သာဒွန်း - နေဝင်းမြင့်
* * *
(၁)
အခုပြောမယ့်အကြောင်းအရာက သူကြီးခေတ်က ဖြစ်ခဲ့တာလေးပါ။ တချို့က အခု မနေ့တနေ့ကဖြစ်တယ်လို့ ထင်မှာစိုးလို့ပြောရတာ။
သိပ်ထူးထူးဆန်းဆန်းကြီးတော့လည်း မဟုတ်ဘူး။ လူငါးယောက်နဲ့ ကခဲ့တဲ့ တခန်းရပ် ပြဇာတ်ကလေး တပုဒ်အကြောင်း ဆိုပါတော့။
(၂)
သဖန်းချောင်း ဘုန်းကြီးက ရွာဆွမ်းသိမ်းပွဲအတွက် အစည်းအဝေးခေါ်တယ်။ သွားကြရတော့တာပေါ့။ တနယ်လုံးက ကြည်ညိုတဲ့ ဆရာတော်ကြီးကိုး။ သဖန်းချောင်းက မြို့မဟုတ်တော့ ရွာထဲက အပိုင်းအပိုင်းလေးတွေ၊ အစုလေးတွေကို ရပ်ကွက်လို့ မခေါ်တော့ဘူး။
အစု တဲ့၊ ချောင် တဲ့၊ ထားပါတော့လေ ချောင်ပဲ။ သဖန်းချောင်းမှာ ချောင် ၅ ခုရှိတယ်။ လက်ခုပ်ချောင် တဲ့၊ အလိုလေးချောင် တဲ့၊ ဘောဂချောင် တဲ့၊ မြို့မ တဲ့၊ မင်းလမ်း တဲ့၊ မြို့မနဲ့ မင်းလမ်းက နည်းနည်းအလယ်ကျပြီး ပိုက်ဆံရှိတဲ့လူ ပေါတဲ့အစုတွေပါ။ လက်ခုပ်ချောင်၊ အလိုလေးချောင်၊ ဘောဂချောင်တွေကတော့ ဆင်းဆင်းရဲရဲ လက်လုပ်လက်စားများတယ် ပြောပါတော့။
ဘာပဲဖြစ်ဖြစ်နှစ်စဉ်လုပ်နေကျ ဆွမ်းသိမ်းပွဲကြီး ဒီနှစ်လည်း စည်ကားချင်တော့ တရွာလုံးပါရတော့တာကိုး။ တချောင် ၃ ယောက်ကျနဲ့ အစည်းအဝေးတက်တော့ ဘောဂချောင်က လူကြီး ၃ ယောက်လည်း ပါတယ်။
ထုံးစံအတိုင်းပေါ့။ သူကြီးက ဆွမ်းသိမ်းပွဲအစီအစဉ်တွေ နှစ်စဉ်နှစ်တိုင်းလိုပဲ စည်စည်ကားကားဖြစ်ချင်တဲ့ အကြောင်း၊ အိုးစည်ဝိုင်း၊ ဒိုးပတ်ဝိုင်းတွေနဲ့ မနှစ်ကစီစဉ်သွားတာ တော်တော်လေး အဆင်ပြေတဲ့အကြောင်း၊ သည်နှစ်တော့ တချောင် တမျိုး တာဝန်ယူပြီး ကြည့်ချင်ပွဲလေးလုပ်ရင် ပိုများသင့်မြတ်မလားလို့ထင်ကြောင်း၊ ရွာကလည်းခေါင်တော့ ကိုယ့်အရပ်နဲ့ကိုယ့်ဇာတ်လေးလုပ်ပါမှ ရွာသူရွာသားတွေကြည့်ကြရမှာဖြစ်ကြောင်း အမိန့်ရှိတော့ သင့်မြတ်ပါတယ် ဘုရားပေါ့။
ကတိပေးကြတယ်။ ဆွမ်းသိမ်းပွဲတွေကလည်း မိုးလေဝသကင်းမှဆိုတော့ လုပ်မယ်ဆိုရင်လည်း ဖြစ်နိုင်တော့ လွယ်လွယ်ပဲ ကတိပေးလိုက်ကြတယ်။
ဒါပေမယ့် အစည်းအဝေးပြီးလို့ အိမ်ပြန်ကြတော့ စိတ်ညစ်သွားတာ ဘောဂချောင်က လူကြီး ၃ ယောက်ပဲ။ ‘ကိုင်း ဘယ့်နှယ့်လုပ်မတုံး၊ တချောင် တမျိုးနဲ့ တာဝန်ယူပြီး ဇာတ်လမ်းကလေးသွင်းရမတဲ့’ ဆိုတော့ ကျန်တဲ့နှစ်ယောက် ကလည်း ဘာမှပြန်မပြောနိုင်ဘူး။ ကိုယ့်ချောင်အကြောင်း ကိုယ်သိတာကိုး။
ထိုးဇာတ်ကလေးနေနေသာသာ ထမင်းစားဖို့ ဖတ်သီဖတ်သီရှာနေရတဲ့ချောင်။ ပြေးကြည့်မှ တချောင်လုံး လူတရာ မပြည့်တဲ့ချောင်။ အဘိုးကြီးတွေ၊ ကလေးတွေ၊ မိန်းကလေးတွေ နုတ်လိုက်ရင် ယောက်ျားသားဆိုလို့ ရှိလှရင် ၃၀ ပေါ့။
အဲသည်အထဲမှာ လူငယ်ဆိုလို့ လေးငါးဆယ်ယောက်လောက်ရှိတယ်။ ကျန်တဲ့ယောက်ျားသားတွေကလည်း ကိုယ့်အသက်အရွယ်နဲ့ မျက်နှာချေအဖွေးသားလိမ်းပြီး ဘယ့်နှယ်လုပ် ဇာတ်စင်ပေါ်တက်မတုံး။ ကိုင်း … တက်ပါပြီတဲ့ ဘာ ကကြမှာတုံး။ ဘယ်သူက သင်ပေးမှာတုံး။
‘သူများချောင်တွေက ဖြစ်ပါတယ်ဆိုလို့သာကိုး မခံချင်လို့သာ ခေါင်းညိတ်ရတယ် ကျုပ်တို့ချောင်က ဘာသွားကရမှာတုံး စိတ်စက်များ ညစ်ပါတယ်’
ပြန်သာလာရတယ်။ မျက်နှာမကောင်းကြဘူး။ ရက်ကတော့ ရပါသေးတယ်။ သီတင်းကျွတ်မှဆိုတော့ လုပ်မယ်ဆိုရင် တိုက်ဖို့ပြုဖို့ ရက်ကလေးကတော့ ရတယ်။ ဒါပေမယ့် ဘယ်သူက ဘာဇာတ်ကို ကမှာတုံး။ တယောက်ကတော့ အကြံပေးတယ်။
“ကျုပ်တို့ချောင်က ယောက်ျားလေးကနည်းရတဲ့အထဲ လူငယ်ကာလသားက ဘယ်နှယောက်ရှိလို့တုံး၊ သည်တော့ ရှိတဲ့အထဲက သာဒွန်းတို့ တာဝန်ပေးရင် ကောင်းမလား”
“မိန်းကလေးကကော ဘယ်သူက မင်းသမီးလုပ်မှာတုံး၊ နေ့ နဲ့ ည ထဘီတောင် အနိုင်နိုင်လဲရတဲ့ ကလေးမတွေက ဘယ်က ထဘီအင်္ကျီရမှာတုံး၊ ဒါလည်း တွက်ပါဦး”
“အင်းဗျာ ဘာလုပ်ရမှန်းတောင် မသိတော့ဘူး”
“နေဦးဗျာ၊ သာဒွန်း မေးကြည့်ပါဦး”
လူကြီးတွေကလည်း တာဝန်သာယူလာတာ ဘောဂချောင်က တင်ဆက်ရမယ့် တခန်းရပ်ပြဇာတ်ကို ဘယ်လိုမှ စဉ်းစားလို့ မရဘူး။ ဘယ်လိုလုပ်လို့ လုပ်ရမှန်းမသိဘူး။ နောက်ဆုံးတော့ ချောင်ထဲက အမြဲမူးနေတဲ့ သာဒွန်းကို ဆရာတင်ဖို့ လုပ်ရတော့တယ်။
သာဒွန်းက ဟိုစပ်စပ် ဒီစပ်စပ်တော့ ပါတယ်။ စည်းလေးဝါးလေး နည်းနည်းပါးပါး နားလည်တယ်။ ဒိုးလေး စခွန့်လေး တီးတတ်တယ်။ သီချင်းလည်းဆိုတတ်တယ်ဆိုပေမယ့် နှဲက စီရှပ်ဆိုရင် သူက ငါးပေါက် အောက်ပြန်လောက်နဲ့  အော်ချင်အော်နေတဲ့ကောင်ပေမယ့် ဘောဂချောင်မှာတော့ သူလည်း တေးသံရှင် “ဘောဂချောင် သာဒွန်း” ပေါ့လေ။
“ဒီကောင်လုပ်ရင်တော့ ဖြစ်မယ်ထင်တာပဲဗျာ၊ မေးကြည့်တာပေါ့”
(၃)
သာဒွန်းနဲ့ သူ့သူငယ်ချင်းလေးယောက်က သူတို့ ရှေ့က လူကြီးသုံးယောက်ကို အံ့သြတကြီး ကြည့်နေကြတယ်။ သူတို့တသက် ချောင်ကလူကြီးတွေက သည်လိုယုံယုံကြည်ကြည် တာဝန်ပေးတာမျိုး မရှိခဲ့ဖူးဘူး။ သူတို့ကို အားကိုးတယ်လို့လည်း တခါမှ ပြောဖူးတာ မဟုတ်ဘူး။
မင်းတို့မရှိရင် ချောင်ကဘယ်လိုမှကို နားလန်ထူမှာ မဟုတ်ဘူး။ ဘောဂချောင်ရဲ့ဂုဏ်သိက္ခာကို မင်းတို့ ထိန်းသိမ်းရမယ်ဆိုတာမျိုးကိုလည်း သူတို့မကြားဖူးဘူး။ ဒါပေမယ့် ကနေ့တော့ လူကြီးသုံးယောက်က ခေါ်တယ် ဆိုလို့ လာကြတော့ တကယ့်ကို တာဝန်ပေးနေပြီ။ တာဝန်ကလည်း ကြည့်ဦး၊ တရွာလုံးက ကြည့်မယ့်ပွဲ တဲ့။ ဆွမ်းသိမ်းပွဲ တဲ့။ ချောင် ၅ ခုစလုံးက တချောင် တမျိုး အသုံးတော်ခံကြမှာ တဲ့။ ကိုယ့်ချောင်က ညံ့ရင်ကိုယ်ခံ တဲ့။ ပြဇာတ်၊ ထိုးဇာတ်၊ တခန်းရပ်၊ အော်ပရာ ကြိုက်ရာတခုခုလုပ် တဲ့။ ဘယ်သူမှ မစွက်ဖက်စေ တဲ့။ ဘယ်သူကမှ မင်းတို့ကို သြဇာမပေးစေရဘူး တဲ့။ ဘောဂချောင်မှာရှိတဲ့ ပစ္စည်းပစ္စယ ကြိုက်တဲ့ထဲက ကြိုက်တဲ့အိမ်က ယူသုံးခွင့်ပြုသတဲ့။ ဒါပေမယ့် ဆွမ်းသိမ်းပွဲမှာတော့ ဘောဂချောင်က တာဝန်ယူတင်ဆက်မယ့် အခန်းတခန်းတော့ ပါကိုပါရမတဲ့။
“ကိုင်း မင်းတို့ဖြစ်မလား သာဒွန်း”
သာဒွန်းကလည်း သူ့သူငယ်ချင်း ၄ ယောက်ကို လှမ်းကြည့်တယ်။ သူငယ်ချင်း ၄ ယောက်ကလည်း သာဒွန်းပြီးရင်ပြီးတာပဲဆိုတော့ သာဒွန်းကိုပဲ ပြန်ကြည့်ကြတယ်။
အမှန်တော့ ကိုယ့်ချောင်အကြောင်းတော့ ကိုယ်သိတယ်။ အမည်ကသာ ဘောဂချောင်။ ဆင်းရဲလိုက်ကြတာ တာတေလံ လို့။ ဘယ်အိမ်မှ တံခါးရှိတာ မဟုတ်ဘူး။ ဘယ်အိမ်ကမှ နွားတရှဉ်း ကျွဲတစီးပိုင်တာ မဟုတ်ဘူး။
ဟင်းရွက်လေး ခူးလိုက်၊ ကောက်သင်းလေး ကောက်၊ စပါးလေးရိတ်နဲ့ ဝမ်းတထွာရှာရတဲ့ချောင်မှာ တခမ်းတနား တင်ဆက်ရမယ့် ထိုးဇာတ် ဘယ်လိုစီစဉ်မလဲ။ သာဒွန်း စဉ်းစားတယ်။ ခဏနေတော့မှ …
“ရတယ်ဗျာ၊ ကျုပ်လုပ်မယ်”
“ဟေ”
လူကြီး ၃ ယောက်ကတော့ ဝမ်းသာကြတာပေါ့။ ဆရာတော်ကိုလည်း လေးစား၊ သူကြီးကိုလည်း ကြောက်လို့သာ ယူရတဲ့တာဝန်၊ ပခုံးပြောင်းပေးရတော့မယ်ဆိုတော့ ဝမ်းသာတာပေါ့။
“ဟုတ်မှလဲလုပ်ပါ မောင်ရာ”
“သိပ်ဟုတ်တာပေါ့ဗျာ”
“လူဘယ်နှယောက်ကုန်မှာတုံး”
“ငါးယောက်”
“ဟေ”
“တော်ပြီ ကျုပ်တို့ ငါးယောက်ပဲ”
“ဟဲ့ကောင် သာဒွန်း၊ ငါးယောက်နဲ့ ပြဇာတ်ဖြစ်လို့လားဟ”
“ဖြစ်တယ်၊ ငါးယောက်ပဲ ကုန်မယ်”
“မိန်းကလေးကကော ပြဇာတ်မင်းသမီးလုပ်ဖို့”
“မလိုဘူး မင်းသမီးမပါဘူး”
“ဟေ”
မင်းသမီးမပါဘဲ လူငါးယောက်နဲ့ ကမယ့်ဇာတ်လမ်း သူတို့လည်း မကြားဖူးတော့ ဝမ်းသာတဲ့ကြားက စိုးရိမ်တယ်နဲ့ တူပါတယ်။ တယောက်က …
“ဟဲ့ကောင် … တရွာလုံးကြည့်မယ့်ပွဲနော်၊ မင်း ပေါ့ပေါ့ဆဆတော့ သဘောမထားနဲ့ ငါ့ကောင်ရ၊ မင်းအစွမ်းတော့ ငါ သိပါတယ်၊ ဒါပေမယ့် မင်းသမီးလည်းမပါဘဲ လူ ၅ ယောက်နဲ့ကမယ့် ဇာတ်ရှိလို့လား”
“ရပါတယ်ဗျာ။ ဆွမ်းသိမ်းပွဲဆိုတော့ ဘာသာရေးနဲ့ပတ်သက်ရမှာကိုးဗျ၊ ဒါလည်း စဉ်းစားရသေးတယ်။ ဘောဂချောင်က ဆင်းရဲပေမယ့် သာဒွန်း ဖြစ်အောင်လုပ်နိုင်ပါတယ်”
“ကောင်းပါ့မောင်ရာ၊ ဒါ့ထက် အဝတ်အစားကကော”
“မလိုဘူး။ မင်းညီမင်းသား အဝတ်အစားတစုံနဲ့ သင်္ကန်းဟောင်းတထည်ပဲ လိုတယ်”
“ဟေ”
“ဘကြီးတို့ စိတ်အေးအေးသာ ထားပါဗျာ၊ ကျနော် ရှာခိုင်းတာသာ ရှာပေးပါ”
“ဒါလောက်ဖြစ်ပါတယ်၊ ကျန်တဲ့ ၃ ယောက်က ဘာဝတ်မှာတုံး၊ ဇာတ်က ဘာဇာတ်တုံး”
“နာမည်မပြောနဲ့ဦး၊ တခန်းရပ်လို့ပဲပြောထား။ ကပ်ပြီးမှ ကြေညာမယ်၊ ကျန်တဲ့ ၃ ယောက်ကလည်း ဘာမှ ဝတ်စရာမလိုဘူး ရတယ်”
ဘောဂချောင်က လူကြီး ၃ ယောက်ကတော့ နားကိုမလည်နိုင်တော့ဘူး။ လူ ၅ ယောက်နဲ့ကမယ့် တခန်းရပ် တဲ့။ အဝတ်အစား မလိုဘူး တဲ့။ အမျိုးသမီး မလိုဘူးတဲ့။ ဘာဇာတ်လည်းဆိုတာလည်း မပြောနိုင်ဘူးတဲ့။ လျှို့ဝှက်တောင် ထားရဦးမတဲ့။ ဘာပဲဖြစ်ဖြစ်လေ ဆွမ်းသိမ်းပွဲမှာ ‘ဘောဂချောင် သာဒွန်း’ ရဲ့ တခန်းရပ်ပြဇာတ် တင်နိုင်ပြီးတာပဲ။ သည်လိုပဲ သဘောထားရတော့တာပေါ့လေ။
(၄)
သည်လိုနဲ့ ဆွမ်းသိမ်းပွဲနီးလာပြီ ပြောပါတော့။ တကယ်ဆိုရင် သူများတွေက ဆိုင်းသံ မောင်းသံတွေနဲ့ တချိန်းချိန်းတိုက်ကြပြုကြ၊ စတော်တိုက်ကြ၊ လမိုင်းတင်ကြ၊ ဆိုကြ ငိုကြနဲ့ နောက်နောက် နောက်နောက် ဖြစ်နေချိန်မှာ ဘောဂချောင်က သာဒွန်းတို့ဘာမှ မလုပ်သေးဘူး။
သူများတွေ လုပ်ကြကိုင်ကြတာလည်း ကြည့်ဦးလေ။ လက်ခုပ်ချောင်က သေရိဝဝါဏိဇ ရွဲကုန်သည်ဇာတ် တဲ့။ ရွှေမန်းဦးတင်မောင်ရဲ့ ရွဲကုန်သည်ကို တိတ်ခွေနဲ့ဖွင့်ပြီး ရှေ့က လူက သရုပ်ဆောင်ကြမှာ တဲ့။ ဒန်ဖလားကို ရွှေရောင်စက္ကူကပ်သူက ကပ်လို့။
အလိုလေးချောင်က ကိသာဂေါတမီ တိတ်ခွေဇာတ်လမ်း တဲ့။ အဝတ်အစားတွေမြို့တက်ငှားလို့ တဲ့။ ကိသာဂေါတမီလုပ်တဲ့ မိန်းကလေးကလည်း မာန်ပါလိုက်တာ တဲ့။
မြို့မနဲ့ မင်းလမ်းကတော့ ချမ်းသာတဲ့ လူများတော့ တတ်လည်းတတ်နိုင်တာကိုး။ ယိမ်းတွေနဲ့ တဲ့။ တခန်းရပ်ပြဇာတ်ကလေးနဲ့ တဲ့။
ဘောဂချောင်က သာဒွန်းတို့ကတော့ အေးအေးပဲ။ တခန်းရပ်လုပ်မယ့် သာဒွန်းလည်း ကဖို့ ၂ ရက်ပဲလိုတာတောင် သူ့ဇာတ်ကို မပြောသေးဘူး။ သူနဲ့တွဲဖက်သရုပ်ဆောင်ရမယ့် လေးယောက်ကလည်း အခုထက်ထိ ဘာလုပ်ရမယ်မသိသေးဘူး။
တကယ်ဆိုရင် တိုက်ဖို့ကောင်းပြီ။ တိုက်သားကျဖို့ ကောင်းပြီ။ နောက်ခံတီးဝိုင်းက ဘာတီးမယ်။ ဘယ်သူက ဘယ်လို ထွက်မယ်၊ ဘယ်သူက ဘာပြောမယ်ဆိုတာလည်း အခုချိန်လောက်ဆိုရင် သိဖို့ကောင်းပြီ။
သာဒွန်းကတော့ အေးအေးပဲ။ လူကြီးတွေကတော့ ခေါင်းပူလှပြီ၊ သာဒွန်းရှာခိုင်းတဲ့ မင်းညီမင်းသားများ ဝတ်တဲ့ အ၀တ်အစားလေး မရှိမယ့် ရှိမယ့် ငှား၊ သင်္ကန်းဟောင်းလေးတထည် ကျောင်းကတောင်းပြီး လာပို့ ထားတာ တောင် တခန်းရပ်က မလှုပ်သေးတော့ သာဒွန်းတို့ ၄ ယောက်ကို ခေါ်ရတော့တာပေါ့။
သာဒွန်းတို့ ရောက်လာတော့ လူကြီးတွေကလည်း ဒေါကန်သူက ကန်နေကြပြီ။
“သာဒွန်း သူများတွေ ဇာတ်တိုက်တာပဲ လိုက်ကြည့်မနေနဲ့၊ မင်းတို့က သန်ဘက်ခါ ဖိန်းနွှဲခါပဲ ကရတော့မယ် ဘာမှမလုပ်သေးဘူး၊ ဟုတ်ရောဟုတ်ရဲ့လားကွာ”
“ဟုတ်ပါတယ် ဘကြီးရ။ ကနေ့ညမှ တိုက်မှာပါ”
“ဟ ဖြစ်ပါ့မလားကွာ၊ မင်းဟာက နေပါဦး မင်းကောင်တွေကကော”
“ဇာတ်လမ်းဇာတ်ကွက် သိပလား”
“မသိသေးဘူး၊ မကြာဘူး ဘကြီးရ၊ ခဏလေးရယ်၊ တခန်းရပ်ပါ ဆို”
“ဘာဇာတ်လဲကွာ၊ သည်အချိန်ရောက်မှတော့ ပြောပါတော့ကွာ”
“တို့လည်း သိပါရစေတော့”
“နိမိတ်လေးအင် ဗုဒ္ဓဝင်”
လူကြီးတွေတောင် ကြောင်သွားတယ်။ နိမိတ်လေးအင် ဗုဒ္ဓဝင်ဆိုပါလား။ သည်ကောင်က ပြောသာပြောရတာ လုပ်လိုက်ရင် ကြီးကြီးကျယ်ကျယ်ထဲက ဆိုတော့ မဟုတ်ဘူးလား မပြောနိုင်ဘူးလေ။
“ဆိုပါဦး မင်းဇာတ်လမ်းက”
“ဘာခက်လို့လဲ ဘကြီးရ တယောက်က ငှားထားတဲ့ မင်းသားအဝတ်အစားနဲ့ အလောင်းတော် သိဒ္ဓတ္ထမင်းသား လုပ်ရမယ်၊ တယောက်က ခေါင်းတုံးတုံးပြီး ရဟန်း လုပ်ရမယ်၊ တယောက်က သူအို လုပ်ရမယ်၊ တယောက်က သူနာ လုပ်မယ်၊ တယောက်က သူသေ လုပ်ရမယ်၊ မင်းသမီး မလိုဘူး၊ အဝတ်အစား မလိုဘူး၊ သိပ်သရုပ်ဆောင်စရာ မလိုဘူး။ ဥယျာဉ်တော်မှ နိမိတ်ကြီးလေးပါး မြင်တော်မူခန်းကို ပြမှာ။ နောက်ခံက မယ်ဒလင်သမား ငပြူးကို ယသော်ဓရာ ယိုးဒယားတီးခိုင်းရုံပါ၊ ဒါပဲ”
“ရွေ နိပ်ဟ”
လူကြီးတွေ တော်တော် သဘောကျသွားတယ်။ ဟုတ်သားပါလား။ သာဒွန်းကို ဒါကြောင့် အားကိုးတာ။ ကြည့်စမ်း သူများတွေ ကုန်လိုက်တဲ့ ပိုက်ဆံ၊ ရွဲကုန်သည် တဲ့။ ကိသာဂေါတမီ တဲ့။ ဝဏ္ဏပထ တဲ့။ တို့သာဒွန်းက နိမိတ်ကြီး လေးအင် ဗုဒ္ဓဝင် တဲ့။ တခြားစီ။ ကောင်းချက်တော့ ရက်စက်တယ်ထဲက နေမှာပဲဟေ့။
ကြည့်စမ်း ဒီကောင် သူ့ဉာဏ်စွမ်းဉာဏ်စနဲ့ သူမို့လို့ စဉ်းစားမိတယ်။ ကြီးလည်း ကြီးကျယ်ရမယ်၊ တရားသံဝေဂလည်း ရရမယ်၊ ပိုက်ဆံလည်း မကုန်ရဘူး။ ဘယ်လောက်ကောင်းသလဲ။ ဘောဂချောင်ကတော့ ဆွမ်းသိမ်းပွဲမှာ အာဂပေါ့ကွယ်။
လူကြီးတွေကတော့ သာဒွန်းအပြောနဲ့ပဲ သာဒွန်းဇာတ်ကို ယုံကြည်သွားတယ်။ အဲသည်တော့မှ သူ့ သူငယ်ချင်း ၄ ယောက်ကလည်း သူတို့ကရမယ့် ဇာတ်လမ်း သူတို့ သိတော့တယ်။ ဘာပဲဖြစ်ဖြစ်လေ တိုက်ရက်ကလည်း ကြားတရက် နှစ်ရက်ပဲ ကျန်တော့ ကနေ့ညက စ တိုက်ကြမယ်ပေါ့။
မယ်ဒလင်သမားကိုလည်း ညကျရင် သီချင်းချပေးမယ်ပေါ့။ ယသော်ဓရာ ယိုးဒယားထဲက ‘လေးပါးရယ် သူအို၊ သူနာ၊ သူသေ၊ မြင်ပြန်လျှင် စွဲစိတ်သံဝေ လူတိုင်းရပ်မြေ ကြာရှည်နေဝံ့ပဲ’ အပိုဒ်ကို သုံးလေးကျော့ တီးခိုင်းမယ်ပေါ့။
(၅)
ဆွမ်းသိမ်းပွဲညက တကယ်ပွဲကတော့ ချောင်လေးခုက တင်ဆက်တဲ့ ထိုးဇာတ်တွေ၊ ယိမ်းတွေပဲ ပါတော့တယ်။ ဘောဂချောင်က ‘နိမိတ်လေးအင် ဗုဒ္ဓဝင်’ မတင်ဆက်နိုင်တော့ဘူး။ သူကြီးကတော့ ဘောဂချောင်က လူကြီး ၃ ယောက်ကို မျက်စောင်းတခဲခဲ၊ အံတကြိတ်ကြိတ်ပေါ့လေ။ ကြီးကြီးကျယ်ကျယ် နိမိတ်ကြီးလေးပါးလေး ဘာလေး နဲ့ နေနှင့်ဦး၊ ဒင်းတို့တော့လို့လည်း ကြိမ်းသတဲ့။
ဘောဂချောင်က လူကြီးတွေကလည်း မျက်စိမျက်နှာပျက်လို့။ သာဒွန်းကတော့ မင်းညီမင်းသား အဝတ်အစားနဲ့ မျက်နှာချေ အဖွေးသားနဲ့၊ ကျန်တဲ့ ၄ ယောက်ကို ရှာမတွေ့လို့ထင်ပါရဲ့။ မျက်နှာလေးငယ်လို့။
“ကောင်းကြသေးရဲ့လား သာဒွန်းရာ၊ မင်းဟာ ကောင်းချီကောင်းရက်နဲ့”
“ကျနော်လည်း သေသေချာချာ စီစဉ်တာပါပဲဗျာ။ ငါက သိဒ္ဓတ္ထမင်းသား လုပ်မယ်။ ကြာယုံက ရဟန်းလုပ်၊ ငတေ က သူသေလုပ်၊ စိန်မောင်က သူနာလုပ်၊ ကျော်လှက သူအိုလုပ်။ သေချာအကွက်ချထားတာပဲ ဘကြီးရာ၊ ကြာယုံက ခေါင်းတုံးမတုံးချင်ဘူး တဲ့။ သင်္ကန်းကြီးနဲ့ မပါချင်ဘူးတဲ့ သိဒ္ဓတ္ထမင်းသားလုပ်မယ် တဲ့။ ငတေက ဇာတ်ခုံပေါ်မှာ သူသေလုပ်ပြီး ပက်လက်ကြီးလုပ်နေမှတော့ မပါတာကောင်းတယ်တဲ့။ ဘာလုပ်ချင်တုံးဆိုတော့ မင်းသားပဲလုပ်မယ်တဲ့။ ကျော်လှကလည်း ရုပ်က အဘိုးကြီးအိုရုပ်ပေါက်နေလို့ သူအိုလုပ်ပါဆိုတော့ သူ့ကောင်မလေးက ဇာတ်ခုံပေါ်မှာ သူအိုမလုပ်ရဘူးတဲ့၊ လုပ်ရင်အပြတ်ပဲတဲ့၊ လုပ်ချင်ရင် မင်းသားလုပ်မရရင် မလုပ်နဲ့ပြောလို့တဲ့”
“စိန်မောင်ကကော”
“ဒီကောင်လည်း မကောင်းပါဘူး ဘကြီးရာ၊ သူက အရိုးပေါ် အရေတင်မို့လို့ သူနာလုပ်ပါဆိုတာကို သူ့ကိုနှိမ်တာ တဲ့ ငါ မင်းသားလုပ်မယ်တဲ့။ ကျနော်ကလည်း ကျနော့်ဇာတ်ပဲ ကျနော် မင်းသားလုပ်မှာပေါ့၊ ဒီကောင်တွေ လူပါးကို ဝတယ်”
“အေး ကောင်းကွာ၊ အခု အဲဒီကောင်တွေကော”
“မရှိတော့ဘူး၊ ဘယ်နေရာ သွားမူးနေကြသလဲ မသိဘူး၊ ကျနော်ရှာတာလည်း မတွေ့ဘူး”
အဲဒီညက သာဒွန်းကတော့ မင်းညီမင်းသား အဝတ်အစားနဲ့၊ မျက်နှာချေနဲ့။ လူကြီးတွေကလည်း မျက်စောင်း တခဲခဲ အံတကြိတ်ကြိတ်နဲ့။ နိမိတ်လေးအင် ဗုဒ္ဓဝင်ဇာတ်မှာ သူအို၊ သူနာ၊ သူသေ၊ ရဟန်း လုပ်မယ့်လူမရှိတော့ သာဒွန်းလည်း ဘာတတ်နိုင်မှာတုံး။ ဆဲလည်းခံရုံပေါ့။ သာဒွန်းကတော့ သူအို၊ သူနာ၊ သူသေ၊ ရဟန်းလုပ်မယ့် သူ့သူငယ်ချင်း ၄ ယောက်ကို မျှော်တုန်း။
(၆)
ကြာတော့ ကြာပါပြီ။ သဖန်းချောင်းမှာ သူကြီးခေတ်ကဖြစ်ခဲ့တာပေမယ့် အကြောင်းတိုက်ဆိုင်ရင် သဖန်းချောင်းသားတွေက ပြောတုန်း၊ ဥပမာပေးကောင်းတုန်း။ ရယ်ကြမောကြတုန်း။
* * *
နေဝင်းမြင့်
သြဂုတ်လ၊ ၁၉၉၃၊ ရွှေအမြုတေ။
credit - ဝတ်မှုန် FB account
No comments:
Post a Comment