သူကျခဲ့တဲ့မျက်ရည်တစ်ပေါက်

သူကျခဲ့တဲ့မျက်ရည်တစ်ပေါက်
***********************
(မောင်ရင့်မာ၊ ကျောင်းကုန်း)

တာဝန်ကျသူနာပြုဆရာမလေး ဆေးလာတိုက်သည်ကို 'မသောက်ချင်ဘူး' ဟူ၍ ငြင်းဆန်ခဲ့သော လူနာတစ်ဦး ရှိခဲ့ဖူးသည်။

ဆရာမလေးပြန်ထွက်သွားသောအခါ လူနာက သူ့သူငယ်ချင်းကို ဇွတ်တောင်း ဆိုသည်။ 'ဟေ့ တင်ဦး၊ သွားပြောချေ၊ မခင်ကြည်တိုက် မှ သောက်မယ်လို့' ထမင်းစားချိန်တန်၍ နောက်တစ်ကြိမ်ရောက်လာသော သူနာပြု ဆရာမ လေး ကိုလည်း နောက်တစ်ကြိမ် ထပ်မံငြင်း ဆန်ခဲ့သေးသည်။ 'မခင်ကြည်ကျွေးမှ စားမယ်' ဇွတ်ကြီးပဲဖြစ်သည်။

သခင်တင်ဦးက ဆရာမလေးမခင်ကြည်ကို မရဲတရဲပြောရသည်။ သူ့သူငယ်ချင်း ဂျီကျ ဆိုးနွဲ့နေသည်ကို တိုးလျှိုးတောင်းပန်ရသည်။ များမကြာမီ ထူးဆန်းသော စကားကို ဆိုပြန်သည်။

'ငါ့ကို အင်္ကျီ၊ လုံချည်ဝယ်ပေးစမ်းပါကွာ''ဘာလုပ်ဖို့လဲ''မိန်းမယူတော့မလို့ကွ'

သခင်တင်ဦး ပါးစပ်ပြဲသွားသည်။ အလံပြဘုရားလမ်း၊ ဘီအိုင်အေဆေးရုံကြီးပေါ် ၌ သူသည် နတ်ဒေဝတာတစ်ဦးမဟုတ်ကြောင်းနှင့် လူသားစင်စစ် ဧကန်ဖြစ်ကြောင်း ကို ကိုယ်ထင်ပြခဲ့ခြင်းဖြစ်သည်။

အသက်-၂၂ နှစ်တွင် တက္ကသိုလ်ကျောင်း သားများသမဂ္ဂဥက္ကဋ္ဌဖြစ်လာသူ၊ အသက်၂၇ နှစ်တွင် ဗမာ့လွတ်လပ်ရေး တပ်မတော်၏ စစ်သေနာပတိနှင့် ၂၈ နှစ်တွင် မေဂျာဂျင်နရယ် ဖြစ်လာသူ။ အသက် ၃ဝ အရွယ်တွင် ဖဆပလ ဥက္ကဋ္ဌအဖြစ်သို့ လည်းကောင်း၊ နိုင်ငံ၏ အမျိုးသားခေါင်းဆောင်ကြီးအဖြစ်သို့ လည်းကောင်း ရောက်ရှိနေခဲ့သူအား ကျွန် တော်တို့ ငယ်စဉ်က ပုံပြင်ထဲက သူရဲကောင်းဟုထင်ခဲ့သည်။ ဒဏ္ဍာရီထဲက နတ်ဒေဝတာ တစ်ပါးဟုထင်ခဲ့သည်။ လူသားစင်စစ် ဧကန် ဖြစ်ပါ့မလားဟု ယုံမှားခဲ့သည်။

ထိုသို့ယုံမှားရအောင်လည်းသူက အံ့သြချီးကျူးဖွယ်ရာအရည်အချင်းများနှင့် ထူးချွန်ထက်မြက်သော လူငယ်တစ်ဦးဖြစ်ခဲ့သည်။

အရွယ်မတိုင်မီရင့်ကျက်ခဲ့သည်။ မြန်မာလူထု တစ်ရပ်လုံး၏ နှလုံးသည်း ပွတ်ဖြစ်ခဲ့ရုံ မျှမက၊ တစ်မြေတည်းနေ သွေးချင်းညီအစ်ကိုတို့၏ ယုံကြည် ကိုးစားမှု၊ အာရှခေါင်းဆောင်တို့၏လေးစားမှုကိုရခဲ့သည်။ အင်မတန်ကိန်းခန်း ကြီးသော မောင့်ဘက်တန်လို တော်ဝင်ပုဂ္ဂိုလ် တို့၏ အလေးထားမှုကိုရခဲ့သည်။ ဤသည်ကို မည်သူမျှအငြင်းပွားဝံ့စရာ မရှိတန်ရာပါ။

သို့အတွက် သိဒ္ဓတ္ထမင်းသားသည် ကျွန်တော်တို့နှင့် အလှမ်းဝေးသကဲ့သို့ သူသည် ကျွန်တော်တို့ကဲ့သို့လူသားမဟုတ်ဟု ငယ်ဘဝတစ် လျှောက်လုံးတွေး ကာ အလှမ်းဝေးနေခဲ့သည်ကို ဝန်ခံလိုပါသည်။

ကျွန်တော့်ကို 'လင်းပွင့်' သွားစေခဲ့သည်မှာ ညဥ့်ဦးယံစားပွဲ သဘင်တစ်ခုဖြစ်သည်။ မြစ်ဝ ကျွန်းပေါ်ဒေသ နတ်တော်ည တစ်ည၏နှင်း ဝေမှုန်မှုန်ထဲတွင် ကျွန်တော်သည် ဗိုလ်ချုပ်ကို လူသားတစ်ယောက်အဖြစ် စတင် တွေ့သိ ခံစားခဲ့ရခြင်းဖြစ်သည်။

ဆရာကျော်အောင်သည် အပျံစားအဟော အပြောသမားတစ်ဦးမဟုတ်ခဲ့ပါ။ မျက်ရည် တောက်တောက်ကျတော့မလို ကူလီကူမာ အမူအရာမျိုးမလုပ်တတ်ပါ။ လိုအပ်သည့် နေရာတွင် လိုသလောက်ကိုယ်ဟန်အမူ အရာဖြင့် 'ရောက်' သွားအောင် ပြောနိုင်၊ ဆို နိုင်သူမျှသာဖြစ်ပါသည်။ ထိုညက ကျွန်တော်တို့ နှလုံးသည်းပွတ် ခေါင်းဆောင်ကြီး၏ လက်ထပ်မင်္ဂလာပွဲကို ခင်းကျင်းပြောပြနေ ခြင်းဖြစ်သည်။

ပြိုးပြက်လင်းလက်နေသည့် မင်္ဂလာအခမ်း အနားသည် မင်္ဂလာသတို့သား၏ ကြီးမြတ် သောဂုဏ်ရည်ကြောင့် ပို၍ ဖိတ်လက်ပြိုးပြက်နေလိမ့်မည်။

သိုက်မြိုက်စည်ကားနေလိမ့်မည်။ အပြုံးပွင့်တွေ တဖျပ်ဖျပ်လက် ၍တောက်ပနေလိမ့် မည်ကို ယုံမှားဖွယ်ရာမရှိ ပါချေ။ ထိုအချိန်တွင် သတို့သား၏သူငယ် ချင်းတစ်သိုက် ဝင်ရောက်လာခြင်းဖြစ်သည်။ ထိုအချိန်တွင် 'တဇွတ်ထိုး သတို့သားကြီး' သည် ပရိသတ်ဗိုလ်ပုံအလယ်၌ သတို့သမီး၏ခါးကို ရုတ်တရက် ဆွဲဖက်လိုက်သည်။

''ဟေ့ရောင်တွေ၊ ဟေ့ရောင်တွေ တင်ဦး။ ဒီမယ်တွေ့လား.. တွေ့လား။ မင်းတို့မရဘူး။ ငါ ရတယ်'' ပရိသတ်တို့ ဝေါခနဲပြိုကျ သွားသည်။ ကျွန်တော်သည် ထိုအခမ်းအနား၊ ထိုအခင်းအကျင်းနှင့် ချစ်ခင်ကြည်မောဖွယ် ရာထိုအဖြစ်အပျက်လေးကို နှစ်ပေါင်းများ စွာရင်ခုန်စွဲလန်းနေမိသည်။

တစ်တိုင်းတစ်ပြည်လုံး၏ နှလုံးသည်းပွတ် ဖြစ်နေပြီဖြစ်သောလူငယ်တစ်ယောက်သည် သူချစ်မြတ်နိုးသော နှင်းဆီ တစ်ပွင့်ကို ပိုင်ပိုင် နင်းနင်းခူးဆွတ်ခွင့်၊ နမ်းရှိုက်ထွေးပိုက်ခွင့်ရရှိ သောအခါ၌ သူ၏ရင်ခုန်သံကို သိမ်းဆည်း မထားနိုင်လောက်အောင်ကိုပဲ သူ့သူငယ် ချင်းများအပေါ် ဂုဏ်ယူဝင့်ကြွား လိုက်ပုံမှာ မည်မျှလူသားပီသလိုက်ပါသနည်း။ မည်မျှ ပွင့်လင်းလိုက်ပါသနည်း။ မည်မျှရိုးစင်းလိုက် ပါသနည်း။ မည်မျှချစ်ခင်စရာကောင်းလိုက်ပါ သနည်း။

ဆရာကျော်အောင်ဟောခဲ့သည်မှာ နှစ် ၂ဝ ခန့်ရှိရော့မည်။ သို့သော် ကျွန်တော်သည် နတ်ဒေဝတာတစ်ပါးကဲ့သို့အောင် မြင်ထင်ရှားသော ဧရာမပုဂ္ဂိုလ်ကြီးတစ်ဦး၏ ပကတိ လူသားအဖြစ်ကိုတွေ့မြင်ခွင့်ရခဲ့သည့် တစ်ညချမ်းကို ကျေးဇူးမမေ့ နိုင်ပါချေ။

သူ၏ကိုယ်ကျိုးစွန့်မှု၊ အနစ်နာခံမှု၊ ရင့်ကျက်မှု၊ ပြတ်သားမှု၊ ဘုဂလန့်ကျမှု၊ လွတ်
လပ်ရေးအတွက် တစ်ချိန်လုံးတွေးတော ကြံစည်၊ ဥာဏ်နီဥာဏ်နက်ထုတ်၊ လုပ်ဆောင်ခဲ့သော အချက်များသည် ခမ်းနားလှပါသည်။ သို့သော် ထိုသူတစ်ယောက်၏ သက်ရှိလူသား အဖြစ်သည် ထိုသို့သောခမ်းနားမှု ကြီးကျယ် မှုများအောက်တွင် ပျောက်ဆုံးသွားတတ်ပါသည်။

လွတ်လပ်ရေးနှင့် တပ်မတော်၏ဖခင်၊ နိုင်ငံနှင့်သမိုင်းကပင် ရာစုနှစ်များချီ၍ မျှော်လင့်စောင့်စားခဲ့ရသော အမျိုးသားခေါင်းဆောင် သူကွယ်လွင့်ကြေပြုန်းခဲ့စဉ်က တစ်ပြည်လုံး ကြိမ်မီးအုံးသကဲ့သို့ သည်းစွာငိုကြွေးပူဆွေးခဲ့ရသောအာဇာနည်။ ဖတ်ခဲ့ပါသည်။ နှမြောခဲ့၊ လွမ်းဆွတ်ခဲ့ပါသည်။ ဦးခိုက် ခဲ့ပါသည်။ သို့သော် ထိုခေါင်းဆောင်ကြီး၏ ခမ်းနားကြီးကျယ်မှုသည် သူ၏လူသားစရိုက်
ပီပြင်သော ပုံကား ချပ်၌ သာပဲပို၍ ရုန်းကြွ၊ ပို၍ တောက်ပလာနိုင်သည်ဟု ကျွန်တော် ထင်သည်။ အသက်ဝင်ရှင်သန်သည်ဟု ကျွန်တော်ထင်သည်။

သမဂ္ဂဥက္ကဋ္ဌ ဟောင်းမစ္စတာရာရှစ်ကို ဝေဖန်သော စစ်ကိုင်းကျောင်းသားတစ်ဦးအား ဒေါသမထိန်းဘဲ ထိုးမည်၊ ကြိတ်မည်လုပ်ခဲ့သော စိတ်လိုက်မာန်ပါအမူအရာကို ကျွန်တော်ကြိုက်၏။ သမဂ္ဂကိုအယုံအကြည်မရှိ အဆိုပြုခဲ့သောညိုမြအား ပြစ်တင် ရှုတ်ချပြီး နောက်တစ်ပတ်အကြာတွင် မိမိ၏ရှုတ်ချချက် ကို ပြန်လည်ရုပ်သိမ်းလိုက်ကြောင်း ကျောင်းဆောင်များတွင် ကြေညာချက်ထုတ်ခဲ့သည်ကိုကျွန်တော်ကြိုက်၏။ သူ့ကိုချစ်ကြည်ညို စိတ်နှင့် သူ့မိန့်ခွန်းကို လာနားထောင်နေသော လူထုကြီးအား အိညက်အိညက်မလုပ်ဘဲ ခပ်ပြတ်ပြတ် ကြိမ်းမောင်းခဲ့သည်ကို ကျွန်တော်ကြိုက်၏။ တစ်သက်လုံးမှာမှ ကံကောင်း လှစွာ မိန်းမ တစ်ယောက်သာရရှိခဲ့ဖူးသော်လည်း မိန်းမတစ်ယောက်မျှမရရှိခဲ့ဖူးသော စာ
ရေးဆရာ အား 'လင်မယားဘဝမှာ အနု ပညာလိုတယ်ကွ' ဟု လူတတ်ကြီးလုပ်၍ အထက်စီးကသွန်သင်ခဲ့သည့် အမူအရာ ကိုကျွန်တော်ကြိုက်၏။ (တော်လှန်ရေးမှာ လည်း အနုပညာ ရှိတယ်ကွ ပြောသောစကား မူကား ဦးညွှတ်စရာဖြစ်၏)သူလက်ထပ်ပြီးစ၊ အင်းလျားကန်စောင်းနေအိမ် ဧည့်ခန်းသို့ နှုတ်ခမ်းနီများပေကျံလျက် ဧည့်သည်ထွက် တွေ့ခဲ့သောအမူအရာကို ကျွန်တော်ကြိုက်၏။

လူ့စရိုက်ပီပြင်သောကြောင့် ဖြစ်ပါသည်။ လူသားအဖြစ် တည်ရှိခဲ့မှု သေချာသောကြောင့်ဖြစ်ပါသည်။ လူဆိုသည်မှာ ဒေါသ ရှိမည်၊ သောကရှိမည်၊ အမှန်ရှိမည်၊ အမှား ရှိမည်။ အချစ်ရှိမည်၊အမုန်းရှိမည်။ ဝမ်းသာ တတ်၊ ဝမ်းနည်းတတ်သည်၊ လွမ်းတတ်သည်။ ကြေကွဲတတ်သည်။ ရယ်မောတတ်သည်၊ ငို ကြွေးတတ်သည်။

သူသည်ငိုကြွေးခဲ့ဖူးသလော။ အံ့မခန်းချီး ကျူးလေးစားဖွယ်ရာ အမျိုးသားခေါင်းဆောင် ကြီးသည် မျက်ရည်ကျခဲ့ဖူးသလော။ ဗိုလ်ချုပ်ငိုသော ညတစ်ညကိုပြန်ပြောပြပါမည်။ ၁၉၄၆ ခုနှစ်တွင် သူ့အသက် ၃၁ နှစ်ပဲရှိသေးသည်။ အမျိုးသားခေါင်းဆောင်၊ မြန်မာပြည်သူတို့၏ အသည်းနှလုံးဖြစ်နေပြီ။ စိုက်ပျိုးရေးပါရဂူ ဖြစ်ခဲ့ဖူးသော ဒေါ်မန်စမစ်သည် ရည်မွန်သောပညာတတ်တစ်ဦးလည်းဖြစ်သည်။ ၁၉၄၁ ခုနှစ်ကတည်းက ဘုရင်ခံအဖြစ် မြန်မာပြည်သို့ ရောက်လာခဲ့သူဖြစ်သည်။

နိုင်ငံရေးအရ တစ်ဦးနှင့်တစ်ဦး မျက်ခြည်မပြတ်စောင့်ကြည့်နေ ရသူများ ဖြစ်ပါလိမ့်မည်။ သို့သော် သူတို့နှစ်ဦးသည် ခင်မင်ရင်းနှီး ကြသည်။ တစ်ညတွင် သူက ဒေါ်မန်စမစ်ထံ သို့ဖုန်းဆက်သည်။

လာတွေ့လိုသည်ဟု ပြောသည်။ လူငယ်တစ်ဦး၏ အရွယ်ကို ကျော်လွန် စပြုပြီဖြစ်သောသူ့ကို ဒေါ်မန်စမစ်က နွေးထွေးစွာ ကြိုခဲ့သည်။

မိတ်ဆွေချင်း နွေးထွေးသော ဆက်ဆံရေးမှာ ရံဖန်ရံခါ ထူး
ဆန်းတတ် ပါသည်။ ညီအစ်ကိုချင်း ပြောမထွက်သောရင်ဖွင့်စကားကို မိတ်ဆွေချင်း လွယ်လင့်တကူပြောထွက်နိုင်သောသဘော မျိုးဖြစ်မည် ထင်ပါသည်။

ထိုည ညဥ့်ဦးယံ၏ လူကြီးလူကောင်းမိတ်ဆွေနှစ်ဦး ဆက်ဆံရေးက လွမ်းမော စရာ ညင်သာပျောင်းနွဲ့လှသည်။ ''ဒါပေမယ့် အဲဒီလိုလုပ်ရင်း ဘဝဟာအထီး
ကျန်လာ တယ်။ ဒီလိုဖြစ်လာလိမ့်မယ်လို့ ကျွန်တော်မမျှော်လင့်ခဲ့ ဘူး'' ပြောရင်း က သူမျက် ရည်ကျသည်။ ''ကျွန်တော် အထီးကျန်လွန်းတယ်ဗျာ ''မမျှော်လင့်သော စကားကို ကြားသောအခါ ဒေါ်မန်စမစ်အံ့သြသွားခဲ့သည်။

''ဘယ်လို အထီးကျန်ဖြစ်နိုင်မှာလဲ ခင်ဗျားဟာ ပြည်သူ့အသည်းကျော်ပဲမဟုတ်လား''နှစ်သိမ့်လိုက်သည်။''ကျွန်တော်က ပြည်သူ့အသည်းကျော်ဖြစ်ဖို့လုပ်ခဲ့တာမဟုတ်ဘူး။ ကျွန်တော့်တိုင်းပြည် လွတ်လပ်ဖို့လုပ်တာပါ''

ဤကားသူ၏ ရိုးသားဖြူစင်သောသဘာဝကို အရင်းအတိုင်းဖော်ပြလိုက်သော စကားဖြစ်သည်။ သို့သော်၊ ထိုအချိန်က သူသည် ပြည်သူလူထုတစ်ရပ်လုံး၏ အသည်းနှလုံး ဖြစ်နေသကဲ့သို့ တစ်ချိန်တည်း တွင် နိုင်ငံရေး လက်ဟောင်းကြီး တချို့က သူ့အပေါ် လူထုကြည်ညိုမှုကိုမနာလိုဖြစ်နေခဲ့သည်။ ခေါင်းဆောင်မှုကို သူ့ထံမှ လွှဲယူလိုကြသည်။ တစ်ခါတစ်ရံ မနာလိုမှုမရှုစိမ့်မှုသည် ပြင်းထန်သော အမုန်း တရားကို မွေးဖွားပေးတတ်သည်။ သူက ထိုအချက်ကို နာကျင်နေခြင်းဖြစ်နိုင်သည်။

နိုင်ငံနှင့် ပြည်သူတစ်ရပ်လုံးအပေါ် တစ်ဘဝလုံးပုံအပ်ထားခဲ့သော လူရွယ်လေး တစ်ယောက်အနေဖြင့် ထိုသို့သော အမုန်းတရားအတွက် ခါးသီး နာကျင်စရာ ဖြစ်မည်သေချာသည်။

''အမျိုးသားသူရဲကောင်းတွေ ဘယ်လောက်ခံသလဲ။ ဒီတိုင်းပြည်မှာ ကြာကြာမခံဘူး။ သူတို့မှာ ရန်သူတွေဝိုင်းနေတယ်။ ကျွန်တော့် အသက်ဟာကော ဆယ့်ရှစ်လထက်ပိုပြီး ရှည်မယ်မဟုတ်ဘူး'' တစ်တိုင်းပြည်လုံး၏ နှလုံးသည်းပွတ်ဟူ၍ ကျွန်တော်တို့ ယုံကြည်သော ထိုခေါင်းဆောင်ကြီးသည် ထိုညက မျက်ရည်တစ်ပေါက်ကျခဲ့သည်။

မောရစ်ကောလစ်၏ Last and First in Burma ကိုမြန်မာပြန်သူ ဆရာကျော်အောင်က ထိုညတွင် ဗိုလ်ချုပ်မျက်ရည်ကျခဲ့သည့် စာတစ်ကြောင်းကို ချန်ခဲ့သည်။ ဆရာဟောပြောစဉ်က ထိုအချက်ပါရှိခဲ့သော်လည်း ဆရာ့စာအုပ်တွင် ပါဝင်ခြင်းမရှိခဲ့သဖြင့် မူရင်းပြန်ရှာကြည့်သည်။ (And saying this he wept) ဟု တွေ့ရသည်။ သူငိုပါသည်။ ဆရာချန်ခဲ့တာ သေချာသည်။

ဘုရင်ခံ ဒေါ်မန်စမစ်၏ မှတ်တမ်းကို အဓိကအားပြုခဲ့သော မောရစ်ကောလစ်၏ ရေးသားချက်ကို မယုံကြည်ရန်ခိုင်လုံသော အကြောင်းပြချက်မရှိပါ။ကျွန်တော်ယုံပါ သည်။ ရိုးသားဖြောင့်စင်းသော လူငယ်တစ်ယောက်၏ ကြေကွဲမျက်ရည်။

သူသည်အသက်အရွယ်နှင့်မမျှ ရင့်ကျက်သော၊ ထက်မြက်သော၊ထူးချွန်သော၊ သတ္တိပြောင်သော ခေါင်းဆောင်တစ်ဦး ဖြစ်သည် ကိုယုံမှားဖွယ်ရာမရှိပါ။ သူလုပ်ကြံခံရနိုင်သည်ဟု ထင်မြင်ယူဆဖွယ်ရာရှိစေကာမူ အကာအကွယ်များကိုကြို၍ စီမံခြင်းမပြုခဲ့ချေ။ သည်အချက်မှာ သူ့၌သေမည်ကို ထိတ်လန့်ကြောက်ရွံ့မှု စိုးစဉ်းမျှမရှိခဲ့ဟု ကောက်ယူနိုင်ပါလိမ့်မည်။

'သူ့အတွက်' ဟု တစ်စုံတစ်ရာငဲ့ကွက်ခြင်းမပြုဘဲ နိုင်ငံတော်အတွက်၊ လွတ်လပ်ရေးအတွက် တစ်ဘဝလုံးပုံ၍ လုပ်ခဲ့ရာ၌ သူမျှော်လင့်မထားသောအရာကို သူပြန်ရခဲ့သည်။ ထိုအရာကား မနာလိုမှုနှင့် သည်း ထန်သော အမုန်းတရားဖြစ်သည်။ ထိခိုက်ပါလိမ့်မည်။

နာကျင်ပါလိမ့်မည်။ ကြေကွဲပါလိမ့်မည်။ ထို ခံစားမှုက နှလုံးအိမ်ကို ဆုပ်ညှစ် မည်။ သူ့ မျက်လုံးတွင် မျက်ရည်ပြည့်ခဲ့မည်။ ထိုမျက်ရည်တို့ကို သုတ်ပေးခဲ့ပြီလား ဟု ယခုပြန်တွေးကြည့်မိပါသည်။

ကျွန်တော်တို့သည် မျက်ရည်များကို သွေ့အောင်မလုပ်နိုင်လျှင် ထပ်မံစိုစွတ်အောင်လည်း မလုပ်သင့်ဟုထင်ပါသည်။