" အဆိပ်တွေနှင့် လူတွေ "
==============
#လင်္ကာရည်ကျော်
(၁)
သူက ဆရာဝန်တစ်ဦး ဖြစ်သည်။
ဆရာဝန်တစ်ဦးမို့ လူတို့ ပတ်ဝန်းကျင်ဝယ် လူကို အဆိပ်သင့်စေသော အရာ ဘာတွေ ရှိသည်ဆိုတာကို သူများထက်တော့ နည်းနည်းပိုသိသည်ဟု ကိုယ့်ကိုယ်ကိုယ် ယုံကြည်ထားသူ တစ်ဦးလည်း ဖြစ်သည်။
လူတွေကလည်း လူတွေပင်။
အဲသည့် အဆိပ်တွေနှင့် ကင်းပြီး နေကို မနေတတ်ကြ။
(၂)
သူ တာဝန်ကျနေသည့် အညာမြို့ကလေးက ဖွံ့ဖြိုးမှု အနည်းငယ် နောက်ကျနေသော မြို့ကလေး ဖြစ်သည်။
သည်မြို့ကလေးကို သူ တာဝန်ကျတော့ သူ သွားမှာ မဟုတ်၊ သူ ထွက်ပြေးလိမ့်မည်ဟု ထင်ကြသူ အများအပြား ရှိသည်။ သို့သော် သူက သွားရုံသာမက အနေပင် ကြာခဲ့သည်။
ပျော်၍တော့လည်း မဟုတ်။
သူက မသွားချင်သည့် နေရာကို သွား၊ သူများ မမြင်ချင်တာကို မြင်၊ သူများ မကြားချင်တာကို ကြား၊ သူများ မထိတွေ့ချင်တာကို ထိတွေ့၊ သူများ မရှူချင်သည့် အနံ့ကို ရှူ၊ သူများ မပြောချင်သည့် စကားကို ပြော။
ဆရာဝန် ဖြစ်ပြီ ဆိုကတည်းက သည်တာဝန်တွေ ကပ်ပါလာပြီးသားဟု သူ ယူဆသည်။ ငြင်းစရာ မရှိ။
သို့သော် အဆိပ်ကို သာမန် လူတစ်ယောက်ထက် နည်းနည်းပို၍ နားလည် ကျွမ်းကျင်သူပီပီ အဆိပ်ကိုတော့ တတ်နိုင်သမျှ ရှောင်ချင်သည်။ လူကို အဆိပ်သင့် မခံချင်။
(၃)
သည်မြို့ကလေးက တော်တော် ဖုန်ထူသော မြို့ကလေး ဖြစ်သည်။ အိမ်ရှေ့ခန်းက တစ်နေ့ သုံးခါလောက် တံမြက်စည်း လှည်းတာတောင် ဖုန်က တရှပ်ရှပ်။
သို့သော် စက်မှု လက်မှု လုပ်ငန်းများ မြို့ထဲမှာ မရှိသလောက် ကားကလည်း ရှား။ ကိုယ်ပိုင် မီးစက် ထားသူကလည်း ရှားမို့ လေထဲမှာ ဓာတုဗေဒ အညစ်အကြေးတော့ သိပ်ရှိဟန် မတူ။
လေက အဆိပ် သိပ်မသင့်သေးပေါ့။
ဖုန်ကလည်း အဆုတ်ကို ဒုက္ခပေးတာပါပဲ။ သို့သော် အဲသည့်ဖုန်က မြင်သာထင်သာ လာနေတာ ဖြစ်သည်။ ကြောက်တတ်လျှင် နှာခေါင်းကို လက်ကိုင်ပဝါကလေးနှင့် အုပ်လိုက်၍ ရသည်။ ခွဲစိတ်ခန်းသုံး နှာခေါင်းစည်းကလေး စည်းထားလည်း ရသည်။
မြင်ရသည့် အဆိပ်က သိပ်ကြောက်စရာ မလို။
မမြင်နိုင်သည့် အဆိပ်ကသာ ကိုယ်မသိဘဲ တစိမ့်စိမ့်ဝင်၍ တွယ်မှာ မဟုတ်ပါလား။
သည်တော့ ဖုန်ကို သူ သိပ်မကြောက်။
ဖုန်ထူသော မြို့ကလေးက ဖုန်ထူသော လမ်းကလေးကို လျှောက်၍ သူငှားရမ်းနေထိုင်ရာ ဖုန်ထူသော အိမ်ကလေးမှ ဖုန်ထူသော ဆေးရုံသို့ သူ နေ့စဉ် လမ်းလျှောက်၍ သွားသည်။
(၄)
လမ်းမှာ လက်ဖက်ရည် ဆိုင်ကလေးတစ်ခုကို ဖြတ်ရသည်။ လက်ဖက်ရည်ဆိုင်က ပလက်ဖောင်းအပြည့် နေရာယူထားသည်မို့ လက်ဖက်ရည်ဆိုင်ကို ရှောင်၍ လမ်းလျှောက်ရန် ဖြစ်မှ မဖြစ်နိုင်ဘဲ။
လက်ဖက်ရည်ဆိုင်ထဲမှ ဖြတ်လျှောက်ရတာလည်း တကယ်တော့ သူ့အတွက် ပြဿနာ မရှိသင့်ပါ။ သည်ဆိုင်က လက်ဖက်ရည်ကိုပဲ သူ့တပည့်ကလေး နံနက်တိုင်း သွားဝယ်၍ သူ့ကို တိုက်နေသည်ပဲ။
ခက်တာက လက်ဖက်ရည်ဆိုင် ထိုင်နေသူတွေက လက်ဖက်ရည်ချည်း သက်သက် သောက်နေကြတာမဟုတ်။
အဆိပ်တွေ ဖွာရှိုက်နေကြတာ ဖြစ်သည်။
ကိုယ်တိုင် မဖွာရှိုက်တတ်ပါဘဲနှင့် အဲ့သည်အဆိပ်တွေ ဖွာရှိုက်နေသူတွေဘေးက ဖြတ်သွားရင်း ရှူမိသည့် အဆိပ်တွေကြောင့် သေဆုံးသူ တစ်နှစ်၊ တစ်နှစ် ဘယ်လောက်ရှိသည်ကို သူ ကောင်းစွာ သိသည်။ သည်တော့ မရှူလို။
ခက်တာက ဒါက တရားမဝင် ပိတ်ပင်ထားသည့် ကိစ္စမှ မဟုတ်လေဘဲ။
ကြော်ငြာတာကို ခွင့်မပြုတော့သော်လည်း ဖွာရှိုက်တာ၊ ရောင်းဝယ်တာကို ကမ္ဘာနှင့်အဝန်း ခွင့်ပြုထားသော ကိစ္စ။
သည်အဆိပ်တွေကို ရှူရင်းပဲ လက်ဖက်ရည်ဆိုင်ထဲက ဖြတ်ရသည်။
ခက်တာက ဆေးရုံဝင်းထဲ ရောက်တာတောင် အဲ့သည် အဆိပ်ရှူနေသူတွေက တွေ့နေရတုန်း။ သူ့ လူနာဆောင်ဝန်းကျင်မှာ တွေ့လျှင်တော့ သူ ချက်ချင်း မောင်းထုတ်နေကျ။ ခက်တာက သူ့အဆောင်က အစွန်ဆုံးမှာ၊ အဲသည်ရောက်ဖို့ သူများအဆောင်တွေကို ဖြတ်သွားရသည်။
အဲသည်မှာ အဆိပ်ရှူနေသူတွေ တွေ့တော့ ပြောရခက်သည်။ သူတို့ကို ဒါမှမဟုတ် သူတို့ လူနာကို ကြည့်ပေးနေသော ဆရာဝန် မဟုတ်လျှင် ပြောစကား နားထောင်ကြမည် မထင်။
ဒါနှင့်ပဲ အဆိပ်နည်းနည်း ထပ်ရှူရသည်။
(၅)
ဆေးရုံဘက်ကို ကွေ့သော လမ်းထောင့်ကလေးမှာ အဆိပ်ဆိုင်ကလေး ရှိသည်။ အဲသည်ဆိုင်က ရောင်းသော အဆိပ်က ဝါး၍ ရသည်။ စား၍ မရ၊ မျိုချ၍ မရ၊ ပြန်ထွေးထုတ်ရသည်။
ဗျစ်ခနဲ။
အခန့်မသင့်လျှင် ဘေးက လျှောက်လာသူကို အဆိပ်တွေ စဉ်သွားတတ်သည်။
သူ အဲသည်ဆိုင်ရှေ့ အရောက်မှာ 'ထုံး များများထည့်'ဟု ဝယ်သူ ပြောသောအသံကို ကြားရ၍ ဆိုင်ဘက် တစ်ချက် ငဲ့ကြည့်မိသည်။
ပြောနေသည့် လူရွယ်က အဆိပ်ရောင်းသည့် ကောင်မလေး ရင်ညွန့်ကိုသာ စိုက်ကြည့်နေသည်ကို တွေ့ရသည်။
ဆီးလမ်းကြောင်းတော့ ဒုက္ခပေးတော့မည်။
ဆရာဝန်ပီပီ တွေးမိ၏။
နဂိုကတည်းက သောက်ရေ၊ သုံးရေမှာ သည်လောက် ထုံးဓာတ်များသော မြို့၊ ထုံးများများထည့်တဲ့။ ဆီးကျောက်တည်တော့မှာပေါ့။
ကြီးလာလျှင် လျှာကင်ဆာ ဖြစ်ဦးမည်။
အိုး သူ့ဘာသာသူ ဘာဖြစ်ဖြစ်၊ ကိုယ်တားလို့ ရတာမှ မဟုတ်တာ။ ရုပ်မြင်သံကြားမှာ အဲဒါတွေ ပညာပေးနေတာ သူ မကြားဘဲ နေမှာမဟုတ်။ သည်ကြားထဲက သူ့ပါးစပ်ထဲကသူ အဆိပ်တွေ ထိုးထည့်နေတာ ကိုယ်နှင့် ဘာဆိုင်လို့လဲ။
တွေးတွေး လျှောက်လျှောက်နှင့် အဲသည်လူ ဘေးက ပတ်လျှောက်သည်။ အဲသည်လူက ဝါးထားသော အဆိပ်တွေထဲက အဆိပ်ရည်တချို့ကို သူလျှောက်ရာ လမ်းသို့ လှည့်၍ ဗျစ်ခနဲ ထွေးထုတ်တော့ သူ့ခြေသန်း စိုသွားသည်။
(၆)
သူက ဆရာဝန်တစ်ဦး သာမက ကျောင်းဆရာတစ်ဦးလည်း ဖြစ်သည်။ ဆရာဝန်လောင်းကလေးတွေကို စာလည်း သင်ရသည်။ စာမေးပွဲကိုလည်း စစ်ရသည်။ သူ့လို ဆရာဝန်တစ်ပိုင်း၊ ကျောင်းဆရာတစ်ပိုင်းတွေကိုလည်း အုပ်ချုပ်ရသည်။
ဆေးရုံထဲမှာရှိသော သူ့ဌာနရုံးခန်းရှေ့ကို ရောက်တော့ ကွန်ပျူတာရှေ့မှာထိုင်၍ မျက်စိ မျက်နှာ ပျက်နေသော လက်ထောက်ဆရာမလေးကို တွေ့ရသည်။
'ဘာဖြစ်လဲ သမီး'
ဆရာမကလေးက သက်ပြင်းချသည်။
'အကျများနေတယ် ဆရာ၊ သုံးပိုင်းမှာ နှစ်ပိုင်းပဲ စစ်ရသေးတယ်၊ ကျပြီးသား ဖြစ်သွားတဲ့လူက များနေတယ်'
'ကျောင်းခေါ်ချိန်နဲ့ ယှဉ်ကြည့်လား'
ဆရာမကလေးက ခေါင်းညိတ်ပြသည်။
'အဲဒါတော့ ကိုက်တယ် ဆရာ၊ ကျောင်းမတက်တဲ့ သူတွေပဲ'
'ကျပါစေပေါ့ သမီးရယ်'
ဆရာမကလေးက ခေါင်းခါသည်။
'နှစ်ခါ ကျထားပြီးသားမို့ ဒီတစ်ခါကျရင် ကျောင်းထွက်ရမယ်သူက တစ်ယောက်ပါနေတယ်၊ ဆရာ နည်းနည်း ပြန်ကြည့်ဦးမလား၊ မကြည့်ခင်'
'မကြည့်ဘူး သမီး၊ အဆိပ်ပင် ရေမလောင်းနဲ့၊ အဲဒီလို ကောင်မျိုး ဆရာဝန်ဖြစ်သွားရင်လည်း ဆရာဝန်လောက အဆိပ်သင့်တာပဲ၊ လူနာလည်း နစ်နာမယ်၊ ဆရာဝန်ကောင်းတွေလည်း သိမ်းကျုံး အပြောအဆို ခံရမယ်၊ ပေါင်းပင်၊ မြက်ပင်တွေ စောစောစီးစီးက နုတ်ပစ်လိုက်ရင် အေးတာပဲ'
ဆရာမကလေးက ပခုံး တွန့်ပြသည်။
'ဆရာ့ သဘောပါ၊ သူ့ဦးလေး ဘယ်သူလဲတော့ ဆရာ သိတယ်နော်'
သူ ပြုံးပြသည်။
'ဆရာတို့၊ သမီးတုိ့ဆိုတာ သမ္မာအာဇီဝနဲ့ပဲ အသက်မွေးချင်လို့ ဆေးကုတာနဲ့ စာသင်တာပဲ လုပ်တဲ့ ဆရာဝန်တွေ လုပ်နေကြတာ သမီး၊ အဂတိ လိုက်စားတယ်ဆိုတာ လာဘ်ယူမှ မဟုတ်ဘူး၊ ဘယာ မောဟတဲ့၊ ကြောက်လို့ မလုပ်ရမယ့်ဟာကို လုပ်တာလည်း ပါတယ်၊ မိတ်ပျက်ခံလိုက်မယ် သမီးရယ်၊ အမှန်တရားကို အလျှော့အတင်း လုပ်မိရင် ကိုယ့်စိတ်ဓာတ်ပါ အဆိပ်မိတယ်'
ဆရာမကလေးက ပြုံး၍ ခေါင်းညိတ်ပြပြီး ကွန်ပျူတာ လက်နှိပ်ခုံပေါ်မှ 'CTRL' ဆိုသည့် ခလုတ်နှင့် 'S' ဆိုသည့် ခလုတ်ကို တွဲနှိပ်ချလိုက်သည်။
(၇)
လူနာကလေးက တစ်ကိုယ်လုံး ဝါထိန်နေသည်။
သတိလည်း ကောင်းကောင်းမရ။ ဘေးမှာလည်း လူနာ့အမေနှင့် အဘွားက ငိုမလို ဖြစ်နေသည်။ ခုတင် ပတ်ပတ်လည်မှာတော့ သူ့လက်ထောက် ဆရာဝန်ကလေးတွေ ၄၊ ၅ ဦးနှင့် ဆရာမ သုံးလေးဦး ရှိနေသည်။
'ဘာဖြစ်နေကြတာလဲ'
သူ့အသံ ကြားတော့မှ ဆရာဝန်ကလေးတွေ ရှဲပေးကြသည်။
'ကိုမာ လား'
'ကိုမာတော့ မဟုတ်ပါဘူး ဆရာ၊ တောက်စစ်ဖြစ်နေလို့ ကိုမာအတိုင်း ပေးထားပါတယ်'
လူနာ၏ အသည်းက ကောင်းကောင်း အလုပ်မလုပ်တော့။ သည်တော့ သွေးထဲမှာ သဘာဝအားဖြင့် ပေါ်ပေါက်လာသည့် အဆိပ်တွေကို မချေဖျက်နိုင်တော့။ သည်တော့ လူနာက အဆိပ်သင့်နေသည်။ တောက်စစ် ဖြစ်နေသည်။ ကိုမာခေါ် သတိလစ်သည့် အဆင့်တော့ မရောက်သေး။
သက်ပြင်း တစ်ချက်ချ၍ ဆရာဝန်ကလေးတွေကို ညွှန်ကြားစရာရှိတာ ညွှန်ကြားပြီး အိမ်ပြန်ခဲ့သည်။
အိမ်ပေါက်ဝမှာ အဆိပ်သင့်နေသည့် လူတစ်ယောက် ရပ်နေသည်။
ရပ်နေသည်။
အဲသည့် စကား သိပ်တော့ မမှန်။ အဲသည့်လူက သူ့ခြေထောက်နှစ်ချောင်းအပေါ်မှာ သူ ငြိမ်ငြိမ်မရပ်နိုင်။ ယိုင်ထိုး ယိုင်ထိုးနှင့်။ မျက်လုံးတွေကလည်း နီရဲနေသည်။ ဒါကြောင့် အဲသည်လူ အဆိပ်သင့်နေသည်ဆိုတာ သူ ရိပ်မိတာပါ။ နေ့လယ် ၁၂ နာရီတွင် အဆိပ်တွေ သောက်ထားတာတော့ နည်းနည်း လွန်သည် ပြောရမည်။
အဲသည် လူကို ကွေ့ရှောင်၍ အိမ်ထဲဝင်ခဲ့ပြီး အတူနေ တပည့်လေးကို မေးငေါ့၍ မေးလိုက်သည်။
'ဘယ်သူလဲကွ'
'ဆေးရုံ တက်နေတဲ့ လူနာရဲ့ အဖေတဲ့ ဆရာ၊ ကျွန်တော်က ဆေးရုံက လူနာရှင်တွေကို ဆရာ့အိမ်မှာ လက်ခံ မတွေ့ပါဘူးလို့ ပြောပြီး ပြန်ခိုင်းတာ မပြန်ဘဲ ရပ်စောင့်နေတာ'
လူနာ 'အပ်' ချင်သည့် သူတွေကို သူ ဘယ်တော့မှ လက်ခံ တွေ့ဆုံလေ့မရှိ။ ကိုယ့်သွေးကိုယ့်သား နာမကျန်းဖြစ်လျှင် ပူပင်တတ်ကြတာ လူ့သဘာဝမို့ သူ နားလည်ပေးနိုင်ပေမင့် သည်လူတွေက အိမ်လာလျှင် အဆိပ်တွေ ပါလာတတ်ကြသည်။ အဲသည့်အဆိပ်တွေကို လက်ခံမိလျှင် ကိုယ် အဆိပ်သင့်ပြီး ကိုယ့်ကို သူတို့ လခပေး ခန့်ထားသော ဝန်ထမ်းတစ်ဦးလို ဆက်ဆံကြတော့မည်။ ကျေးဇူးတင်တာတွေ မရှိတော့။ အားနာတာတွေ မရှိတော့။ ကြားအဆင့်တွေကို လျစ်လျူရှုတော့မည်။ ဆရာဝန်သက်တမ်း အစိတ်တွင် အဲသည့် အဆိပ်တွေအကြောင်း သူ ကောင်းကောင်း နားလည်ခဲ့ပြီ။
လူနာရှင်က မေးချင်တာရှိလျှင် ဆေးရုံတွင်ပင် လူအများရှေ့မှာ ဖြေသည်။ တာဝန်ချိန် ပြင်ပတွင် အရေးပေါ်တာဝန်ကျ ဆရာဝန်ကလေးများမှ တစ်ဆင့်သာ သူ ဆက်ဆံသည်။ အဆိပ်သင့် မခံတော့။
'ရွဲ့နေတာ မင်း မမြင်ဘူးလားကွာ၊ မောင်းထုတ်လိုက်ပါလား'
'ထုတ်ပါတယ် ဆရာ၊ သူက ခြိမ်းခြောက်နေလို့'
'ဟေ'
တပည့် လူငယ် ရှင်းနိုင်မည့် ပြဿနာ မဟုတ်။ အဆိပ်သင့်နေသည့်လူကို ခေါ်တွေ့ရသည်။ စောစောက အသည်းရောင် လူနာကလေး၏ ဖခင်ပါပဲ။ ဆရာဝန်တွေ ဂရုမစိုက်လို့ သူ့ကလေး မသက်သာသေးတာတဲ့။ အကုန်လုံး ဒုက္ခရောက်အောငါ လုပ်လိုက်၍ရသည် ဆိုပဲ။
အမှန်တော့ အသည်းပြဿနာက သည့်ထက် မြန်မြန်ပြန်ကောင်းဖို့ အကြောင်းမရှိ။ အချိန်ပေး၍ ကုရမည်။
သို့သော် ထိုလူ့နာကို နားလည်အောင် ရှင်းပြဖို့က မဖြစ်နိုင်။ သူ အဆိပ်သင့်နေသည့် နေရာကလည်း အသည်း ဖြစ်နေသည်။
(၈)
ညနေဆေးခန်း ပိတ်ခါနီးတွင် မိတ်ဆွေဆရာဝန်ကြီးနှစ်ဦး လာခေါ်သည်။ ညစာ အတူသွားစားကြသည်။
သူတို့က အဆိပ် နည်းနည်းစီလောက် သောက်သည်။
ဟိုလူ့လိုတော့ မဟုတ်။ တစ်နေ့လုံး စိတ်ဖိစီးမှုဒဏ်ကောင့် သွေးထဲမှာ ဖြစ်ပေါ်လာသမျှသော အဆိပ်တွေကို အဆိပ်၊ အဆိပ်ချင်း တိုက်ခိုင်း၍ လူက ဘေးက အနားယူတာ ဖြစ်သည်။
အချိန်တန်လျှင်တော့ အဆိပ်တွေက အချင်းချင်း တည့်သွားကြမှာပါ။ လူ့ဘက်ပဲ ပြန်လှည့်တိုက်မှာပါပဲ။
အဲသည်လို ခံယူ၍ သူ အဲသည့် အဆိပ်ကို ရှောင်ခဲ့တာ ၁၂ နှစ်ရှိပြီ။ ခြင်သာ မရိုက်မိလျှင် ငါးပါးသီလတောင် လုံနေပြီ။ သည်တော့ သူက ဟင်းပဲ စားသည်။
ခက်တာက သူ့ဟင်းချိုခွက်ထဲမှာ အဆိပ်တွေ ဝေ့နေသည်။ သူ့ဟင်းခွက်ထဲမှာ အဆိပ်တွေ ရွှဲနေသည်။
တစ်နေ့ကပဲ မိတ်ဆွေ ဆရာဝန်ကြီး၊ ယခု သူနှင့်အတူ ညစာစားနေသူတစ်ဦးက စစ်ဆေးပေးသည်။
'ကိုလက်စထရောက နည်းနည်း တက်နေတယ်ဗျ၊ အီးစီဂျီက ကောင်းနေပေမယ့် အပိုင် မတွက်နဲ့၊ အဆီ လျှော့ဦးဗျ၊ ယူရစ်အက်စစ်လည်း များနေတယ်၊ အဆစ်က တစ်ခါ ရောင်ထားပြီးသားဆိုတော့ ပြန်မရောင်ဘူး မပြောနိုင်ဘူး၊ ဝမ်းတွင်းသားတွေ ရှောင်ဦး' တားတုန်းက တားသော်လည်း ယခု သူ့ရှေ့မှာပင် ထိုင်စားနေတော့ ဘာမှ မပြော။
မိတ်ဆွေနှစ်ဦး သောက်နေသည့် အဆိပ်တွေနှင့် သူစားတော့မည့် အဆိပ်တွေ ဘယ်နေရာက အရင်ဒုက္ခပေးမလဲတော့ မှန်းရ ခက်လှသည်။
ဘယ်သူမှ မသိနိုင်။
(၉)
အိမ်ပြန်ရောက်တော့ တပည့်ကလေးက အဆိပ်တွေ ရေတွက်ပြီးပြီ။ သူ့ကို စာရင်းဇယားနှင့် အပ်သည်။
'မင်း ဈေးဖိုး ယူထားဦးမလား'
'ဟုတ်ကဲ့ ဆရာ'
အဆိပ်တချို့ ရေတွက်၍ သူ့ကို ပြန်ပေးလိုက်သည်။
ပညာသက်သက်နှင့် ရှာထားတာပါ။
ညှိတာ မပါ၊ ညစ်တာ မပါ၊ လှီးတာ မပါ၊ ထစ်တာ မပါ။
သမ္မာအာဇီဝ ဖြစ်ဖို့ကျတော့ မြတ်စွာဘုရားက မည်သည့် စီးပွားရေးလုပ်ငန်းကိုမှ သမ္မာအာဇီဝဟု မချီးမှ မချီးကျူးခဲ့လေဘဲ။ စီးပွားရေးအားလုံးကို ကျောခိုင်းပြီး ဆွမ်းခံစားခိုင်းသည် မဟုတ်ပါလား။
ဘာပဲလုပ်လုပ် လောဘနှင့် စရမည်။ ရတန်သလောက် မရတော့ ဒေါသက ပါလာမည်။ ရနေပြီဟု ထင်လျှင် မောဟက ဖက်တော့မည်။
အချိန်တန်တော့ ရလာမှာကလည်း အဆိပ်တွေပါပဲ။
ဒါတွေ ပြန်သုံးလျှင် တခြားသော အဆိပ်တွေ ထပ်ရမည်။ အဲသည့်အဆိပ်တွေထဲမှာ လူးလွန့် နစ်မူးရတာ ကြာလာတော့ အဆိပ်ကို အဆိပ်ဟု မြင်တတ်တော့မည် မဟုတ်။
အဆိပ်တွေ ထပ်ရှာလိုက်။ အဆိပ်တွေနှင့် ထပ်ဖလှယ်လိုက်။
သူ သက်ပြင်းချသည်။
ခုနေ အခါမှာတော့ မနက်ဖြန်ကို ရင်ဆိုင်ဖို့အတွက် အဆိပ်နည်းနည်း လိုနေတုန်းပါပဲ။
တပည့်ကလေးကို ရေတွက်ပေးပြီး ကျန်သည့် အဆိပ်တွေကို သူ့လက်ကိုင်အိတ်ကလေးထဲ ထည့်လိုက်ပါသည်။
လင်္ကာရည်ကျော်
-မဟေသီမဂ္ဂဇင်း
-ဆရာ လင်္ကာရည်ကျော်၏ 'နှလုံးသားညာဘက်အပေါ်ခန်း ဝတ္ထုတိုများ' ဝတ္ထုတိုပေါင်းချုပ်ထဲ၌လည်း ထည့်သွင်းဖော်ပြထားပါသည်။
Credit ;
No comments:
Post a Comment