အက်ဆေး(၁၅)
____________
ပူလောင်အိုက်စပ်နေသော မိန်းမ
===================
ရွှေပိုးအိမ်(ပဲခူး)
.
ပူလောင်အိုက်စပ်နေတဲ့ နွေပါပဲ။ အသက်တွေ တစ်နှစ်ပြီးတစ်နှစ်ကြီးလာတိုင်း ကျွန်မအမြဲ ကြုံနေကျနွေပဲလေ။ သတ္တလောကလို့ အမည်တပ်လို့ ရမလား။ ကမ္ဘာကြီးလို့ ကျွန်မသုံးနှုန်းခွင့်ရှိမလား။ ကျွန်မပူလောင်အိုက်စပ်မှုဒဏ်ကိုခံစားနေရတာတော့ အမှန်ပဲ။
မျက်မှန်တစ်လက်လည်းလိုအပ်နေတယ်။ ကျွန်မမှာမျက်မှန်မရှိဘူး။ကျွန်မကွန်ပျူတာအရမ်းသုံးတယ်။ ဖုန်းအရမ်းသုံးတယ်။ စာအုပ် တွေဖတ်တယ်။ ကျွန်မမျက်လုံးတွေ ပူထူလာတဲ့အထိပဲဆိုပါတော့။ ကျွန်မကိုယ်ကျွန်မ ပြန်မြင်နေရတာကလည်းသိပ်တော့ ပုံမလာဘူး။ သစ်ရွက်တွေက တဝေ့ဝေ့ တ၀ဲဝဲနဲ့ အရင်နှစ်တုန်းကထက် ပိုပိုကြွေလာသလိုပဲ။ ကျွန်မ ၀မ်းနည်းချင်တော့ပါဘူး။ ကျွန်မ ၀မ်းနည်းစရာ အကြောင်းတွေ တော်တော်များများကို ကြုံလာခဲ့ပြီးပြီပဲ။ အရာရာဟာ ၀မ်းနည်းစရာအတိပဲလို့ မြင်နေတဲ့အထိ ကျွန်မစိတ်ဟာ မှိုင်းညှို့ခဲ့ဖူးပါ တယ်။ ကျွန်မကိုယ်ကျွန်မ စိတ်ဝေဒနာတစ်ခုခုစွဲကပ်နေသလားလို့ သံသယရှိလာတဲ့အထိပါပဲ။စိတ်ရောဂါကု ဆရာဝန်ကြီးတစ်ချို့ရဲ့ လိပ်စာ တွေ ဖုန်းနံပါတ်တွေ ကျွန်မ ကြိတ်ပြီးရှာဖွေနေမိတယ်။ အခွင့်ကြုံတိုင်းလည်း အဲဒီဖုန်းနံပါတ်တွေကို နှိပ်နေမိတယ်။
ဒါပေမယ့် ….ဒါပေမယ့် ကျွန်မသိနေတယ်။ အမှန်တရားဆိုတာကိုလည်းနားလည်နေတယ်။ မသိချင်ယောင်ဆောင်နေတာလည်း ဖြစ်နိုင်တယ်ပေါ့။ ဆိုလိုချင်တာ ကျွန်မကသိသိရက်နဲ့ မိုက်နေတာ။ အဲလိုအဓိပ္ပါယ်ကောက်လို့လည်း ငြင်းစရာတော့ မရှိပါဘူး။
ကျွန်မအဆင်ပြေပါတယ်။
။-----။
ကျွန်မအခန်းကသိပ်မကျယ်လှဘူး။ ရှိလှမှ ၁၀ပေအတိုင်းအတာပေါ့။ အရှေ့နဲ့အနောက် လမ်းလျှောက်ဖို့လူသွားလမ်းလေးဖယ်ပြီးရင် တိုက်ခန်းရဲ့ ရှေ့ဆုံးခန်းမှာဘုရားစင်ရှိမယ်။ စာအုပ်စင်ရှိမယ်။ စာရေးစားပွဲလေးတစ်လုံးရှိမယ်။ စားပွဲပေါ်မှာ လက်တော့လေးတစ်လုံး တင်ထားမယ်။ ဘေးနားမှာပွယောင်းနေတဲ့ စာအုပ်တွေရှိမယ်။ ပလတ်စတစ်နဲ့ လုပ်ထားတဲ့ ကော်ထိုင်ခုံသုံးခုံလောက်တော့ ရှိတယ်။ အဲဒါ တောင် ဟိုတလောကမှ ၀ယ်ဖြစ်တာ။ ၀ယ်ဖြစ်ရတာလည်းအမေ့ကြောင့်ပေါ့။ အမေအိမ်လာတဲ့အခါ သူ့ မိတ်ဆွေနှစ်ယောက်ပါ ခေါ်လာ တယ်။ ဘုရားက ပြန်လာရင်းနဲ့ ၀င်လာကြတာတဲ့။ ကျွန်မသူတို့ကိုနေရာထိုင်ခင်းပေးဖို့ မလုပ်တတ်တော့ဘူး။ အမေကဘာမှ မဖြစ်ပေမယ့် ပါလာတဲ့ ဧည့်သည်တွေက ကြမ်းပြင်ပေါ်ပဲထိုင်ရတော့မလိုလို ကျွန်မစာရေးစားပွဲကကုလားထိုင်မှာပဲထိုင်ရတော့မလို။ မတ်တပ်ကြီးရပ်လို့။ အခြေအနေ ရိပ်စားမိတဲ့ အမေကပဲ မြန်မြန် စကားဖြတ်ပြီးသူ့ ဧည့်သည်တွေ ပြန်ခေါ်သွားတယ်။ အိမ်ရောက်ရောက်ချင်း ကျွန်မကို ဖုန်း ဆက်ပြီးပြောပါလေရော။ နင်က လူ့အသိုင်းအ၀ိုင်းအပြင်ဘက်က သတ္တ၀ါလားတဲ့။ ကျွန်မစိတ်မဆိုးဘဲ ရယ်မိတယ်။ အမေပြောတာလည်း ဟုတ်တာပဲလေဆိုတော့ ဖုန်းကိုချက်ချင်းချသွားတယ်။ နောက်နေ့တော့ ကျွန်မနေတဲ့ ရပ်ကွက်နားက ဈေးထဲမှာ အစိမ်းရောင် ပလတ်စတစ် ကော်ထိုင်ခုံလေးတွေ ၀ယ်ဖြစ်တယ်။
ပြီးတော့ ကျွန်မအခန်းမှာတီဗွီမရှိဘူး။ ဒုတိယအခန်းက ကျွန်မအိပ်ခန်း။ တစ်ယောက်အိပ် ကုတင်တစ်လုံးရယ်။ အ၀တ်အစားထည့်ဖို့ ဗီဒိုတစ်လုံးရယ်။ ရေခဲသေတ္တာသေးသေးလေးရယ်။ တတိယအခန်းကတော့ ထမင်းစားဖို့ နေရာတစ်နေရာရယ် ချက်ပြုတ်ဖို့ နေရာ တစ်နေရာ ရယ် ပြီးတော့ ရေချိုးခန်းနဲ့ အိပ်သာတစ်ဆက်တည်းအခန်းတစ်ခန်း။ဒါပါပဲ။ သိပ်ပြီးထူထွေဆန်းပြားစရာလည်းမရှိဘူး။ ငါးလွှာတိုက်ခန်းရဲ့ လေးလွှာမြောက် အခန်းကျဉ်းတစ်ခန်းပါပဲ။
ကျွန်မအတွက် အသက်ရှူချောင်စေတာကတိုက်ခန်းရှေ့မှာဝါးရန်တာလေးတစ်ခု ရှိနေတာပဲ။ ကျွန်မအဲဒီဝါးရံတာက နေအောက် ဘက်က မြင်ကွင်းတွေကိုငေးလို့ရတယ်။ ကောင်းကင်ရဲ့ နေ့စဉ် ပြောင်းလဲမှု အဆင့်ဆင့်ကို ကြည့်လို့ရတယ်။ ငှက်ကလေးတွေအတွက် စပါးတွဲလေးတွေ ချိတ်ပေးလို့ရတယ်။ ညဘက်တွေ အရမ်းအိုက်စပ်လွန်းရင် ကျွန်မကော်ခုံတစ်လုံးဆွဲပြီး ၀ါးရန်တာ အပြင်ဘက် ထွက်ထိုင်နေ လေ့ရှိတယ်။ ၀ါးရန်တာကနေ ကျွန်မစာရေးတဲ့ စားပွဲကိုပြတင်းပေါက်တစ်ခုနဲ့ ဆက်စပ်ပေးထားတယ်။ ကန့်လန့်ကာ အပြာနုရောင်လေးတပ် ထားတယ်။ ကျွန်မအနေနဲ့တော့ပြီးပြည့်စုံသလိုပါပဲ။ မပြီးပြည့်စုံဘူးလို့ထင်တိုင်း ပြီးပြည့်စုံတယ်လို့ ထင်လာစေတဲ့ အပြင်အဆင်ပေါ့။ ဘုရားစင် ပေါ်က ဗုဒ္ဓဆင်းတုတော်လေးက ကျွန်မအမေရဲ့ အမွေပဲ။ ကြည်ညိုစရာကောင်းတယ်။ ဘုရားပန်းအိုတစ်လုံးပေါ်မှာ နှင်းဆီတွေ လှူထား တယ်။ မနေ့ညနေကမှ ကျွန်မတင်ထားတဲ့ ရေမွှေးနှင်းဆီတွေပေါ့။ ဒါပေမယ့် လန်းဆန်းမှုကတော်တော် လျော့နေပြီ။ ဒါလည်းပူလွန်းလို့ နေမှာပါ။ သောက်တော်ရေတစ်ခွက် ကပ်ထားတယ်။ ပုတီး၂ကုံး၊ ၁၀၈လုံးပုတီးရယ်၊ ကိုးလုံးပုတီးရယ်။ ဘုရားမီးပူဇော်ထားတဲ့ မီးလုံးလေး ရယ်….။ ကျွန်မစိတ်ထဲကုသိုလ်ယူနိုင်သလောက်ပေါ့။ ဘုရားရှိခိုးတဲ့ အလုပ်ကိုပုံမှန် မလုပ်ဖြစ်ဘူး။ပုတီးတွေ ချိတ်ထားပေမယ် မစိပ်ဖြစ်ဘူး။ ဂါထာရွတ်တာလည်းမလုပ်ဖြစ်ဘူး။ ဘုရားသောက်တော်ရေ၊ ပန်း၊ သစ်သီးဆွမ်းတော့ ပုံမှန် ကပ်ဖြစ်တယ်။
ဓာတ်ပုံတစ်ပုံရှိတယ်။ ထူးထူးခြားခြား ကျွန်မကြည့်ချင်မှယူကြည့်တဲ့ ဓာတ်ပုံပေါ့။
အများအားဖြင့် ကျွန်မဓာတ်ပုံကိုကျောခိုင်းထားတဲ့ပုံစံမျိုးလုပ်ထားလေ့ရှိတယ်။ ဓာတ်ပုံထဲမှာကျွန်မထက် အသက်ကြီးတဲ့ ယောက်ျား တစ်ယောက်ရယ်။ ခှုစ်နှစ်အရွယ် မိန်းကလေးတစ်ယောက်ရယ်၊ ပြီးတော့ မရယ်မပြုံးမျက်နှာအသေနဲ့ မိန်းမတစ်ယောက် တွေ့ရလိမ့်မယ်။ ကျွန်မ လားဆိုတော့ လက်မခံချင်ဘူး။ ဒါပေမယ့် ဟုတ်နေတယ်လေ။ ထားပါတော့။ ကျွန်မမျက်နှာကအဲဒီလိုမျက်နှာသေမျိုးပဲ။ လက်မခံချင် စရာတော့ မရှိပါဘူး။ ကျွန်မလက်မခံချင်စရာတွေ အများကြီးရှိသေးတယ်။ ကျွန်မကမိသားစုနဲ့ ဓာတ်မတည့်တဲ့ မိန်းမတစ်ယောက်လေ။ ဓာတ်ပုံတွေက ကျွန်မအကြောင်းပြောပြပေးမယ်ဆိုရင်တော့ ကောင်းတာပေါ့။တစ်ခုတော့ ကြိုပြောပြထားချင်တယ်။ ဓာတ်ပုံတွေက ကျွန်မ မဟုတ်ဘူး။ ဓာတ်ပုံတွေထဲကအရိပ်တွေဟာအမှတ်တရတစ်ခုခုအတွက် ရာထားတဲ့ ခြစ်ရာလေးတွေပဲ။ အမှန်ကမေ့သွားမှာစိုးလို့ပါ။ ကျွန်မက ကျွန်မ ဖြစ်တည်မှုထဲမှာဘောင်အပြင်ထွက်နေတဲ့ သူမျိုးပဲ။
ကျွန်မပူလောင် အိုက်စက်လာပြန်ပြီ။
ရေးလက်စစာမူကို ခဏရပ်လိုက်တယ်။ ရေခဲသေတ္တာသေးသေးလေးထဲက ရေခဲရေဗူးကို ထုတ်ယူလိုက်တယ်။
အာ … မအေးဘူး။ ဘယ်အေးမလဲရေခဲသေတ္တာရဲ့ ပလပ်ပေါက်ကို ကျွန်မပလပ်ကျွတ်ပြီး ဖြုတ်ထားမိပြန်တာကိုး။ သေလိုက်ပါ တော့။ မအေးတော့လည်းဘယ်တတ်နိုင်တော့မလဲ။ ခုချိန်မှာ ကျွန်မလည်ချောင်းတစ်လျှောက် ပူထူနေတဲ့ အစိုင်အခဲတွေ…။ များနေပြီ။ သိပ်ကိုများနေပြီ။ ကျွန်မရေသောက်မှပဲရတော့မယ်။
ရေ… ရေ…။ ပူလောင်အိုက်စက်နေတဲ့ မိန်းမတစ်ယောက်အတွက် ရေကဘယ်မှာလဲ။
။-----။
တံခါင်းခေါက်တယ်။ ကျွန်မ ကြားတယ်။ ဒါပေမယ့် ဆက်ထိုင်နေတုန်းပဲ။
ဒေါက်ဒေါက်…..။
ကျွန်မထိုင်နေရတာကိုပုံစံမပြောင်းချင်ဘူး။
ဒေါက်ဒေါက်…..။
ဆက်ပြီး ငြိမ်သက်နေမိတယ်။
သုံးခါမြောက် ခေါက်အပြီးမှာတံခါးခေါက်သံမကြားရတော့ဘူး။
အဲဒီအတွက် ကျွန်မမှာစိုးရိမ်စိတ်တော့ ရှိနေတာအမှန်ပဲ။ ကျွန်မအတွက် အရေးကြီးတဲ့ သတင်းတွေ ယူဆောင်ပေးလာမှာလား။ ကျွန်မအတွက် မထူးမခြားနားတဲ့ လာရောက်ခြင်းမျိုးလား။ ကျွန်မကိုစိတ်အနှောက်အယှက်ပေးမလို့လား။ အသိပေးစရာတစ်ခုခုရှိလို့လား။ အဓိက စိုးရိမ်မိနေတာကသမီးနဲ့ ပတ်သက်လို့။ ကျွန်မသမီးကိုချစ်တယ်။ သမီးကလည်း ကျွန်မကိုချစ်တယ်။ သမီးနဲ့ပတ်သက်ပြီး စိုးရိမ် သောကတွေ ခဏခဏ ဖြစ်ဖူးတယ်။ သမီးမွေးတုန်းကဆို ကျွန်မဘ၀မှာ တကယ့် ဒုက္ခထုတ်ကြီးတစ်ခုလိုခံစားခဲ့ရတယ်။ ငြိမ်သက်တိတ် ဆိတ်လွန်းတတ်တဲ့ စရိုက်ဟာသမီးနဲ့ကျ ဆက်ပြီးမပီပြင်နိုင်တော့ဘူး။ သမီးရဲ့မျက်နှာဟာ ကျွန်မနဲ့ မတူဘူး။ ကျွန်မ မနှစ်သက်တဲ့ အသံပြဲပြဲတွေကို သမီးကပိုင်ဆိုင်ထားတယ်။ ညဘက် ကျွန်မတွေးနေလို့ ငေးနေလို့ မရတော့ဘူး။ ကျွန်မတော်တော် ကြိုးစားယူခဲ့ရတယ်။ မိခင်ဘ၀ဟာ တော်တော် မလွယ်တာပဲလို့ သက်ပြင်းခဏခဏချခဲ့မိတယ်။ မိခင်ဖြစ်ဖို့ ကျွန်မဟာအရည်အချင်းလည်းလုံလုံလောက်လောက် မရှိခဲ့ဘဲနဲ့များ သမီးကိုလူလောကထဲခေါ်လာရဲတယ်။ သိပ်မိုက်တဲ့ မိန်းမလို့ ကျွန်မမကြာခဏရေရွတ်မိခဲ့သေးတယ်။ ဒါပေမယ့် သမီးကို ကျွန်မချစ်တယ်။ သမီးအပြုံးလေးတွေကိုမကြာခဏငေးနေရတာကျေနပ်စရာ။ သမီးကစကားလည်းများတယ်။ သွက်လည်းသွက်တယ်။ ပြီး တော့ ရှပ်ပြာပြာနိုင်သေးတယ်။
ဟော့… ကျွန်မ ပြုံးနေပြီ။ ကိုယ့်ကိုယ်ကိုယ် ပြန်သတိထားမိတယ်။ သမီးအကြောင်းတွေးလိုက်မိတာနဲ့ ကျွန်မ နှုတ်ခမ်းဟာ ပျားရည်ပုလင်းမှောင်ထားသလို ချိုချိုမြိန်မြိန် ပြုံးမိလိုက်တာပါပဲ။ ကျွန်မကို ပြုံးစေနိုင်တဲ့ သမီးလေး…။ သတိရလိုက်တာ။
ကျွန်မမှောက်ထားတဲ့ဓာတ်ပုံကို ပြန်လှန်လိုက်တယ်။ သမီးတစ်ယောက်တည်းကိုကွက်ပြီးဘေးနားက နှစ်ယောက်ကိုလက်နှစ်ဖက်နဲ့ ဖုံးပြီး ကြည့်လိုက်တယ်။ သမီးမျက်နှာလေးကအပြစ်ကင်းစင်းလို့…။
။-----။
ကျွန်မအင်တာနက်ကသတင်းတွေကိုဖတ်နေတယ်။ သတင်းတွေကလည်းစုံလို့စေ့လို့။ ဒီနှစ်ရဲ့ အကယ်ဒမီပေးပွဲသတင်းက အဟော့ ဆုံးပဲ။ အကယ်ဒမီမရတဲ့သူကရတဲ့သူကိုမနာလိုဖြစ်ကြပေါ့။ အနိမ့်အမြင့် မမှန်တဲ့စကားလုံးတွေကို တောင်စဉ်ရေမရပြောကြပေါ့။ အကယ်ဒမီ ရတဲ့သူက မရထိုက်ဘူးဆိုတဲ့ စကားအပုပ်အသိုးတွေ။ အကယ်ဒမီရတဲ့သူဟာရဲရဲမပျော်ရဲတော့ဘူး။ အကယ်ဒမီရုပ်ထုကြီး ပိုက်ပြီး စကားလုံး လှိုင်းမှာ မြှုပ်ချည်တလှည့် ပေါ်ချည်တလှည့်။
ရယ်ရတယ်။ အကယ်ဒမီဟာလူတွေရဲ့ ဘ၀မှာ တော်တော် အရေးပါပုံပဲ။ အကယ်ဒမီ အကြောင်းတွေချည်း တစ်ယောက်တစ်မျိုး မရိုးနိုင်အောင် ဖေ့ဘုတ်တခွင်မှာတက်လာကြတယ်။ ကျွန်မကြောင်သွားတယ်။ ကျွန်မအကယ်ဒမီပေးပွဲလည်းမကြည့်ဖြစ်ပါဘူး။ မကြည့်ဘူးဆို ကျွန်မမှာတီဗွီမရှိဘူးလေ။ တီဗွီ တစ်လုံးကို ကျွန်မမပိုင်ဆိုင်ဘူး။ ဒါက ကျွန်မကျေနပ်လို့ ပိုင်ဆိုင်ဖို့ မကြိုးစားတာ။ တီဗွီတစ်လုံးဝယ်ဖို့ ကျွန်မမှာပိုက်ဆံရှိပါတယ်။ ဒီထက်ပိုပြီးလူတွေနဲ့ အဆက်အဆံမလုပ်ချင်တော့လို့များ မ၀ယ်ဖြစ်တာများလား။ မသိတော့ပါဘူး။ ကျွန်မဆိုတဲ့ မိန်းမကို အကဲခတ်ဖို့ဆိုတာ ကျွန်မအတွက် တကယ် အခက်ခဲဆုံးပါပဲ။
အင်တာနက်တောင် ကျွန်မ စာရေးဖို့အတွက် လိုအပ်တဲ့ သတင်းအချက်အလက်တွေ ရှာဖွေနေရလို့သာ သုံးဖြစ်နေတာ။ ကျွန်မဖေ့ဘုတ်ရဲ့ ပရိုဖိုင်းကလည်းကြွေနေတဲ့ နှင်းဆီပန်းအနက်ရောင်ပုံ။ ကျွန်မမှန်း သိကြတဲ့သူလည်းရှိမှာပေါ့။ ကျွန်မစာရေးတယ်လေ။ ကျွန်မရေးတဲ့စာကလည်း ကျွန်မကိုယ်ကျွန်မတောင် တစ်ခါတလေ နားမလည်ပါဘူး။ ဒါပေမယ့် အချို့ ဝေဖန်ရေးဆရာတွေကတော့ ကျွန်မ ရေးထားတာတွေကိုအသေးစိတ်တွေ ခံစားပြီးဆောင်းပါးပုံစံမျိုးတွေ ရေးကြတယ်။
ကျွန်မဘ၀ ရပ်တည်ဖို့ အလုပ်တစ်ခုလုပ်တယ်။ ဘာသာပြန်ဆရာပေါ့။ အင်္ဂလိပ်ကနေ မြန်မာ။ မြန်မာကနေအင်္ဂလိပ်။ အဓိက ကတော့ NGO တွေနဲ့ ချိတ်ဆက်ပြီးလုပ်ရတာပေါ့။ ကျွန်မအတွက် အဆင်ပြေပါတယ်။ ကျွန်မသမီးအတွက်လည်း ထောက်ပံ့မှု ပေးနိုင်တဲ့ အလုပ်ပေါ့။ ကျွန်မတစ်ကိုယ်ရေစာအတွက် ငွေကအရမ်းကြီးတော့ မလိုဘူး။ တစ်ခါတလေတော့ မဖြစ်မနေလိုပါတယ်။ လိုတဲ့အခါ အလုပ် ပိုလုပ်ပစ်လိုက်တာပဲ။မလိုဘူးဆိုရင်လည်း ကျွန်မကခပ်ပေါ့ပေါ့နေတယ်။တကယ့်ကိုပေါ့ပေါ့နေပေါ့ပေါ့စားမိန်းမတစ်ယောက်ပါပဲ။ သူများတွေ က ဝေဖန်လည်း ကျွန်မကမနာတတ်တော့ဘူး။ ဟုတ်လည်းဟုတ်နေတာကိုး။
။-----။
ကျွန်မဒီနေ့ အလုပ်ကိစ္စနဲ့ မြို့ထဲရောက်ဖြစ်တယ်။ အဖြူရောင်လက်ရှည်အကျီခပ်ပါးပါးရယ်၊ အနက်ရောင်အောက်ခံနဲ့ အဆင်လှလှ ကချင်ထမီတစ်ထည်ရယ် စာရွက်တွေ စာအုပ်တွေ စုံပလုံနေအောင် ထည့်ထားတဲ့ ဘေးလွယ်ရတဲ့ ချည်အိတ်တစ်လုံးရယ်။ အုပ်ထုတ်အဖြူ ရောင်ခပ်ကြီးကြီးဆောင်းလို့။
ခိုတွေ…. ။
ကျွန်မရပ်ကြည့်နေလိုက်တယ်။ ခိုစာရောင်းတဲ့ ကလေးမက ကျွန်မကို ပြန်ကြည့်နေတယ်။ သူ့မျက်လုံးထဲကအဓိပ္ပာယ်ကို ကျွန်မ ပြန်ကောက်ဖို့ မစဉ်းစားချင်တော့ဘူး။ ခိုစာဝယ်စေ့ချင်နေတယ်ဆိုတာ သိနေတာကိုး။ ကျွန်မကိုယ်တိုင်ကလည်း ခိုတွေကိုအစာ ကျွေးချင်နေ ပါတယ်။ ဒါပေမယ့် ခိုတွေကိုလည်းခပ်ကြာကြာ ကြည့်နေချင်သေးတယ်။
ခိုတွေ ခိုတွေ… အစားစားနေကြတယ်။
အလုအယက်ပဲ။ ခိုစာကျွေးနေတဲ့ လူငယ်စုံတွဲလေးဘေးမှာတောင်ပံတွေ တဖျတ်ဖျတ်နဲ့။ စပ်စလူးခါနေတယ်လို့ ကျွန်မသုံးနှုန်း လိုက်ရင် ရင့်သီးသွားမလား။ သုံးပြီးနေပြီလား။ ဆောရီးပါနော်။ ကျွန်မကတစ်ခါတလေ တော်တော် အူကြောင်ကြောင်နိုင်တာ။ ခိုတွေ တည်ငြိမ်သွားတဲ့အထိ ကျွန်မစောင့်ဖို့ လိုအပ်လို့လား။
ပြီးတော့ လူငယ်စုံတွဲလေးတစ်ယောက်ခါးကိုတစ်ယောက်ဖက်လို့ ခိုတွေကို ကျောခိုင်းသွားတယ်။
ကျွန်မ ခိုစာဝယ်လိုက်တယ်။ ခုတော့ ကျွန်မတစ်ယောက်တည်း…. ။ ခိုတွေ အလယ်မှာ…။ ခိုတွေကတော့ လူငယ်စုံတွဲလေးကျွေးခဲ့ တဲ့ ပြောင်းဖူးစေ့လေးတွေကို အလုအယက်ကောက်လို့ ကောင်းတုန်း။
ခုတော့ ခိုစာရောင်းတဲ့ ကလေးနဲ့ ခိုတွေအလယ် ကျွန်မတစ်ယောက်တည်း….။
ခိုတွေကလည်းတဖျတ်ဖျတ်နဲ့။
ကျွန်မကိုသူတို့ သိပ် စိတ်မရှည်ကြဘူးနဲ့ တူတယ်။
ကုသိုလ်လုပ်ချင်တဲ့စိတ်နဲ့ ကျွေးနေတာမဟုတ်ဘူးဆို။ ကျွန်မစိတ်အတိုင်းလိုက်လုပ်နေတာဆို။
ခိုတွေ သိသွားမလား။ ကျွန်မကိုသူတို့ မုန်းသွားကြမလား။ ခိုတွေမှာအမုန်းတရားရှိမလား။
သံယောဇဉ်တော့ ရှိတတ်ပုံရတယ်။
ကျွန်မထင်တာပြောတာနော်။
ခိုတွေကိုအစာကျွေးပြီးတော့လမ်းဟိုဘက်ခြမ်းဆီကိုမျက်လုံးကရောက်သွားတယ်။
ကားအဖြူလေးတစ်စင်းကော်ဖီဆိုင်လေးရှေ့ရပ်တယ်။ အမျိုးသားတစ်ယောက် အမျိုးသမီးလှလှတစ်ယောက် မိန်းကလေးငယ်ငယ် လေးတစ်ယောက် ကားပေါ်ကဆင်းလာတယ်။ ကျွန်မသေချာကြည့်လိုက်တော့ မိန်းကလေးငယ်ငယ်လေးက ကျွန်မမှောက်ထားတဲ့ ဓာတ်ပုံထဲ က သမီးလေး။ ဒါဆိုဘေးနားကအမျိုးသားကအရင်က ကျွန်မယောက်ျားပေါ့။ အော်……။
သိပ်လှတဲ့ အမျိုးသမီးက ကျွန်မသမီးကို ကြင်ကြင်နာနာဆက်ဆံနေတယ်လို့ သိလိုက်တယ်။ ကျွန်မသမီးမျက်နှာလေးက ပြုံးနေ တာပဲ။ သူတို့ အဆင်ပြေကြပုံပါပဲ။ ဒါပေမယ့် သမီးရဲ့ ဘ၀အတွက် ကျွန်မထောက်ပံ့နေမှုကိုမစွန့်လွှတ်နိုင်ဘူး။ သမီးရဲ့ ရှင်သန်မှုတွေထဲမှာ ကျွန်မရဲ့ ချွေးစက်တွေ ပါစေ့ချင်တယ်။ ဒါကို ကျွန်မယောက်ျားဖြစ်ခဲ့ဖူးသူကလည်းခွင့်ပြု ပေးထားပါတယ်။ ကျွန်မမိဘတွေကလည်း ကျွန်မ ယောက်ျားနဲ့ ခုထိအဆင်ပြေကြတယ်။ သမီးကို ကျွန်မမိဘတွေကခေါ်ထားလိုက် ကျွန်မယောက်ျားမိသားစုကခေါ်ထားလိုက်နဲ့ သမီးကတော့ အချစ်တွေ အပြည့်အ၀ခံနေရတဲ့အပြင် ဂရုဏာတရားဆိုတာကိုပါ အပိုရလိုက်သေး။တစ်ခုပဲတစ်ခုပဲ…။ သမီးရဲ့ အိပ်စက်ချိန်တွေမှာ ကျွန်မ ရင်ငွေ့ကိုမရတာကလွဲလို့ပေါ့။
။-----။
ဒီညတော့ ကျွန်မဘုရားရှိခိုးတယ်။ ပုတီးလည်းစိပ်ဖြစ်တယ်။ ကျွန်မမိဘရယ်၊ ကျွန်မသမီးရယ်။ ကျွန်မယောက်ျားဖြစ်ခဲ့ဖူးသူရယ်ကို ရည်မှန်းပြီးမေတ္တာတွေပို့တယ်။ ကျွန်မကိုယ်ကျွန်မလည်းမေတ္တာပို့တယ်။
ကျွန်မမျက်မှန်တစ်လက်လုပ်လာတယ်။ ကျွန်မမျက်လုံးတွေကို ဒီထက်ပိုပြီးဒုက္ခပေးလို့ မဖြစ်တော့ဘူးလေ။ ကျွန်မမျက်မှောင်တွေ ကုတ်ကုတ်နေရတာနဖူးကြောတွေပါ တွန်လာသလိုပဲ။ ကျွန်မမျက်မှန်ကိုတပ်ကြည့်လိုက်တယ်။ အနက်ရောင်ကိုင်းနဲ့ ခပ်ကြီးကြီးမျက်မှန် တစ်လက်။
ဘုရားပန်းတွေ လဲလိုက်ပြီ။ ရေမွှေးနှင်းဆီတော့ မဟုတ်ဘူး။ အနီရောင် နှင်းဆီတွေ။ အနီရောင်နှင်းဆီတွေက ရေမွှေးနှင်းဆီ တွေ ထက် ပိုပြီး ကြာကြာခံတယ်တဲ့။ မနွမ်းလွယ်ဘူးပေါ့။ ဘုရားကို ကြာကြာခံတဲ့ပန်းတွေ ပြောင်းပြီးလှူနေတာဘာသဘောလဲ။ ရှင်တို့ ထင်တဲ့ အတိုင်းပဲ။ ငွေရေးကြေးရေးခြွေတာတဲ့ သဘောလည်းပါတာပေါ့။ ဒါပေမယ့် အဲဒီတစ်ခုတည်းလည်း မဟုတ်ပါဘူး။ ဒီနှစ်တွေမှာ ကျွန်မအနီ ရောင်ကိုပို ကြိုက်လာတယ်။
အဲဒီတော့ အနီရောင်က ကျွန်မစိတ်ကြိုက်အရောင်ပေါ့။အရာရာက ကျွန်မစိတ်ကြိုက်ပဲ။ ကျွန်မမှာပိုင်ဆိုင်တာမရှိဘူးလေ။ ကျွန်မ စိတ်ကြိုက်တော့ ဖြစ်ရမယ်ပေါ့။
ဒါ ၀တ္တုတစ်ပုဒ်လား။ အရေးအသားတစ်ခုလား။
စကားပြောသံတော့မပါဘူး။ ဒါလည်း ကျွန်မစိတ်ကြိုက်ပါပဲ။
သတ္တလောကကြီးအနေနဲ့လည်းကျွန်မကိုရော ကျွန်မအရေးအသားကိုပါစိတ်ကြိုက် ခေါင်းစဉ်တပ်နိုင်ပါတယ်။
ရွှေပိုးအိမ်(ပဲခူး)
၅-၄-၂၀၁၆
မိုးမခအွန်လိုင်းမဂ္ဂဇင်း
Beauty မဂ္ဂဇင်း
No comments:
Post a Comment