အက်ဆေး(၁၆)
____________
ရောက်လေရာ ၂၉
==============
ရွှေပိုးအိမ် (ပဲခူး)
.
ပုတ်သိုးလွယ်တဲ့ လရောင်ကိုခံယူရင်းဆယ့်နှစ်လရာသီခွင်ရဲ့ နောက်ဆုံးစာကြောင်းမှာ ကျွန်မရဲ့ အနူးညံ့ဆုံးအလွှာတွေ တစ်ဆင့် ချင်းစီကွာကျလာတယ်။ ဒီဇင်ဘာတော့ ဒီဇင်ဘာပဲ။ ဒါပေမယ့် နှင်းကျလာတာမမြင်ရသေးဘူး။ နှင်းဟာပူပြင်းတဲ့ ရာသီဥတုရဲ့ တိုက်ခိုက်မှု တွေကိုအလူးအလဲခံရင်းအစွမ်းကုန် ပွင့်လန်းဖို့ ကြိုးစားနေဆဲပဲ။ အဲဒီအချိန်မှာပဲအမေက ကျွန်မကို နှင်း… ဆိုပြီး ပွင့်ပေးလိုက်တယ်။ တကယ့်နှင်းတွေ ညှိုးရော်သွားလိုက်တာ။ အမေ မသိဘူးနဲ့ တူပါတယ်။ အင်းလေ… အမေမသိလို့ နေမှာပါ။ ကျွန်မက နှင်းဆိုပေမယ့် နေရောင်နဲ့တွေ့ရင် အရည်မပျော်ဘဲပိုပြီးမာကျောလာတတ်လွန်းလို့။ အမှန်က ကျွန်မနာမည်ထဲက နှင်းဆိုတဲ့ အနူးညံ့ဆုံး စကားလုံးလေး ကိုအမေဖြုတ်ချခဲ့သင့်တာ။ အမေစိတ်မဆိုးနဲ့နော်။ ကျွန်မကဆောင်းမှာပွင့်ပေမယ့် နှင်းမှ မဟုတ်တာအမေရယ်…။ အေးစက် ခြောက်ကပ်မှုကို ကြိုက်နှစ်သက်တဲ့ ကန္တရ ဆူးပင်လေးတစ်ပင်ပါ…။ အထီးကျန်ကြေကွဲမှုတွေနဲ့ မိတ်ဆွေဖွဲ့ချင်နေတဲ့ ကန္တရ ဆူးပင်လေး တစ်ပင်ပါ အမေ။
အဲဒီနောက် ကမ္ဘာမြေဟာ ကျွန်မတစ်ကိုယ်လုံးကိုသိမ်းကြုံးတပ်ဆင်၊ မြေပြင်နဲ့ တသားတည်းဖြစ်အောင် ယစ်ပူဇော်ပစ်လိုက်တာများ၊ အဖေကဓားထမ်းပြီး အနှီးထုတ်ကလေးထဲက နဂါးမလေးကိုအားနဲ့မာန်နဲ့ ကျော်တယ်။ နဂါးမလေး ဂြိုလ်မထနိုင်အောင်တဲ့။ ယုံကြည်မှု အစွဲ အလန်းတွေထဲမှာ ၁၉ နှစ်အရွယ် ကျွန်မမိဘတွေကမရင့်ကျက်သေးတဲ့ ကလေးစုံတွဲပဲ။ အနီရင့်ရောင် ရထားပိုးကောင်တွေ ပလုတ်ပလောင်း စားပစ်တဲ့နေ့ကဆိုတစ်အိမ်လုံး ပြာယာခတ်လို့။ သောက်ရေအိုးထဲကရေတွေ အကုန်သွန်ပြီးတစ်ကိုယ်လုံးစိုစိုရွှဲနေတဲ့ ကလေး တစ်ယောက် သောက်ရေအိုးအလွတ်ကြီးထဲမှာ…။ အဲဒီနေ့ကအဖေနဲ့ ရန်ဖြစ်ထားတဲ့ အမေက ကျွန်မကိုရိုက်တယ်။ လူလစ်ပြီဆို ခါးကို ဆွဲဆွဲဆိတ်တတ်တဲ့ ဆရာမရဲ့ ညီမကြောင့် ကျူရှင်တက်ရတာ စိတ်ညစ်လာတယ်။ အဲ့ဒီအတွက် ဆရာမအိမ်ရဲ့ လမ်းတစ်ဝက်ကနေ စာမသင်ဘဲ အိမ်ပြန် လှည့်လာတဲ့ ကျွန်မကို အမေမရိုက်ဘူး။ ကျွန်မသိမ်ငယ်တတ်တာကိုသိပေမယ့် ကျွန်မစိတ်ထဲကခံပြင်းမှုတွေကိုအမေမမြင်ခဲ့တဲ့နေ့တွေ ရှိတယ်။ ကန္တရဆူးပင်လေးဟာတစ်ခါ တစ်ခါ ကြောက်မက်ဖွယ် တိတ်ဆိတ်မှုနဲ့ သွေးအေးလွန်းလှတာ အမေနားမလည်ခဲ့ဘူး။ ကျွန်မမှာ အမေ မမြင်နိုင်တဲ့ လက်နက်တွေရှိတယ်ဆိုတာ ယုံသလားအမေ…။
ဂြိုလ်နက္ခတ်တွေရဲ့ စီးနင်းမှုကို ငြင်းဆန်ခဲ့တဲ့ အစိမ်းရောင်မိန်းမတစ်ယောက်ဟာ ကျွန်မပါပဲ။
အိပ်၊ စား နှစ်မျိုးတည်းနဲ့ ကာမတဏှာမဖိစီးတဲ့ အချိန်တွေဟာပစ်စလတ်ခတ်နိုင် လှတယ်ဆိုပေမယ့် ပြန်ပြောမိတဲ့အခါ ပြုံးရယ် စရာကောင်းရုံမှ အပ ကျွန်မအတွက်ရော… ကြားရတဲ့သူတွေအတွက်ပါ ဒဏ်ရာမဖြစ်စေခဲ့ဘူးလေ။
နှင်းဆီကိုချစ်သယောင်ပြပြီးမှ ဆိတ်ဖလူးရဲ့ သိမ်ငယ်ခြင်းအတွက် တစ်ဘ၀လုံး ရက်ရောပေးခဲ့တဲ့ မိန်းမ။ ပညက်ချက် တစ်ခုကိုလည်ပင်းမှာမြဲနေအောင် ဆွဲပေးလိုက်ကတည်းကဆင်တွေ မုန်းယိုနေသလိုမျိုးကံကြမ္မာကလည်းဆင်ကန်းတောတိုးပဲ။ အရက်ပုလင်း တွေ ပတ်ချာလည် စီထားတဲ့ အခန်းငယ်လေးထဲမှာ ကျွန်မ ငယ်ဘ၀ရှိတယ်။ အမေမရှိဘဲပိတောက်ပန်းပွင့်တဲ့နှစ်မှာ ကျွန်မကောင်းကောင်း ရှင်သန်နိုင်ခဲ့တယ်။
ညတွေဟာ ကျွန်မ နှလုံးသားကိုဓားနဲ့ ခြစ်ချပြီးစကားလုံးတွေကိုမပြောမဆိုဘဲယူသွားလေ့ရှိတယ်။
မနက်တွေဟာ ကျွန်မပျော်ရွှင်ခြင်းကိုမီးခိုးမှိုင်းတိုက်ပြီး ကျွန်မ ဖြစ်တည်ခြင်းကို နှုတ်ခမ်းတစ်ဖက်တည်းတွန့်ပြီးရူးအောင် ပြုစားလေ့ရှိ တယ်။
ရေ၀တီရေ… ရေ၀တီရေ… ။ အမည် ပညက်ချက်လှလှပပနဲ့ အလွမ်းသီးချင်းလေးကို လိုက်ညည်းရင်းသစ်ပင်တွေနဲ့ ပိတ်ဆို့နေတတ် တဲ့ နေမင်းကြီးကိုငေးခဲ့ဖူးတယ်။ တကယ်တော့ ရေ၀တီဆိုတာ လွမ်းစရာမကောင်းတဲ့ ဘ၀နဲ့ သံသရာတစ်ဖက်ကမ်းမှာ မောကြီးပန်းကြီး ကူးခတ်နေရတဲ့ အပြစ်သားဆိုတာအချိန်နှောင်းမှ သိခဲ့ရပေါ့။ သတ်ပုံကျမ်းကိုဘေးချ၊ စာလုံးပေါင်းမှားခဲ့တဲ့နေ့တွေကိုရေတွက်မိပြီဆို ကျွန်မ ငိုတယ်။ အချို့စာလုံးပေါင်းတွေကသိသိချည်းနဲ့ မျက်စိလျှမ်းပြီး မှားခဲ့တာ။ အချို့ကမသိတာကိုသိချင်ယောင်ဆောင်ပြီး ခပ်တည်တည်နဲ့ ရေးခဲ့မိလို့ မှားခဲ့တာ။ တကယ်မသိလို့ မှားခဲ့တဲ့ စာလုံးပေါင်းတွေအတွက်တော့ စိတ်မကောင်းဖြစ်မိတာအမှန်ပဲ။ ဒါပေမယ့် အားလုံးက အမှားတွေချည်းပဲလေ။ အမှားဆိုတဲ့ စာတန်းထိုးလိုက်ချိန်မှာ ကျွန်မလက်ထဲက Correction pen လေး ပြုတ်ကျသွားခဲ့ပြီ။
ပင့်သက်ရှိုက်သံတွေ တိတ်ဆိတ်သွားကတည်းက ပန်းတွေ ပွင့်တာ၊ တိမ်တွေ လွှင့်တာ၊ ဂစ်တာကြိုးညှိတာအားလုံးကို ရဲရဲတောက် မခံစားရတော့ဘူး။ တစ်ခါတစ်ခါ ဘုရားပေါ် တက်ခါနီးမှ ဖိနပ်ပြတ်သွားတာကိုပဲပိုပြီးအဆင်ပြေသွားသလိုမျိုးရောချခဲ့ရတယ်။ သိလား…။ သိလားလို့ မေးရင် မသိဘူးလို့ ခေါင်းခါမယ်မှန်းသိသိကြီးနဲ့ သိလားလို့ ကျွန်မမေးတတ်လာတယ်။ မသိဘူးမဟုတ်လားလို့မေးရင် ငြိုငြင်မယ် မှန်းသိသိကြီးနဲ့ မသိဘူးမဟုတ်လားလို့ အရွဲ့တိုက်ပြီး ကျွန်မမေးတတ်လာတယ်။ လောကကြီးကိုအရွဲ့တိုက်ပေမယ့် လောကကြီးက ကျွန်မ ကြောင့် ဘယ်တုန်းကမှ မရွဲ့ခဲ့ပါဘူး။ ကျွန်မသာ သူ့အမြင်မှာ သနားစရာ ဖြစ်ဖြစ်သွားတာ။ လောကကြီးရဲ့ စိတ်ဓာတ်က တကယ်ကို အဖြောင့် အတိုင်းပါပဲ။
ပြီးတော့ သိလား…..။ ကျွန်မဘယ်တုန်းကမှ ကြိုးတွေကိုမချစ်တတ်ခဲ့ဘူး။ ကြိုးတွေကို မြင်တာနဲ့ ကျွန်မစိတ်ဟာ ပျော့ဖတ်လာတယ်။ ကျွန်မ နှလုံးသားဟာ နုံးချိလာတယ်။ ကြိုးတွေကိုမချစ်တတ်ခဲ့ပေမယ့် ကြိုးတွေကိုမုန်းဖို့တော့ မဖြစ်နိုင်ပါဘူး။ ကြိုးတွေမှာ အပြစ်မရှိဘူး ဆိုတာ ကျွန်မယုံတယ်။ တုတ်နှောင်သူနဲ့ တုတ်နှောင်ခံရသူသာအပြစ်ရှိတာ…။ ကြိုးတွေ….။ တွန့်လိမ် ကောက်ကွေးနေတဲ့ ကြိုးတွေ ကျွန်မသွားမယ့် လမ်းတစ်လျှောက် မြွေတွေလိုပဲရွစိတက်လို့။ ကြိုးတွေကိုဖယ်နေရတာနဲ့ ကျွန်မခရီးဟာ နှေးကွေးခဲ့ရပြီ။ ကျွန်မလမ်းဟာ ကြမ်းတမ်းခဲ့ရပြီ။ ထပ်ပြောပါဦးမယ်။ တကယ်တမ်းက ကြိုးတွေမှာအပြစ်မရှိဘူး။ ကြိုးတွေနဲ့မှ ဆော့ကစားချင်တဲ့ မိန်းမငယ်လေး တစ်ယောက်ဟာ ကြိုးတွေကြားမှာပဲလေးလံမှုံမှိုင်းနေရတာ သဘာဝကျပါတယ်။ သဘာဝတရားက တရားမျှတမှုလည်းရှိတယ်။ ကျွန်မ အတွက်တော့ သဘာဝတရားဟာမျက်စိနောက်စရာပဲ။ တစ်ခါတခါ အဲဒီလိုကြောင်ပါတယ်။
အရင်တုန်းကကိုယ့်ကိုယ်ကိုယ် သနားတယ်။ သနားတယ်ဆိုတာ ချစ်တာထက်တောင် ပိုနေသေးတဲ့ သဘောပဲ။ ကိုယ့် ကိုယ်ကိုယ် ချစ်တာဟာ အတ္တဆိုရင် ကျွန်မကအတ္တကိုတောင် မာရေကျောရေနဲ့ စောင်းငဲ့ကြည့်နေမယ့် မိန်းမမျိုး။
ထိကရုဏ်းပင်တွေကြားက မီးခိုတွေ အူနေတဲ့ ညနေခင်းတွေဆို ငယ်ဘ၀ကို သတိရတယ်။ မီးခိုတွေအူနေတာ ခြင်အန္တရာယ်ကို ကာကွယ်ဖို့လေ။ အဲဒီလိုပစ္စုပန်ကိုတည့်တည့် မကြည့်နိုင်တဲ့ လွန်မြောက်ခြင်းမျိုးနဲ့ အသက်ကို မြနေအောင် သွေးတယ်။ ကျွန်မပျော်တဲ့အခါ မျက်လုံးတွေ မှိတ်နေအောင် အားရပါးရရယ်ပြီး ကျွန်မမပျော်တော့တဲ့အခါ မျက်လုံးတွေ မှိတ်နေအောင် ခေါင်းငုံ့ နေတတ်တယ်။ ကျွန်မကျရှုံးတယ်။ ကျွန်မအောင်မြင်တယ်။ ပြန်ကျရှုံးတယ်။ အောင်မြင်တယ်။ ပြီးတော့ ရှုံးပြန်တယ်။ ကြာလာတော့ ကျွန်မအောင်မြင်တယ် ဆိုတာကိုမယုံတော့ဘူး။ အဲ့ဒီတော့မှပဲ ကျွန်မဆီကနေအရှုံးဟာဖယ်ခွာသွားတော့တယ်။ အောင်မြင်မှုက လက်တစ်ကမ်းမှာ…။ ဟုတ်ကဲ့ ကျွန်မမယုံတော့ပါဘူး။ တကယ်တမ်းတော့ အောင်မြင်မှုကိုမယုံတဲ့ စိတ်ဟာ ကျွန်မရဲ့ တစ်ကိုယ်ရည် ဝေဒနာ ပါပဲ။
ရေပေါ်မှာဂယက်တွေ ထနေတယ်။ စိတ်ပေါ်မှာဂယက်တွေ ထနေတယ်။ ရေပေါ်ကဂယက်က ကျွန်မလုပ်တာမဟုတ်ဘူး။ သဘာဝ တရားကြောင့် ဖြစ်ရတာ။ စိတ်ပေါ်ကဂယက်ကတော့ …။ ထင်တဲ့ အတိုင်းပါပဲ။ ဂယက်ထအောင် လုပ်ခဲ့တာ ကျွန်မကိုယ်တိုင်ပါ။ ကိုယ့်ဘ၀ ကိုယ် အဆုံးစီရင်မှုအတွက် ကျွန်မကတရားခံပါပဲ။ ဒါပေမယ့် ကျွန်မကိုဘယ်သူမှ လာမဖမ်းကြဘူး။ အဲဒီအတွက်လည်း ကျွန်မကျေနပ်မှု မရှိခဲ့ ပါဘူး။ ဘာလို့လဲဆိုတော့ အသက်ရှင်နေထိုင်ခဲ့သမျှ နေ့ရက်တိုင်းလိုလိုကျွန်မကိုယ်ကျွန်မမကျေမလည် စိတ်တွေနဲ့ အပြစ်ပေးနေရတာ တော်တော်ဆိုးဝါးတယ် မဟုတ်လား။ တစ်ကိုယ်လုံးမီးကျွမ်းလောင် မြိုက်နေတဲ့သူက ကျွန်မကို ပြုံးပြနေတယ်။ ကျွန်မထိတ်လန့်သွားတယ်။ ကျွန်မ၀န်းကျင်မှာ တစ်ကိုယ်လုံးလောင်မြိုက်နေသူတွေ အများကြီးတွေ့ လိုက်ရလို့ပဲ။ ခါးအောက်ပိုင်းတစ်ခုလုံး လောင်မြိုက်နေသူတွေ၊ ဦးခေါင်းတစ်ခုလုံးမီးစွဲနေတဲ့သူတွေ…၊ လက်တွေ မီးစွဲနေတဲ့သူတွေ…။ ခြေထောက်တွေ ပြာဖြစ်သွားတဲ့ သူတွေ….။ ဟုတ်တယ်။ ကျွန်မ ခြေဖ၀ါးပေါ်ကို မီးပွားလေးစင်သွားရုံလောက်နဲ့ ကျွန်မ ပြာမဖြစ်သင့်သေးဘူး။
နေ၀င် မိုးချုပ် ကျွန်မ ဆန္ဒတွေအတိုင်း ဖြစ်အောင်လုပ်နေပေမယ့် ဒီနေရာဟာ ကျွန်မ ဆန္ဒ မရှိတာတွေနဲ့ တည်ဆောက်ထားပြီးသား ရပ်ဝန်းတစ်ခုပါ။ မိန်းမတစ်ယောက်ရဲ့ အားနည်းချက်တွေကိုသာအမှတ်ရစေပြီးလူသားမဆန်စွာနေထိုင်လာမိတဲ့ ပြက္ခဒိန်တွေကို ကျွန်မ စုတ်ဖြဲခွင့် မရှိတော့ဘူး။
လှိုင်းကတော့ ထန်ပါစေ။ ဒါပေမယ့် မုန်တိုင်းကိုတော့ တားဆီးရလိမ့်မယ်။
မဖြစ်စလောက် ခွန်အားနဲ့ ဆိုပေမယ့် တကယ်တမ်းတော့ မိန်းမတစ်ယောက်ရဲ့ ခွန်အားဟာကြောက်စရာကောင်းလောက်အောင် ကြီးမားပါတယ်။ ယိမ်းထိုးနွဲ့နှောင်းနေတဲ့ ကန္တရပင်လေးပေါင်းများစွာ……။ တစ်ပင်တည်းကျန်ခဲ့တဲ့အချိန်အထိအင်အား ကြီးမားခဲ့ဖူးပါတယ်။ အသက်ကိုဖက်တွယ်ထားတဲ့ ဆဲလ်ငယ်လေးတွေဟာ မသဘာဝရဲ့ တွန်းလှန်ခြင်းအင်အားကြောင့် သန်မာလာခဲ့တယ်။ ကန္တရပင်လေးတွေ ဆက်လက် ရှင်သန်ပါစေ…။ ကျွန်မလည်းဘယ်လိုအကြောင်းနဲ့ ဖြစ်ဖြစ် ဆက်လက် ရှင်သန်ပါရစေ…။
‘မင်းဘ၀မှာ ဆက်လက် ရှင်သန်ချင်တယ်ဆိုရင် ငြင်းပယ်မှုတွေကိုလက်ခံရဲတဲ့ သတ္တိရှိရမယ်။ လောကဆိုတာ ငြင်းပယ်မှုတွေကို စိန်ခေါ်ဖို့ စောင့်နေတဲ့ အရပ်ပဲ။
မင်းက ငြင်းပယ်ခံရလိမ့်မယ်။ မင်းကိုယ်တိုင်ကလည်း ငြင်းပယ်လိမ့်မယ်။’
သစ္စာနီရဲ့ ပဉ္စရူပံကို ကျွန်မတွေ့လိုက်တယ်။ ကျွန်မ ဘ၀မှာ မငြင်းဆန်ခဲ့တာတွေ အများကြီးပဲ။ ငြင်းဆန်လိုက်ရင် ကျွန်မဒီထက် ပိုပြီးအဆင်ပြေသွားမှာပဲလို့ ဆွေးဆွေးမြည့်မြည့်နောင်တရမိတယ်။ ကျွန်မခုထက်ထိလည်း ငြင်းဆန်ခြင်း အတတ်ပညာရပ်ကို မကျွမ်းကျင် သေးဘူး။ ကျွန်မ ခြေဖ၀ါးပေါ် မီးစတွေ စင်နေတုန်းပဲ။ ဒါပေမယ့် သိလား…။ ငြင်းပယ်ခံရတာတွေတော့ ကျွန်မ ဘ၀မှာ ပိုများလာတယ်။ ကျွန်မအပြုအမူတချို့ကို ငြင်းပယ်ခံရတယ်။ ကျွန်မစိတ်အသွားအလာတွေကို ငြင်းပယ်ခံရတယ်။ ကျွန်မပျော်ရွှင်မှု အိပ်မက်ကလေးတွေ… ငြင်းပယ်ခံရတယ်။ ကျွန်မဖိတ်ခေါ်ခြင်းကို ငြင်းပယ်ခံရတယ်။ ကျွန်မ… ချစ်တတ်ခဲ့ခြင်းကို ငြင်းပယ်ခံရတယ်…။ ကျွန်မရဲ့ အာရုံစူးစိုက်မှု စာမျက်နှာတွေ ငြင်းပယ်ခံရတယ်….။ ကျွန်မရဲ့ ဖြစ်တည်မှု၊ ပြီးတော့ ကျွန်မရဲ့ ယုံကြည်မှုကို ကျွန်မအယုံကြည်ရဆုံးလူတွေဆီက ငြင်းပယ် ခံရတယ်။
ကျွန်မရဲ့ ငြင်းပယ်ခံရခြင်းစာမျက်နှာတွေ ခြစ်ထုတ်ပစ်လိုက်… ပါ… တော့… မယ်။
၂၉ နှစ်ရဲ့ မှတ်တိုင်တစ်ခုကို ကျွန်မစိုက်လိုက်တဲ့နောက် ရှေ့ဆက်ဖို့ အင်အားသစ်တွေနဲ့ အိုမင်းခြင်း အနက်ရောင်ကကြိုးဟာ ထိခတ်မိကြပြီ။ ကျွန်မအိုမင်းခြင်းကိုမငြင်းဆန်နိုင်ဘူး။ ကျွန်မနာကျင်မှု ဝေဒနာတွေကိုမငြင်းဆန်နိုင်ဘူး။ ပြီးတော့ ….. သွားတက်ကလေး လက်ခနဲ ဖြစ်သွားအောင် ပြုံးပြတတ်တဲ့ သေမင်းရဲ့ ဆွဲငင်အားကိုလည်း ငြင်းဆန်နိုင်မှာမဟုတ်ဘူး။
ဂြိုလ်နက္ခတ်တွေရဲ့စီးနင်းမှုကို ငြင်းဆန်ခဲ့တဲ့ အစိမ်းရောင်မိန်းမတစ်ယောက် အိမ်ရှေ့ကနေအိမ်နောက်ဖေးကိုလမ်းလျှောက်တယ်။ တာဝန်ဝတ္တရား စံနှုန်းထဲမှာခြေထောက်တစ်ဖက်ကိုစိမ်ပြီးအရာအားလုံးရဲ့ လွန်မြောက်ခြင်းမှာခြေထောက်တစ်ဖက်ဟာလွတ်လပ်နေပြန်တယ်။ အဲဒီမိန်းမကို ငြင်းဆန်ဖို့အတွက် မျက်လုံးပေါင်းများစွာဟာအရှိန်ယူနေကြပေါ့။
နှင်း…. ဆိုတဲ့ ခေါ်သံကြားတော့ ၂၉ နှစ်ရဲ့ နောက်ဆုံးစာမျက်နှာကိုအဆုံးသတ်ဖို့ ကျွန်မ ပြင်ဆင်ခဲ့ ပြီးပါပြီ….။
ရွှေပိုးအိမ် (ပဲခူး)
မိုးမခအွန်လိုင်းမဂ္ဂဇင်း
No comments:
Post a Comment