လိပ်ပြာ

လိပ်ပြာ
@@@@@@@
စ/ဆုံး
တာရာမင်းဝေ

(၁)
“လှံထမ်းလာတာ မြင်ရတယ်။ ကံထမ်းလာတာ မမြင်ရဘူးလို့ စကားပုံရှိတယ်။ တကယ်တော့
လှေကား ထမ်းလာတာကိုလည်း မမြင်ရဘူးကွ” သူက အဲဒီလိုပြောတော့ ကျွန်တော်လည်း
ကြောင်အမ်းအမ်း ဖြစ်သွားတယ်။ “လှေကား ထမ်းလာတာကို ဘာလို့မမြင်ရမှာလဲဗျ၊ ခင်ဗျား
ရူးနေလို့လား” အဲဒီအခါ သူက မချိုမချဉ်ပြုံးပြီး ကျွန်တော့်ကို ပြန်ပြောတယ်။ သူ့စကားကတော့
အတိုင်းအတာ တစ်ခုထိ ဒဿနဆန်သယောင်၊ လေးနက်သယောင် ရှိပါလေရဲ့။ “လူတွေက
လှေကားတစ်စင်းစီ ထမ်းထားကြတယ်ကွ။ ဒီဘဝကနေ သေလွန်သွားတဲ့အခါ တချို့က
အဲဒီလှေကားနဲ့ နတ်ပြည်ကို တက်သွားကြပြီး တချို့ကတော့ အဲဒီလှေကားနဲ့ပဲ ငရဲပြည်ကို
ဆင်းသွားကြတယ်” ကျွန်တော်က ဘာမှပြန်မပြောဘဲ သူ့ကိုကြည့်နေတဲ့အခါ သူက မီးခိုးငွေ့တွေကို
တဖြည်းဖြည်းချင်း မှုတ်ထုတ်ပြပါတယ်။ ဆေးလိပ်က ပြာတွေကို တောက်ချရင်း မီးခိုးငွေ့တွေ
ကြားထဲမှာပဲ မသဲမကွဲဆိုခဲ့တယ်။ “လူတွေဟာ ကိုယ်လှေကား ကိုယ်ထမ်းထားကြတာကွ”
အဲဒီလိုနဲ့ သူဟာကိုယ်ကျင့်တရားကို လေးစားသူတစ်ယောက်အဖြစ် လောကကြီးမှာ
ကုတ်ခြစ်ရပ်တည်ခဲ့တယ်။ ကျွန်တော့်ဘဝရဲ့ ဖြစ်စဉ်တွေကို ပြန်စဉ်းစားတဲ့အခါ မေ့လျော့
နေတာတွေ အများကြီးပါပဲ။ အနည်းအကျဉ်း မှတ်မိသမျှလေးတွေထဲမှာတော့ သူဟာ
ကိုယ်ကျင့်တရား တည့်မတ်သူတစ်ယောက်ဆိုတာကို လင်းလင်းချင်းချင်း တွေ့မြင်ရပါတယ်။
ဒါပေမယ့် တစ်နေ့မှာတော့ သူဟာ မကောင်းမှု တစ်ခုကို ပြုကျင့်ခဲ့တယ်။ သူပြုတဲ့ မကောင်းမှု
ကတော့ အောက်ပါအတိုင်းဖြစ်ပါတယ်။
(၂)
အဲဒီနောက်ပိုင်း ညတစ်ညရဲ့ သန်းခေါင်ယံမှာ သူဟာ ထူးဆန်းတဲ့ အိပ်မက်တစ်ခုကို
မြင်မက်ခဲ့ပါတယ်။ သူ့အိပ်မက်ထဲမှာ သူဟာ ကျောက်ချောခေတ်က လူရိုင်းတစ်ယောက်ကို
ပြတ်သားကြည်လင်စွာ တွေ့နေရပါတယ်။ အဲဒီလူရိုင်းဟာ တစ်စုံတရာကို ပစ်ခတ်ဖို့ ဒူးလေးကို
ခေါင်းငုံ့ပြီး ပြင်ဆင်နေပါတယ်။
နောက်…. တဖြည်းဖြည်း ခေါင်းမော့လာပြီး လူရိုင်းက အိပ်မက်မက်သူကို စေ့စေ့ကြည့်လေရဲ့။
သူလည်း အံ့သြသွားတယ်။ အဲဒီမှာပဲ လူရိုင်းက သူ့ကို ဒူးလေးနဲ့ စနစ်တကျ ချိန်ရွယ်လိုက်တယ်။
သူအကြီးအကျယ် ထိတ်လန့်သွားပြီး လက်နဲ့ကာ ဟန့်တား၊ အိပ်ရာက အမြန်ဆုံး လူးလဲထဖို့

ပြင်လိုက်တယ်။ ဒါပေမယ့် အဲဒီမှာပဲ လူရိုင်းက ဒူးလေးကို ရွှတ်ခနဲ မောင်းဖြုတ်လိုက်တယ်။
မြားချွန်က သူ့ခန္ဓာကိုယ်ထဲကို တန်းလန်းထိုးဖောက်သွားစဉ်မှာပဲ အားခနဲ အသံနက်ကြီးနဲ့
ကြုံးအော်ရင်း သူလန့်နိုးသွားတယ်။
သူတစ်ကိုယ်လုံးချွေးတွေ ပြိုက်ပြိုက်စီးကျနေတယ်။ သူ့ရင်ဘတ်ကို ငုံ့ကြည့်၊
သူတစ်ကိုယ်လုံးကို လက်နဲ့စမ်းကြည့်ပြီး နေတော့တယ်။ အဲဒီညက သူပြန်အိပ်လို့ မရတော့ဘူး။
နာရီသံချောင်းခေါက်သံဟာ မာရ်နတ်ရဲ့ စောင်းကြိုးခတ်သံလို သူ့ကို ညှို့ငင်ချောက်လှန့်နေတယ်။
(၃)
အဲဒီလို ပြင်ထန်ရက်စက်တဲ့ အိပ်မက်တစ်ခုကို ရက်ပိုင်း အတွင်းမှာပဲ သူ ထပ်မက်သေးတယ်။
အဲဒီအိပ်မက်ထဲမှာ ကြမ်းကြုတ်တဲ့ပုံရတဲ့ လူတစ်ယောက်က သူ့ကို ကျောပေးပြီး လက်ပစ်ဗုံးကို
ပင်အပ် ကိုက်ဖြုတ်နေတယ်။
နောက်ပြီးတော့မှ ချာခနဲလှည့်ပြီး ကြည့်နေမိတဲ့ သူ့ကို လက်ပစ်ဗုံးနဲ့ ပစ်ပေါက်လိုက်တယ်။ သူက
ပါးစပ်ကြီး အဟောင်းသားနဲ့ ကြည့်နေမိတဲ့အချိန်မှာပဲ လက်ပစ်ဗုံးဟာ သူ့ရင်ဘတ်ထဲကနေ ဝုန်းခနဲ
ပေါက်ကွဲသွားတယ်။
သူ့တစ်ကိုယ်လုံး အပိုင်းအစတွေအဖြစ် လွင့်စဉ်သွားသလို ခံစားရပြီး သွေးရူးသွေးတန်း
သူနိုးလာတယ်။ နိုးနိုးချင်း နားတွေ အူဝေနေပြီး အခန်းထဲမှာလည်း ယမ်းနံ့တွေ နံနေသလိုပဲ။
သူ မရဲတရဲ ထရပ်ပြီး လက်တွေနဲ့ လေကို ဖမ်းကိုင်နေမိတယ်။ “ဘုရား…ဘုရား..” လို့ ပါးစပ်က
တမိပေမယ့် မသဲမကွဲလို့ သူ့ဘာသာတောင် ပြန်မကြားခဲ့ပါဘူး။
(၄)
နောက်ဆုံး…. အိပ်မက်ကတော့ ကြောက်မက်ဖွယ်ရာ အကောင်းဆုံး၊ သူလည်း အခံစားရဆုံးပါပဲ။
ရှင်းလင်းသိပ်သည်းတဲ့ ညတစ်ည။ သူ နှစ်နှစ်ခြိုက်ခြိုက် အိပ်မောကျနေတုန်းမှာ အမှောင်ထဲက
လက်တစ်ဖက်ကို မြင်လိုက် ရတယ်။
အဲဒီ လက်ဟာ မှောင်ရိပ်ထဲမှာ ပါးပျဉ်းထောင်လာတဲ့ မြွေတစ်ကောင်လို ဖြည်းဖြည်းချင်း စတင်
လှုပ်ရှားတယ်။ အဲဒီလက်က သူ့ရင်ထဲကိုဖောက်ပြီး ဝင်လာတယ်။ နောက်တော့ အဲဒီလက်က
သူ့နှလုံးသားရှေ့တည့်တည့်မှာ ရပ်လိုက်တယ်။ သူ ကြည်နေဆဲအချိန်မှာပဲ အဲဒီ လက်ချောင်း
တွေ့က သူ့နှလုံးသားကို “ဖျန်း”ခနဲ ပါးရိုက်ပစ်လိုက်တယ်။
“အား….”
သူ့နှလုံးသားဟာ နာကျင်စွာ တရှိုက်နစ်နစ် အော်ဟစ်လိုက်ရင်း ကြေးစည်လို
ချာလည်လည်သွားတယ်။ သူလည်း အမှောင်ထဲမှာ ရေနစ်နေပြီး သေအံ့မူးမူးနဲ့ပဲ အမှောင်ကို
တဗောင်းဗောင်းကူးခတ်၊ ခြေကုန်လက်ပန်းကျ မောလျလို့ အငွေ့ပျံပျောက်ကွယ်သွားတော့တယ်။
1
နိုးလားတော့ ရူးမတတ်ပဲပေါ့။ ဝူးဝူးဝါးဝါး ရေမွန်းထားတဲ့ သမင်ကြီးလို အသက်ကို
အလုအယက်ရှုရင်း မျက်လုံးတွေကလည်း ဖန်လုံးတွေလို ကြောင်စီနေတယ်။ အတော်ကလေး
ကြာတော့ သွေးစုပ်ဖုတ်ကောင်က သူ့အခေါင်းထဲမှာ မျက်လုံးပြန်မှိတ်သွားသလိုမျိုး သူလည်း
ခုတင်ထက်မှာ မျက်လုံးတွေပြန်မှိတ်သွားတယ်။ခေါင်းရင်းက အိပ်ဆေးပုလင်းကတော့
အခွံလောက်ပဲ ကျန်ရစ်လေရဲ့။
(၅)
သူနဲ့ကျွန်တော် ကွဲကွာနေတဲ့ အဲဒီအချိန်တိုလေးအတွင်းမှာပဲ သူဟာ အိပ်မက်များနဲ့
ထပ်ကာတလဲလဲ အိုမင်းခဲ့ပြီဖြစ်တယ်။
သူ့အဖြစ်အပျက် အကုန်အစင်ကို သူပြောပြလို့ သိပြီးတဲ့အခါမှာ ကျွန်တော်က ပေါ့ပါးလွယ်ကူတဲ့
စိတ်ပညာ ကုထုံးတစ်ရပ်ကို အမှတ်မထင် ပြောပြလိုက်တယ်။
“ဒါ မခက်ပါဘူးဗျာ၊ အိပ်မက်ထဲမှာပဲ ခင်ဗျား သူတို့ကို အကျိုးအကြောင်းပြေပြ
တောင်းပန်လိုက်ပေါ့…”
သူ တွေဝေသွားတယ်။ ပြီးမှ လေးနက်သွားတဲ့ မျက်နှာနဲ့ ခေါင်းတစ်ချက် ညိတ်ပြရင်း
ပြန်သွားတယ်။ဒါပေမယ့် နောက်တစ်ပတ်လောက်ကြာလို့ သူနဲ့ ပြန်တွေ့တဲ့အချိန်မှာပဲ
လွယ်ကူမယ်ထင်ရတဲ့ ကိစ္စဟာ ပြန်ခက်သွားတာကို တွေ့ရတယ်။ သူက ကျွန်တော့်ကို
မျက်နှာနွမ်းနွမ်းနဲ့ ခေါင်းခါပြတယ်။
“မရပါဘူးကွာ…”
“ဘာလို့ မရတာလဲ….”
သူက ကျွန်တော့်ကို ခပ်မောမောကြည့်ရင်း တိုးတိုးပြောတယ်။
“ငါ့အိပ်မက်ထဲ ငါပြန်ဝင်လို့မှ မရပဲကွ”
ကျွန်တော် ရယ်လည်း ရင်ချင်၊ ငိုလည်း ငိုချင်သွားတယ်။
(၆)
“အဲဒါဆိုရင်တော့ သေတဲ့အခါ ခင်ဗျားလှေကားနဲ့ ခင်ဗျား ငရဲပြည်ကို ဆင်းသွားရတော့မှာပဲ….”
သူမျက်နှာ ဖြူရော်သွားတယ်။ ပြီး … ကြောက်ကန်ကန်သလို ပြန်ပြောတယ်။
“အဲဒီအခါကျတော့လည်း ယမမင်းကို ရှင်းပြရမှာပေါ့ကွာ….”
“ရင်ဆိုင်ရဲသားပဲ” လို့ တွေးမိပြီး ကျွန်တော် သူ့ကို ခပ်မဆိတ် ကြည့်နေလိုက်တယ်။ သူ
နဖူးကြော်ရှုံ့ပြီး စဉ်းစားနေတယ်။ သူ့မျက်နှာမှာလည်း အရိပ်အရောင်တွေ အမျိုးမျိုး
ဖြတ်ပြေးနေတယ်။ အတော်ကြာမှ ဖြည်းဖြည်းချင်း ခေါင်းခါလာတယ်။
“ဒါလည်း မဖြစ်သေးဘူးကွ…”
“ဘာဖြစ်လို့ မဖြစ်တာလဲ…”
“ယမမင်းကို ရှင်းပြတဲ့အချိန်မှာ ဘာပဲပြောပြော ငါက ငရဲကျနေပြီကွ၊ မကောင်းဘူး…”
သူ့ကို မစာနာတာ မဟုတ်ပါဘူး။ ကျွန်တော် ရယ်မိတော့တယ်။ အရယ်တစ်ဝက်နဲ့ပဲ ကျွန်တော်
ဗလုံးဗထွေး ပြောလိုက်တယ်။
“အဲဒါဆိုရင်တော့ ခင်ဗျား ကောင်းမှုတစ်ခု ပြန်လုပ်ရ လိမ့်မယ်”
“ဘာလဲ…”
ကျွန်တော်ပြောပြတဲ့ ကောင်းမှုကိစ္စကတော့ အောက်ပါ အတိုင်းဖြစ်ပါတယ်။
“……………………………………………………………….”
( ၇ )
အဲဒီနောက်ပိုင်းကာလမှာတော့ သူဟာ တိမ်စင်သွားတဲ့ ကောင်းကင်ဖြူလို ပြန်ပြီး ကြည်လင်
လာပါတော့တယ်။ သူ့အိပ်မက်တွေ အပြစ်ကင်းသွားပါပြီ။အရင်ကထက်တောင် ပိုပြီး
တည်ငြိမ်လာပါတယ်။ သူ့ရဲ့ စိတ်ပိုင်းဆိုင်ရာ ပြန်လည် ရှင်သန်လာမှုအတွက် ကျွန်တော်လည်း
ကြည်နူးဝမ်းသာရပါရဲ့။သူ့လက်ထဲမှာ “အက်အင်ဂိုအင်ကာရဲ့”ရဲ့ စာအုပ်လေးတွေ တစ်အုပ်မဟုတ်
တစ်အုပ်ကိုင်ထားတတ်တာကို တွေ့ရပါတယ်။ ကာလအတော်ကြာတဲ့အထိ ကျွန်တော်ကလည်း
အလိုက်တသိနဲ့ သူ့အိပ်မက်ဆိုးတွေအကြောင်း ပြန်မဖော်ခဲ့ပါဘူး။ တစ်နေ့တော့
သူနဲ့လမ်းမှာဆုံတယ်။ ဘုရားက ပြန်လာတယ်ဆိုလို့ ကျွန်တော်က လှမ်းစလိုက်တယ်။
“ငရဲပြည်က ပြန်တက်လာသူကြီး… ဘာဆုတောင်းခဲ့သလဲ” သူက သူ့ဆုတောင်းကို
တည်ကြည်စွာ ပြောပြသွားတယ်။လမ်းတစ်လျှောက်လုံးမှာ သူဆုတောင်းကို ကျွန်တော်
အလေးအနက် စဉ်းစားလာမိတယ်။ဟုတ်တယ်။ သူဆုတောင်း သိပ်မှန်တယ်။
လူ့ဘဝမှာ ဒါလောက်ကလေးရမယ်ဆိုရင်ကို တကယ်တော့ နေပျော်သင့်ပါပြီ။ ကျွန်တော်လည်း
သူ့လို ဆုတောင်းရလိမ့်မယ်။
( ၈ )
“အရှင်ဘုရား
ဤမှန်သော သစ္စာစကားတို့ကြောင့် “လိပ်ပြာ” သန့်သော အိပ်မက်များကိုသာ မြင်မက်ရပါလို၏
ဝတ်ပြုတောင်းစဉ်….
ညင်သာတဲ့ ခေါင်းလောင်းသံလွင်တွေကို ကြားနေရတော့တယ်။ ။
****************
တာရာမင်းဝေ

ကျွန်တော်နှင့်ကံကြမ္မာလက်မှတ်များ
==================
စ/ဆုံး
တာရာမင်းဝေ

( ၁ )
“ကံကြမ္မာဆိုတာ ဘာလဲ”ဟု အသေအချာ မသိသေးသော အချိန်ကပင်
ကံဆိုးခြင်းတရာကို ကျွန်တော် ခပ်ဖျော့ဖျော့ခံစားခဲ့ရ ဖူးလေသည်။ လေးတန်းအရွယ်ကျောင်းမှာ
ပျော်ပွဲစားလုပ်ကြစဉ်က ဖြစ်၏။
အခြားကျောင်းသား ကျောင်းသူလေးများ အားလုံးမှာ ဆရာမများ ချက်ကျွေးသော ငါးကြီးကြီးဖြင့်
စားရလေ၏။ တစ်ကျောင်းလုံးမှာ ကျွန်တော် တစ်ယောက်တည်း ဖောက်ပြီး ဥမပါသော
ငါးကိုစားရလေသည်။ ကျွန်တော်လည်း ကိုယ့်ပန်းကန်ထဲမှ ငါးကိုကြည့်လိုက်၊ သူများပန်းကန်ထဲမှ
ငါးကိုကြည့်လိုက်ဖြင့် မကျေမနပ်ဖြစ်နေမိ၏။ သူငယ်ချင်းများက “ကရော်…ကရော်”ဟု
ဝိုင်းစကြသောအခါ “ဘာဖြစ်လဲ…ဥမပါတော့ ပိုကောင်းတာပေါ့…ငါ့ငါးက အပျို….”ဟု
ပြန်ပြောလိုက်၏။ ဆရာမများက ဝါးခနဲ ဝိုင်းရယ်ကြသည်။ ထိုအဖြစ်အပျက်ကလေးသည်
သူတစ်ပါးအတွက် ဘာမှ မဟုတ်ခဲ့၊ အရေးမပါသော်လည်း ကျွန်တော့်အတွက်မူ “လောကမှာ
ဒါမျိုးလည်း ဖြစ်တတ်တာကို…”ဟု ကံကြမ္မာဆိုသောအရာကို မရေမရာဖြင့်
စတင်ခံစားခဲ့ရခြင်းဖြစ်လေသည်။
ထိုနောက်တွင် ထို “ကံ”ကို သတ်ပုံမှန်အောင် သေးသေးတင်ဖြင့် “ကံ” ရကြောင်း
ဆရာသင်ကြားတာကို အမှတ်ထင်ထင်ဖြစ်မိ၏။ သို့သော် နငယ်သတ်သော “ကန်”များ ဆိုးဝါးလျှင်
ပြုပြင်ရလွယ်ပြီး ကကြီးပေါ် အစက်ကလေးတစ်စက်တင်ရုံဖြင့်ရသော ထိုကံများဆိုးဝါးလျှင်
မည်သို့မျှ ပြုပြင်၍ မလွယ်ကြောင်းကို ထိုစဉ်က မသိခဲ့။
နောက်ပိုင်းကာလများတွင် “မင်းတို့ ကံကောင်းတဲ့သူ ရမှာပေါ့…”ဟု ဆရာမက ကြေညာပြီး
စီစဉ်ပေးသဖြင့် စာသင်ခန်းထဲတွင် ဘောလ်ပင်လေးများ မကြာခဏ မဲနှိုက်ရသည်ကို ကြုံဖူး၏။
လက်ချောင်းတို့ တုန်မိသည်အထိ စိတ်လှုပ်ရှားကာ ထိုစက္ကူမဲလိပ်တို့ကို နှိုက်ယူဖူးပါသော်လည်း
ကျွန်တော်ရသမျှမဲမှာ “ဗလာ” ဖြစ်လေသည်။ ဆရာမပြောသည့် “ကံကောင်းသောလူမှာ”
ကျွန်တော် တစ်ခါမှ မဖြစ်ခဲ့။ ထိုသို့သော ဖြစ်ရပ်မျိုးကို ကြုံကြိုက်ပေါင်းများလာမှ ကိုယ့်ကိုယ်ကို
ကံမကောင်းသောလူမှန်း သိတော့၏။
“မင်းတို့ထဲက ကံဆိုးတဲ့သူတော့ ခံရပြီပေါ့ကွာ….” ဟု ဆရာမစီစဉ်သော အချို့မဲများကို
အံ့သြစရာကောင်းလောက်အောင် ကျွန်တော် တည့်တည့် ပေါက်လေသည်။
ဥပမာ…စာသင်ခန်းထဲမှာ တံမြက်စည်းလှည်းရန်၊ သောက်ရေခပ်သွားရန် စသည်မဲတို့ဖြစ်၏။
တစ်ခါဆိုလျှင် ကျောင်းသား(၇၀)ရှိသော စာသင်ခန်း၌ မဲလိပ်(၇၀)ကို ကျွန်တော်က
အရင်ဆုံးနှိုက်ရလေသည်။ စိတ်တိုစရာကောင်းလောက်အောင် ကျွန်တော်ပဲ ထိပ်ဆုံးက
ပေါက်သွား၏။ ကျန်ကျောင်းသား(၆၉)ယောက်က ဝမ်းသာအားရ ဝါးခနဲ ဝိုင်းရယ်ကြလေသည်။
ထိုညနေကျောင်းမှ အပြန် “ကံမကောင်းရုံမဟုတ်ဘူး ငါက ကံ ကိုဆိုးတာ….”ဟု လေးလေးလံလံ
တွေးလာတော့၏။
ခြောက်တန်းနှစ်မှာလည်း သတိရစရာကိစ္စတစ်ရပ် ဖြစ်ဖူးလေသည်။ စာသင်ခန်းတွင်
အောင်စာရင်းကတ်ပြားများ ဝေစဉ်က ဖြစ်၏။ အောင်စာရင်းကတ်ပြားကို ကပျာကယာဖွင့်ကြည့်ပြီး
ကျွန်တော်မျက်လုံးများ ပြာဝေသွားရသည်။ ကျွန်တော် အိမ်အပြန်ခက်တော့မည်။
“မဟုတ်ဘူး…မဟုတ်ဘူး…”ဟု ခေါင်းကို ဘယ်ညာခါရမ်းရင်း ဆရာကို
သွားစကားပြောရသည်။
ဆရာက တစ်ခန်းလုံးကို ဝေထားပြီးသော အောင်စာရင်းကတ်ပြားများအား ပြန်သိမ်းယူ၏။
အားလုံးကို ပြန်ပြင်ရ၏။ (သူ၏ မတော်တဆ မှားယွင်းမှုဖြစ်သည်။) အမှန်အတိုင်း ပြင်ပြီးသော အခါ
ကျွန်တော်က အဆင့်(၁)ဖြစ်၏။ စိတ်မောလူမောဖြင့် ကျွန်တော် ပင့်သက်ရှိုက်မိသော်လည်း
ပြဿနာက ထိုမှာရပ်မသွားချေ။
ကျောင်းဆင်းသောအခါ “နင်ကတော့ ဖြစ်ရမယ်” ဟု သူငယ်ချင်းများက ဝိုင်းရယ်ရင်း
ပြင်ဆင်ရေးခြစ်ထားသော အောင်စာရင်းကတ်ပြာကို တောင်းယူကြည့်ကြ၏။ သို့ဖြင့် လမ်းမှာ
ထိုကတ်ပြားကြီး ပျောက်သွားလေသည်။ အိမ်ရှေ့ရောက်မှ ကျွန်တော် ငိုရမလို၊
ထခုန်ရမလိုဖြစ်နေတော့၏။ သို့သော် လမ်းမှာကောက်ရ၍ဆိုပြီး ကျောင်းသားတစ်ယောက်က
လာပြန်ပေးသဖြင့် ဝမ်းသာအားရပြန်ဖြစ်ကာ သက်ပြင်းချမိပြန်၏။ သို့သော် ပြဿနာက ထိုမှလည်း
မရပ်ပဲ ဖြစ်ပြန်၏။
ကျွန်တော့်အိမ်မှာ မည်သူမှမရှိပဲ သော့ပိတ်ထား၍ လူကြီးများပြန်မလာခင် ဘေးအိမ်မှာ
သွားနေရ၏။ ကျွန်တော့် အောင်စာရင်းကတ်ပြားကို ထိုအိမ်မှလူတို့ ယူကြည့်ကြ၊ ဝေဖန်ကြ၏။
နောက်မှ မည်သို့ဖြစ်သည် မသိ။ ဗြိခနဲ အသံကြား၍ ကြည့်လိုက်သောအခါ ထိုကတ်ပြားကို ထိုအိမ်မှ
ကလေးငယ်တစ်ယောက် ကစားရင်း ဖြဲပစ်လိုက်သည်။ “ဟာ…”ခနဲ ကျွန်တော် ပြေးသွားသောအခါ
နှစ်ခြမ်းဖြစ်နေလေပြီ။ ကျွန်တော်က လုယူရန်ပြင်သောအခါ ထိုကလေးက ကတ်ပြားကို
ဝါးစားပစ်လိုက်လေသည်။ ကျွန်တော် အလွန်စိတ်ဆိုးသွားသော်လည်း ဘာမှမလုပ်ရဲချေ။
ကျွန်တော်ထုလိုက်သဖြင့် သူအော်ငိုလျှင် ကျွန်တော်ပဲ မကောင်းရှိမည်။ အကြီးအကျယ်
စိတ်ပျက်ရင်း ကိုယ့်အဆင်မပြေခြင်းကိုသာ အံသြနေမိတော့၏။
( ၂ )
တစ်စတစ်စနှင့် “ကံကြမ္မာ”ဆိုသော အရာကို အဆိုးမြင်ဘက်မှ ကြည့်မိရင်း ကျွန်တော်
ကြောက်လာဖူးသည်။ တန်းတူအခွင့်အရေး ရမည်ဆိုလျှင် မည်သူ့ကိုမျှ မမှုချင်သော ကျွန်တော့်အား
“ကံ ကြမ္မာ”ဟူသည့် ဒိုင်လူကြီးက ကြားမှဝင်၍ ထိုးသွားတတ်၏။ ထိုသို့ဖြင့်
ပြိုင်မြင်းဆန်သော ကျွန်တော့်ဘဝတွင် ခွာလိပ်ခဲ့ရသည်တို့ကလည်း အခါခါပင် ဖြစ်လေတော့သည်။
သိုးဆောင်းအယူအဆတွင် (၁၃)ဂဏန်းသည် ကံမကောင်းသော ဂဏန်းဖြစ်၏။ အနောက်နိုင်ငံမှ
တည်းခိုခန်းအချို့တွင် အခန်း(၁၃)ဆိုလျှင် မည်သူကမှ မတည်းခိုချင်ကြောင်း၊ အခန်း(၁၂)
ပြီးသည်နှင့် အခန်း(၁၄)ကိုထားရကြောင်း ကြားသိနေရတော့ မပီမပြင်ပြုံးဖြစ်သည့်။
လွန်ခဲ့သော(၂၆)နှစ်၊ မိုးတွေလေတွေ ဝုန်းဒိုင်းကြဲရွာသွန်းပေါက်ကွဲသော(၁၃)ရက်နေ့တွင်
ကျွန်တော့်ကို မွေးဖွားခဲ့လေသည်။ အီဂျစ်ပြက္ခဒိန်တွင် ကံမကောင်းခဲ့သော ကျွန်တော့်ကိုယ်
ကျွန်တော် မြန်မာပြက္ခဒိန်တွင် ရှာဖွေကြည့်မိသောအခါ ထပ်မံအံ့သြရပါ၏။ ကျွန်တော်သည်
မြန်မာလိုလည်း လဆုတ်(၁၃)ရက်ဖွား ဖြစ်လေသည်။ ပြက္ခဒိန်စာအုပ်ကို ပြန်ပိတ်၍
ဒဏ်ရာရနေသော သားကောင်တစ်ကောင်ကြည့်သလို ပြန်ကြည့်မိတော့၏။
ထိုသော ကျွန်တော်သည် အောင်ဘာလေဆုကြီးများ သုံးကြိမ်သုံးခါတိုင်တိုင်
နောက်ဆုံးတစ်လုံးတည်း ကပ်လွဲဖူးလေသည်။ သူငယ်ချင်းများက ကျွန်တော့်အစား
အူယားကြသည်ဟု သိရသည်။ ကျွန်တော်ကတော့ အနည်းငယ်ပျော်သလိုဖြစ်သည်ကလွဲ၍
ထူးထူးခြားခြား မည်သို့မှ မခံစားမိချေ။ ဘေးလူများက ဝိုင်းတိုက်တွန်း၍ နောက်အပတ်များတွင်
ထီကိုယခင်ကလို တစ်စောင်တည်းမဟုတ်တော့ဘဲ ရွက်ရေများများ ထိုးမိလေ၏။ ထိုအခါကျ
ပြန်တော့လည်း နည်းနည်းမှ မနီးစပ်တော့ဘဲ တက်တက်စင်အောင် လွဲလေသည်။
ကျွန်တော့်အတွက်မူ ထီဆုကြီးများသည် များများထိုးလျှင် များများလွဲ၏။ နည်းနည်းထိုးလျှင်
နည်းနည်းလွဲ၏။ တစ်စောင်တည်းထိုးလျှင် နောက်ဆုံးတစ်လုံးတည်း ကပ်လွဲ၏။ တစ်စောင်မှ
မထိုးလျှင် မပေါက်ချေ။ ကျွန်တော် မည်သို့လုပ်ရမည် မသိ။ နောက်ဆုံးကျတော့လည်း
ထီကိုလုံးဝမထိုးတော့ပဲ သူများတွေ ထီတိုက်နေတာကို နံဘေးမှပြုံးယောင်ယောင်ဖြင့်
ကြည်တတ်လာတော့၏။
ဆယ်တန်း ကျောင်းသားဘဝ၏ ခြောက်လပတ် စာမေးပွဲတစ်ခုတွင်မူ
“ကျွန်ုပ်သိန်းထီပေါက်ခဲ့သော်…” ခေါင်းစဉ်ဖြင့် စာစီစာကုံးတစ်ပုဒ်ကို ရေးရဖူးလေသည်။
ကျွန်တော်မျက်မှောင်ကြုတ်ပြီး မည်သို့ရေးရမည်ကို စဉ်းစားကြည့်ပါသေး၏။ ပြီးမှ သေသေချာချာ
ရေးခဲ့ပါ၏။ စာမေးပွဲကြီးပြီးဆုံး၍ မြန်မာစာအမှတ်များကို ဆရာက အတန်းထဲတွင် ပြောသောအခါ
ကျွန်တော်က အခန်းရှေ့ထွက်၍ အရိုက်ခံရပါတော့သည်။ ကျွန်တော်က
“စားပြီးအိပ်…အိပ်ပြီးစား…စားပြီးအိပ်….အိပ်ပြီးစား”ဟု ခြောက်မျက်နှာရေးခဲ့သောကြောင့်
ဖြစ်လေသည်။
ကျွန်းတော့်ဘဝ ကျွန်တော့ဘက်မှ ကံကြမ္မာနှင့် ပတ်သက်သော အယူအဆ၊ ဒါတွေကိုကြိမ်လုံးက
မသိသလို ဆရာကလည်း မသိခဲ့ချေ။ ထိုသို့ဖြင့် ကျွန်တော်သည် ပတ်ဝန်းကျင်တွင်
အံဝင်ခွင်ကျမဖြစ်ခဲ့။ ကျွန်တော်က လောကအတွက် အေးမြသော ပင်လယ်တစ်စင်းအဖြစ်
ကိုယ့်ကိုဆန့်ထုတ်ဖြန့်ခင်းပေးချင်၏။ သို့သော် အမှန်တကယ် ဖြစ်ရသည့်က ဗလောင်းဆူနေသော
ရေတစ်စက်မျှသာဖြစ်လေသည်။
မိမိ၏ ကံကြမ္မာနံပါတ်ကို မျက်ခြေမပြတ် စောင့်ကြပ်ကြည့်ရှုရင်း မျက်လုံးဘောင်ဘင်ခတ်နေသော
လူများစွာကို ကျွန်တော်ကြုံခဲ့ဖူးပါသည်။ သူတို့ကို ကျွန်တော်က သနားသောအခါ သူတို့ကလည်း
ကျွန်တော့်ကို ပြန်သနားကြလေသည်။ ထီလက်မှတ်ကံစမ်းမဲစသည်တို့က ကျွန်တော့်အတွက်
ပလူလိုထပျံတတ်သည့် စက္ကူအိပ်မက်များဖြစ်၏။
သူတို့အတွက်တော့ မျှော်လင့်ချက်ကို ဒရွတ်တိုက်ဆွဲသည့် စွပ်ဖားလှည်းအိုကြီးများဖြစ်၏။
ကံကြမ္မာနှင့်ပတ်သက်လျှင် ကျွန်တော်နှင့် အခြားလူများ ထိုသို့ ကွဲပြားလေသည်။
ကျွန်တော့်တွင် ဖားနှင့်တူသော မိတ်ဆွေတစ်ယောက်ရှိ၏။ စီးပွားရေး၊ ငွေစသည်တို့နှင့်
ပတ်သက်လာလျှင် ထိုင်ရာမှပင် ခုန်ထနိုင်လောက်အောင် သတိရှိသောကြောင့် သူ့ကိုမြင်လျှင်
ဖားကို သတိရမိခြင်းဖြစ်သည်။ ပြီးခဲ့သည့်လထဲမှာ ငွေအလုံးအရင်းဖြင့် သူထီကစားပါသည်။
တစ်စောင်မှ မပေါက်။ ထို့အတွက် သူအရက်တစ်ခွက်သောက်၏။ ကျွန်တော်က ပြုံးနေသောအခါ
သူက ကျွန်တော့်အပြုံးကို နားလည်စွာ ပြန်ပြုံး၏။
တယ်လီဗေးရှင်းထဲတွင် ပယ်နယ်တီဖြင့် အဆုံးအဖြတ်ပေးသော ဘောလုံးပွဲကို လှမ်းကြည့်ရင်း
ကျွန်တော်ဘယ်တော့မှ မေ့မည်မဟုတ်သည့် စကားတစ်ခွန်းကို ခပ်တိုးတိုးပြော၏။
“အဲဒီ့ဘောလုံးပွဲမှာ…ပယ်နယ်တီကန်နေကြသလိုပေါ့ဗျာ…သေသေချာချာ
လေ့ကျင့်ထားတဲ့လူတွေက သေသေချာချာ တည်ထားတဲ့ ဘောလုံးကို
သေသေချာချာချိန်ကန်တာတောင် လွဲသွားတတ်သေးတာပဲ…အခုဟာက ကံကြမ္မာကို….”
ထိုသောအခါ သူငယ်ချင်းတစ်ယောက်က ကျွန်တော့်ကို “ခေါင်းလား…ပန်းလား….”
မေးပြီးဒင်္ဂါးကိုလေထဲမြှောက်၏။ “ပန်းပန်ထားသော ခေါင်း…” ကို လိုချင်မိလျှင် ကျွန်တော်က
အလွန်ဖြစ်ပါသည်။ သို့သော် ခေါင်းဟုဖြေပါလျက် ပန်းချည်းကျနေလျှင်၊ ပန်းဟုဖြေပါလျက်
ခေါင်းချည်းကျနေလျှင် မည်သူ့ကို အပြစ်တင်ရပါတော့မည်နည်း။
ထိုညက သန်းခေါင်လွန်သော် နှင်းတွေလွင့်လွင့်ဝေဝေကျ၏။ အိပ်မရသော ကျွန်တော်သည်
ဗေဒင်လက္ခဏာစာအုပ် တစ်အုပ်ကို ထုတ်ဖတ်မိလေသည်။ ထိုစာအုပ်မှ သိလိုက်ရသည်မှာ
ကျွန်တော်၏ ကျောပြင်သည် သုမနနှင့်တူ၏။ ကျွန်တော့်သွေးသည် လက်သည်းဆိုးဆေးနှင့်မတူ။
အသေချာဆုံး အချက်ကို မင်နီတားလိုက်၏။ ကျွန်တော်သည် လူသားဖြစ်၏။ လက်ဝါးမှာ
အမှားလက္ခဏာပါလာလေသည်။
29
( ၃ )
မှောက်ထားသော ဖဲချပ်လေးများတွင် မှော်အတတ်ရှိ၏။ သူတို့ကို ဆွဲလှန်ပြီး
ဖြန်းခနဲပစ်ချလိုက်ခြင်းအားဖြင့် အချို့လူများကို နှလုံးရောဂါရစေပါသည်။ လူတိုင်းတွင်
မှောက်ဖဲလေးများ ရှိတတ်၏။ ကျွန်တော့်တွင်လည်း ရှိသည်။ သို့သော် မည်သည့်အခါမှ
ကျွန်တော့်မှောက်ဖဲကို ကျွန်တော်ဆွဲလှန်လိမ့်မည် မဟုတ်ချေ။
လျှို့ဝှက်သိပ်သည်းစွာ ဣနြေ္ဒရနေသော မှောက်ဖဲလေးများ၏ ဘဝကို ကျွန်တော့်ကြောင့်
မနိမ့်ကျစေလိုပါ။ ကျွန်တော့် လက်ဖြင့် ဆွဲလှန်လျှင် သူတို့အတွက် ပက်လက်လန်သည်ကလွဲ၍
ဘာကိုမှ အစွမ်းပြနိုင်မည်မဟုတ်။
ကျွန်တော်က ကြိုးစားရတာကို ပျော်တတ်သော သဘာဝရှိ၏။ အချို့သော ကံကြမ္မာ
အချိုးအကွေ့များတွင်တော့ တဖြည်းဖြည်း မပျော်ဝင်နိုင်ဖြစ်လာခဲ့သည်။ လူကပြေးသော်လည်း
ကံကနှေးနေသည်။ လူက သွားသော်လည်း ကံကနားနေသည်။ လူက ရှုံးမှပဲ ကံကပြုံးတော့၏။
တစ်ခါတစ်ခါတော့လည်း ကျွန်တော်သည် ဘယ်သူ့ကိုဟု တိတိပပ မပြောနိုင်ပဲ နာကြည်းနေခဲ့ဖူး၏။
မသေချာပဲ ဘာကိုမှ ရဲရဲဝံ့ဝံ့ မလုပ်တော့။ ကံကြမ္မာနှင့် စစ်တုရင်ထိုးမည့် အစားနွားသိုးနှင့်သာ
ခေါင်းချင်းဆောင့်နေချင်တော့၏။
ကျွန်တော့်ဘဝကို အစဆုံး မြင်နေရသော မိတ်ဆွေ ကျောင်းဆရာတစ်ဦးက ရင်းနှီးစွာ
အကြံပေးဖူး၏။
“ခင်ဗျားက လေယာဉ်ပေါ်မှ ခုန်ချပြီးမှ လေထီးမပွင့်တဲ့
စစ်သားလိုဖြစ်နေတယ်…တချို့အလုပ်တွေကို ခင်ဗျားမလုပ်နဲ့ မရဘူးဗျ…မကြိုးစားနဲ့ ခင်ဗျားကို
“ကံ”မလိုက်နိုင်ဘူး…. ခင်ဗျားက သေအောင်ကြိုးစားရင် သေသွားမယ်…
ရမှာမဟုတ်ဘူး…”
ထိုသို့ဖြင့် ကျွန်တောနှင့် ကံကြမ္မာသည်(ဓမ္မာ၊ သောက၊ အင်းဝ၊ ရာဇာ) ဖြစ်လဲ့နေသည်။
ကံကြမ္မာဆိုးတို့ကသာ မိုးကြိုးလို ထစ်ချုန်းဆူးနစ်တတ်သော သဘောရှိမည်းဆိုလျှင် ကျွန်တော့်
ခန္ဓာတစ်နံတစ်လျား ခြေဖဝါးမှ ဦးကင်းတိုင်အောင် မိုးကြိုးသွားတို့ အစင်းစင်းဖြာဝေ
စိုက်နစ်နေပေလိမ့်မည်။
စောင်းကြိုးကို ကြာပွတ်ရိုးတပ်ပြီး တစ်စုံတစ်ယောက်က ရိုက်လာလျှင် နာကျင်မိမည်လား။ နှစ်တွေ
ခေတ်တွေကို တပေပေ ဖြတ်သန်း ကျော်လွှားခဲ့ရ၏။ ရင်နင့်လှိုက်မောဖွယ်ရာ
အတွေ့အကြုံများစွာတို့တွင် စုန်ချည်ဆန်ချည် မွေ့ထုံပျော်ပိုက်ခဲ့ရသော်လည်း ကျွန်တော်သည်
မပြည့်စုံသေးသော လူတစ်သိုက်ထဲမှ တစ်ယောက်သာဖြစ်ခဲ့၏။
“စိတ်ရှိလက်ရှိ တရားပေါက်လိုက်ရရင်တော့ တစ်ခါတည်း နိဗ္ဗာန်ရောက်သွားတော့မယ်…”
ဟု မကြာခဏ ရေရွတ်ဖူးသော်လည်း အမှန်စင်စစ် ကျွန်တော်သည် လူ့ဘုံက ဖိနပ်စီးသော
ခြေထောက်နှစ်ချောင်းပေါ်တွင် တစ်ဘဝစာ တဲလေးဆောက်၍ နေထိုင်သူသာ ဖြစ်၏။
ယောက်ျား တစ်ယောက်ဟာ“တက္ကသိုလ်ပညာ သင်ဖူးရမယ်…. ပင်လယ်ခရီးထွက်ဖူးရမယ်….
ထောင်ကျဖူးရမယ်…”ဟု တစ်ယောက်က ပြော၏။ ထိုစကားကို သော်လည်းကောင်း၊ ဆင်တူယိုးမှား
အခြားစကားများကိုသော် လည်းကောင်း ကျွန်တော်ကြားဖူးပေါင်း များပြီဖြစ်သည်။
ထိုစကားအရ ဆိုလျှင် ပင်လယ်ခရီးထွက်ရန် ကျန်နေသေးကြောင်း သတိပြုမိ၏။ ပြုံးလည်း ပြုံးမိ၏။
ထားလိုက်ပါ။ ထိုစကားအတိုင်း အံဝင်ခွင်ကျဖြစ်အောင် လိုက်လံဖြည့်ဆည်းနေမည် မဟုတ်။
ထိုစကားနှင့် မကိုက်ညီမှုအတွက် ကိုယ့်ကိုယ်ကို ယောက်ျားမဟုတ်ပဲ မိန်းမတစ်ယောက်များ
ဖြစ်နေရော့လားဟု နည်းနည်းလေးမှလည်း ထင်လိမ့်မည်းမဟုတ်။
ဘုရားစင်ပေါ်မှ သပြေပန်း လုပ်ရကောင်းလား။ ညောင်ရေအိုး လုပ်ရကောင်းမလား။ ကိုယ့်ကိုယ်ကို
မကွဲပြား၊ ချိုးရုပ်တွေ ရွံ့နဲ့လုပ်ပြီး ချိုးအုပ်နားမှာတော့ ဝီစီလို သွားမှုတ်ချင်သည်။ လူ့သမိုင်းတွင် ကြိုး၊
ခေတ်က မိုးပျံပူဖောင်းဆိုလျှင် ကျွန်တော် ဟိုက်ဒရိုဂျင် လုပ်ချင်သည်။ ထိုသိုဖြင့် ကျွန်တော်
အိမ်ပြန်မရောက်တာ (၇)နှစ်တိုင်ခဲ့ပါပြီ။
(၁၃) ဂဏန်းနှင့် တွေ့ဆုံလိုလျှင်တော့ ကျွန်တော့် အမည် “မောင်ကံဆိုး”ကို သတိရမိတုန်းဖြစ်၏။
တည်ငြိမ်ရင့်ကျက်စပြု၍ အရာရာအပေါ်တွင် တုန်လှုပ်ချောက်ချားမှု နည်းပါးလာသော်လည်း
ဖြစ်နိုင်မည်ဆိုလျှင် ကံကောင်းချင်ပါသေးသည်။ ထိုသို့ တွေးမိသည့် ညက လင်းဝေသော
အိပ်မက်တစ်ခုကို ရ၏။
အိပ်မက်ထဲမှာ ရွှေရောင်တောက်ပသော လူတစ်ယောက် ကျွန်တော့်ဆီကို လာ၏။ ကျွန်တော်ကို
စကားတစ်ခွန်းပြော၏။
“ကံကောင်းတာပဲတို့...ကံဆိုးလေခြင်းတို့ ပြောနေ… ညည်းနေတာဟာ
ကိုယ်ကျိုးသမားတွေပါကွာ… ကိုယ်ကျိုးမကြည့်တဲ့လူ… ကိုယ်ကျိုးစွန့်ထားတဲ့လူမှာ ကံကောင်း
ကံဆိုးမရှိပါဘူး… ကံကောင်းကောင်း ကံဆိုးဆိုး သူလုပ်သင့်တာကို လုပ်ပေးသွားတာပါပဲ…
ဒါပဲပေါ့… ဒီလိုပဲ ဖြစ်ရမှာပေါ့….”
ထို့နောက် သူပြန်သွားလေသည်။ အိပ်မက်သည် ကြောက်မယ်ဖွယ်ရာ ငြိမ်သက်သွား၏။
ကျွန်တော့်ရင်ထဲမှ အနှောင်အထုံးတို့ ပုံလျက်သား ပြေကျသွား၏။ အကြွင်းမဲ့ ရှင်းသွားသည်။
ကျွန်တော်… ည… အိပ်မက်… ကံကြမ္မာ… လက်မှတ်…. ဘာဆိုဘာမှ မရှိတော့ချေ။
ထိုသို့ဖြင့် သေနေသော ကျွန်တော် ပြန်လည် ရှင်သန်လာခဲ့ရလေသည်။ လေထဲမှာ ငုတ်နေသော
လူတစ်ယောက် “ဗွမ်း”ခနဲ ပြန်ပေါ်လာရခြင်းဖြစ်၏။
ဒီအချိန်ကျမှ စာရွက်ပေါ်မှာ ကျွန်တော့်ကို သိန်းဆုပေးဖူးသော မြန်မာဆရာနှင့်
31
အမှတ်မထင်ပြန်ဆုံရလေသည်။ “မင်း သိန်းထီပေါက်ရင် ဘာလုပ်ဦးမလဲ….” ဟု သတိတရ မေး၏။
ကျွန်တော် ရယ်၍သာနေလိုက်သည်။ အပြန်လမ်းတွင် ထီတစ်စောင်ဝင်ထိုးသည်။ အကယ်၍
ကျွန်တော်သာ သိန်းထီ၊ သန်းထီပေါက်လျှင်…
(၁) ထိုငွေများကို အကြွေဖြစ်အောင် လဲပါမည်။
(၂) ထို့နောက် ကျွန်တော်က ရုပ်စုံကာတွန်းများထဲမှ သူဌေးမင်းလို ခေါင်းပေါင်း၊
ရင်ကျပ်အင်္ကျီလက်ရှည်၊ တောင်ရှည်ပုဆိုးတို့ကို ဝတ်ပါမည်။
(၃) သျှောင်ထုံးနှင့် လူတစ်ယောက်ကို ငွေထုတ်ကြီး ထမ်းခိုင်းပါမည်။
(၄) ထို့နောက် ကျွန်တော်က ရှေ့မှရင်ကော့ လျှောက်ပြီး သူက နောက်မှ ငွေထုတ်ထမ်း၍
လိုက်လာရပါမည်။
(၅) ထိုသိုဖြင့် အချို့လူ၊ အချို့အိမ်၊ အချို့လမ်းများရှေ့၌ ကျွန်တော်တို့ ဖြတ်လျှောက်ပါမည်။
(၆) ထိုဆရာ့အိမ်ရှေ့သို့လည်း ဖြတ်လျှောက်ပါမည်။
ကဲ … မိတ်ဆွေ
ကျွန်တော် ထီတစ်စောင်ထိုးထားပါပြီ။ နံပါတ်က အ…၀၀၀၀၁၃ ဖြစ်ပါသည်။ ဝိုင်းဝန်းတိုက်ပြု
ကြည့်ရှုပေးစေလိုပါသည်။ အတိတ်ကိုလည်း သတိထားစေလိုပါသည်။ အတိတ်က “အိပ်မက်ထဲမှာ
အိပ်မက် မမက်ကြေး…”ဟူ၍ ဖြစ်ပါသည်။
***************************************
တာရာမင်းဝေ
Creadit ကျွန်​​တော်​ ချစ်​​သော စာအုပ်​များ

by မွန်းလေးဖေဖေ