စာကိုဘယ်လိုဖတ်ကြမလဲ

#စာကိုဘယ်လိုဖတ်ကြမလဲ

#ဂျူး

၂၀၁၆ နှစ်တစ်ခုလုံးမှာ ကျွန်မ စာပေဟောပြောပွဲ ခပ်များများသွားဖြစ်ခဲ့ပါတယ်။ ရောက်သမျှ ရွာတွေ၊ မြို့တွေမှာ ခေါင်းစဉ်တစ်ခုတည်းပဲ ပြောဖြစ်ပါတယ်။ စာဖတ်ခြင်းအနုပညာဆိုတဲ့ ခေါင်းစဉ်ပါ။ ကျွန်မတို့ မြန်မာပြည်သူပြည်သားတွေ စာဖတ်အားနည်းနေတယ်လို့ ခံစားရလို့ပါ။ တစ်နေရာနဲ့တစ်နေရာ ဥပမာပေးတဲ့ စာတွေ တူချင်မှ တူပါမယ်။ ဒါပေမဲ့ စာဖတ်တဲ့နည်းတွေအကြောင်းကတော့ ခပ်ဆင်ဆင်ချည်း ဖြစ်ပါတယ်။

တစ်ခါတစ်ခါတော့ ကျွန်မတို့ စာဖတ်ဖြစ်ကြတဲ့ ရည်ရွယ်ချက်တွေကို ထည့်ပြောဖြစ်တယ်။
၁။ သတင်းအချက်အလက်နဲ့ ဗဟုသုတတွေ သိချင်လို့ စာဖတ်တယ်။
၂။ စာဖတ်ခြင်းအရသာကို နှစ်သက်လို့၊ မွေ့လျော်လို့ စာဖတ်တယ်။
၃။ ကိုယ့်ဉာဏ်ရည်ကို မြင့်စေချင်လို့၊ တွေးတောဆင်ခြင်ဉာဏ် လိုချင်လို့ စာဖတ်တယ်။ ဒါက ကျွန်မရဲ့ ကိုယ်ပိုင်အမြင်ပါ။ တခြားသူတွေနဲ့ ကွဲလွဲမှုရှိနိုင်ပါတယ်။

သတင်းအချက်အလက်နဲ့ ဗဟုသုတတွေကို လိုချင်လို့ စာဖတ်တဲ့အခါ သတင်းစာ၊ ဂျာနယ် စသည် ဖတ်တယ်။ သိသွားတယ်။ အသုံးချတဲ့အခါ ချမယ်။ ကိုယ်အရင်က နားလည်နိုင်စွမ်းထက်ပိုပြီး နားလည်လာတာမျိုးတော့ ရှားမှာပါ။ ကိုယ့်နဂို အဆင့်အတိုင်းပဲ။ တွေးခေါ်တဲ့၊ ဖန်တီးတဲ့၊ ဝေဖန်တဲ့ဉာဏ်ရည် သိပ်တိုးလာတာတော့ မဟုတ်ဘူး။ သို့သော် ဗဟုသုတရှိလာလို့ ဆုံးဖြတ်ချက်ချရာမှာတော့ ပိုမှန်ကန်လာမှာပါ။

မိမိဉာဏ် ရင့်သန်လာဖို့ စာဖတ်တဲ့အခါ စာအုပ်တွေကို ဖတ်ရမယ်။ ကိုယ့်အဆင့်ထက် ပိုမြင့်တဲ့စာကို ဖတ်ရမယ်လို့ သိထားဖူးပါတယ်။ ဇော်ဂျီမြန်မာပြန်တဲ့ ပလေးတိုးနိဒါန်းလို စာအုပ်မျိုးနဲ့ ဥပမာပေးရင် မမှားနိုင်ဘူးလို့ ကျွန်မထင်ပါတယ်။

လွန်ခဲ့တဲ့ နှစ်ပေါင်းများစွာက ထုတ်ဝေဖြစ်ခဲ့ဟန်တူတဲ့ စာပေဗိမာန်ထုတ် စာအုပ်လေးတစ်အုပ် ကျွန်မလက်ထဲမှာ ရောက်နေတယ်။ စာဖတ်လိုသော် တဲ့။ အဲဒီစာအုပ်မှာ မျက်နှာဖုံးတွေ၊ ကျောဖုံးတွေ မရှိတော့ဘူး။ အစ စာမျက်နှာနဲ့ အဆုံးသတ်စာမျက်နှာတော့ ပါတယ်။ ဘယ်သူဘာသာပြန်တဲ့စာအုပ်လို့ ကျွန်မ မသိနိုင်ပါဘူး။ သိပ်ဖတ်လို့ကောင်းပါတယ်။ နောက်တော့ ကျွန်မ အင်တာနက်မှာ ဂူးဂဲလ်မှာ ရှာဖွေဖတ်ရှုဖြစ်တဲ့ စာဖတ်ခြင်းနဲ့ပတ်သက်တဲ့ စာအုပ်တွေထဲကနေ စိတ်ဝင်စားစရာ စာအုပ်တစ်အုပ်ကို တွေ့သွားပါတယ်။ မော်တီမာဂျေအက်ဒ်လာရဲ့ စာတစ်အုပ်ကို ဘယ်လိုဖတ်မလဲ (Mortimer J Adler ရဲ့ How to read a book) စာအုပ်ပါ။ အဲဒီစာအုပ်ကို ကျွန်မ အင်တာနက်ကနေ သိမ်းယူပြီး ဖတ်ကြည့်တော့ ကျွန်မ သတိပြုမိသွားတယ်။ ကျွန်မဆီမှာရှိနေတဲ့ "စာဖတ်လိုသော်"စာအုပ်ဟာ အခုစာအုပ်ကို မြန်မာပြန်ထားတာပါလား။ ကျွန်မ တယ်ကံကောင်းပါလား။ နှစ်အုပ်စလုံးကို ကျွန်မကျေနပ်စွာ အထပ်ထပ်ဖတ်နေမိပါတယ်။

သူက ဒီစာအုပ်ကို စာမဖတ်တတ်သူတွေအတွက် ရည်ရွယ်ပါတယ်လို့ ပြောတယ်။ စာမဖတ်တတ်သူတွေဆိုတာမှာ စာကို ဖတ်တတ်ရုံအဆင့်ရှိသူတွေကို ဆိုလိုတယ်ဆိုတာ အထူးရှင်းပြဖို့ လိုမယ် မထင်ပါဘူး။ စာကို အလေးအနက် မဖတ်တတ်သူတွေ၊ စာဖတ်ဖို့ ခက်ခဲနေသူတွေကို ဆိုလိုတာဖြစ်ပါတယ်။ သူ့ကိုယ်သူလည်း စာမဖတ်တတ်ဘူးဆိုတာကို ကောလိပ်ကနေ ကျောင်းပြီးတဲ့အထိ သတိမပြုမိခဲ့ဘူးတဲ့။ ကျောင်းသားတွေကို စာသင်တဲ့အခါကျတော့မှ သတိပြုမိတာပါတဲ့။ အဲဒါနဲ့ပဲ ဒီစာအုပ်ကို ရေးသားပြုစုတော့တာပါပဲ။

စာတစ်အုပ်ကို ဘယ်လိုဖတ်ရမလဲတဲ့။ စာဖတ်တဲ့အခါ ဖြတ်ကျော်ရတဲ့ အဆင့်လေးခုကို သူဆွေးနွေးထားပါတယ်။
ပထမအဆင့် အခြေခံစာဖတ်နည်း (Elementary reading) မှာ ဒီစာက ဘာအကြောင်းလဲ၊ စာရေးသူက ဘယ်လိုရည်ရွယ်ချက်နဲ့ ရေးတာလဲ၊ နောက်ကွယ်က အရင်းခံက ဘာတွေလဲ စသည်ဖြင့် သိလာတဲ့အဆင့်ပါ။

ဒုတိယအဆင့် စူးစမ်းလေ့လာစာဖတ်နည်း (Inspectional reading) မှာတော့ ပေးထားတဲ့အချိန်အတွင်း စာကို နားလည်အောင် ဖတ်တဲ့အဆင့်ပါ။ အချိန်ကာလကန့်သတ်ချက် ရှိနေပါတယ်။ ကျွန်မ မြင်အောင် ကြည့်မိတယ်။ စာမေးပွဲဖြေတဲ့အခါ ပေးထားတဲ့စာပိုဒ်ကို ကန့်သတ်ထားတဲ့အချိန်အတွင်းဖတ်ပြီး ဆိုလိုရင်းကို နားလည်အောင် လေ့လာတဲ့နည်းတဲ့ ဆင်ဆင်တူတယ်လို့။ အဲဒါကို တချို့ကတော့ Skimming လို့လည်း ခေါ်ကြပါတယ်တဲ့။ တချို့ကတော့ Pre-reading လို့လည်း ခေါ်ပါသတဲ့။ ဒီနေရာမှာ ကိုအော်ပီကျယ် ခဏခဏပြောတဲ့၊ သူလေ့လာထားတဲ့ Scanning and Skimming စာဖတ်နည်းတွေကို ကျွန်မ သွားသတိရလိုက်ပါတယ်။

တတိယအဆင့်ဖြစ်တဲ့ ပိုင်းခြားဝေဖန်စာဖတ်နည်း (Analytical reading) ကတော့ စာအုပ်တစ်အုပ်ကို အပြည့်အ၀နားလည်အောင် စိတ်ရှည်လက်ရှည် စနစ်တကျ အကောင်းဆုံး ဖတ်တဲ့အဆင့်ပါ။

စတုတ္ထအဆင့် နှိုင်းယှဉ်လေ့လာ စာဖတ်တဲ့အဆင့် (Syntopical reading) ကတော့ အမြင့်ဆုံးပါပဲတဲ့။
စာတမ်းပြုစုမယ့်သူ၊ စာအုပ်တစ်အုပ်ရေးမယ့်သူဟာ ကိုယ်ရေးမယ့်စာအတွက် ဘာသာရပ်တူညီသော စာအုပ်တွေကို အများအပြား နှိုင်းယှဉ်လေ့လာ ဖတ်ရှုတာမျိုးဖြစ်ပါတယ်။ စနစ်အကျဆုံး စာဖတ်အဆင့်လည်း ဖြစ်ပါတယ်။ ကျွန်မတို့လို ယေဘုယျစာဖတ်သူတွေအနေနဲ့တော့ တတိယအဆင့်ထိရောက်ရင်ကို တော်တော်ဟုတ်နေပါပြီ။

ဆရာကိုတာ လမ်းပေါ်ကလူတစ်ယောက် တွေးမိတာများ ဆိုတဲ့ စာအုပ်အမှာမှာ ပြောတဲ့စကားတစ်ခု သိပ်နှစ်သက်မိပါတယ်။ သူ့ကိုယ်သူ ရာထူးမရှိ၊ နေရာမရှိ သာမန်စာရေးဆရာ လမ်းပေါ်ကလူအဖြစ် ရည်ရွယ်ပြီး သူလို ကျွန်မလို လမ်းပေါ်ကလူတွေအတွက် ရေးတဲ့ စာအုပ်ပါ။
"လမ်းပေါ်ကလူတွေကို တွေးတတ်သူတွေ ဖြစ်စေချင်တယ်"တဲ့။

#ဂျူး

Eternal Light Magazine
January 2017
#စာပေတန်ဖိုး

➳ ➳ ➳ ➳ ➳ ➳ ➳ ➳