" ကံမကြုံ အကြံကုန် "
============
#ဆူးငှက်
သည်တစ်ခါတော့ ဆုံးဖြတ်မှ ဖြစ်တော့မယ်။ ဟုတ်တယ်။ သည်ပုံအတိုင်း ဆက်သွားလို့ မဖြစ်တော့ဘူး။ စရိတ်တွေက သိပ်တက်လာပြီ။ ဒီစရိတ်ကို အမီလိုက်ဖို့ ဆိုတာက တော်ရုံတန်ရုံ ဝင်ငွေနဲ့ မဖြစ်တော့ဘူး။ အခုငွေက မတ်တတ်စာတော့ ရှိပါရဲ့၊ တုံးလုံးစာဆိုတာ ဝေလာဝေး။
ပင်ကိုစရိုက်က ခပ်အေးအေး နေချင်တာပါ။ ကိုယ့်မိသားစု လေးယောက်တောင် ရှုပ်လှပြီလို့ ထင်နေတဲ့သူ မဟုတ်လား။ အခုမှ နဖူးတွေ့၊ ဒူးတွေ့တွေ့သူတွေနဲ့ နှစ်ချီပြီး အတူနေဖို့ ဆိုတာတော့ မစဉ်းစားခဲ့ရိုး အမှန်။ ကိုယ့်မိသားစု ကိုယ့်အိမ် အနေအထား ကြည့်ပြီး တဒီးဒီး လာစပ်ကြပါတယ်။ အကုန်လုံးကို ဆလံသ လွှတ်လိုက်တာချည်းပါ။
ခင်ဗျားသိတဲ့ အတိုင်းပါပဲ။ ကိုယ့်အိမ်က အကျယ်ကြီးပဲ။ ကိုယ့်မိသားစု လေးယောက်က အပေါ်ထပ်တင် ကျွမ်းပစ်နေလို့ ရတယ်။ အောက်ထပ် တစ်ထပ်လုံး အားနေတာပဲ။ ကိုယ့်အိမ် အနေအထားကလည်း ဈေးခေါ်ကောင်းတဲ့ အနေအထားပဲ။ ဒါပေမဲ့ တော်ပြီ။ ကိုယ့်စာအုပ်ဆိုင်လေးနဲ့ပဲ လူတန်းစေ့နေပြီ။ တော်ပြီ။ ဒါက လွန်ခဲ့တဲ့ သုံးလေးနှစ် အခြေအနေ၊ သုံးလေးနှစ် အတွေးကိုး။
အင်း ... အခုတော့ စာအုပ်ဆိုင်ကလေးက တယ်ပြီး လူတန်းစေ့အောင် မပေးနိုင်တော့ဘူး။ တက်လာတဲ့ စရိတ်တွေကြောင့် စာအုပ်ဆိုင် ဝင်ငွေဟာ စာအုပ်အသစ်ကို ပုံမှန်ဝယ်နိုင်ဖို့ အင်အား မရှိတော့ဘူး။ အသစ် မဝယ်နိုင်တော့ အငှားမလိုက်၊ အငှားမလိုက်လို့ အသစ် မဝယ်နိုင်နဲ့ လုံးချာလိုက် နေတာ ကြာပြီပဲ။ ဒီဒဏ်ကို တင်းခံကြည့်တယ်။ အင်း ... ရေရှည်တင်းနိုင်၊ တောင့်နိုင်ဖို့ မလွယ်လှဘူး။ လက်အံသေနေပြီ။ တစ်ခုခု အမှီရှာမှ ဆက်ရပ်တည် နိုင်တော့မယ့်ကိန်း။
ကိုယ့်အားနာပုံမျိုး၊ နှုတ်နည်းပုံမျိုးနဲ့ အရောင်းအဝယ် လုပ်လို့လည်း မဖြစ်။ အပေါင်းအသင်း မဆံ့ပုံမျိုး၊ မျက်နှာပြောင် မတိုက်ရဲပုံမျိုးနဲ့ ကန်ထရိုက် လုပ်လို့လည်း မဖြစ်။ ကိုင်း ... ဒီတော့ စိတ်အကျဉ်းအကျပ် ကျချင် ကျပစေ၊ အနေအထိုင် ကျုံ့ချင် ကျုံ့ပစေ၊ ဒီတစ်လမ်းပဲ ရှိတော့ ဆုံးဖြတ်လိုက်တယ်။
မနေ့က မာရဘင် ဝင်းထဲက ဇော်ဇော် စာအုပ်ငှားရင်း ပြောကတည်းက ခေါင်းညိတ်မိ လိုက်တယ်။
“အိုကေ ... ငှားမယ်၊ မင်းလူတွေ ခေါ်ခဲ့တော့” ပေါ့။
***
“အဲဒီလိုနဲ့ သမီးတို့လည်း ပညာသင်ကတည်းက သူ့ဆိုင်မှာပါပဲ။ သမီးတို့က နယ်ကလာပြီး ပညာသင်ရတာ ဆိုတော့ ပညာကိုပဲ ဂရုတစိုက် လေးလေးစားစား သင်ကြတာပါ။ ဒါကြောင့်လည်း သူ့အနေနဲ့ နောက်ပိုင်းဆို ဆိုင်ကို မျက်နှာလွှဲရတော့တာပေါ့။ သမီးတို့ ဦးစီးပြီး သုံးနှစ်လောက် လုပ်ကျွေး ပြီးပါပြီ။ ဒါပေမဲ့ ကိုယ့်ဘဝ ရှေ့ရေးက ရှိသေးတယ် မဟုတ်လား။ ပြီးတော့ ရန်ကုန်မှာလည်း တစ်သက်လုံး မနေနိုင်ဘူးလေ။ ဒါကြောင့် စုဆောင်းထားတာလေး ထုခွဲ၊ မိဘဆွေမျိုး အထောက်အပံ့ ယူသင့်တာ ယူပြီး မန္တလေးမှာပဲ ကိုယ်ပိုင်ဆိုင်လေး စထောင်တဲ့ အနေအထားပါ”
ကိုယ့်ရှေ့မှာ ထိုင်နေတဲ့ ကလေးမလေးက ဇာတ်စုံ ခင်းပြနေတယ်။ သူတို့ဇာတိက မုံရွာနယ်က ဖြစ်ပုံတွေ၊ အဒေါ်တစ်ယောက် အထောက်အပံ့နဲ့ ရန်ကုန်မှာ မိတ်ကပ် ဆံပင် အလှပြင် သင်ပုံတွေ၊ သူတို့ သင်တဲ့ ဆိုင်မှာပဲ အလုပ် ဆက်လုပ်ကြပုံတွေ အစချီပြီးတော့ အခု မန္တလေးမှာ ဆိုင်ခွဲဖွင့်မှာတွေ အထိပေါ့။ ကလေးမက သွက်သွက်လက်လက်လေးပဲ။ အရွယ်ကလည်း ဘာရှိဦးမှာလဲ၊ အစိတ် အလွန်ဆုံးပေါ့။ ထုံးစံအတိုင်း ခေတ်အပြင်အဆင် ကိုတော့ အမီလိုက်ထားတဲ့ ပုံစံမျိုး။ ဒါပေမဲ့ တယ် မကလက်လှဘူး။ သူ့ဘေးမှာ ထိုင်နေတဲ့ ကလေးမကတော့ သူ့ထက် ငယ်တယ်။ သူတို့ အပြောအရ ဆိုရင် ညီမ ဖြစ်မယ်။ အဲ ... သူကတော့ စကားတစ်ခွန်းမှ ဝင်မပြောပေမဲ့ အကြီးမထက် ပိုပြီး ရဲတင်းဖျတ်လတ် ပုံမျိုး။ အကြီးမက ဆက်တီမှာ ခပ်ကျုံ့ကျုံ့နဲ့ ထဘီလေးကို ဒူးအောက်ဆွဲကာ၊ ဆွဲကာထိုင်ရင်း စကားတွေ တတွတ်တွတ် ပြောနေပေမဲ့ သူမကတော့ ဆက်တီပေါ်မှာ ဘယ်ဘက်ဒူးပေါ် ညာဘက် ပေါင်တင်ပြီး ခပ်ကြော့ကြော့လေး ထိုင်နေတယ်။ ခပ်တိုတိုဝတ်ထားတဲ့ ထဘီက သူ့ဒူးလုံးလုံးလေးကို အနိုင်နိုင် ဖုံးထားရတာပေါ့။
ပြီးတော့ ဆက်တီ နောက်မှီပေါ် ဘယ်ဘက်လက်ကို တင်လို့။ နဖူးပေါ် ဝဲဝဲကျလာတဲ့ ရှေ့ဆံပင်တွေကို ခေါင်းလေး ဆတ်ကာဆတ်ကာ ဖယ်ရင်း အိမ်ရဲ့ အနေအထားကို မျက်လုံးကစား နေတယ်။ တစ်ခါတစ်ခါ သူ့အစ်မ ပြောတဲ့စကား တစ်ခွန်းတလေ အပေါ် အသိအမှတ်ပြု အတည်ပြုတဲ့ သဘောမျိုး ခေါင်းလေး ညိတ်တတ်ရဲ့။
အလုပ်လုပ်မှာတော့ သူတို့ညီအစ်မ နှစ်ယောက်ပေါ့လေ။ အအုပ်အထိန်းနဲ့ အဖော်အဖြစ် နယ်က ဘွားအေကြီးကို ခေါ်ထားတာတဲ့။ အတူ ပါလာတဲ့ ဘွားအေကြီးကတော့ ဘာမှ ဝင်မပြောရှာဘူး။ တစ်ချိန်လုံး ဆေးလိပ်ပဲ ဖွာနေတာပါပဲ။ ဟုတ်တယ်လေ။ တောက ဘွားအေကြီး တစ်ယောက် အနေနဲ့ ခေတ်လူငယ်တွေရဲ့ ခေတ်ကိစ္စ ဘာသိမှာ မှတ်လို့။
ဒီတော့ သူတို့ညီအစ်မ နှစ်ယောက်ရယ်၊ ဘွားအေကြီးရယ်၊ အကူ ထမင်းချက် တစ်ယောက်ရယ် ပေါင်း (၄) ယောက် နေပြီး အလှပြင်၊ ဆံပင်ညှပ်ကောက်ဆိုင် ဖွင့်ဖို့ ကိုယ့်အိမ် အောက်ထပ်ကို ငှားကြတယ် ဆိုပါတော့။ မန္တလေး အနေအထား၊ မန္တလေး အတိုင်းအတာနဲ့ ဆိုတော့ အိမ်ငှားခတို့ စပေါ် ပမာဏတို့ကို သူတို့ သဘောပေါက်ပြီးပုံ ရပါတယ်။ ပြောစရာ ရှိတာက ကိုယ့်အိမ် အောက်ထပ်ကို ဘယ်လို အသုံးချမှာလဲ၊ ဘာတွေ သုံးခွင့် ပေးရမှာလဲ၊ ဘယ်လို အထိန်းအကွပ်မျိုး ရှိရမှာလဲ၊ ဘယ်လို စည်းကမ်းတွေ အပေးအယူတွေ လုပ်ရပါ့မလဲပေါ့။
ကိုယ့်ကို စပ်ပေးတဲ့ ဇော်ဇော်ကလည်း ပွဲစားသာ လုပ်တယ်၊ သူတို့ကို အိမ်ပို့ပေး ပြီးကတည်းက ဈေးချိုကို ဆိုင်ဖွင့်ဖို့ ထွက်သွားပြီ။ ဒီတော့ ကိုယ်ပဲ တတ်သလောက် မှတ်သလောက် ကြားဖူးနားဝ ရှိသလောက်နဲ့ ညှိရတော့တာပေါ့။ နောက်ဆုံး ပြောကြ ဆိုကြတာ ချုပ်လိုက်တော့ အိမ်အောက်ထပ် သုံးခန်း မျက်နှာဖွင့်မှာ အပေါ်ထပ် လှေကားဘက်ကို သွားသာရုံ (၄) ပေလောက် ချန်ပြီး ကန့်ပေးရမယ်။ အဲဒီ (၄) ပေက ကိုယ်တို့ အပေါ်တက်ဖို့၊ လှေကားသုံးဖို့ စက်ဘီးထားဖို့ပေါ့။ နောက်ဖေးကတော့ ကိုယ်တို့ လက်ရှိ သုံးနေတဲ့ မီးဖို ပေးရမယ်။ လက်ရှိ သုံးနေတဲ့ ရေလောင်းအိမ်သာ ပေးရမယ်။ ဒီတော့ လွတ်နေတဲ့ နောက်ဖေး အနောက်တောင် ထောင့်မှာ ကိုယ်တို့သုံးဖို့ မြေကျင်း ရေလောင်းအိမ်သာ တစ်လုံး လုပ်ရမှာပေါ့။
ပြီးတော့ ဆံပင်ကောက်၊ ဆံပင်ညှပ်ဆိုင်မို့ ရေပေးရမယ်။ ခေါင်းလျှော်ဖို့၊ ချိုးဖို့၊ သုံးဖို့ အခန်းတွေထဲမှာ ပိုက်တွေ ဆင်ပေးရမယ်။ ရပါတယ်။ ပြီးတော့ ဆံပင်ကောက်၊ ညှပ်နဲ့ ဆိုင်တဲ့ လျှပ်စစ် ပစ္စည်းတွေအတွက် လျှပ်စစ်အားတွေ သုံးမယ်ပေါ့။
နှစ်ဖက် လိုချင်တာ၊ ပေးနိုင်တာ ညှိကြပြီး ဈေးစကား ပြောကြတော့ ကိုယ်ဘာမှတောင် ပြောစရာ မလိုပါဘူး။ စပေါ် ရှစ်သောင်း၊ လခ ရှစ်ထောင်နဲ့ တည့်သွားပါတယ်။ ကိုင်း ... ဘာပြောစရာ လိုတော့လဲ။ ရပ်ကွက် လူကြီးတွေရှေ့ စာချုပ်ပြီး ငွေပေးငွေယူ လုပ်ကြရုံ ရှိတော့တာပေါ့။ စာချုပ်ကြတော့ ထုံးစံအတိုင်း လူမှုရေးအရ၊ ဥပဒေအရ ခွင့်မလွှတ်နိုင်တဲ့ ကိစ္စမျိုး ပေါ်ရင် ကိုယ့်ဘက်က ဆက်မထားနိုင်ဘူး ဆိုတာတော့ အလုပ်သဘော ထည့်ပေးပါတယ်။
စာချုပ်မှပဲ ဒီညီအစ်မ နာမည် သိရတော့တယ်။
ဝင်းသန်းဦးတဲ့။ ဝင်းသန်းစိုးတဲ့။
ဟုတ်တယ်။ ကိုယ်တို့ နယ်ဘက်က မှည့်တတ်တဲ့ နာမည်မျိုး။
***
ဘာမှသာ မဟုတ်တာ။
အခန်းကန့်တာ၊ ဆေးသုတ်တာ၊ မီးဆင်တာ၊ ရေပိုက်သွယ်တာ၊ ပြင်တာဆင်တာနဲ့ ငွေသုံးသောင်းခွဲလောက် ကုန်သွားပါတယ်။ ငွေမြင်ပြန်တော့ မိန်းမကလည်း ပူဆာတာနဲ့ တိုရှီဘာ (၁၄) လက်မလေး တစ်လုံး ဝယ်ပေးရတာ နှစ်သောင်းရှစ်ထောင်လောက် ချောသွားရော။ ဘာကျန်တော့မလဲ၊ လက်ထဲ တစ်သောင်းခွဲလောက် ကျန်တော့တာပေါ့။ ဒါက ခြေစောင့်လက်စောင့်။
ကဲ ... အိမ်လည်း ပြင်ဆင်ပြီးပြီ။ မဦး (ဝင်းသန်းဦး) က ဆိုင်းဘုတ်နဲ့ ထောင်ဘုတ် အပ်ခိုင်းလို့ ပန်းချီဆရာဆီ အပ်ပေးရတယ်။ ဖလာဝါရီ အမျိုးသား၊ အမျိုးသမီး ဆံပင်အလှပြင်တဲ့။ ထောင်ဘုတ် မှာတော့ အမျိုးသား၊ အမျိုးသမီး ဆံပင်ညှပ်၊ ဆံပင်ကောက်၊ ဆံပင်ဖြောင့်၊ ဆံပင်ပေါင်းတင်၊ တစ်ကိုယ်လုံး ပေါင်းတင်၊ မျက်တောင်ကော့၊ မျက်ခုံးကို စက်ဖြင့်ထိုး၊ ခြေသည်း လက်သည်း ပြုပြင်၊ ခေတ်မီသေနတ်ဖြင့် နားဖောက်၊ ခေတ်မီ စက်ကိရိယာဖြင့် အကြောပြင် ဆိုပြီး ရေးခိုင်းတယ်။ လား လား စုံလိုက်တဲ့ အတတ်ပညာတွေပါလား။
ဆိုင်ကိုတော့ ကဆုန်လဆန်း (၈)ရက်နေ့မှာ စဖွင့်မယ်လို့ မဦးက ပြောပါတယ်။ သည်တစ်ခါတော့ အဘွား လုပ်သူက သူ့မြေး ဖတဆိုးလေးတွေ အရွယ်နဲ့မလိုက် လုပ်ကိုင်စားသောက် ကြရတာမို့ နှမလေးတွေလို စောင့်ရှောက်ဖို့၊ ကြည့်ရှုဖို့၊ ဆွေမျိုးရင်းချာလို သဘောထားဖို့ ပြောပါတယ်။ ကိုယ်ကလည်း စိတ်ချပါပေါ့၊ ဒီရပ်ကွက် အနေနဲ့လည်း မန္တလေး ရွာနေပြည်ထိုင် ရပ်ကွက်မို့ အစစ စိတ်ချဖို့ ပြောပြရပါတယ်။
လဆန်း (၈)ရက် ဥပုသ်နေ့မှာ ဆိုင်စဖွင့်တယ်။ ဆိုင်ဖွင့်ပွဲမှာ ဘုန်းကြီး (၃) ပါး ဆွမ်းကျွေးတယ်။ ရပ်ကွက် လူကြီးတွေ အိမ်နီးနားချင်းတွေ ဖိတ်ပေးလိုက်ရတယ်။
အဲ ... မဦးတို့ မိတ်ဆွေတွေလည်း လာကြတယ်။ အမယ် ... သူ့မိတ်ဆွေ အပေါင်းအသင်း တွေကလည်း တော်ရုံတန်ရုံတော့ မဟုတ်ကြဘူး။ သိသလောက်တော့ မန္တလေးက စားပွဲရုံပိုင်ရှင်တွေ၊ ဟိုတယ်ပိုင်ရှင်တွေ ချည်းပဲ။ ဒီခေတ် “ကလေး” တွေ မျက်စိပေါက် သိပ်ပွင့်ကြတယ်။ ဒီအရွယ်နဲ့တင်ပဲ အခုလို ကျယ်ကျယ်ပြန့်ပြန့် ပေါင်းနိုင်ကြတာ ပါကလား။
ဆိုင်ထဲက ဖွင့်ထားတဲ့ ကက်ဆက်သံက လာတဲ့ ဧည့်သည်တွေရဲ့ စကားသံတွေ ကြားက အပြင်ကို တိုးထွက်လာတယ်။
“တစ်နေ့နေ့ တစ်ချိန်ချိန် သိန်းကျောက်ရရင် လောပန်းဖြစ်ပြီပေါ့၊ အကြံကုန်ရင် သံတိုင်ရောင်း ...”
***
အကျိုးပေးတယ် ခေါ်မလား၊ လက်ရာကောင်းတယ် ခေါ်မလား၊ မဦးတို့ဆိုင်မှာ စဖွင့်ကတည်းက လူမပြတ်ဘူး။ စာအုပ်ဆိုင် ဖွင့်တုန်းက အလွန်ဆုံးစည်လှ စက်ဘီး လေးငါးခြောက်စီးသာ ရှိတဲ့ ကိုယ့်အိမ်ရှေ့လည်း စာအုပ်ဆိုင်ပိတ်၊ မဦးတို့ဆိုင် ဖွင့်ပါမှ ပါဂျဲရိုးတွေ၊ အက်စ်အီးတွေ၊ ဗင်တွေ၊ စူပါဆလွန်းတွေ၊ ဘဲခေါင်းစိမ်းတွေ၊ ရွှေရောင်တွေနဲ့ ပြည့်နေတော့တယ်။ ဒါကြောင့်လည်း ညဆို (၁၁) နာရီကျော်မှချည်း မဦးတို့ ဆိုင်ပိတ်ရတယ်။
ကိုယ်တို့ မိသားစုကတော့ စာအုပ်ဆိုင်အလုပ် မရှိကတည်းက ညစာ စားသောက်ပြီး တစ်ခါတည်း အပေါ်တက်ကြတယ်။ မိန်းမကလည်း တီဗွီမှာ ရောင်စုံမျဉ်းကျားကြီးတွေ လာကတည်းက ထိုင်လိုက်တာ အစီအစဉ်ပြီးထိ နေ့တိုင်း။ ကိုယ်လည်း ပျင်းရင် တီဗွီ ထကြည့်ချင် ကြည့်၊ ရှစ်နာရီ ဆယ့်ငါး ရေဒီယို နားထောင်ချင်ထောင်၊ စာအုပ်ဖတ်ချင် ဖတ်နဲ့ မဦးတို့ဆိုင် စဖွင့်တဲ့ နေ့ကစပြီး အိမ်အောက်တောင် မရောက်ဖြစ်ပါဘူး။ ဘာပဲပြောပြော အိမ်ငှားခလေးက ကိုယ့်မိသားစု စားဖို့ သောက်ဖို့အပြင် လစဉ် စုနိုင် ဆောင်းနိုင်ပြီး ခုလို အေးအေးသက်သာ နေနိုင်တော့ မဆိုးဘူး ပြောရမှာပေါ့။ ဒီကြားထဲ မဦးတို့ အလုပ်ဖြစ်တာ မြင်နေရတော့ ဝမ်းသာရတာ ပေါ့လေ။
သူတို့ အလုပ်ဖြစ်ပုံကလည်း ကိုယ်က အိပ်ရာထ မျက်နှာသစ်ပြီးလို့ တံခါးဖွင့်ခါစ ရှိသေး၊ အိမ်ရှေ့မှာ စောင့်တဲ့ ဧည့်သည်က စောင့်နေပြီ။ တစ်ရက်ကများ ဘယ်အချိန်က ရောက်နေကြသလဲ မသိဘူး။ တံခါးဖွင့်လိုက်တော့ အိမ်ရှေ့မှာ ကားနှစ်စီး ရောက်နေပြီ။ ဟို ... တောင်ပေါ်က ဆင်းလာတဲ့ကားတွေ နေမှာ။ ဟိုင်းလတ် နှစ်စီးရဲ့ ဘော်ဒီ တစ်ခုလုံးလည်း နဂိုဆေးရောင် မမြင်ရတော့ဘူး။ မြေနီတွေ၊ ရွှံ့တွေ၊ ဖုန်တွေနဲ့။ ကားပေါ်မှာလည်း အထုပ်အပိုးတွေ အပြည့်။ အထုပ်အပိုးတွေ ပေါ်မှာလည်း လူသုံးလေးယောက်က ခရီးပန်းလာတဲ့ ပုံမျိုး ပိုးလိုးပက်လက် အိပ်လို့။ တံခါးအဖွင့် ကိုယ့်ကိုမြင်တော့ ကားခေါင်းခန်းကလူက စီးကရက်ဖွာရင်း ရယ်ပြတယ်။ မဦးတို့အခန်း မေးငေါ့ပြီး မဖွင့်သေးဘူးလားတဲ့။ ကိုယ်က ဖွင့်တော့မှာပါ၊ သူတို့ညက ဆိုင်ပိတ်တာ နောက်ကျပုံ ရတယ်၊ ခဏ စောင့်ပါလို့ ပြောရတယ်။
ဒီအချိန်မှာ ဆင်းတာလား၊ တက်တာလား မသိဘူး။ ဝေါ ... ဝေါ ... ဝေါနဲ့ လေယာဉ်ပျံသံ ကြားတော့ ကားနောက်ခန်းက အိပ်နေတဲ့လူတွေ လူးလဲထပြီး အံ့အားတသင့်နဲ့ လေယာဉ်ပျံကို မော်ကြည့်ကြပါရောလား။ ဪ ... အတော်ခေါင်တဲ့ နေရာက လူတွေ နေမှာလို့ တွေးမိသေးရဲ့။ အံမယ် ... အဲဒီလို လူတွေက မဦးတို့ဆိုင်ကို သိနေတာ တွေးမိပြန်တော့ ပိုအံ့ဩရတာပေါ့။
ခဏနေတော့ မဦးတို့ ဆိုင်ဖွင့်တယ်။
ကဲ ... အဲဒီနေ့ မနက်တင် ညှပ်၊ လျှော် ငါးယောက်လောက် ဝင်တော့ အနည်းဆုံး ငွေတစ်ထောင်ကျော် ဈေးဦးပေါက်ပြီ။ ဆိုင်ထဲကလည်း ဧည့်သည် အသံတွေနဲ့အတူ ကက်ဆက်သံလေး ကြားရပြီ။
“ဘဝသံသရာရဲ့ အလယ်မှာ ...
ဆင်းရဲသူရယ် ... ချမ်းသာသူရယ်
အများကြီး ရှိပါတယ် ...
ကံမကြုံသေးလို့ သံတိုင်ကိုင်ပြီး ကျောက်တူးရတာ
အထင်တော့ မသေးပါနဲ့ ...”
***
ဒီအနံ့တွေနဲ့ လေးငါးခြောက်နှစ်လောက် ကင်းကွာနေပေမဲ့ ဘယ့်နှယ်လုပ် မေ့ပါ့မလဲ။ မနက်စောစော ရတာက အခေါက်ကင်နံ့။ ပြီးတော့ ကြက်သားလုံးကြော်နံ့၊ ကုန်းဘောင်ကြီးကြော်နံ့၊ ငါးရှဉ့်ကြော်နံ့၊ ကိုက်လန်နံ့၊ မှိုနံ့၊ ပုစွန်နံ။ တော်တော်များများ အနံ့တွေမှတ်မိတယ်။ ဒီအနံ့တွေကို အခုထိစွဲပြီး မှတ်မိနေတုန်း။
အား ... မဦးတို့က ဝင်ငွေကောင်းတော့ ဖွယ်ဖွယ်ရာရာ ချက်ပြုတ်စားနိုင် ကြပါကလား။ လေးယောက်အိုးစာကို ဒီလောက် ကြော်လှော်နေရင် ဘယ်လိုလုပ် ကုန်အောင် စားနိုင်ပါ့မလဲ။ နေ့တိုင်းပဲ ချက်နိုင် ပြုတ်နိုင်ကြပါပေ့။ သူတို့ခိုင်းတဲ့ ကောင်မလေးများ မနက်ဘက် ဈေးက ပြန်လာရင် ချက်စရာ ပြုတ်စရာတွေ ဆိုက်ကားပေါ်မှာ ခြင်းတောင်းနဲ့ အပြည့်။ တစ်ခါတလေ အချိုရည်ဘူးတွေလည်း ပါတတ်တယ်။ တစ်ခါတလေ ဂျပ်ပုံးတွေနဲ့ အစားအသောက်ဘူးတွေ၊ ပုလင်းတွေလည်း ပါတတ်ပါတယ်။
မိန်းမကတော့ မိန်းမဉာဏ်နဲ့ မှတ်မှတ်သားသား ရှိတယ်။ အချိုရည်ဖာတွေ ကိုတလုတ် ဆိုက်ကားနဲ့ ရောက်လာရင်-
“ဟင် မနေ့ကမှ နှစ်ဖာ ယူလာတာ၊ ဒီနေ့ ထပ်ဝယ်ပြန်ပြီ”
လို့ ပြောတတ်ပါတယ်။
တစ်ခါတလေ အချိုရည်ဖာတွေ မဟုတ်ဘဲ ဂျပ်ပုံးကြီးတွေ သယ်ပြီး အခန်းထဲ ဝင်သွားရင် ကိုယ့်နားကပ်ပြီး တိုးတိုးပြောတတ် ပါသေးတယ်။
“အစ်ကို ... အဲဒီ ဂျပ်တွေက အရက်ပုလင်းတွေ သိလား။ ကိုတလုတ်ကြီး အခုလိုသယ်တုန်း တစ်ခါက ကြိုးတွေ ပြေသွားလို့ ပြန်ချည်တော့ မြင်လိုက်ရတယ်” တဲ့။
ကိုယ်ကတော့-
“သူတို့လည်း အရောင်းအဝယ် လုပ်လို့ နေမှာပေါ့ကွာ။ ဆိုင်မှာ ကုန်သည်တွေ ဝင်ထွက်နေတာပဲ”
လို့ ခပ်ပေါ့ပေါ့ ပြောလိုက်ရတယ်။ မိန်းမက မျက်လုံးလေး ကလယ် ကလယ်နဲ့ ထပ်အတွန့် တက်ချင်ပုံပဲ။ ဒီကိစ္စကို ကိုယ်သိပ်စိတ်ဝင်စားပုံ မပေါ်လို့သာ ဘာမှ ပြန်မပြောတာ။ ဒါပေမဲ့ နောက်တော့ ကိုယ်လည်း စိတ်ဝင်စားလာတယ်။ သံသယ ဖြစ်လာတယ်။ ဂျပ်ပုံးတွေ အဝင် သိပ်များလာ ပါကလား။ ကိုတလုတ် ဆိုရင် သူ့ဆိုက်ကား ဂိတ်ထိုးစရာ မလိုဘူး၊ ပါစင်ဂျာ ရှာစရာ မလိုဘူး၊ မဦးတို့ ဆိုင်နဲ့တင် အလုပ်ဖြစ်နေပြီ။
တစ်ညတော့ ဖြု(စ်)ပြတ်ပြီး မီးငြိမ်းသွားတယ်။ ပြတ်သွားတဲ့ ဖြု(စ်)ကို ပြန်တပ်၊ မီးပြန်ဖွင့်၊ ဖြု(စ်) ပြန်ပြတ် ဖြစ်နေတယ်။ တစ်နေရာရာမှာ ရှော့ဝင် နေပြီပေါ့။ ကိုယ်တို့ အပေါ်ထပ်မှာလည်း ထူးထူးထွေထွေ လျှပ်စစ်အသုံး မရှိတော့ ခဏရှာလိုက်ရုံနဲ့ ရှော့မရှိတာ စစ်လို့ရတယ်။ ဒါနဲ့ အောက်ထပ် မဦးတို့အခန်း ဝင်ရှာရတာပေါ့။ သူတို့သုံးတဲ့ လျှပ်စစ်ပစ္စည်းတွေ နည်းနည်း စစ်ကြည့်တော့ တွေ့ပါပြီ။ ဟော့ပလိတ်ဝါယာ ပေါက်နေတာပါ။ ဒါနဲ့ ဝါယာပေါက်ကို တိပ်ပတ်ပြီး မီးဖွင့်တော့ ကောင်းသွားတယ်။
ဒါက အရေးမကြီးဘူး။ မဦးတို့ အခန်းကို ဝင်ကြည့်တော့ ဆံပင်ညှပ်လာတဲ့ ပုဂ္ဂိုလ်လေးယောက်ကို မဦးတို့ ထမင်းစား စားပွဲမှာ အမြိန့်သား တွေ့ရပြီး စားပွဲပေါ်က ပစ္စည်းပစ္စယ မြင်ကွင်းက စိတ်ကသိကအောက် ဖြစ်ရတာက အရေးကြီးတယ်။
ပြောပြပါ့မယ်။ စားပွဲပေါ်မှာ ပန်းကန်ကြီး၊ ပန်းကန်ငယ်နဲ့ ဟင်းအမယ်တွေက အမျိုးမျိုး။ ဘီယာပုလင်း၊ ဘီယာဘူး၊ နိုင်ငံခြား အရက်ပုလင်းတွေက ထိုးထိုးထောင်ထောင်။ လဲနေတဲ့ ဆိုဒါပုလင်း၊ စားပွဲအောက် လိမ့်နေတဲ့ ဘီယာဘူးခွံ၊ အချိုရည်ဘူးခွံ၊ ပုဂ္ဂိုလ်အားလုံးကလည်း ရေချိန်ကိုက် နေကြပြီ။
ဘေးက ဆက်တီအရှည် ပေါ်မှာတော့ တစ်ယောက်က ခပ်မှီမှီလေး ခွေလို့။ မျက်လုံးက မှိန်းလို့။ သူ့ရှေ့မှာ ရေနွေးကြမ်း အပြည့်။ တစ်ပန်းကန်ပြီး တစ်ပန်းကန် တဂွပ်ဂွပ် ယူမော့လို့။ စတီးရေ နွေးဘူးတွေလည်း စားပွဲပေါ်မှာ အစီအရီ။
ဒီထက် ဆိုးတာက မဦးညီမ မစိုးက ဒူးပေါ် ရောက်နေတဲ့ စကပ် ကျပ်ကျပ်လေးနဲ့။ ခပ်ပွပွ တီရှပ်လည်ပင်းဟိုက်နဲ့။ ပြောပါရစေတော့။ ကိုယ့်အထင် အပေါ်ဝတ် အတွင်းခံတောင် ပါပုံ မရဘူး။ ကိုယ်လည်း အစက ရှော့ဖြစ်တဲ့ကိစ္စ မဲနေရလို့ သတိမထားမိတာ အမှန်။ ပြင်ဆင်ပြီး မီးဖွင့်လို့ရမှ သတိထားမိတာပါ။ မဦးက ကွက်ခနဲ မျက်နှာပျက်သွားတယ်။ အဘွားကြီးကတော့ ထုံးစံအတိုင်း နောက်ဖေးဘက်မှာ ဆေးပေါ့လိပ်နဲ့ ငုတ်တုတ်။ သူတို့အခန်းက ကိုယ်လည်း ပြန်ထွက်လာတော့ မဦးက မလုံမလဲနဲ့-
“မူဆယ်က ဧည့်သည်တွေလေ”
လို့ ပြောလိုက်တယ်။ ကိုယ် ဘာပြန်ပြောရမှန်း မသိဘူး။ ဒါပေမဲ့ ခေါင်းထဲမှာ အလုပ်တစ်ခုတော့ ပိုလာပြီ။ မိန်းမကိုတော့ ပြန်ပြောမပြသေးဘူး။
***
“အစ်ကို ... အစ်ကို”
ဆူဆူညံညံ အသံတွေရော၊ မိန်းမ လှုပ်နှိုးတာရော၊ ကိုယ် ဖျတ်ခနဲနိုးလာပါတယ်။ ငုတ်တုတ်ထိုင်တော့ မိန်းမက-
“အစ်ကို ထပြီး ဆင်းကြည့်ဦး။ အောက်မှာ ဆူညံနေတာပဲ။ မဦးတို့ ဘာဖြစ်နေလဲ မသိဘူး”
ဆိုလို့ ကမန်းကတန်းထ၊ မီးဖွင့်ပြီး နာရီကြည့်တော့ (၁၂) နာရီ (၂၀)။
ဟုတ်တယ် ... မဦးတို့ အခန်းက ဆူညံနေတာပဲ။ ဒါနဲ့ အောက်ဆင်း လိုက်တယ်။ မိန်းမက နောက်က လိုက်လာတယ်။ မဦးတို့ အခန်းက ဝုန်းဒိုင်း ကြဲနေကြ ပါလား။ စားပွဲကို စည်းချက်ကျကျ ရိုက်နေသံတွေလည်း ပါရဲ့။ ပုလင်းတွေ၊ ပန်းကန်တွေ တဒေါင်ဒေါင် ခေါက်နေသံရော ပါရဲ့။
“ဟိုကျင်းမရရင် ဒီကျင်း၊ ဒီကျင်းမရရင် ဟိုကျင်း၊ ဇွဲမလျှော့ပါဘူး ...”
ဆိုတဲ့ သီချင်းသံကလည်း ကက်ဆက်က တစာစာ။ ရယ်သံတွေလည်း ဆူလို့။ တစ်ခါတစ်ခါ မဦးအသံ ကြားရတယ်။
“ပြန်ကြတော့ကွာ။ တော်ကြတော့ကွာ။ မဦးကို သနားပါဦး” တဲ့။
အဲလိုပြောတိုင်း ဝိုင်းအော်ကြတာက-
“ရတယ်၊ ပြန်မယ်၊ မဦးရော လိုက်ရမယ်” တဲ့။
ကိုယ် သူတို့ အခန်းရှေ့ ရောက်တော့ ဆိုင်ရှေ့မှာ ကားနှစ်စီး ရပ်ထားတယ်။ ဘေးအိမ်တွေ မျက်နှာချင်းဆိုင် အိမ်တွေကပါ ထွက်ကြည့် နေကြတယ်။ ကိုယ်လည်း ထောင်းခနဲ ဒေါသထွက် သွားတာပေါ့။ ရှက်လည်း ရှက်တယ်။ ကာထားတဲ့ လိုက်ကာ အစိမ်းကြီး တွန်းဖယ်ပြီး မဦးတို့ အခန်းထဲ ဝင်လိုက်တယ်။ ကိုယ့်မြင်တော့ မဦး မျက်လုံး ပြူးသွားတယ်။ လက်ထဲက ဘီယာဘူး လွတ်ကျ သွားတယ်။ စားပွဲပေါ်ထိ တက်ထိုင်သူထိုင်၊ ကုလားထိုင်ကို ပြောင်းပြန်ကားယားခွ ထိုင်သူထိုင်၊ ဆက်တီပေါ်မှာလည်း တုံးလုံးပက်လက်တွေ။
“ရတယ်၊ ပြန်မယ်၊ မဦး လိုက်ရမယ်”
“ရတယ်၊ ပြန်မယ်၊ မဦး လိုက်ရမယ်”
ဒေါင် ... ဒေါင် ... ဒေါင် ...
ဒုန်း ... ဒုန်း ... ဒုန်း
ကိုယ်လည်း နံရံက နာရီကို လက်ညှိုးထိုးပြီး-
“မဦး ... ဘယ်အချိန် ရှိပြီလဲ။ ညည်းတို့ဟာက ဆင်ခြင်ဦးမှပေါ့။ ရပ်ကွက်ကိုလည်း အားနာဦးမှပေါ့။ အခုတော့ ပေါက်လွှတ်ပဲစား ပုံစံနဲ့ ကမ္ဘာပျက်နေတဲ့ အတိုင်း”
လို့ အော်လိုက်တယ်။ စားပွဲပေါ်က ပုဂ္ဂိုလ်တချို့ ခေါင်းထောင်ကြည့်တယ်။ တစ်ယောက် နှစ်ယောက်က ဒယီးဒယိုင်နဲ့ ထလာတယ်။ ကိုယ်က အနားမှာရှိတဲ့ တံခါးမင်းတုံး သုံးတစ်အသား တစ်ချောင်းကို လှမ်းဆွဲလိုက်တယ်။ မိန်းမက အော်တယ်။ အိမ်နီးနားချင်းတွေ ကိုယ့်ဘေး ရောက်လာကြတယ်။ မဦးက သူ့လူတွေ ဆွဲရင်း ရှေ့ကို ထွက်လာပြီး-
“ဦး ... ဦး ... သူတို့ မူးနေလို့ပါ။ ကျွန်တော့် ဧည့်သည်တွေပါ။ ကျွန်တော် တာဝန်ယူပါတယ်။ နော် ... နော် ... ဦး ... ဦး ...”
လို့ ပြောတယ်။ ကိုင်း ... အိမ်နီးချင်းတွေကို ဘယ်လို မျက်နှာပြရမှာလဲ။ မပြေသေးတဲ့ ဒေါသကြောင့် လက်ထဲက မင်းတုံး အသားချောင်းကြီး ဝုန်းခနဲ ဆောင့်ချလိုက်ပြီး နောက်ဖေး မီးဖိုခန်းထဲ ဝင်လိုက်တယ်။ ပန်းကန်တွေ ဆေးနေတဲ့ အဘွားကြီးကို-
“ဒီမယ် ... ခင်ဗျား မြေးမတွေကို ပြောလိုက်။ သုံးရက်အတွင်း နေရာရှာပါ။ ဒီက ထွက်ပေးပါ။ မစိုးလည်း ဘာစစ်ကိုင်း သွားတာလဲ။ ကျုပ် ကိုယ်တိုင် တည်းခိုခန်းမှာ တွေ့ခဲ့ပြီဗျ။ သုံးရက် အတွင်းနော် ... သုံးရက်အတွင်း ... အမြန်ဆုံး ရွှေ့ပေးပါ”
လို့ အော်နေမိတယ်။
အဘွားကြီးက ခေါင်းမော့ မကြည့်ဘူး။ အဖော် ကောင်မလေးက ပုလင်းခွံတွေ စုသိမ်းနေ လေရဲ့။ အပြင်ဘက်မှာ မိန်းမကို အိမ်နီးချင်းတွေက အခုမှ ရင်ဖွင့်နေကြပုံ ရတယ်။
***
တော်ပါသေးရဲ့၊ ရှောရှောရှူရှူ ထွက်သွားကြပေလို့။ သူတို့ စပေါ်တင်ထားတဲ့ အထဲက (၄) သောင်းပဲ ပြန်ယူသွားတယ်။ အိမ်ပြင်ဆင်တဲ့ စရိတ်(၄) သောင်းကို ရက်ရက်ရောရော ထားခဲ့တယ်။ အဲဒီည အဖြစ်အပျက် အတွက်လည်း မဦးက တောင်းပန်တယ်။ ကိုယ်အမ်းရမယ့် (၄) သောင်းကလည်း တီဗွီဝယ် ဘာဝယ် ဆိုတော့ တီဗွီ ပြန်ရောင်းပြီး စုထားတဲ့ငွေလေး ဖြည့်တာတောင် မပြည့်လို့ နန်းရှေ့က တူမဆီက ထပ်ဆွဲရတော့ အကြွေးတောင် တင်ရပါရောလား။
မဦးတို့လည်း လုံးချင်းအိမ်တစ်လုံး ရသတဲ့။ စပေါ် (၁) သိန်း၊ လခကတော့ ရှစ်ထောင်ပဲတဲ့။ သန်ဘက်ခါ ဆိုင်ဖွင့်မှာတဲ့။ ဆိုင်ဖွင့်ပွဲ လာပါဦးတဲ့။ ဘာညာ ပြောပြီး ဘဲခေါင်းစိမ်း စူပါကပ်လေး ဝေါခနဲ စီးပြီး ပြန်သွားမှပဲ သက်ပြင်းချနိုင်တော့တယ်။
ကဲ ... သူတို့ထားခဲ့တဲ့ အခန်းမှာပဲ ထမင်းရှင် စာအုပ်ဆိုင်လေး ပြန်ဖွင့်မယ်။ အခန်းကို ရေဆေး ရှင်းလင်းနေတဲ့ မိန်းမက လှမ်းအော်တယ်။
“အစ်ကို ... ဒီဂျပ်ပုံးကြီး အပြင်ထုတ်ပေးပါဦး” တဲ့။
ဒါနဲ့ ခုတင်အောက် မဦးတို့ ကျန်ခဲ့တဲ့ ရိုက်ကွတ်ကာ ပုံးခွံကြီး သွားရွှေ့ရတယ်။ ပုံးထဲက ဂွမ်းလိပ်အသစ်တွေ ထွက်လာတယ်။ ပြီးတော့ နေဗီယာကရင်မ် ဘူးခွံ၊ လက်သည်းဆိုးဆေး ဘူးခွံ၊ အမ်းမဝေးဘော်ဒီ ချောပြည့်တင်းဆေး ဘူးခွံတွေ။ ပြီးတော့ ပြီးတော့ ...။ ကိုယ်မျက်လုံး ပြူးသွားတယ်။ ကံကောင်းလို့ပါလား။
နောက်ထပ်တွေ့တဲ့ ပုလင်းခွံတွေက အများကြီး၊ အများကြီး။ ဒီပုလင်းတွေက ဆေးရည်ပါရင် တစ်ပုလင်း ထောင်ချီတန်တဲ့ ပုလင်းတွေ။ ပုလင်းတွေကသာ တစ်မိုက်လောက် ရှိတာ။ အိန္ဒိယ ဘက်ကဝင်တဲ့ ဥပဒေပြင်ပက ဆေးရည်ပုလင်းခွံတွေ။
ကိုယ့်မျက်စိထဲမှာ ဒီပုလင်းခွံတွေနဲ့အတူ စတီးရေနွေးဓာတ်ဘူး အရွယ်စုံ ဆိုက်စုံတွေ၊ မှေးစင်းနေတဲ့ မျက်လုံးတွေ၊ ဖန်ခါးခါး ရေနွေးကြမ်း ပန်းကန်တွေ။ အမယ်လေး စောစောစီးစီး နှင်မိတာ ကံကောင်းလို့ပါလား။
***
စာအုပ်ဆိုင်လေး ပြန်ဖွင့်ပြီး ပထမဆုံးရတဲ့ သန့်သန့်ရှင်းရှင်း ငွေနှစ်ရာထဲက တစ်ရာကို ဘုရားကြီးမှာ ရွှေသွားချကြတယ်။
ကလေးတွေ ကျောင်းပိတ်တဲ့ စနေနေ့မှာ မိသားစု ဘုရားကြီး ထွက်ခဲ့တယ်။ ဘုရားကန်တော့၊ ရွှေချ၊ ကြေးစည်ကြီး၊ မောင်းကြီးနဲ့ ကြေးရုပ်ကြီးတွေကို ကလေးတွေ ပြပြီး လိပ်ကန်ဘက် ထွက်လာခဲ့ကြတယ်။ လိပ်ကန်မှာ ကလေးနှစ်ယောက်က လိပ်စာကျွေးကြနဲ့ ပျော်လို့။ ကိုယ်တို့ လင်မယားလည်း ကလေးတွေကိုကြည့်ပြီး ကြည်နူးလို့။
ကလေးတွေဆီ အာရုံရောက်နေတုန်း အနားက-
“မိသားစု ဘုရား လာကြတာလား”
ဆိုတဲ့ အသံကြောင့် မော့ကြည့်လိုက်မိတယ်။ ကန်စွန်းဥပြုတ် လင်ပန်းလေး ရွက်ထားတဲ့ အဘွားကြီးကို မြင်ဖူးသလိုလို ဇဝေဇဝါနဲ့။ မိန်းမက ကိုယ့်လက်မောင်းကို လှမ်းကိုင်ပြီး “မဦးတို့ အဘွားလေ” လို့ပြောမှ မှတ်မိတော့တယ်။
အဘွားကြီးက ခေါင်းပေါ်က လင်ပန်းလေးချ၊ လင်ပန်းလေးထဲက ဆေးလိပ်တိုလေးယူ ပါးစပ်တပ်၊ မီးညှိ၊ တစ်ရှိုက်နှစ်ရှိုက် ဖွာပြီး ရယ်ကျဲကျဲနဲ့-
“ကိုယ့်ဟာကိုယ် သရေစာလေး ရောင်းပြီး ငါးကျပ် တစ်ဆယ် ရတာက စိတ်ချမ်းသာ ပါတယ်တော်။ သူတို့က သူတို့အဘွား အနေနဲ့ လိုက်နေပေးပါ၊ ဘာမှလည်း ဝင်မပြောပါနဲ့၊ စားပြီးသောက်ပြီးလို့ တစ်လငါးရာ ပေးပါမယ် ဆိုလို့သာ စိတ်ဆင်းရဲခံပြီး လိုက်နေရတာပါ။ အခု သူတို့ ဆေးရုံကြီးဘက် ပြောင်းတော့ ကျုပ်လည်း မလုပ်ချင်တော့ဘူး၊ ရှက်တယ်ဆိုပြီး ထွက်ခဲ့တာ၊ နောက်တစ်ယောက် ထပ်ရှာပြီး ခေါ်သွားကြလေရဲ့။ မဦးနဲ့ မစိုးကလည်း ညီအစ်မ မဟုတ်ပေါင်တော်။ မစိုးကလည်း ကျုပ်လို ငှားတဲ့ အလုပ်သမားပါပဲ။ အဲ ... ကွာတာကတော့ မစိုးက ပိုက်ဆံတွေ အများကြီး ရတာပေါ့လေ” လို့ ပြောတယ်။
ကိုယ်တို့လည်း ပါးစပ် အဟောင်းသားနဲ့ အံ့အားသင့်လို့။
ကလေးနှစ်ယောက်ကတော့ လိပ်ကန်ဘေး လိပ်စာဆိုင်က ဖွင့်တဲ့ သီချင်းကို သံပြိုင်လိုက်ပြီး အော်ဆိုနေကြတယ်။
“ကျင်းပေါင်းတစ်ထောင် ကုန်အောင် တူးမယ့်
ကျောက်တူးသမားပါကွာ ...
တကယ်တော့ ကျောက်တူးသမားများဟာ
လောပန်းလောင်းတွေပါ ...”
ဆူးငှက်
ရွှေအမြုတေ၊ ဇူလိုင်၊ ၁၉၉၅။
No comments:
Post a Comment