မသာ ကိုယ်စားလှယ် - မောင်နှင်းပန်း
* * *
ကျွန်တော်တို့အိမ်၏ နောက်ဖေးဘက် လမ်းမဆီမှ သံဝေဂ လင်္ကာများကို ရွတ်ဆိုသွားသံ ကြားတိုင်း ကျွန်တော့် စိတ်ထဲမှာ “သွားပြန်ပြီ တစ်ယောက်" ဟု မြည်တမ်းမိ တတ်ပါသည်။ လက်ရှိ ကျွန်တော်နေသော ရပ်ကွက်ကလေးသည် ရေဝေးသုသာန်နှင့် အတန်ငယ် နီးသဖြင့် နေ့စဉ်နှင့်အမျှ ဆိုသလို ထိုအသံတွေကို ကြားရလေ့ ရှိပါသည်။ လမ်းမကြီး ပေါ်တွင် အသုဘယာဉ်များ၊ သေဆုံးသွားသည့် လူများကို သယ်ယူ၍ ရေဝေး အအေးခန်းသို့ ပို့ဆောင်ပေးနေသော ပတ်ဝန်းကျင် ထိန်းသိမ်းရေး ယာဉ်များ၊ အသုဘ ချလာစဉ် လိုက်လံပို့ဆောင် ပေးလေ့ရှိသည့် ယာဉ်တန်းများကို တစ်နေ့မပြတ် တွေ့မြင်ရတတ်လေ့ ရှိပါသည်။ တစ်ခါ တစ်ခါတွင် ပျင်းပျင်း ရှိသဖြင့် လမ်းထိပ်ထွက်၍ လက်ဖက်ရည်ဆိုင် ထိုင်နေလျှင်သော် လည်းကောင်း၊ တင်ခါ တစ်ခါ သွားသွားလာလာဖြင့် ထိုလမ်းကို ဖြတ်မိလျှင်သော် လည်းကောင်း အသက်အရွယ် အမျိုးမျိုး၊ ဆင်းရဲချမ်းသာ မကွဲပြား၊ ကျားမမရွေး သေဆုံး နေကြသည်ကို စိတ်မချမ်းမြေ့ဖွယ် တွေ့မြင် နေရတတ်ပါသည်။ ထို့ကြောင့် ကျွန်တော့်အတွက် ထိုကိစ္စသည် အတော့်ကို ယဉ်ပါးနေကျကိစ္စဟု ထင်မြင်မိပါသည်။
ထို့နည်းတူ ဒီရပ်ကွက်ကလေးတွင် နေထိုင် ကြကုန်သော ရပ်ကွက်သူ ရပ်ကွက်သား အားလုံး အတွက်လည်း ယဉ်ပါးနေသော ကိစ္စသာဖြစ်ခဲ့ပါသည်။ မည်သူမဆို ဒီရပ်ကွက်သား မှန်လျှင် မော်တော်ကား မှန်များတွင် တပ်ဆင်ထားလေ့ ရှိသော ဦးဘယ်သူ ဒေါ်ဘယ်ဝါ အသက်ဘယ်လောက် “ကောင်းမှု” ဆိုသည့် စာတန်းများကို ရင်တွင်းမှ ခံစားချက် မပါဘဲ လိုက်လံဖတ်ရှု နေတတ်ခဲ့ပြီ ဖြစ်ပါသည်။
သို့သော် တစ်ခါတစ်ရံ တွင်တော့ အသက်အရွယ် ငယ်ရွယ်လွန်းသေးသူများ၊ ကျိုးကျိုးကျဲကျဲနှင့် မဖြစ်ညစ်ကျယ် အသုဘများကို တွေ့လျှင်တော့ စိတ်မကောင်း ဖြစ်မိတတ်ပါသည်။ ထို့ပြင် နာရေးနှင့် ပတ်သက်သော မည်သည့် မြင်ကွင်းကို မဆို တွေ့မြင် လိုက်ရရသည်နှင့် တစ်ပြိုင်နက် ကျွန်တော့် ရင်တွေ ဆတ်ဆတ်ခါမျှ လှုပ်ရှား သွားတတ်ပါသည်း စိတ်မျက်စိတွင် ဘယ်လိုမှ မေ့ပျောက်နိုင်မည် မဟုတ်သော ပုံရိပ်အချို့က လွန့်လွန့်လူးလူး ရုန်းကြွ လာတတ်သည်။
ထိုသို့ သတိတရ ဖြစ်လာစေသည့် အဓိက ဇာတ်ဆောင်မှာ ကျွန်တော်၏ အဘိုးသာ ဖြစ်ပါသည်။ အမည်ရင်းမှာ ဦးဘိုးသီး ဖြစ်ပြီး အများစုကတော့ “ဘကြီး ဘိုးသီး” ဟု ခေါ်လေ့ ရှိကြသည်။ ကျွန်တော် မှတ်မိသည့် အရွယ်မှာပင် အဘိုး၏ အသက်မှာ ခုနှစ်ဆယ် ကျော်ကျော် ရှိနေခဲ့ပြီ ဖြစ်ပါသည်။
လူပုံစံမှာ တုတ်တုတ်ခိုင်ခိုင် တောင့်တောင့်တင်းတင်း ဖြစ်ပြီး ခေါင်းကို ပြောင်နေအောင် အမြဲတမ်း ရိတ်ထားလေ့ ရှိသည်။ အသားညိုညို၊ ဗိုက်ပူပူ ဆိုတော့ အဘိုး၏ ပုံပန်းသဏ္ဌာန်မှာ မြင်သူတိုင်းအတွက် လွဲမှားစရာ မရှိအောင် ထူးခြားနေလေ့ ရှိသည်။ ပို၍ ထူးခြားသည်က အဘိုးသည် ဘယ်အရပ်ကို သွားသွား အပေါ်အင်္ကျီ ပါလေ့မရှိ။ ဆောင်းရာသီမှ လွဲလျှင် အဘိုးကို အမြဲတမ်းနီးပါး ကိုယ်တုံးလုံးနှင့် တွေ့ရလေ့ ရှိသည်။ ဒါကိုက ကျွန်တော့်အဘိုး၏ အမှတ်အသား တစ်ခုပင် ဖြစ်ပါသည်။
သေချာသည်က ကျွန်တော့် အဘိုးတွင် ထူးခြားသည့် ဝါသနာတစ်ခု ရှိခဲ့သည်။ ဒါမှမဟုတ် ပရဟိတ စိတ်ဓာတ် ရှိသူဟုလည်း ဆိုနိုင်ပါသည်။ ထိုစိတ်ဓာတ် ထိုဝါသနာနှင့် ပတ်သက်၍ ပတ်ဝန်းကျင်က ဝိုင်းဝန်း၍ အသိအမှတ်ပြု ထောမနာ ပေးထားသော ဘွဲ့ထူးတစ်ခု ရှိခဲ့သည်။ “မသာ ကိုယ်စားလှယ်ကြီး” တဲ့။ အဘိုးသည် ထို အမည်နာမနှင့် လိုက်အောင် မသာကိစ္စ အသုဘကိစ္စများတွင် အတော် ဝါသနာ ကြီးခဲ့သူတစ်ဦး ဖြစ်ခဲ့ပါသည်။
အဘိုးတို့ ခေတ်က ယခုခေတ်လို မီးသင်္ဂြိုဟ် စက်တွေ၊ အအေးခန်းတွေ မပေါ်သေး။ ပတ်ဝန်းကျင် ထိန်းသိမ်းရေးတွေ မရှိသေး လူသေပြီ ဆိုလျှင် မိမိတို့ အိမ်ရှေ့တွင် လေးတိုင်စင်နှင့် သုံးရက်တန်သည်၊ ငါးရက်တန်သည် စသည်ဖြင့် ထားပြီးမှ မြေချတတ်သည့် ခေတ် ဖြစ်သည်။
ကျွန်တော် မှတ်မိသလောက် ထိုခေတ်က မသာကိစ္စမှာ အတော် အလုပ်ရှုပ်သော ကိစ္စ ဖြစ်သည်။ လူတစ်ဦး သေပြီဆိုလျှင် အစဉ်အလာ သဘော၊ ရိုးရာ သဘောတွေ ပါရသည်။ မပါ၍ မဖြစ်။ တစ်ယောက်ယောက်က ပထမဦးစွာ ဆရာဝန် တစ်ဦး၏ ထောက်ခံချက်ကို ယူကာ နီးစပ်ရာ ဒေသန္တရ၊ ဆေးရုံ စသည်တို့သို့ သွားကာ သေစာရင်း တောင်းရသည်။ ပြီးလျှင် သင်္ချိုင်းသို့ ပြေးကာ ခေါင်းမှာ၊ ကျင်းအပ်၊ သင်္ဂြိုဟ်မည့် အချိန်ညှိ၊ ကား တတ်နိုင်သူက ကားငှား၊ ကား မတတ်နိုင်သူက ထမ်းချရန် စီစဉ်ရသည်။
ပထမ တစ်ယောက်က ထိုကဲ့သို့ အချိန်ကုန် နေလျှင် အခြားသော တစ်ယောက်က အိမ်တွင် ကျန်ရစ်ခဲ့ကာ မသာရှင် ကိုယ်စား သေသူကို ရေချိုးပေး။ ကြမ်း ခုနစ်ချောင်း သက်ငယ် ခုနစ်ပျစ် သဘောမျိုး ဝါးဖြင့် ကပ် ရက်ရသည်။ ပြီးလျှင် မသာကို ခြေထိပ် လက်ထိပ် ကြိုးချည်၊ အင်္ကျီ ပြောင်းပြန်ဝတ် စသဖြင့် အတော် အလုပ်ရှုပ်သည်။
သို့သော် ကျွန်တော်တို့ ရပ်ကွက်ထဲတွင် ထိုအလုပ်မျိုးကို အစမှ အဆုံးတိုင် ကျွမ်းကျင်သူ တစ်ဦးသာ ရှိသည်။ ထိုတစ်ဦးတည်းသော ပုဂ္ဂိုလ်မှာ ကျွန်တော်၏ အဘိုးပင် ဖြစ်ပါတော့သည်။
ကျွန်တော့် အဘိုးသည် ထိုကိစ္စမျိုးနှင့် ပတ်သက်လာလျှင် အမြဲတမ်း ထကြွလုံ့လ ကြီးသူ တစ်ဦးဟုလည်း ဆိုနိုင်ပါသည်။ အဘိုးသည် ရပ်ကွက်ထဲတွင် လူတစ်ယောက် သေပြီဟူသော သတင်းကို ကြားလိုက်ပြီ ဆိုသည်နှင့် တစ်ပြိုင်နက် ကျွန်တော်တို့ အိမ်ဦးခန်းရှိ ကွမ်းအစ်ထဲမှ ကွမ်းသီးများကို တဖျောက်ဖျောက် ညှပ်ကာ ကွမ်းကို တစ်ယာပြီး တစ်ယာ ဝါးရင်း တမျှော်မျှော် ဖြစ်နေတတ်သည်။
သိပ် မကြာမီမှာပင် လူသေသည့် အိမ်မှ တစ်ယောက်ယောက်က မောကြီးပန်းကြီး အပြေးအလွှားနှင့် ရောက်လာကာ
“ဘကြီးဘိုးသီး ကူညီပါဦး” ဟု ဆိုလိုက်သည်နှင့် အဘိုးက ပါးစောင်ထဲသို့ ကွမ်းတစ်ယာ ထိုးထည့်ကာ ပုဆိုးဟောင်း တစ်ထည်ကို ပခုံးပေါ်တွင် တင်ပြီး တက်တက်ကြွကြွ လိုက်ပါသွား တတ်သည်။
ထိုသို့ သွားပြီဆိုလျှင် အဘိုးတွင် ထုံးစံအတိုင်း အပေါ်အင်္ကျီ ပါလေ့မရှိ ကျောဗလာနှင့် ထီးထီးမားမား သွားလေ့ရှိသည်။ အဘွားကတော့ အဘိုး၏ လုပ်ရပ်ကို လုံးဝ လက်မခံ။ အားလည်း မပေး။ မကြာခဏ မြည်တွန်တောက်တီး တတ်သည်။ သို့သော် အဘွားက တဗျစ်တောက်တောက် မည်မျှပင် ပြောနေပါစေ၊ ထိုအချိန်တွင် တစ်စုံတစ်ယောက်က “ဘကြီး” ရေ ဆိုလိုက်သည်နှင့် “အေး” ဆိုကာ ဝမ်းသာအားရ လိုက်ပါသွား တတ်သည်။
ဒီလို လိုက်သွားပြီ ဆိုလျှင် အဘိုးသည် မသာရှင်ဆီက အခကြေးငွေ၊ စေတနာကြေး အစရှိသည့် မည်သည့် ငွေကြေးကို မဆို တစ်ပြားတစ်ချပ်မျှ မယူဘဲ ခုနစ်ရက် ခုနစ်လီ လုပ်ကိုင် ပေးလေတော့သည်။ အဘွားကိုလည်း ဘယ်အခါတွင်မှ တစ်လုံးတစ်ပါဒ ပြန်ပြောတတ်လေ့ ရှိသူမဟုတ်။ တစ်ခါတစ်ရံတွင်တော့
“မကျင်ဗျာ ... ခင်ဗျားဗျာ” ဟု ဆိုတတ်သည်။ ဒါကိုက ကျွန်တော့်အဘိုး၏ အပြင်းထန်ဆုံး တုံ့ပြန်မှုပင် ဖြစ်သည်။ ယုတ်စွအဆုံး ကျွန်တော့် အဘိုးသည် နေထိုင်မကောင်း ဖြစ်၍ ဆေးထိုး ဆေးသောက် လုပ်နေရပါစေ၊ ထိုကိစ္စအတွက် အိပ်ရာမှ လူးလဲထကာ စေတနာ ပါပါနှင့် လိုက်လုပ်ပေး တတ်သည်။
သို့သော် ဤကိစ္စသည် ပြဿနာ မဟုတ်သေး။ ပြဿနာ အစစ်က ကျွန်တော့် အပါးတွင် ဖြစ်သည်။ ပတ်ဝန်းကျင်ရှိ ကျွန်တော်နှင့် ရွယ်တူ သူငယ်ချင်းများက ကျွန်တော့်ကို နောက်တတ် ပြောင်တတ်ကြသည်။ “မင်းတို့ အဘိုးက မသာ ကိုယ်စားလှယ်ဆို၊ တို့အမေက ပြောတယ်။ မင်းတို့ အဘိုးက စဏ္ဍာလတဲ့” ဆိုသော စကားများသည် ကျွန်တော့်အတွက် မျက်နှာ တစ်ခုလုံး ထားစရာ နေရာမရှိအောင် ရှက်ရသည့် အချိန်များပင် ဖြစ်ပါတော့သည်။
ထို့ကြောင့် ကျွန်တော်က ကလေးပီပီ ရှက်ရှက်နှင့် အဘိုးကို တားတော့ အဘိုးက ပါးစောင်ထဲရှိ ကွမ်းများ ထွက်ကျ လာအောင်ကို တသိမ့်သိမ့် ရယ်ပါတော့သည်။ ဘာကိုမှတော့ ထွေထွေထူးထူး မပြော။ ထိုပုံပန်း သဏ္ဌာန်တွေက ကျွန်တော့် အဘိုးကို ယနေ့ အချိန်ထိ သတိရ နေစေသည်။
* * *
(၂)
ထိုကိစ္စနှင့် ပတ်သက်၍ ငယ်ရွယ် နုနယ်ခဲ့သော ကျွန်တော့် မှတ်ဥာဏ်ထဲတွင် ပြင်းပြင်းထန်ထန် စွဲလမ်း နေခဲ့သော ပြဿနာ တစ်ခု ရှိနေခဲ့ပါသည်။ ထိုပြဿနာမှာ ကြားရသူတိုင်း ပါးစပ် အဟောင်းသား ဖြစ်ပြီး မယုံကြည် နိုင်လောက်အောင် အံ့ဩ သွားစေသည့် အဖြစ်အပျက်မျိုး ဖြစ်သည်။
ထိုကိစ္စမှာ ကျွန်တော့် အဘိုးသည် မကြီးမငယ်နှင့် အိမ်က ပျောက်သွားခဲ့ခြင်းပင် ဖြစ်ပါတော့သည်။ အသက် ခုနစ်ဆယ်ကျော် အဘိုးကြီး တစ်ယောက် အိမ်မှ ရုတ်တရက် ပျောက်သွားခြင်းသည် မိသားစုဝင် တစ်ဦးဦးနှင့် စကားများကာ အိမ်ပေါ်မှ ဆင်းသွားခြင်းမျိုး မဟုတ်။ လူငယ်တွေလို တစ်နယ်တစ်ကျေးကို ခရီးထွက် သွားခြင်းမျိုးလည်း မဟုတ်သဖြင့် ကျွန်တော်တို့ မိသားတစ်စုလုံးမှာ ဘယ်မှာ လိုက်ရှာရမှန်း မသိ။ တစ်ရပ်ကွက်လုံး ဟိုလူ့မေး၊ ဒီလူ့စမ်းနှင့် စုံစမ်းခဲ့သော်လည်း အဘိုးနှင့် ပတ်သက်၍ ဘာသဲလွန်စမှ မရခဲ့ပါ။
နောက်ဆုံးတွင် အဘွားက ရဲရဲရင့်ရင့် မျက်ရည်လည်ရွဲဖြင့် ဆုံးဖြတ်ချက် တစ်ခုကို ပိုင်ပိုင်ချကာ အဘိုး ပျောက်သွားသည့် နေ့မှစ၍ ပြန်လည် တွက်ချက်ပြီး ရက်လည် ဆွမ်းသွတ်ဖို့ပင် ပြင်ဆင် နေပါတော့သည်။ ထိုစဉ်က အဘွား၏ ဆိုစကားအရ အဘိုးသည် သူ့တစ်သက်တာ အတွင်း ဤသို့ သွားတတ် လာတတ်ခြင်း လုံးဝ မရှိခဲ့ မည်သည့် အရပ်သို့ သွား သွား အဘွားကို အမြဲပြော သွားတတ်သူဟု သိရသည်။
အခုတော့ အဘိုး ပျောက်နေသည်မှာ ဆယ်ရက်နီးပါး ရှိနေပြီဆိုတော့ အားလုံးက ခြေမကိုင်မိ၊ လက်ကိုင်မိ ဖြစ်နေကြသည်။ သို့သော် အဘိုးအတွက် ရက်လည် ဆွမ်းသွတ်ရန်အတွက် ပစ္စည်းပစ္စယတွေ ဝယ်ယူနေသည့် နေ့မှာပင် အဘိုးက မျက်နှာ မရွှင်မပျဖြင့် ပြန်ရောက် လာခဲ့သည်။
ထုံးစံအတိုင်း ခါးထဲတွင်တော့ အင်္ကျီမပါ။ အဘိုး၏ ပုံပန်းသဏ္ဌာန်မှာ အတော့်ကို ပင်ပန်း နွမ်းနယ်ပုံ ပေါက်နေသည်။ အမေ၊ အဘွားနှင့် ကျွန်တော်တို့က ဝမ်းသာအားရ ဝိုင်းဝန်း မေးမြန်း ကြသည်ကိုပင် အဆင်ပြေအောင် ပြန်မပြောနိုင်။ အိပ်ရာထဲသို့ တစ်ခါတည်း တန်းဝင် သွားခဲ့ပါသည်။ သတင်း အကြားဖြင့် ရောက်ရှိ လာကြသော ရပ်ကွက်ထဲ၊ လမ်းထဲရှိ ပရိသတ်များကိုလည်း ပြန်၍ မပြောနိုင်ဘဲ အိပ်ရာထဲသို့သာ တစ်ခါတည်း တန်းဝင် သွားခဲ့ပါသည်။
နောက်တစ်နေ့ ရောက်မှ အဘိုးက ကျွန်တော်တို့ကို အေးဆေးစွာ ပြန်လည်၍ ပြောပြခဲ့ပါသည်။ 'ဖြူး' မြို့နယ်တွင် သေဆုံးခဲ့သော အသုဘ တစ်ခုကို အစမှ အဆုံးတိုင် လိုက်လုပ်ပေးခဲ့ပြီး ရက်လည်ပြီးမှ ပြန်လာခဲ့ခြင်း ဖြစ်သည်ဟု သိခဲ့ရပါသည်။
ဘာပဲဖြစ်ဖြစ် အဘိုး၏ဇွဲကို ကျွန်တော် သဘောကျသည်။ အိမ်မှ ထွက်သွား ကတည်းက အင်္ကျီပင် ပါမသွားသည့် အဘိုးက တစ်နယ်တစ်ကျေးတွင် ရက်ပေါင်းများစွာ နေထိုင်လုပ်ကိုင် ပေးပြီး အိမ်ပြန် ရောက်လာသည် အထိ ခါးထဲတွင် အင်္ကျီမကပ် နိုင်သေး။ ဤမျှ လုံ့လကြီးခဲ့သည့် အဘိုး၏ ပုံပန်း သဏ္ဌာန်ကို ယခုအချိန်တွင် နာရေးကူညီမှု ကားများ၏ တက်ကြွစွာ လှုပ်ရှားသွားလာ နေသည်ကို မြင်တိုင်း သတိရ နေတတ်သည်မှာ မဆန်းဟု ကျွန်တော် ထင်ပါသည်။
သေချာစွာ ဆိုရလျှင် တစ်ချိန်က ကျွန်တော့် အဘိုး၏ စွမ်းဆောင်ရည်များ ထဲတွင် ကျွန်တော်တို့ မိသားစု အပြင် ရပ်ကွက်သူ ရပ်ကွက်သား အားလုံး အောချရလောက်သည့် ကြိုးပမ်းမှု တစ်ရပ်ကလည်း ကျွန်တော့် အာရုံထဲတွင် ပြက်ပြက်ထင်ထင် ပြန်လည် မြင်ယောင်လာမိ တတ်ပါသည်။ ထို စွမ်းဆောင်မှုမှာလည်း ထုံးစံအတိုင်း မသာကိစ္စနှင့်ပင် ပတ်သက် နေလိမ့်မည်မှာ ယုံမှားစရာ မရှိပါ။
ထိုစဉ်က သေဆုံးသူမှာ အနာကြီး ရောဂါသည် ဖြစ်နေသည်။ ထို့ကြောင့် ဘယ်သူမှ မကိုင်ချင် မတွယ်ချင် ဖြစ်နေသည်။ ယုတ်စွအဆုံး သေသူ၏ မိသားစုပင်လျှင် အိမ်ပေါ်၌ ရှိမနေကြ။ ထိုအခါ သေသူ၏ အနားတွင် ရောက်ရှိနေသော ကျွန်တော့်အဘိုး ကိုယ်တိုင်လည်း သူ ကျွမ်းကျင်သည့် ကိစ္စကို ဆောင်ရွက်ရန် အတွက် ရွံ့တွန့်တွန့် ဖြစ်နေပုံရသည်။ ပို၍ ဆိုးသည်က အချိန်ကြာမြင့် လာလေလေ ရိရွဲနေသည့် သေသူ၏ ခန္ဓာကိုယ်က ရွံရှာဖွယ် ကောင်းလာလေလေ ဖြစ်နေသည်။
မထူးတော့သည့် အဆုံးတွင် အဘိုးသည် အနားရှိ ကလေးတစ်ယောက်ကို အရက်တစ်ပိုင်း ဝယ်ခိုင်းကာ တရှိန်ထိုး မော့သောက်ပြီး၊ သေသူကို ပယ်ပယ်နယ်နယ် ဆွဲထူ၊ တစ်ဦးတည်း မနိုင့်တနိုင်နှင့် ရေချိုးပေးပြီး ချက်ချင်း ဆိုသလို ဂုန်နီအိတ်နှင့် အထပ်ထပ် စွပ်ကာ ခေါင်းစပ်၍ သင်္ဂြိုဟ်ပစ်လိုက် ရသည်တဲ့။ အကျိုးဆက် အနေဖြင့် ကျွန်တော့် အဘိုးသည် သုံးရက်လောက် အထိ မစားနိုင် မသောက်နိုင် ဖြစ်ကျန်နေခဲ့သည်။ မသာရှင်ကတော့ ကျေးဇူးတင်မဆုံး။
* * *
(၃)
ကျွန်တော် အရွယ် ရောက်လာသည့် အခါတွင်တော့ အဘိုး၏ ပရဟိတ လုပ်ငန်းနှင့် ကျွန်တော်၏ ရှက်စိတ်တို့မှာ သိသိသာသာ အားပြိုင် လာခဲ့ပါတော့သည်။ ရပ်ကွက်ထဲတွင် ကျွန်တော့်ကို လူကြီး တော်တော်များများက မသိကြ။ အကြောင်း တစ်စုံတစ်ရာကြောင့် ဈေးသွားဝယ်မိလျှင် ဖြစ်ဖြစ်၊ လူကြီးများက ခိုင်း၍ တစ်ခုခုကို ဆောင်ရွက်ပေးရလျှင် ဖြစ်ဖြစ်၊ ကျွန်တော့်ကို မြင်သမျှသော လူကြီး တော်တော် များများက “သားက ဦးဘိုးသီး မြေးလား" ဟု မေးလာကြလေ့ ရှိပါသည်။
ထို မေးခွန်းများက ဘာရည်ရွယ်ချက်မျှ မရှိသော်လည်း ကျွန်တော့် စိတ်ထဲတွင် ငယ်စဉ် ကတည်းက စွဲထင်နေခဲ့သော သူငယ်ချင်းများ နောက်ပြောင်ကြလေ့ ရှိသည့် “မင်းအဘိုးက မသာ ကိုယ်စားလှယ်ဆို” “မင်းတို့အဘိုးက စဏ္ဍာလဆို” ဟူသော စကားရပ်များ ကသာ တရစ်ဝဲဝဲနှင့် ကျွန်တော့် အာရုံထဲတွင် ပြန်လည် ပေါ်ပေါက် လာတတ်ခဲ့ပါသည်။ ထို့ကြောင့် တစ်စုံ တစ်ယောက်က ကျွန်တော့်အား “မင်း ဦးဘိုးသီးမြေး မဟုတ်လား” ဟု မေးလိုက်တိုင်း ကျွန်တော့်ကို အရှက်ခွဲသည်ဟုပဲ ထင်မြင်လာသည် အထိ ဖြစ်နေ ပါတော့သည်။
နောက်ပိုင်းတွင် ကျွန်တော့် အဘိုးသည် အတိတ်ကံ အကျိုးပေးကြောင့် သူဝါသနာ ပါသော တစ်သက်လုံး မက်မက်စက်စက် ဖက်တွယ်မြတ်နိုး လာခဲ့သော၊ လူနတ် သာဓုခေါ်သည့် လုပ်ငန်းဖြစ်သော ထိုပရဟိတ လုပ်ငန်းများကို စွန့်လွှတ်ရန် အကြောင်းဖန်လာခဲ့ ပါတော့သည်း ထိုအကြောင်းမှာ အဘိုး လေဖြတ် သွားခြင်းကြောင့်ဟု ဆိုရလိမ့်မည် ဖြစ်ပါသည်။
ညာဘက် တစ်ခြမ်းလုံး လှုပ်ရှား၍ မရတော့သော အဘိုး၏ အခြေအနေကို ကြည့်ရင်း ကျွန်တော်တို့ တစ်မိသားစုလုံးက စိတ်မကောင်းခြင်း ကြီးစွာဖြင့် တတ်နိုင်သမျှ ပြုစုကြပါသည်။ ထို့ပြင် ရပ်ကွက်သူ ရပ်ကွက်သား အတော်များများ ကလည်း ကျွန်တော့် အဘိုးကို ဆေးဝါး၊ ငွေကြေး အစရှိသည့် အကူအညီများ ပေးကြပါသည်။ သို့သော် အဘိုးမှာ လေသမားတို့၏ ထုံးစံအတိုင်း လက်တစ်ဖက် တွဲလောင်းကျကာ စကားပြောလျှင် ပီပီသသ မရှိတော့။ လမ်းလျှောက်လျှင်လည်း အနားတွင် အဖော် တစ်ယောက်နှင့် အတူ တောင်ဝှေး တစ်ချောင်းလည်း အမြဲပါရ သည်။
ထိုအခါ အဘွားက “ကဲ - ဘာတတ်နိုင်သေးလဲ” ဟူသော အကြည့်မျိုးဖြင့် မကြာခဏ ကြည့်လေ့ ရှိပါသည်။ သို့သော် ကျွန်တော့် အဘိုးက မထိတထိ ပြုံးနေတတ်ပါသည်။ ထိုအပြုံးထဲတွင် အဘွားကို လှောင်သလိုလို ထီမထင်သလိုလို သဘောမျိုးပင် ရိုးတိုးရိပ်တိတ် ပါနေခဲ့သည်ဟု ကျွန်တော် ထင်ခဲ့သည်။
ထင်သည့် အတိုင်းပင် ကျွန်တော့် အဘိုးမှာ အာဂအဘိုးပင် ဖြစ်ပါတော့သည်။ သူကိုယ်တိုင်က မလှုပ်နိုင်၊ မရှားနိုင် ဖြစ်နေသည် မှန်သော်လည်း မသာအိမ်တိုင်းက သူ့ကို လာခေါ်ကြတုန်း ရှိသေးသည်။ ထိုနည်းတူ အဘိုး ကိုယ်တိုင်ကလည်း မညည်းမညူ လိုက်ပါနေတုန်း ရှိသေးသည်။ ဟိုနား၊ ဒီနားဆိုလျှင် အဘိုးကို တစ်ယောက်ယောက်က လာရောက် တွဲငင်ကာ ခေါ်ဆောင် တတ်ကြပြီး အနည်းငယ် ခရီးဝေးလျှင် ဆိုက်ကားနှင့် ခေါ်တတ်ကြသည်။
ထိုအခါ သူ ဝါသနာ ကြီးလှသည့် လုပ်ငန်းကို အဘိုး ဘယ်လို လုပ်မလဲဟု ကျွန်တော်တို့ စဉ်းစားမိတော့ အဘိုးအတွက် လွယ်ကူလွန်း နေသည်။ အဘိုးက အရှေ့အနောက် ဆင်ခြင်တွေးခေါ်ပြီး သန်းအောင်ဆိုသည့် လူငယ် တစ်ယောက်ကို စနစ်တကျ သင်ပြပေးရင်း သူ၏ ပညာအမွေကို ဆက်ခံစေခဲ့သည်။ သန်းအောင်ကလည်း အဘိုးကဲ့သို့ပင် ဘယ်မသာကို ဖြစ်ဖြစ် မညည်းမညူ ကူညီ လုပ်ကိုင်ပေးလေ့ ရှိသည်။
ထိုအချိန်မျိုးတွင် အဘိုးက သန်းအောင်၏ လက်ကျလက်နကို ကြည့်ရင်း မကြာခဏ ဆိုသလို စကားတစ်ခွန်းကို မပီမသ ပြောတတ်လေ့ ရှိသည်။
“အဘက သိပ်ကြာတော့မှာ မဟုတ်ဘူးကွ။ သေတော့မှာ။ မသေသေးလည်း ဘာမှ လုပ်နိုင်တော့တာ မဟုတ်ဘူး။ ရှေ့လျှောက် သန်းအောင်ကိုပဲ အားကိုး ရတော့မှာ”
ထိုသို့ အဘိုးပြောပြီး သိပ်မကြာမီမှာပင် လူတစ်ယောက် သေဆုံး သွားခဲ့သည်။ သေဆုံး သွားသူက ကျွန်တော့်အဘိုး မဟုတ်ဘဲ သန်းအောင် ဖြစ်နေသည်က အနည်းငယ် အံချော်နေသည့် ပြက်လုံးတစ်ခု ဖြစ်နေခဲ့ရပါသည်။ ဖြစ်ပုံမှာ သန်းအောင်သည် အရက်သောက် ပြန်လာခဲ့ပြီး နောက်တစ်နေ့တွင် နှိုး၍ မရတော့ခြင်း ဖြစ်သည်။ သေချာသည်က အဘိုးကိုယ်တိုင် သန်းအောင်အိမ်သို့ လိမ်ဖည် လိမ်ဖည်နှင့် သွားကာ မျက်ရည် တဝဲဝဲဖြင့် လမ်းညွှန် ပြောဆိုပြီး ခုနစ်ရက်စေ့မှ အိမ်သို့ ပြန်လာခဲ့သည်။
သို့သော် အဘိုး၏ မျက်နှာက သိသိသာသာ မကောင်းတော့။ အသုဘနှင့် ပတ်သက်သော ပညာအမွေကို သူ့ဆီက ဆက်ခံမည့်သူ မရှိတော့သဖြင့် မျက်နှာ ပျက်ယွင်းခြင်း၊ စိတ်မကောင်း ဖြစ်နေခြင်း ဖြစ်လိမ့်မည်ဟု ကျွန်တော်တို့ မိသားစုက ယုံကြည်ကြသည်။
အဘိုးသည် နောက်ထပ် တပည့်တစ်ယောက် မွေးအပြီးတွင် သေဆုံးခဲ့သည်။ ထိုအခါ အဘိုး၏ ဈာပနကို သူ၏ ဒုတိယမြောက် တပည့် ဖြစ်သည့် ကိုလှဝင်းက တာဝန်ယူသည်။ အစစ အရာရာ ချောမော အောင်မြင်သည့် အပြင် အဘိုးဆုံးပြီ ကြားသဖြင့် တစ်လမ်းလုံး တစ်ရပ်ကွက်လုံးရှိ လူတွေ အားလုံးနီးပါး လာရောက်ကြသည်။ ထို့ကြောင့် ကျွန်တော်တို့ အိမ်သည် ပွဲတော်တမျှ စည်ကားနေခဲ့သည်။
ပို၍ သေချာသည်က အဘိုး၏ ဈာပနနှင့် ပတ်သက်၍ မသာစရိတ်ဟူ၍ တစ်ပြားတစ်ချပ်မှ ကုန်ကျခြင်း မရှိခဲ့ပါ။ သင်္ချိုင်းမှ ခေါင်းတလားမှ စ၍၊ မြေမြှုပ်သည့်ကျင်း၊ သယ်ယူပေးမည့် ကားခ၊ ယုတ်စွအဆုံး ပန်းဖိုးပင် မကုန်ကျခဲ့ပါ။ လာလိုက်ကြသည့် လူတွေမှာလည်း မုန့်ဟင်းခါး အချိန်နှစ်ရာကျော်ကို မနက် ဆယ်နာရီလောက် မှာတင် ကုန်သွားခဲ့သည်။ ဝေယျာဝစ္စ ကိစ္စများနှင့် ပတ်သက်၍လည်း ကျွန်တော်တို့ မိသားစုထဲက တစ်ဦးတစ်ယောက်မှ နှီးတစ်ချက် မချည်လိုက်ရပါ။ ရေတစ်ပုံး မခပ်လိုက်ရပါ။ ဟင်းအိုးပင် တစ်ချက် မမွှေလိုက်ရပါ။
မှတ်မှတ်ရရ အဘိုး မြေချသည့်နေ့က အဖြစ်အပျက်တို့သည် ယုံနိုင်စရာ မရှိအောင် အံ့ဩစရာ ကောင်းနေတော့သည်။ ထိုနေ့က အဘိုးကို မြေချမည့် အချိန်မှာ ညနေ သုံးနာရီဖြစ်သည်။ သို့သော် အသုဘယာဉ်က သုံးနာရီ ကျော်သည်အထိ ရောက်မလာသေး။ ထို့ကြောင့် သင်္ချိုင်းသို့ ကျွန်တော်က လိုက်သွားရသည်။ ထိုအခါ အဘိုးကို တင်ဆောင်မည့် အသုဘယာဉ်၏ ခေါင်းခန်းတွင် ထိုင်လျက် လိုက်ပါလာခဲ့ ရသည်။ ဒီတော့မှ ကျွန်တော် စဉ်းစားမိသည်က လက်ရှိ ကျွန်တော် ထိုင်နေသော တိုင်ခုံတွင် ကျွန်တော့် အဘိုးသည် အကြိမ်ပေါင်း များစွာ ထိုင်ခဲ့ဖူးသည်။ အခေါက်ပေါင်း များစွာ စီးနင်းခဲ့ဖူးသည်။
အနားပတ်လည်ကို ကြည့်လိုက်မိတော့ ကားက အတော့်ကို ဟောင်းနွမ်း ပျက်စီးနေပြီ ဖြစ်သည်။ တံခါးချက်တွေက မကောင်းတော့သဖြင့် သွပ်နန်းကြိုးနှင့် ချည်နှောင် ထားရသည်။ ကူရှင်တွေလည်း မရှိ။ ထိုကား၏ အခြေအနေမှာ ဟွန်းမှလွဲလျှင် ကျန်သည့် အရာဝတ္ထုတွေ အားလုံးက မြိုင်မြိုင်ဆိုင်ဆိုင် အသံတွေ မြည်ကြသည်။ ကျွန်တော်က ထိုကားကြီးကို စီးလာတော့ အသုဘပို့မည့် သူတွေထဲက ထောမနာပြုသံ တစ်ချက် ကြားလိုက် ရသေးသည်။ “ပုံစံကတော့ ဘကြီးဘိုးသီး အတိုင်းပဲ” တဲ့။
ကျွန်တော်က ချိုင့်တွေ၊ ဗွက်တွေမှ နည်းနိုင်သမျှ နည်းသည့်လမ်းမှ မောင်းစေရသည်။ ဒရိုင်ဘာ ဖြစ်သူကလည်း အနည်းငယ် စိတ်မြန်ပုံရသည်။ ဂီယာ အနုတ်အသိမ်း ကြမ်းသည်။ ကလပ် အလွှတ်အပြု ညင်သာမှုမရှိ၊ ထို့ကြောင့် ကားမှာ စုတ်ရသည့် အထဲ သွားရင်းလာရင်း တစ်စစီ ပြုတ်ကျ ပျက်စီးသွားမည် ကိုပင် စိုးရိမ် နေရသေးသည်။
တစ်လမ်းလုံး ပြဿနာ မရှိခဲ့သော ဤကားသည် ကျွန်တော်တို့ လမ်းထိပ်ရောက်မှ စိတ်ညစ် ရတော့သည်း အသုဘပို့မည့် ပရိသတ်မှာလည်း တစ်ရပ်ကွက်လုံးရှိ လူတွေ စုံစုံစေ့စေ့ ရောက်ရှိ နေသလိုပင် ထင်မှတ်ရအောင် ညို့နေတော့သည်။ ဖြတ်သွား ဖြတ်လာကြ သူတို့ကလည်း စိတ်ဝင်တစားဖြင့် အမှတ်တမဲ့ လှမ်းကြည့်ရင်း ကျွန်တော့် အဘိုးမှန်း သိသွားသဖြင့် ချက်ချင်း လိုက်ပို့ရန် စောင့်ဆိုင်း နေသူတွေလည်း ပါသည်။
ထိုလူအုပ်ကြားတွင် ဖြစ်သည့် ပြဿနာက အသုဘယာဉ် ဗွက်နစ်ခြင်းပင် ဖြစ်သည်။ ပထမတော့ ကိုရွှေဒရိုင်ဘာက ဗွက်ကို ရုန်းကြည့်သေးသည်။ မရ။ ပို၍ပင် နစ်နေသေးသည်။ နောက်ဆုံးတွင် ဘယ်လိုမှ ရုန်းမရတော့သည့် အဆုံး မသာပို့ ပရိသတ်တွေထဲက ယောက်ျားတွေ လေးငါးဆယ်ယောက်ခန့် ဝိုင်းလာကြကာ တွန်းကြသော်လည်း ထူးမလာ။ နောက်ဆုံး တစ်ယောက်တစ်လက် ညီညီညာညာဖြင့် ထိုကားကြီးကို ညာသံပေး ဝိုင်းမကာ ဗွက်လွတ်ရာသို့ တရွေ့ရွေ့ ရွှေ့ပေးလိုက်ကြ ရတော့သည်။
ထိုအချိန်မှ စ၍ အဘိုး၏ စေတနာ အလှကို ကျွန်တော် နားလည် သဘောပေါက် လာပြီး မသေခင် ဖြတ်သန်းခဲ့သော လုံ့လကြောင့် အဘိုး၏ သေပန်းပွင့်ပုံ ကိုလည်း ကြည်နူးပီတိ ဖြစ်ခဲ့ရပါသည်။ ထို့ပြင် အဘိုး၏ ဘဝ တစ်လျှောက်လုံး ဘယ်တုန်းကမျှ မထောက်ခံခဲ့ဘူးသော အဘွားကပင် ဆေးပေါ့လိပ်ကြီးကို ငေါ့ရင်းကနေ ဝမ်းပန်းတနည်း ထ၍ ကြွေးကြော်သည်။
“ရှင်သေတာ ကျွန်မ စိတ်မကောင်း ဖြစ်ရမယ့် အစား၊ ဝမ်းသာလိုက်တာ ကိုဘိုးသီးရယ် ဟီး ဟီး” တဲ့။
ယခုဆိုလျှင် ကျွန်တော့်အဘိုး ဆုံးခဲ့သည်မှာ နှစ်ပေါင်း နှစ်ဆယ်နှစ်ကျော် ကြာခဲ့ပါပြီ။
အရွယ် ရောက်လာခဲ့ပြီ ဖြစ်သော ကျွန်တော့် အနေနဲ့လည်း ယခုအချိန်တွင် တစ်ယောက်ယောက်က ကျွန်တော့်ကို “မင်း ဦးဘိုးသီးရဲ့ မြေးလား” ဟု မေးလာခဲ့လျှင် ကျွန်တော် အရင်လို မရှက်တော့ပါ။ သိမ်ငယ်ခြင်းလည်း မဖြစ်တော့ပါ။ အဘိုး၏ ဂုဏ်ကို ချီးမြှောက်ခြင်း၊ အဘိုး၏ ပရဟိတစိတ်နှင့် စေတနာကို မမေ့မလျော့ အသိအမှတ် ပြုခြင်းဟု နားလည်လာပြီ ဖြစ်သည်။
ထို့ကြောင့် မေးလာသူရှေ့တွင် ကျွန်တော့် ရင်ကို သိသိသာသာ ကော့ပြီး ဟုတ်မှန်ကြောင်း ဝန်ခံတတ်ပါသည်။ သေချာသည်က လူတစ်ယောက်၏ ထင်ကျန်ရစ်ခဲ့သော နာမည်တစ်လုံးမှာ နှစ်ပေါင်းများစွာ ကြာသည်အထိ၊ လတ်ဆတ်စွာ ကျန်ရစ်နေခဲ့ သည်မှာ အံ့ဩစရာ ကောင်းလွန်းလှပါသည်။
* * *
(၄)
သေချာသည်က အချို့သော သူများသည် လူဆင်းရဲ သော်လည်း အများကောင်းကျိုး အတွက် မိမိကိုယ်ကျိုးကို မကြည့်ဘဲ စွမ်းစွမ်းတမံ ဆောင်ရွက်ခဲ့ ကြသည်။ အချို့သောသူတွေ ကတော့ မည်သူ တစ်ဦးတစ်ယောက် ကိုမျှ ဂရုမစိုက်ဘဲ မိမိအတ္တ တံခွန်ထူဖို့ ကိုသာ အားသွန်ခွန်စိုက် ကြိုးစားနေတတ် ကြပါသည်။ ခက်သည်က ကျွန်တော်တို့ လူ့လောကကြီးတွင် ဒီလို လူမျိုးတွေလည်း အထိုက်အလျောက်တော့ လိုအပ် နေလိမ့်မည်ဟု ကျွန်တော် ထင်ပါသည်။ သို့သော် ထိုသူမျိုးတွေ သိပ်များနေလျှင်တော့ လောကအတွက် မကောင်း။
နောက်ဖေးလမ်းဆီမှ သံဝေဂ လင်္ကာများကို ရွတ်ဆိုသွားသံ ကြားလိုက်ရ ပြန်သည်။ ကျွန်တော့် စိတ်ထဲတွင် “သွားပြန်ပြီ တစ်ယောက်” ဟု မြည်တမ်းမိ ပြန်ပါသည်။ ထို့ပြင် “သူ့ဆီမှာ ဘာများ ပါသွားပါလိမ့်၊ ဒါမှမဟုတ် သူ ဘာတွေများ ထားခဲ့ပါလိမ့်” ဟု တွေးနေမိပါသည်။
-----------------
မောင်နှင်းပန်း
ရွှေအမြုတေ၊ ဧပြီ၊ ၂၀၁၂။
credit - မြန်မာဝတ္ထုတိုများ
No comments:
Post a Comment