❇ ဆန် ❇
ခင်ခင်ထူး
(၁)
"ခိုးကြပြန်ပြီလားဟေ့။ ဝရမ်းပြေးနဲ့ သူခိုးမ စပ်ကျတဲ့ ဟာတွေရဲ့။ ဘယ့်နှယ်တော် အိုကြီးအိုမ မုဆိုးမ ဆန်တောင် မနေရတော့ လူ့ပြည် မကောင်းတော့ပါဘူး။ မြစ်နားကမ်းနား မျောလာသမျှ ထင်းမှတ်လို့ ဆယ်ပါသယ်၊ မပွေးချည်းပါလား ကရို့ရဲ့"
အမေပေါက်စက လူကသာ ပဲချောင်းလောက် ရှိသာပါ။ အသံက မြစ်မကို ကျော်ပြီး တစ်ဖက်ကမ်း စစ်ကိုင်းတောင်ကို ရိုက်ပြီး ပြန်လာတာမျိုး။ အနီးအနားက တဲတွေထဲ အရက်သောက်နေ သူတွေရော၊ နေဝင် မိုးချုပ် ဖတ်သီ ဖတ်သီ ရင်တလျားလျား ပြေးလွှားနေကြတဲ့ မိန်းမတွေရော၊ မယ်ဒလင် တီးနေသူနဲ့ တစ်ယောက် တစ်ပေါက် ဆိုနေသူတွေရော၊ လင်မယားချင်း လုံးသတ်နေကြ သူတွေရော အားလုံးလိုလိုက ကြီးတော် ပေါက်စ ခုနစ်စင် ခုနစ်မောင်း အော်လိုက်သံကြောင့် တစ်ချက် တုံ့သွားကြလေရဲ့။ ခဏ ကလေးပါ။ ချက်ချင်းလိုလို လုပ်လက်စတွေ ပြန်လုပ်နေကြတာပါပဲ။ တဲရှေ့ စီးနေတဲ့ ဧရာဝတီ မြစ်ကြီးတောင် လန့်သွား ထင်ပါ့။
အသက်က ရပြီဆိုတော့ ကြီးတော် ပေါက်စ ခမျာလည်း အဲသလောက် အော်နိုင်တာပါ။ စိတ်ရှိလို့သာ အော်ရ မောလိုက်တာ ရင်ဘတ် ဖိထားရတယ်။ သည်နားက တဲတွေမှာ သူ့တဲ ကိုယ့်တဲ ပစ္စည်းပျောက်တာ မဆန်းတော့ပါဘူး။ မုဆိုးမလည်း ပျောက်တာပဲ။ မုဆိုးထီးလည်း ပျောက်တာပဲ။ တစ်တဲနှင့် တစ်တဲ သံဘာဂျာတံခါး တပ်ထားတာ မဟုတ်တော့ ကူးချင်သူက ကူးရုံပဲ။ မြွေရေခွံအိတ် တစ်လုံး အနားသုံးဖက် ဖွင့်ပြီး အပေါက်ဝ ချိတ်ထားရင် တံခါး ဖြစ်တဲ့ဟာ၊ ဘယ့်နှယ်လုပ် လုံနိုင်မှာတုန်း။ ဘယ်သူ ဘယ်ဝါတော့ ဝင်တာ တွေ့ပါတယ် လို့လည်း မြင်လိုက်သူက ကာယကံရှင်ကို မပြောဝံ့ကြဘူး။ အကောင်းဆုံးက ဘာမှ မသိသလို၊ မမြင်သလို၊ မကြားသလို ငြိမ်နေတာပဲ ဆိုတာ သင်ခန်းစာ ရကြ လှပြီကိုး။ ပြောကြကြေး ဆိုရင် တဲနီးချင်း ကတောင် မလှုပ်ဘူး။ ပျောက်တဲ့လူက ဘာပျောက်တယ် ဆိုပြီး အော်ရုံပဲ။ မောရင် ရပ်သွားလိမ့်မယ် ဆိုတာ သိပြီးသား။ အခုလည်း ကြီးတော် ပေါက်စ ခမျာ တစ်ချက်ကောင်းကောင်း အော်လိုက်ပြီး ငြိမ်ရ တော့တာပါ။
ဧရာဝတီ မြစ်ကြီးကလည်း ဒါမျိုး ရိုးလှပေါ့ဆိုတဲ့ ပုံစံနဲ့ ဆက်စီး နေတာပါပဲ။ အဲဒီညနေက ကြီးတော် ပေါက်စ ကြွပ်ကြွပ်အိတ်နဲ့ ထည့်ထားတဲ့ ဆန်ထုပ် နို့ဆီဘူးလေးလုံး မဲ့မဲ့လောက် ပျောက်တာပါ။ ထူးဆန်းတာက ဆန်ထုပ်က ထရံဟောင်းမှာ ချိတ်ထားတာ မဟုတ်ဘူး။ ခါတိုင်းလို ခေါင်းအုံးအောက် ထိုးထည့်ထားလို့ ပျောက်တယ်ဆိုလည်း ထားပါတော့။ အခုဟာက သံသေတ္တာဟောင်းထဲ ဆန်ထုပ်ကလေး ထည့်ပြီး သော့ပါ ခတ်ပစ်ခဲ့ရာက ပျောက်တာ။ ဓာတ်သိမို့ ခိုးတယ် ဆိုရအောင်ကလည်း သည်နားက တဲတွေအားလုံး ဓာတ်သိတွေချည်းပဲ။ ထူးထူးဆန်းဆန်း ကောင်းကောင်းကန်းကန်း ရယ်လို့ ဘယ်သူ့မှာမှ မရှိတာလည်း အချင်းချင်း ဆိုတော့ သိကြပြီးသား။ ဘယ်သူမဆို သံသေတ္တာလေး တစ်လုံးရှိရင် ထည့်ဖို့ပဲ။ မရှိရင် တစ်တဲတဲ အပ်ခဲ့ဖို့ပဲ။ သည်ကြားထဲက ပျောက်တာတွေ ရှိတတ်ပေသိ အခါခပ်သိမ်း လူမရှိတာနဲ့ ပျောက်တာ ချည်းပဲလို့လည်း ပြောမဖြစ်ဘူး။ မပျောက်ချင် မပျောက်ဘူး။ ပျောက်ချင်မှလည်း ပျောက်မယ်။ ကိုယ့်ပစ္စည်းကိုယ် အရေးကြီးတယ် ထင်ရင် လုံခြုံအောင်သိမ်း။ ဒါပဲ ရှိတယ်။
"ကျုပ်တို့လည်း အခုမှပဲ သဲကားက ဆင်းကာ ကြီးတော်ရေ။ ရေတစ်ပေါက် မချိုးရသေးဘူး။ ခုဟာက ဘာပျောက်သတုန်း"
"ဆန်ပါအေ၊ နို့ဆီဗူး လေးဘူးလောက် ရှိမှာပေါ့။ ငါ မခံချင်သာက သော့ပါ ချိုးဖဲ့ပြီး ယူသွားသာကို မခံချင်တာ။ သူခိုးလက်စကြီး ထင်ပါရဲ့ ဗျစ်ထူမရယ်"
ကိုယ့်ကိစ္စ သူ့ကိစ္စ မပါကြဘူး ဆိုပေသိ မဗျစ်ထူကတော့ တဲနီးချင်းကိုး၊ မထင်သော်ရှိ ထင်သော်ရှိ ဘေးဆီးရန်ကာ တစ်ချက်တော့ မေးမှ ကောင်းမယ်ထင်လို့ မေးတာပါ။ မေးပြီးတာနဲ့ မြစ်ရေထဲ ခြေကျင်းဝတ်က ဒူး၊ ဒူးကနေ ရင်ခေါင်း ရောက်အောင် ဆင်းသွားလေရဲ့။ ကြီးတော် ပေါက်စကတော့ ချွဲတပျစ်ပျစ် ထွေးရာက ဗျစ်တောက် ဗျစ်တောက် လောက်တော့ ပြောနေသေးတာပါ။ ထရံချိတ်ထားတဲ့ မြင်းဖြူရုပ်ကို လက်အုပ်ချီ ထားသေးတာ။
''အဖေ မြင်းဖြူရှင်တို့များ တဲထဲ လူဝင်တာ မသိရဘူးရယ်လို့၊ ခွာနဲ့ ခုတ်လိုက် စမ်းပါတော့။ သွားနဲ့ ကိုက်လိုက် စမ်းပါတော့''
* * *
(၂)
သည်နားတစ်ကြော တဲစုတွေထဲမှာ ကြီးတော် ပေါက်စ အသက် အကြီးဆုံး၊ ခြောက်ဆယ် ကျော်လှပေါ့ဟာ။ မန္တလေးကို ရောက်ပါပြီ ဆိုတုန်းကတော့ ကြီးတော် ပေါက်စ အိမ်သား၊ 'ဘိုးပြောင်း' ပါသေးတယ်။ တောင်သာနထိုး ဘက်ကရွာမှာ အိမ်ထောင်ရက်သား ကျလို့ သူတကာ့ အခင်း၊ သူတကာ့ ယာ လင်ကိုယ်မယား နှစ်ယောက် အများတကာလို နေပူလောင်အောင် လုပ်စားခဲ့ရတာပဲ နှစ်ပေါင်းလေးဆယ် မက မကမယ်။ ကြီးတော် ပေါက်စ မိဘများက ပဲရိတ်၊ နှမ်းရိတ် မဝ ဝမ်းစာနဲ့ ဘဝကုန်ခဲ့ ကြသလို ဘိုးပြောင်း မိဘများ ကလည်း ထန်းတက်ရတာနဲ့ မြေပေါ် ဆင်းရတယ် မရှိသူတွေ။ ဘယ်မိဘကမှ မြေတစ်ကွက်၊ ယာတစ်ခင်း ရော့ဟဲ့ အင့်ဟဲ့ ပေးနိုင်ကြတာ မဟုတ်တော့ သူတို့နှစ်ယောက် ညားတော့လည်း ဇာတာက နေပူသဲပူက မလွတ်ဘူး။ မပူပါဘူး။ သူတကာ သည်လိုပဲ ဥစ္စာ၊ နားပေါက်ဟောင်းလောင်း နှစ်ဖက်ကို ငရုတ်ခြောက် အညှာကောက်ကလေး တစ်ဖက်တစ်ချက် ထိုးပြီး နားပေါက် မပိတ်ရအောင် နေခဲ့ရတဲ့ ဘဝပဲဟာ။ ဘိုးပြောင်းက ငယ်သေးတော့ ထန်းတက်တယ်။ ထန်းလျက်ဖိုမှာ ထန်းလျက် ချက်တယ်။ ကြီးတော် ပေါက်စ ကလည်း အလကား မနေပါဘူး။ အပျိုမပေါက်တပေါက် ဂျာရစ်ထုံးကလေးနဲ့လောက် ကတည်းက ဆင်းရတဲ့ သစ်ခင်း။ လင်ရယ်လို့ ရတော့လည်း အနားမရှိဘူး။ လင်မယား နှစ်ယောက်တည်း ဆိုတော့ ရွာထဲ ဘယ်နား တဲထိုးထိုး ရတဲ့ ခေတ်ကာလမှာ နေစရာလည်း မပူရဘူး။ စားဖို့လည်း မဥပါဒ်ရဘူး။ တစ်ဝမ်းတစ်ခါးတော့ ငြိမ်တယ်။ ကြီးတော် ပေါက်စက သားသမီး မပေါ်ပေါက်တာ အကြာကြီး။ ညားခါစ ကလေး တပိုက်ပိုက် ဖြစ်မှာစိုလို့ သားသမီး မလိုချင်သေးပေသိ နှစ်နှစ်က သုံးနှစ် ဖြစ်လာတော့ သားသမီး လိုချင်ကြပြီ။
''ပါးစပ်တစ်ပေါက် တိုးချင် တိုးပါစေဟာ။ ဆင်များလို တစ်အစ် အစ်ကြရုံပေါ့'' လို့ ဘိုးပြောင်းကတောင် ပြောလာရတဲ့အထိ ဆိုတော့ ကြီးတော် ပေါက်စကလည်း ဝမ်းနဲ့ လွယ်မွေးရမယ့် မိခင်လောင်းကိုး။ လိုချင်တာပါပဲ။ သည်လိုနဲ့ ရွာညောင်ပင်မှာ သားဆုပန်ကြတာ နှစ်နှစ်ကြာတယ်။ ရုက္ခစိုး မတာပဲလား။ ဘဝက အကြာင်းပဲလား မသိပါဘူး။ အကြီးမ လုံးကျစ် ကိုယ်ဝန် ရှိလာတော့ ဝမ်းသာ လိုက်ကြရပုံများတော့။ နောက် နှစ်နှစ်လောက် ကြာတော့ လုံးဇောက် ဆိုတဲ့ သမီးတစ်ယောက် မွေးပြန်တယ်။ အကြီးမက မွေးကတည်းက လုံးလုံးကျစ်ကျစ်ကလေးမိ်ု့ 'လုံးကျစ်' မှည့်တာပါ။ ငယ်ငယ်ကတည်းက မျက်နှာက လင်နို့ မျက်နှာလေးနဲ့။ 'လုံးဇောက်' (လုံးစောက်) ကတော့ မျက်နှာ လုံးစောက်စောက် ဆိုတော့ လင်းဝက်နဲ့ တူတယ်။ ဒါပေသိ လုံးဇောက်က လူ့ဘဝ ကံမပါရှာဘူး ထင်ပါရဲ့။ လေးနှစ်သမီးလောက်မှာ ပျက်စီးရှာတယ်။ နောက်ထပ်လည်း သားသမီး မပေါ်ပေါက်တာ့ပါဘူး။ သည်တော့ အကြီးမ လုံးကျစ်နဲ့ သားအဖ သုံးယောက် တစ်ဘဝ ရှိခဲ့ကြတာပါ။
ရွာမှာ မိုးကြီးဆက်တိုက် ခေါင်တော့ ရွာက တစ်ယောက်ထွက် တစ်ယောက်ထွက်နဲ့ မြို့တက်ကြရာမှာ ဘိုးပြောင်းတို့ သားအဖတွေကိုလည်း သည်ရောဂါ ကူးစက်ကြတယ် ပြောပါတော့။
''ကိုငပြောင်း ... တော်လည်း ထန်းပင် ခြေကန် တက်ရသာနဲ့ ခြေဖဝါး ကွဲတော့မယ်၊ ကျုပ်မလည်း ကြက်သွန်တူး၊ ပဲနုတ်ရသာနဲ့ လက်အရေခွံ လန်လှပြီ။ ကံရှိန်တို့ ဘုတ်မတို့တောင် မြို့တက်မှတော့ ကျုပ်တို့လည်း လိုက်ချင်လှတော်''
''ထသွားမှ ကျိုးမှန်းသိဗျာ၊ ကိုယ် တောသူတောသား မြို့တက် မြို့တက်နဲ့ လွယ်မှတ်လို့ ပေါက်စနှယ်၊ ကံရှိန်တို့က သူတို့အမျိုးတွေ မန်းလေး ရှိသာဗျ။ ကျုပ်တို့က ဘယ်နား သွားနေမှာတုန်း''
မပေါက်စက သည်လို စကားစရင် ကိုပြောင်းက သည်လို စကားဆုံးတာ ချည်းပဲ။ သည်လိုနဲ့ တစ်နေ့ရွှေ တစ်နေ့ငွေနဲ့ သမီးလုံးကျစ်ကလည်း ထိုးထိုးထောင်ထောင် အရွယ်ရောက်လာပြီ။ ဖအေ ဘိုးပြောင်းနဲ့အတူ ထန်းတက်ဖက်သူငယ် 'မောင်အုပ်' နဲ့ အနေနီးရာက စုံဖက်ကြတော့ တဲထဲ လူတစ်ယောက် တိုးပြီကိုး။ ငအုပ်ကလည်း ရေမျောကမ်းတင်။ တစ်ရွာက လာပြီး ထန်းတက်တာ ဆိ်ုတော့ မင်္ဂလာဆွမ်းတစ်အုပ် ကျောင်းပို့တာတောင် မိရယ် ဖရယ် ခေါ်နိုင်တာ မဟုတ်ဘူး။ သည်လိုနဲ့ ရွာမှာတင် မြေးရပြီး မအေ လုံးကျစ်နဲ့ ဖအေ ငအုပ် ပေါင်းပြီး 'အုပ်လုံး' လို့ မှည့်ကြတယ်။ ဘိုးပြောင်းက မြေးကို တပွေ့ပွေ့ အင်မတန် ချစ်ရှာတာကိုး။ ထန်းတောထဲ သွားရင် မြေးက ပခုံးပေါ်က။ ကြီးတော် ပေါက်စကလည်း မထူးပါဘူး။ မနက်ဖက် အခင်းဆင်းရင် မြေး ပါနေကျ။
အဲသည်တုန်းကတော့ သမီး၊ သမက်၊ မြေး၊ အဘိုး၊ အဘွားတစ်တွေ ဆင်းရဲကြပေသိ ဘဝက နေပျော်တယ် ပေါ့လေ။ ကြီးတော် ပေါက်စက တဲခြေနဲ့ နှစ်လံလောက်မှာ တဖျတ်ဖျတ် လာရိုက်နေတဲ့ ဧရာဝတီ မြစ်ရေတွေကို ငေးရင်း တစ်ခါက ဘဝကို သတိရနေမိတာပါ။ မျက်ရည်ကလေး တစမ်းစမ်းနဲ့ သွားလေသူကိုလည်း သတိရရဲ့။
''အဘိုးကြီးရေ ... ခုတော့ ကျုပ် တစ်ယောက်တည်း ပါတော်။ ကျုပ်တို့ဟာ ကျုပ်တို့ ကိုယ့်လက်နဲ့ ကိုယ်ခြေ၊ ကိုယ့်ရွာကိုယ် နေခဲ့ကြရင် အကောင်းသား၊ တော်ပြောတဲ့ ထသွားမှ ကျိုးမှန်းသိ ဆိုတာ အဟုတ်ပါ့ကော''
လင် သတိရတာရော၊ ဆန်ပျောက်လို့ နှမြောတာရော ပေါင်းပြီး တအီအီ ငိုနေသေးတာ။
* * *
(၃)
ကြီးတော် ပေါက်စ ညည်းတဲ့ ''အဘိုးကြီးရေ ... အခုတော့ ကျုပ်တစ်ယောက်တည်းပါ့ကော'' ဆိုတာ ဟုတ်လည်း ဟုတ်ပါရဲ့။ ဟုတ်တော့လည်း မဟုတ်ပြန်ဘူး။ ဧရာဝတီမြစ်ဆိပ် တာရိုးခြေမှာ တဲတွေ တသီကြီး တန်းထိုးနေကြတော့ ဘိုးပြောင်းနဲ့ ကြီးတော် ပေါက်စက တစ်တဲ။ သမီး၊ သမက် သားအဖတစ်တွေက တစ်တဲ။ တဲချင်းက မဝေးလှဘူး။ တဲ ခုနစ်လုံးခြား၊ ရှစ်လုံးခြားလောက် ရှိမှာပေါ့။ ဝေးလှပြီ မဆိုနိုင်ပေသိ သူ့အိုးနဲ့ သူ့အိမ်ဆိုတော့ နှစ်ရက်နေလို့ သမီးတဲထဲ မရောက်လေ့ဘူး။ မြေးတွေကတော့ ကလေးတွေကိုး၊ မြစ်ထဲ ရေစိမ်လိုက်၊ တာရိုးပေါ်တက်ကစားလိုက်၊ တဲတကာက အလေ့ပေါက် ခွေးတွေနဲ့ လုံးလိုက်ထွေးလိုက် အမေကြီးရှိတဲ့ အချိန်ဆိုရင်တော့ ရောက်ရောက် လာကြတယ်။ အမေကြီး လုပ်သူက မုန့်ကလေး ပဲကလေး ပါလာတတ်တာက တစ်ကြောင်း၊ ဘွားအေရယ်လို့ ချစ်ခင်ကြတာ တစ်ကြောင်းဆိုတော့ မြေးသုံးကောင်နဲုတော့ ဝေးလှတယ် ပြောမဖြစ်ဘူး။
မြစ်စောင်းမှာ တဲထိုးနေကြသူတွေ ဆိုတာ နည်းမှ မနည်းဘဲ။ ယောက်ျား သန်သန်မာမာတွေက သဲကား လိုက်ကြတာ များတယ်။ သဲကား လိုက်တာက ပင်ပန်းပေသိ ပိုက်ဆံတော့ ရတယ်၊ မြစ်ထဲက သဲတွေကို စက်နဲ့စုပ်တဲ့ သဲမော်တော် လိုက်သူတွေလည်း ရှိတယ်။ မြစ်ထဲက သဲစိုတွေ တင်လာတဲ့ သဲမော်တော်က မြုပ်လုမြုပ်ခင်ရယ်။ မြစ်ဆိပ်ရောက်တော့ စက်နဲ့ပဲ မြစ်ကမ်းပေါ် တည်ထားတဲ့ သစ်ပုံရိုက် ဇလားကြီးတွေထဲ မောင်းထည့်။ သဲနဲ့ရေ ဖျော်ပြီးသား ဆိုတော့ သဲက ဇလားထဲ ကျန်ပြီး ရေက အောက်ကို စိမ့်ထွက်သွားတယ်။ သည်သဲ စိုဖန့်ဖန့်ကိုမှ သဲတင်သူတွေက မြစ်စောင်းခြေ ထိုးလာတဲ့ ကားတွေပေါ် ထမ်းထမ်းတင် ကြရတာပါ။ သဲကားတွေက အကြီးကြီးတွေ။ မိန်းမ၊ ယောက်ျား၊ သဲတောင်းမောက်မောက် အခေါက်ခေါက် အခါခါ ရွက်တင်ကြရတယ်။ သွားချတော့လည်းသူတို့ပဲ။ မြစ်ဆိပ်မှာ သဲကားတွေဆိုတာ မနည်းဘူး။ အလှူထမင်းရုံသာ ကြည့်တော့။ ''ချမ်းသာတဲ့ လူများကျတော့လည်း ဆောက်လိုက်ကြတဲ့ တိုက်တွေတော်။ မြစ်ထဲက သဲတောင် မလောက်နိုင်ဘူး'' လို့ ကြီးတော် ပေါက်စက တစ်ခါတစ်ခါ တွေးမ်ိတယ်။ ပိုက်ဆံတွေ ဘယ်ကများ ရကြပါလိမ့်။
တဲရှေ့မှာ တစ်ယောက်တည်း ငုတ်တုတ်ထိုင်ရင်း ကြီးတော် ပေါက်စ အတွေးတွေ ဝင်နေလိုက်တာ ဗိုက်ထဲက ဂွီခနဲ မြည်လာတော့မှ ရင်ထဲ လှပ်လှပ်ပြေးအောင် ဆာတာကို သတိရတော့တယ်။ ဆန်ရှာပြီး ထမင်းတစ်လုံး ချက်ရ ကောင်းမလား။ စားနိုင်တာက တစ်လုတ်တစ်ဆုပ်ရယ်။ တာရိုးပေါ် တက်ပြီး ခြင်းကြားဟောင်း၊ ကွမ်းခြင်းဟောင်းတွေ ရှာနေရမှာကို သတိရလိုက်တော့ မောတာနဲ့ ချက်မနေတော့ ပါဘူးလို့ တွေးတယ်။ သည်နားမှာက မြစ်ဆိပ်ရယ်လို့ ထင်းတွေတော့ ရှိသားပဲ။ လှေကြီးတွေနဲ့ အထက် မလည်ဘက်၊ စဥ့်ကူး သပိတ်ကျင်း ဘက်ကနေ မြစ်ကြီးကို အလျားလိုက် စုန်ဆင်းပြီးမှ မန္တလေးဆိပ်ကမ်း ရောက်ရတာတွေ ဆိုတော့ ထင်းတစ်ချောင်း၊ အလကားမူးတင်း ဘယ်ရပါ့မလဲ။ တချို့ကတော့ ထင်းလှေတွေက ပုံထားတဲ့ ထင်းတစ်ပွေ့တော့ လူမသိအောင် ဆွဲကြတာ ရှိတယ်။ မ်ိရင်လည်း မသက်သာဘူး။ လှေပေါ်ကနေ ထင်းချောင်းနဲ့ ကောက်ပစ်လိုက်တာများ ရင်ဝ မြားစိုက်တာကမှ သက်သာဦးမယ်။ တချို့က ဘတ်ခွနဲ့ ပစ်ကြ သေးတာပါ။ သည်တော့ မြစ်နဲ့ တာရိုးးကြားက ရွှေလှေကျင်းလို့ ခေါ်တဲ့ အမှိုက်ကျင်းထဲ ဆင်းကြရပြီး သူတကာ ပစ်ထားတဲ့ အမှိုက်တို အမှိုက်စ၊ ခြင်းတို ခြင်းစ ကောက်ရတာပေါ့။ ထမင်းတစ်လုံးစာတော့ ဖြိုးဖြိုး ဖြောက်ဖြောက်နဲ့ ကျက်တာပဲကိုး။ ရွှေလှေကျင်းက ရပ်ကွက်ဈေးနဲ့ နီးတော့ ခြင်းတောင်းစုတ်တွေ ပစ်နေကျ နေရာပါ။ သို့ပေသိ တဲရှိသမျှ သည်ကျင်းထဲ နှိုက်ကြတာ ဆိုတော့ နတ်ခံတွင်းလို နှိုက်တိုင်းရဖို့ ဆိုတာ မသေချာဘူး။ တဲနီးချင်း မဗျစ်ထူတောင် ရေထဲက တက်လာပြီ။ ကြီးတော် ပေါက်စ ငုတ်တုတ်က မကြွရသေးဘူး။
''ကြီးးတော် ... ကျုပ်တို့နဲ့ အတူစားလိုက်၊ မိငှက်က ပိုချက်ထားမှာပါ။ အဘွားကြီး လေခံနေဦးမယ်၊ ခဏနေရင် ခေါ်လိုက်မယ်''
''နေပါအေ ... မဆာပါဘူး။ တာရိုးပေါ် တက်ပြီး မန်းမရွေး ဝယ်စား လိုက်ပါ့မယ်။ ငါက ဆန်မနှမြောဘူး။ ငါ့ တရုတ်သော့ကလေး နှမြောတာပါအေ။ သော့ပါ ချိုးဖဲ့ယူသွားသာကို မခံချင်တာ။ မပွေးမှ မကိုက်သယ်''
မဗျစ်ထူ သူ့တဲထဲ ဝင်သွားတော့လည်း ကြီးတော် ပေါက်စ မန်းမရွေး တက်မဝယ်ဖြစ်ပါဘူး။ မြောက်ဘက် တဲစုတွေထဲ နေတဲ့ သမီးအိမ်များ ထမင်းတစ်ဆုပ်တစ်ခဲ ပိုကောင်းပါရဲ့။ ထမင်းများကလည်း ဘာသဘောရယ် မပြောတတ်ဘူး။ ရှိရင် မဆာဘူး။ မရှိရင် ရင်ထဲ ပလုံစီ ထိုးနေတော့တာ မဟုတ်လား။ တော်ပါသေးရဲ့၊ ရှိစုမဲ့စု ပိုက်ဆံကလေးတော့ ချွေးခံထဲ ရင်ပုံထဲ ထည့်ထားတတ်လို့ ကိုယ်ရင့်တတူ မြဲနေလို့။ သံသေတ္တာထဲ ထည့်ထားရင် ပါပြီပေါ့။ ကြီးတော် ပေါက်စ တဲထဲ ပြန်ဝင်ပြီး ကပ်ကြမ်းပေါ် ခွေအိပ် နေလိုက်တယ်။ ကနေ့ လူလည်း တော်တော် ပင်ပန်းသွားပါရဲ့။ ပိုက်ဆံလည်း ရပါရဲ့။ သူတကာ့ အပူတွေ ကူးရတဲ့ အလုပ်။ ရွာမှာ နေတုန်းက လူ့ဘဝ နင်းနှိပ်စားရမယ်လို့ တစ်ခါမှ မတွေးဘူးတဲ့ အလုပ်။ ခုတော့ လုပ်နေရပြီ။ ဘိုးပြောင်း ရှိတုန်းက နည်းနည်းပါးပါး သင်ပြပေးခဲ့လို့သာ ထမင်းတစ်လုပ် စားရတာကိုလည်း သတိရရဲ့။ ဘိုးပြောင်းကလည်း နင်းတတ်၊ နှိပ်တတ်တယ်ရယ်လို့ မဟုတ်ဘူး။ ကိုရင်ဘဝက ဆရာတော်ကြီး ခြေဆုပ်လက်ဆုပ် ဝတ်ဖြည့်ရာက ခပ်ဖျင်းဖျင်းလောက် တတ်ခဲ့တာပါ။ အဘိုးကြီး ရှိတုန်းက လင်ကိုယ်မယား နှစ်ယောက် တဲထဲ ထိုင်နေရုံပဲ။ လာခေါ်ကြလွန်းလို့ လှန်လွှတ်ရတာတောင် ရှိတယ်။ မြေကြီးထဲက ကြက်သွန်ဥ၊ မြေကြီးထဲက မြေပဲဥ၊ တူရွင်း မပါရင်တောင် လက်နဲ့ ကုတ်ယူနိုင်ခဲ့တဲ့ မိန်းမပဲဟာ။ လူ့အသား လူ့အကြောလောက်တော့ ကုတ်တာနဲ့ ထအော်တာ ဘာဆန်းလိမ့်မလဲ။ ကြီးတော် ပေါက်စက လက်သန်တယ်၊ လက်ပေါက်တယ် ဖြစ်ကရော။
တဲစုတွေဆီက အသံဗလံစုံ ကြားနေတဲ့ ကြားက ကြီးတော် ပေါက်စလည်း တဲထဲ ဝင်လှဲတယ်။ ဝမ်းဟာနေတဲ့ ကြားက မှေးခနဲ တစ်ချက် အိပ်ပျော်သွားတယ်။
* * *
(၄)
နို့မို့ဆိုရင် သည်မြစ်ဆိပ်နား တဲထိုးနေစရာ အကြောင်း မရှိပါဘူး။ ကိုယ့်ရွာကိုယ် နေပူပူ ကျောကွဲကွဲ၊ သရောကြီး ခိုင်းတာတောင် ခွာဖို့ စိတ်ကူးခဲ့တာမှ မဟုတ်တာ။ ရွာက တချို့ မြိ်ု့တက်ကြတယ် ဆိုတုန်းကတော့ လင်သားကို ပူဆာဖူးပါရဲ့။ အိမ်သားဖြစ်သူက တားတာနဲ့ မရောက်ရတာ အကြာကြီး။ မြို့တက်တာနဲ့ အလိုလို ချမ်းသာဖို့ မရှိတာလည်း သိသားပဲ။ လုပ်မှ စားရမှာလည်း သဘောပေါက်သားပဲ။ ဒါပေသိ ရွာမှာထက်တော့ အူစိုစိ်ု ရှိလိမ့်မယ် ထင်တာကိုး။ ရွာမှာတော့ ပဲပိုးထိုးနဲ့ သုံးလွန်တင်ထမင်း လည်ချောင်းထဲ အတောင့်လိုက် ဆင်းနိုင်အောင် မနည်းမျိုကြရတဲ့ အဖြစ်ကိုး။ မြို့မှာ ဘယ်သူတော့ဖြင့် ဆိုက်ကားနင်း သတဲ့။ ဘယ်ဝါတော့ဖြင့် ပွက်ရည်ပုံး၊ ထမ်းသတဲ့။ ငဖြူတော့ဖြင့် လှေလိုက်သတဲ့။ ငနီတော့ဖြင့် ပန်းရန်ခကြွေး လုပ်သတဲ့ ဆိုတာတွေ ကြားရသားပဲ။ တောင်သူတောင်သား ဆိုတော့ အားကျတာ သတ်သတ်၊ ကြောက်တာက သတ်သတ်။
''ပေါက်စရာ ထပင်တွေတော့ ဘယ်ထန်းရှင်ကမှ ခုတ်လှဲ မပစ်ပေါင်ဟာ။ ထပပ်ရှိ ထမင်း ရှိနေသဲ့ဟာ။ မြို့တက်ပြီး စမ်းတဝါးဝါး လုပ်မစားချင်ပါနဲ့၊ အသာနေစမ်းပါဟာ''
''ကျုပ်ကလည်း သွားချင်လှလို့ ပြောသာ မဟုတ်ဘူးရယ်၊ ကျုပ်တို့အိမ် စားအိုးကြီးလာပြီတော့။ သမီးရော၊ သမက်ရော၊ မြေးနှစ်ကောင်ရော ဆိုတော့ တစ်ရွာပြောင်း သူကောင်းဖြစ်မလားလို့ ပြောရသာပါ''
''သေချင်တဲ့ကျား တောပြောင်း ဆိုတာလည်း ရှိသားဟာကိုး''
လင်က စိတ်ပါတော့ မယားက ဖျက်လိုက်၊ မယားက တိုက်တွန်းတော့ လင်က ပုတ်ချလိုက်နဲ့ပဲ မန်းလေးမြို့ ဆိုတာ ဝေးလို့ နွားထိုးကြီး၊ တောင်သာလို မြို့ပေါ်တောင် မရောက်ရတာ ကြာပေါ့။ တောထဲက ထန်းတက်သမား မြို့သွားစရာ အကြောင်းကလည်း မရှိဘူးကိုး။ နို့ပေသိ လူ့ကံများ ဆန်းချက်တော့။ မန်းလေးနဲ့ လှမ်းလှမ်းက ကွင်းတွေထဲမှာ အုတ်ဖိုတွေ ထောင်ကြလို့ ရွာကလူတွေ လိုက်စုနေသတဲ့ ဆိုတဲ့သတင်း ရောက်လာခဲ့တယ်။ တစ်ရက်တော့ အုတ်သူကြီးရဲ့ လူယုံ မောင်စံသိန်း ဆိုသူက ထန်းတောထဲ ထန်းရည်သောက်ရင်း မြို့မှာ လက်ပေါက်အုတ်လုပ်ငန်း လုပ်ဖို့ လူတွေလိုလို့ လိုက်စုနေတာ တော်တော် ရပြီလို့ ပြောနေတာကို ကြားလာခဲ့တယ်။ လိုက်ချင်ရင် ယောက်ျား၊ မိန်းမ စာရင်း ပေးရုံပဲတဲ့။ နေ့တွက်က ဘယ်ရွေ့တယ်မျှ ရမယ် ဆိုတာလည်း ပါရဲ့၊ သည်လိုနဲ့ တံခါးပိတ် ဂျိတ်ဆို သားအဖတစ်တွေ ထလိုက်လာကြတာ အခုထိပဲ။ ရွာတစ်ခေါက် ပြန်မရောက် ကြတော့ဘူး။
မန်းလေးတောင်လေးပြင်လေးရပ် မြို့တစ်ပတ် ကောင်းကောင်း ပိတ်မိပါပြီ။ ကွင်းကြို ကွင်းကြား နေခဲ့ရတာကပဲ နှစ်တွေ မနည်းတော့ဘူးကိုး။ တဲပြန့်ကြီး ထိုးပေးထားလို့ နေရေး မပူရသလို အုတ်ရာသီ မဟုတ်ရင်လည်း အုတ်သူကြီးဆီက ငွေကြိုယူလို့ ရလေတော့ ဟုတ်သလိုလိုပေါ့။ အုတ်သူကြီးက ရွာကလူတွေ မန်းလေး ရောက်ရောက်ချင်း ကားကြီးတစ်စီးပေါ် တက်ကြဆိုပြီး မဟာမုနိ ဘုရားကြီး ပို့တယ်။ ရှင်ပင်ပက်လက် ရေစက်လက် ဘုရား ပို့တယ်။ မန်းလေးတောင်ပေါ် ပို့တယ်။ ရွှေကျီးမြင့်ဘုရား ပို့တယ်။ ပျော်စရာတောင် ကောင်းသေးတော့။ သည်တစ်ခေါက်ပဲ။ အဲသည်ကတည်းက ရွှံတစိုစို လေတဟူးဟူးကြား ဘဝပြီးရတာ၊ ဘုရားကိုယ်တော်မြတ် ကြွလာမှ ဖူးရဖို့ ရှိတော့တာပါ။ ရွှံ့တစိုစို ရွှံ့တလူလူ လုပ်စားကြရင်းက နှစ်တွေလည်း ကြာပြီ။ လူတွေလည်း အိုကြပြီ။ အုတ်သူကြီးတွေလည်း အလုပ်မကောင်းရာက ပြုတ်သူပြုတ်၊ ပြောင်းသူကပြောင်း၊ ကြီးတော် ပေါက်စတို့လည်း ဟိ်ုရောက် သည်ရောက်ပေါ့။ ရွာတော့ မပြန်ဖြေစ်တော့ဘူး။ သည်လိုနဲ့ မြစ်ကမ်းနား ရောက်လာကြတယ်။ ဘာလုပ်စားတာလဲလို့ မမေးနဲ့။ အဲသလိုတော့ ပြောမဖြစ်ဘူး။ အစုံပဲ။ သည်မှာတော့ ကိုယ့်ဝမ်းစာနဲ့ကိုယ် ဆိုတော့ အဘိုးကြီး အဘွားကြီးက တစ်ကွဲ၊ သမီးနဲ့ သမက်က တစ်အိုး နေကြရပြီ၊ ဝေးဝေးတော့လည်း မဟုတ်ပါဘူး။ ကိုယ်လိုလူတွေ စုစုရှိရာ သည်လို အတွဲလိုက် လိုက်ကြရင်း ဘဝတွေ စုံလှပေါ့။ သမီးနဲ့ မြေးတွေတော့လည်း လဲမှို့များ လွှင့်သလို တော်ရာကျရော့ဟဲ့ မရှိနိုင်ဘူးကိုး။
တစ်ခုတော့ ရှိပါရဲ့။ သမီးက သူတကာ့ မိန်းမတွေလို သဲတင်သဲချ မလုပ်နိုင်ရှာတော့ဘူး။ မီယပ်ကျိုး ခေါ်မလား။ တစ်ရက်သား အုတ်ဖိုမှာ အလုပ်လုပ်ရင်းက ပုံလဲကျ သွားလိုက်တာ နေသာ ပြန်ကောင်းတယ်။ မသန်တော့ဘူး။ တစ်ကိုယ်လုံးလည်း လှီသွားသလိုပဲ။ ထန်းသမား ဘဝက လာတဲ့ သမက်ကတော့ သားမယားရယ်လို့ လုပ်ကျွေးရှာပါရဲ့။ အရက်ဖိုးက ကျန်မှ ပိုက်ဆံက အိမ်ရောက်တာပါ။ တစ်ခါတလေ တာရိုးထိပ်က အရက်ဆိုင်မှာ အချိန်မတော် အချိန်တော် ထိုင်နေလိုက်တာ မထတော့ဘူး။ ထမင်းအိုး မီးမကူးရသေးတဲ့ မယားက လိုက်ခေါ်တော့လည်း ရိုက်မောင်း ပုတ်မောင်းက ရှိသေးတော့ ကြီးတော် ပေါက်စ အဖို့ရာ အင်မတန် စိတ်ဆင်းရဲရတယ်။ သည်ဘက်ခေတ်များ ပေါလာလိုက်တဲ့ အရက်သေစာ။ ယောက်ျားမှန် အရက်နဲ့ မကင်းရုံတင် မကဘူး။ အရက်ချွေးနံ့တွေက လူဆင်းရဲနံ့ လို့တောင် ပြောရမလို ဖြစ်နေပါပြီ။ အိမ်က အဘိုးကြီး ပျက်စီးလို့ သားသမီး အားကိုးဖို့တော့ ဝေလာဝေး။
မြေးသုံးကောင်ကိုတော့ အနှိပ်အနင်း မလိုက်ရတဲ့နေ့ ကြီးတော် ပေါက်စနဲ့အတူ တွေ့ရပါရဲ့။ တစ်ခါတလေ မြေးတွေ လက်ဆွဲပြီး ဗီဒီယို လိုက်ပြရတယ်။ ရပ်ကွက်မုန့်ဆိုင်တွေ ပို့တယ်။ အိမ်က ထမင်းကြမ်းကလေး အိုးဆီပွတ် လှော်ကျွေးရတယ်။ ဘယ်ကပြန်ပြန် လက်ထဲ ငွေစလေးပါရင် ပြောင်းဖူးပြုတ် ကလေး၊ ကန်စွန်းဥပြုတ် ကလေးက အစ ဝယ်လာတတ်တယ်။ မြေးတွေကလည်း ချစ်လိုက်ကြတာ။ ခေါ်တာတောင် မေကြီးပေါက်စတဲ့၊ ကြီးတော် ပေါက်စ အိမ်သား ရှိတုန်းကတော့ မြေးတွေက ဘိုးအေကို ဘိုးကြီး ခေါ်ကြတယ်။ သမီးတဲရှေ့လည်း သမက်ကောင် မရှိတဲ့အချိန် ရောက်တာပါ။ မျက်နှာချင်း မဆိုင်ချင်လို့။ လူပါးဝတယ် ထင်လို့။
''အမေရယ် ... ကျုပ်တော့ အလုပ်သာ ထလုပ်လိုက်ချင်တော့တာပါပဲ။ ဒင်းလုပ်စာ မျှော်ရတာများ ဝမ်းထဲ မကျချက်တော့ ဒူးက မသန် လက်က မသန်မို့သာ အောင်းနေရတယ်။ အလုပ်များ မကြောက်လိုက်သမှ''
''အမေ ရှိပါသယ်အေ ကလေးတွေ လူလုံးထွားလာရင် သဲကားလိုက်လို့ ဖြစ်ပါပြီ။ စောင့်ရလှ လေးငါးနှစ်ပေါ့။ ညည်းယောက်ျားလည်း သည်လောက် သောက်နေမှတော့ နေလှ လေးငါးနှစ်ပေါ့အေ''
သည်ရက်ထဲ အနှိပ်အနင်း အခေါ်အပြု များကြလို့ မိုးချုပ်တာ များပြီ။ သမီးနဲ့ မြေးတွေဆီလည်း မရောက်ရဘူး။ သည်ကြားထဲ သံသေတ္တာထဲ ထည့်ထားတဲ့ ဆန်က ပျောက်ရသေး။ တရုတ်သော့က အချိုးခံရသေး။ နားထဲ အသံကြားသလိုလို ရှိတာနဲ့ ကြီးးတော် ပေါက်စ ငေါက်ခနဲ ထထိုင်တော့ ဗျစ်ထူမရယ်၊ လက်ထဲမှာ ဒန်ဇလုံတစ်လုံး ကိုင်လို့၊ မြွေရေခွံအိတ် ချထားတာကို လက်တစ်ဖက်နဲ့ ဖယ်ပြီး ဇလုံကို လှမ်းပေးတော့ ငါးပိချက်နံ့က မွှေးသွားလေရဲ့။
''အဘွားကြီး စားလိုက်ပါဦး၊ ငါးပိတစ်နဲ့ ခရမ်းချဉ်သီး လှိမ့်ထားတာ၊ ထစားလိုက်ဦး၊ ပြီးမှ ဇလုံ ကမ်းချေ''
မနေနိုင်ပါဘူး။ လက်တောင် ဆေးမနေတာ့ဘဲ စားလိုက်တယ်။ စာရင်းက ထမင်းကို အကဲခတ်ချင်လို့ မီးထွန်းမယ် စိတ်ကူးသေးတယ်။ သူ့ဆန်များ ခိုးချက်လေလား ထင်လို့ပါ။ ကိုင်းပါလေ ... ငါ့ဆန်သော သူ့ဆန်သော စားရသာ ကျေးဇူကြီးပါ့ အောက်မေ့မိတယ်။ သည်လို နေရာမှာ ပစ္စည်းပျောက်ရင်ဘယ်သူမဆို ဖြစ်နိုင်တာကိုး။ ကောင်းလိုက်တဲ့ ထမင်းနှယ်။ ရင်ပူအောင် ဆာနေလို့လား မပြောတတ်ဘူး။
* * *
(၅)
ကြီးတော်ပေါက်စ မနက်စောစော နိုးနေပေသိ ကပ်ကြမ်းပေါ် ဆက်မှေးနေမိတယ်။ မရှိမဲ့ရှိမဲ့ ဆန်ကလေး တစ်ထုပ် ဘယ်သူများ လက်ဆော့ သွားပါလိမ့် ဆိုတာ နိုးနိုးချင်း ခေါင်းထဲ ဝင်လာလို့ ဥစ္စာပျောက် ငရဲရောက် ဖြစ်နေမိတယ်။ အရက်သမား ငမှတ်လည်း ဖြစ်နိုင်တာပဲ။ ကွမ်းယာသည်မ မြမေလည်း ဖြစ်နိုင်တာပဲ။ တဲနီးချင်း ဗျစ်ထူမလည်း ဖြစ်နိုင်တာပဲ။ ခြေရင်းတဲက မိလှလည်း ဖြစ်နိုင်တာပဲ။ ပြောခဲ့ပါပကော၊ ဘယ်သူ မဆို ဖြစ်နိုင်တယ်လို့။
သည်နေ့ နေပူရွာထဲက မပုံ့ကိုနှိပ်ဖို့ ချိန်းထားတော့ ရေကလေးချိုးဖို့ စိတ်ကူးတယ်။ သူဌေးမ နှိပ်ရမှာဆိုတော့ နံနံစော်စော် ဆိုရင် မကောင်းဘူးလို့ တွက်တာကိုး။ ကုတ်သားကြီးတွေ၊ လက်မောင်သားကြီးတွေ တုတ်ခိုင်လှတဲ့ သူဌေးမတွေများ လက်ဆစ်ကျိုးအောင် နှိပ်ရတာဆိုတော့ မနက်ခင်း အဆာပြေ တစ်ခုခုလည်း စားသွားဦးမှ ဖြစ်မှာ။ မနက် ထမင်းဇပြီး (စားပြီး) ချိန်းထားတာ ဆိုတော့ ကြီးတော် ပေါက်စ မြစ်ထဲ ရေဆင်းချိုးတယ်။ အဝတ်အစားကလေး လဲပြီးတော့တောင် အချိန် ရသေးတာနဲ့ သမီးနဲ့ မြေးတွေနေတဲ့ တဲစုတွေဘက် လျှောက်လာခဲ့တယ်။ သည်အချိန်ဆိုရင် မျက်နှာချင်း မဆိ်ုင်ချင်တဲ့ သမက်ကောင်လည်း မရှိလောက်တော့ဘူး ဆိုတာ သိလို့လည်း ပါပါတယ်။ မြေးအငယ်ဆုံးမကို အထူးသဖြင့် သတိရတယ်။ သည်ကောင်မက မန်းလေးရောက်မှ အုတ်ဖိုတွေထဲ မွေးတဲ့ ကောင်မ၊ နာမည်တောင် ကြီးတော် ပေါက်စ ကိုယ်တိုင် 'အုတ်ဖို' လို့ မှည့်ထားတာလေ။ သမီး ရောဂါသည်မက အဝတ်ဟောင်းတွေ လှန်းနေလို့ မြေးမ ဘယ်မှာတုန်း မေးရတယ်။
''အမေ မလာတာ ကြာပေါ့၊ အနှိပ်လိုက်ရလား''
''လိုက်ရပါသယ်အေ ... ငါ့မြေးတွေကော''
''အကြီးကောင် နှစ်ကောင်က တာရိုးပေါ်မှာ၊ အမေ့မြေးမက တဲနောက်မှာ ထင်ပါရဲ့''
ကြီးတော် ပေါက်စက တဲနောက် ပတ်လာခဲ့တယ်။ အမှိုက်တွေ ဆိုတာ ပုပ်ပွနေကြပြီ။ မြေးမက အမှိုက်ပုံပေါ်မှာ ထိုင်ပြီး ကော်အရုပ်ကျိုး တစ်ရုပ်နဲ့ ဆော့နေတာ မြင်ရတော့ ကြည်နူးသွားမိတယ်။ ချွေးခံထဲက ငါးဆယ်တန် တစ်ချပ် ထုတ်ပြတော့ ကစားလက်စ အရုပ်ကျိုးကို ပစ်ချပြီး ဘွားအေဆီ ဆင်းလာတယ်။ ရေမချိုး မိုးမချိုးနဲ့ လူရုပ်မပေါ်တဲ့ မြေးမကို ငုံ့နမ်းပြီး လက်ထဲ ပိုက်ဆံ ထည့်ပေးတော့ လှမ်းယူလေရဲ့။
''ငါ့မြေး မုန့်စား။ လက်ထဲက ဘာကြီးတုန်း။ လွှင့်ပစ်လိုက်''
မြေးမက လွှင့်ပစ်လိုက်တာပါပဲ။ ဝေးဝေးတော့ မရောက်ဘူး။
''သမီးရေ ... အမေသွားလိုက်ဦးမယ်''
''ဟုတ်ကဲ့ အမေ ... ညက အမေ အော်နေ ဟစ်နေ သေးတယ်ဆို ဘာဖြစ်လို့တုန်း''
''ဆန်ထုပ် ပျောက်သာပါအေ၊ သေတ္တာက သော့ခလောက်ပါ ကလန့် ခွာသွားသာ၊ မတွေ့လို့ပေါ့အေ၊ တွေ့ရင် ခုနစ်စင်တောင် တိုက်လိုက်သေး။ အဖေ မြင်းဖြူရှင်တော့ တိုင်တည်ခဲ့သယ်။ စားတဲ့လူ ဘေးတွေ့ ပါစေလို့''
ကြီးတော် ပေါက်စ သူ့သမီး တဲခြေကပဲ တာရိုးပေါ် တက်လာခဲ့တယ်။ ဖိနပ်မပါတဲ့ ဖဝါးက တစ်စုံတစ်ခု နင်းမိတော့ ငုံ့ကြည့်တယ်။ စောစောက မြေးမလေး လက်တွင်း ဆုပ်ထားရာက လွှင့်ပစ်လိုက်တဲ့ ပစ္စည်းကလေး။ ကောက်ယူလိုက်တော့ တရုပ် သော့ခလောက်ကလေး ပါကော။ သံချောင်းနဲ့ ကလန့်ထားလို့ ထင်ပါရဲ့။ သော့ခလောက်က လိမ်ရွဲ့နေပြီ။ သော့ခလောက်ကလည်း မတ်စေ့လောက် ရှိတာကိုး။ သော့ခလောက်ကျိုးကို လက်တွင်းဆုပ်ပြီး ဆက်လျှောက် လာခဲ့တာပါပဲ။ သမီးခမျာ ကလေးတွေ ကျွေးချင်ရှာလို့ မအေ့တဲထဲ ဝင်ပြီး လုပ်မိလုပ်ရာ လုပ်ရှာ ထင်ပါရဲ့။ ငါ့မြေးတွေ စားကြလို့တော့ ယူကြစမ်းပါအေ။ အမေ သဒ္ဓါပါ့။ ချက်ချင်း လိုလိုပါပဲ။ ပါးစပ်က တတွတ်တွတ် ရွတ်နေရှာလေရဲ့။
''အဖေ မြင်းဖြူရှင် ... ခွာကိုလည်း ရုပ်တော်မူပါ။ သွားကိုလည်း သိမ်းတော်မူပါ။ ဆန်ခိုးသူကိုလည်း စောင့်ရှောက်တော်မူပါ''
🔲
#ခင်ခင်ထူး
မဟေသီ၊ ဇန်နဝါရီလ၊ ၂၀၁၂။
No comments:
Post a Comment