မကို စိမ်းကား မနေပါ။ ရွာထဲကို ပြန်ဝင်ခဲ့တော့လည်း တလင်းပြန့်တွေထဲမှာ ဟည်းထနေသည့် ပဲနွယ်ပုံကြီးတွေကို ကျွန်မ မမြင်ခဲ့ရ။ ပဲသိမ်းချိန် လွန်သွားခဲ့ပြီလား မသိ။ ကျွန်မ ငယ်ငယ်က စီးခဲ့ဖူးသည့် ကြီးတော်တို့ ခြံထောင့်က ဆီဆုံကုန်းထက်မှာ စီးနေကျ ဆီဆုံကြီးလည်း မရှိတော့ပါ။
နွေဦးက ကျွန်မကို ခံစားမှု အမျိုးမျိုး ပေးနေကျ ဖြစ်သော်လည်း သည်တစ်ခေါက် နွေအပြန်ကတော့ ပိုလို့တောင် လွမ်းစရာ ကောင်းနေခဲ့သည်။ သည်မြင်ကွင်း၊ သည်ရှုခင်းတွေ ရှိတုန်းကလည်း လွမ်းစရာ။ မရှိတော့လည်း လွမ်းစရာ။
ခင်ခင်ထူး
(ပါးကွက်ကျား ဝတ္ထုတိုများ)
No comments:
Post a Comment