တစ်နေ့ကို (၅) မိနစ်ပဲ အချိန်ပေးပါ

"တစ်နေ့ကို (၅) မိနစ်ပဲ အချိန်ပေးပါ"
====================

                                              #ဝင်းငြိမ်း

စာရေးချင်တဲ့လူငယ်များနဲ့ တွေ့တိုင်း ကျွန်တော် ပြောဖြစ်တာကတော့ စာရေးတာကို ဝါသနာအနေနဲ့ပဲလုပ်ပါ။ အသက်မွေးဝမ်းကျောင်း အနေနဲ့ကတော့ ပုံမှန်ဝင်ငွေရှိမယ့် အလုပ်တစ်ခုရှိပါစေ ဆိုတာပါပဲ။ ကျွန်တော်တို့အရင်ခေတ်က စာရေးဆရာကြီးများ လုံးချင်းဝတ္ထုတွေ ထုတ်ဝေရာမှာ စောင်ရေ သောင်းဂဏန်း ရိုက်ခဲ့ရတာပါ။ အခုတော့ လုံးချင်းဖြန့်ချိရာမှာ စောင်ရေ ၅ဝဝ ဆိုတာ တော်တော်ဟုတ်နေပြီလို့ ဆိုကြပါတယ်။ ကဗျာ၊ ဆောင်းပါး၊ ဝတ္ထုတိုရေးသူများ ဆိုရင်လည်း ရလာတဲ့ စာမူခနဲ့ မိသားစု စားဝတ်နေရေး ဖန်တီးဖို့ဆိုတာ လုံးဝ မဖြစ်နိုင်တဲ့ ကိစ္စပါ။ ဒီတော့ အသက်မွေးဝမ်းကျောင်း အလုပ်က တစ်ဖက်၊ ဝါသနာပါတဲ့ စာရေးတာက တစ်ဖက် လုပ်ကြရပါတယ်။ ရုံးလုပ်ငန်းလို တနင်္လာကနေ စနေနေ့အထိ အလုပ်လုပ်ကြရပြီး အားလပ်တဲ့ တနင်္ဂနွေနေ့မှာ စာရေးမယ်လို့ အားခဲထားကြပေမဲ့ တနင်္ဂနွေနေ့မှာ မိသားစုကိစ္စ၊ သာရေးနာရေးကိစ္စ၊ လူမှုရေးကိစ္စ စတာတွေ ပေါ်ပေါက်လာပြန်တာမို့ စာမရေးဖြစ်ပြန်ဘူး။ တစ်ပတ်လုံး အလုပ်လုပ်နေတုန်း ကာလအတွင်းမှာလည်း အချိန်ရရင် ရသလို ကိုယ်ရေးလက်စ ဝတ္ထုကလေးအတွက် စိတ်ကူးဥာဏ်တွေ ပေါ်ပေါက်လာတတ်ကြပါတယ်။ နောက် တနင်္ဂနွေမှာ လုံးဝအားလပ်သွားလို့ စာရေးစားပွဲကိုလည်း ထိုင်လိုက်ရော ဘာရေးရမှန်းမသိ ဖြစ်သွားတဲ့ အကြိမ်တွေ အများကြီး ကြုံတတ်ပါတယ်။ ရေးပြီးသားလေး ပြန်ဖတ်ကြည့်တော့လည်း ကောင်းနေသား။ ဒါပေမဲ့ ရှေ့ကို ဘယ်လို ဆက်ရေးရမလဲဆိုတာ ပေါ်ပြီးသားစိတ်ကူးက အစရှာမရဖြစ်နေတာမို့ ဘာမှမရေးနိုင်ဘဲ ငုတ်တုတ် မေ့ရတဲ့ အကြိမ်တွေများစွာ ရှိနိုင်ပါတယ်။

ဒါကြောင့် ၂ဝ၁၁ခုနှစ်၊ စက်တင်ဘာလထုတ် The Writer မဂ္ဂဇင်းမှာ ဝတ္ထုရေးဆရာ ဂျယ်ရီ ကလီဗား က ၅ မိနစ် လောက် အချိန်ပေးစမ်းပါ ဆိုတဲ့ ခေါင်းစဉ်နဲ့ စာရေးဆရာများ အတွက် အကြံပြုထားတဲ့ ဆောင်းပါးကို ဒီလ နှစ်ကြောင်းရေး တစ်ကြောင်းခြစ်ကဏ္ဍမှာ ဖော်ပြပေးချင်ပါတယ်။

အရေးပါတဲ့ ၅ မိနစ်
----------------------------

ခင်ဗျားတို့ဘဝမှာ အချိန်လုံးဝ မရှိဘူးဆိုတာကို ကျွန်တော် လက်မခံပါဘူး။ အချိန် နည်းနည်းကလေးတော့ ရှိမှာပါ။ တကယ်ကို နည်းနည်းလေးပါ။ ဘယ်လောက် နည်းသလဲဆိုရင် ၅ မိနစ်တည်းပါ။ တစ်နေ့ကိုမှ ၅ မိနစ် တည်းပါ။ အဲဒီ ၅ မိနစ်က စာရေးဆရာတစ်ယောက်အတွက် ဘယ်လောက်ထိရောက်သွားနိုင်တယ် ဆိုတာကို ကျွန်တော် ပြောပြပါ့မယ်။

၅ မိနစ်ဆိုတဲ့ အချိန်ဟာ ဘယ်နေရာမှာပဲဖြစ်ဖြစ် သုံးလို့ရနိုင်ပါတယ်။ ဥပမာ- အိမ်ကို မြို့ပတ်ရထားနဲ့ ပြန်နေတုန်း အချိန်အတွင်းမှာ ထိုင်နေရတဲ့ အချိန်ထဲက ၅ မိနစ် ရနိုင်တာပဲ။ ကိုယ်ပိုင်ကားနဲ့ သွားနေသူများအတွက်ကလည်း ကားပါကင်ထိုးပြီး ရုံးပေါ်မတက်ခင် ၅ မိနစ်လောက် အချိန်ပေးလို့ ရနိုင်တာပါပဲ။ အဲဒီလိုပေးတဲ့ အချိန် ၅ မိနစ်က စောစောကပြောတဲ့ ဘာဆက်ရေးရမှန်းမသိ ဖြစ်ကုန်တယ် ဆိုသူတွေအတွက် အများကြီးအကျိုးသက်ရောက်မှု ရှိတာကို ကျွန်တော် ပြောပြချင်ပါတယ်။

အချိန် ၅မိနစ်မဟုတ်ဘူး၊ အများကြီး ပေးနိုင်ပါတယ်ဆိုတဲ့ သူတွေအတွက်လည်း ၅ မိနစ်ကနေ စ စေ ချင်ပါတယ်။ တစ်နေ့မှ ၅ မိနစ်တည်းလားဗျာ။ ဒီ ၅ မိနစ်နဲ့ ဘာလုပ်လို့ရမှာလဲ။ ကျွန်တော့် အလုပ်တွေက အဲဒီ ၅ မိနစ်ကို အချိန်မပေးနိုင်တာလို့တော့ ဆင်ခြေ မတက်စေချင်ပါဘူး။ အချို့ကလည်း ၅ မိနစ်ကလေးနဲ့ စာဘယ်လောက် ရေးနိုင်မှာမို့လို့လဲလို့ စဉ်းစားချင် စဉ်းစားပါလိမ့်မယ်။

စာရေးဖို့အတွက် အချိန်ဘယ်လောက်ယူမှာလဲ။ ဒါက ပုံသေသတ်မှတ်ထားလို့ မရတဲ့ကိစ္စပါ။ ၅ မိနစ်မှာ စာ တစ်ကြောင်းရေးလို့ ရချင်မှ ရပါလိမ့်မယ်။ ပထမဆုံး ပြောချင်တာကတော့ ၅ မိနစ်မှာ စာမရေးပါနဲ့ဦး။ ဘာရေးမလဲဆိုတာကို စဉ်းစားစေချင်တာပါ။

စာလည်းမရေးနဲ့ဦးလို့ ကျွန်တော်က ပြောလိုက်တဲ့အတွက် ဒာဆို ခင်ဗျား လိုချင်တဲ့ ၅ မိနစ်မှာ ဘာလုပ်ရမှာလဲလို့ မေးလာရင် ဘာမှမလုပ်ပါနဲ့လို့ပဲ ကျွန်တော် ဖြေမှာပါ။ တကယ့်ကို ဘာမှ မလုပ်ရပါဘူး။ ဘာမှမလုပ်ရဘူးဆိုတာနဲ့ ပတ်သက်ပြီး အကြောင်းပြချက် နှစ်ခုရှိပါတယ်။ ပထမအချက်ကတော့ ခင်ဗျား ကိုယ်တိုင် ပြောလာမယ့် “ဘာမှ မဟုတ်တာ” ဆိုတဲ့ ကိစ္စပါပဲ။ ဒုတိယအချက်က အဲဒီအချိန်ကလေး အတွင်းမှာ စိတ်ကို လွတ်လပ်မှု ပေးလိုက်ပါ။ အဲဒီလို လုပ်လိုက်ရင် ဘယ်လိုခံစားရမယ်ဆိုတာ ကိုယ်တွေ့ကြုံတဲ့အခါမှာ သိလာပါလိမ့်မယ်။ ပျောက်ဆုံးသွားပြီးလို့ ထင်ထားတဲ့ စိတ်ကူးတွေက ကိုယ့်ခေါင်းထဲကို အလိုလို ပြန်ဝင်လာပါလိမ့်မယ်။

ဒါကြောင့် ကျွန်တော် ပြောတာပါ။ တစ်နေ့ကို ၅မိနစ်လောက် ဘာမှမလုပ်ဘဲ ထိုင်ကြည့်ပါ။ အကျိုးသက်ရောက်မှု ရှိလာပါလိမ့်မယ်။ Cool Hand Luke ဆိုတဲ့ ရုပ်ရှင်ဇာတ်ကားထဲမှာ ပေါလ်နျူမင် ပါဝင်သရုပ်ဆောင်တဲ့ ဇာတ်ကောင်က ပြောဖူးခဲ့တဲ့ စကားတစ်ခု ရှိပါတယ်။

“တစ်ခါတလေမှာ ဘာမှမလုပ်တာက အများကြီး အကျိုးသက်ရောက်မှု ရှိစေတယ်” တဲ့။

ဒါကြောင့် ၅ မိနစ် အလဟဿ     ထိုင်လိုက်ခြင်းက ကိုယ့်အာရုံတွေကို ပြန်လည်စုစည်းပေးပြီး ရပြီးသားစိတ်ကူးတွေကို ပြန်လည်ရရှိစေနိုင်တာ ဖြစ်ပါတယ်။ အဲဒီအချိန်မှာ စိတ်ပူတာတွေ၊ သောကရောက်တာတွေ ပျောက်ကွယ်နေပြီး ကိုယ့်ဝတ္ထုအတွက် ဆက်ရမယ့် ဇာတ်လမ်းဇာတ်ကွက်တွေ ပေါ်လာပါလိမ့်မယ်။

ဒါကြောင့် ခင်ဗျား လုပ်ရမယ့်အလုပ်က ဘာမှမဟုတ်ပါဘူး။ ၅ မိနစ် ငြိမ်ငြိမ်ကလေး ထိုင်ပြီး အနှောက်အယှက် ကင်းမဲ့စွာနဲ့ စိတ်ကူးတွေကို ပြန်လည်တူးဆွဖို့သာ ဖြစ်ပါတယ်။ ၅ မိနစ်လောက် နေ့လယ် အ်ိမ်မက်မက်တယ်ဆိုရင်လည်း မမှားပါဘူး။

ဒါပေမဲ့ ဒီလို ၅ မိနစ် စထိုင်တဲ့ ပထမနေ့မှာတော့ စိတ်ကူးတွေက စုစည်းလို့ ရဦးမှာ မဟုတ်သေးပါဘူး။ ဒါဆို ဘယ်လို ဆက်လုပ်ရမလဲ။ စိတ်ကူးဆိုတာ ခင်ဗျားရဲ့ စိတ်ကို ငြိမ်ငြိမ်ကလေးထားမှ ပေါ်ပေါက်လာမှာပါ။ ပထမရက်တွေမှာ စိတ်က ဟိုရောက်သည်ရောက် ပျံ့နှံ့နေနိုင်ပါသေးတယ်။ စိတ်ငြိမ်ငြိမ်ကလေး ထားတတ်သွားတဲ့ အချိန်မှာ စိတ်ကူးတွေပေါ်လာပါလိမ့်မယ်။ ဦးနှောက်ရဲ့ လှုပ်ရှားမှုများကို အဓိကထားလေ့လာကြတဲ့ ဆေးပညာ သုတေသီများကလည်း ဒီစကားကို ထောက်ခံပါတယ်။ ဒါကြောင့် ကျွန်တော် ပြောသလို ၅မိနစ်ကလေးပဲ အချိန်ပေးပြီး လုပ်ကြည့်ပါ။

ပထမတော့ ခင်ဗျား ထင်ပါလိမ့်မယ်။ ဂျယ်ရီ ဆိုတဲ့ကောင်က အရူးပဲ။ ၅ မိနစ်အတွင်းမှာ ဘာလုပ်လို့ရမှာလဲ။ အလကား အချိန်ကုန်တာပဲ အဖတ်တင်တယ်လို့ တွေးကောင်းတွေးပါလိမ့်မယ်။ ငြိမ်ငြိမ်ကလေး ထိုင်နေပါဗျာ။ အဲဒီအချိန်မှာ ခင်ဗျားက...

“ငါ ဘာလုပ်နေတာလဲ၊ လုပ်စရာအလုပ်တွေက တစ်ပုံကြီး ရှိသေးတယ်။ ကားကို ရေးဆေးရဦးမယ်။ လက်အောက်ငယ်သားတွေ တင်ထားတဲ့ အစီရင်ခံစာတွေကိုလည်း ဖတ်ရဦးမယ်” စသဖြင့်ပေါ့။

ဒါလည်း ဖြစ်ပါတယ်။ အစပိုင်းမှာတော့ စိတ်မငြိမ်နိုင်သေးတဲ့အတွက် ဒီလို စိတ်ကူးတွေပေါ်မှာပါ။ ဘာပဲဖြစ်ဖြစ် ကျွန်တော် ပြောသလို ၅ မိနစ်သာ ငြိမ်ငြိမ်ကလေး ထိုင်နေစမ်းပါ။ စိတ်ပူစရာတွေ၊ စိတ်ရှုပ်စရာတွေ အတတ်နိုင်ဆုံးမတွေးပါနဲ့။ နေ့စဉ်ရက်ဆက် အဲဒီလိုထိုင်ပေးလိုက်ရင် ခင်ဗျားစိတ်တွေ ငြိမ်လာလိမ့်မယ်။ စိတ်ငြိမ်လာတာနဲ့ အမျှ စိတ်ကူးဥာဏ်တွေလည်း ရင့်သန်လာပါလိမ့်မယ်။

တစ်ခုသတိထားဖို့က ခင်ဗျားဟာ စာရေးချင်သူ တစ်ယောက်ဖြစ်တယ်။ ရေးဖို့လည်း စိတ်အားထက်သန်တယ်။ ဒါကြောင့် ကိုယ့်စိတ်ကူး မရှိဘဲနဲ့တော့ ဘယ်နည်းနဲ့မှ ခင်ဗျား ရေးချင်တဲ့ ဝတ္ထုကို ရေးလို့ပြီးမှာ မဟုတ်ပါဘူး။ ရေးပြီးတော့မှသာ ထုတ်ဝေလို့ ရနိုင်မယ်။ ကိုယ်က သမ္ဘာရင့် စာရေးဆရာလည်း မဟုတ်သေးဘူး။ စာတစ်အုပ် ရေးလိုက်ရင် သိန်းသန်းချီပြီး ရတဲ့သူလည်း မဟုတ်သေးဘူး။ ဒါကြောင့် ကိုယ်ရေးချင်တဲ့ ဝတ္ထုတိုလေး တစ်ပုဒ် အတွက်တော့ ၅ မိနစ်ဆိုတဲ့ အချိန်ဟာ ခင်ဗျား အတွက် ဘာမှ အကျိုးယုတ်သွားမှာ မဟုတ်ပါဘူး။

စိတ်ကူးဥာဏ်က သူ့အလိုလို ဖမ်းချုပ်ထားပြီးသား
-----------------------------------------------

စာရေးချင်တယ်၊ ရေးဖို့စိတ်ကူးတွေလည်း ရှိတယ်။ ဒါပေမဲ့ ဘယ်ကစရေးရမှန်း မသိဘူးလို့ ဖြစ်နေသူတွေ အတွက်လည်း ဒီနည်းနဲ့ပဲ ၅ မိနစ် ငြိမ်ငြိမ်ကလေးထိုင်ပြီး နေခြင်းအားဖြင့် စိတ်ကူးတွေ ပေါ်လာပါလိမ့်မယ်။ အချိန်အားဖြင့်တော့ ၅ မိနစ် ဆိုပေမဲ့ အဲဒီ ၅ မိနစ်အတွင်းမှာ စိတ်ကူးတွေ အတောမသတ် ရနိုင်ပါတယ်။ စိတ်ကူးဆိုတာက လျှပ်စီးလက်သလို ဖျတ်ခနဲ ခေါင်းထဲကို ဝင်လာတာမျိုးပါ။ သိပ္ပံပညာရှင်ကြီး အိုင်းစတိုင်းရဲ့ တီထွင်မှုများစွာဟာ အဲဒီလို ဖျတ်ခနဲ ပေါ်လာတဲ့ စိတ်ကူးတွေကနေ ဖြစ်ပေါ်လာတာပါ။ ဘယ်အချိန်မှာ စိတ်ကူးဝင်လာသလဲလို့ မေးရင်တော့ အဖြေက ရှင်းပါတယ်။ စိတ်ငြိမ်နေတဲ့ အခါမှာ စိတ်ကူးဥာဏ်ဟာ အလိုလိုဝင်လာတာပါ။ ရေချိုးနေရင်း ဖြစ်နိုင်သလို၊ မုတ်ဆိတ်ရိတ်နေရင်းလည်း ပေါ်ပေါက်လာနိုင်တာပဲ။ ဒီတော့ ဝတ္ထုတစ်ပုဒ်အတွက် စိတ်ကူးဥာဏ်ဆိုတာ စာရေးစားပွဲမှာ ထိုင်ပြီး စိတ်ကူးမှသာ ရတာ မဟုတ်ပါဘူး။ စိတ်ငြိမ်နေတဲ့ အချိန်မျိုးမှာ အလိုလို ဝင်လာတာပါ။

တစ်ခါတစ်လေ ဇွတ်ဖျစ်ညှစ်ပြီး စဉ်းစားကြည့်ပါ။ ဘယ်လိုမှ ပေါ်မလာပါဘူး။ ဒါပေမဲ့ မစဉ်းစားတဲ့အချိန် ဖြုန်းဆို သူ့ဘာသာသူ ပေါ်လာတာမျိုးကို ကြုံဖူးကြပါလိမ့်မယ်။ ဒီလို ဘာကြောင့် ပေါ်လာသလဲ ဆိုတော့ သိစိတ် က မစဉ်းစားတော့ဘူးလို့ လက်လျှော့လိုက်ပေမဲ့ မသိစိတ်က သူ့အလိုလို ဆက်ပြီး အလုပ်လုပ်နေတာမို့ ဖြုန်းဆို ပေါ်လာခြင်း ဖြစ်ပါတယ်။

ဒါကြောင့် ကျွန်တော် ပြောတဲ့ ၅ မိနစ်ဆိုတဲ့ အချိန်ဟာ စာရေးဖို့ ကြိုးစားနေသူများအတွက်၊ ရပြီးသား စိတ်ကူးကို ပြန်မဖေါ်နိုင် ဖြစ်နေသူများ အတွက် အင်မတန် အကျိုးများစေမှာ ဖြစ်ပါတယ်။ စာကို ဆက်တိုက်ရေးနေရင် စိတ်ကူးတွေက မြစ်ထဲမှာ စီးနေတဲ့ ရေများလို တသွင်သွင် စီးဝင်လာမှာ ဖြစ်ပေမဲ့ ရေးလက်စကို ဖြတ်ထားပြီးတဲ့ နောက် ဆက်ရေးဖို့ ကြိုးစားတဲ့အခါမှာတော့ စိတ်ကူးရေစီးက ရပ်တန့်သွားပြီး ဖြစ်တာမို့ ပြန်လည်စီးဆင်းလာနိုင်ဖို့ ဒီနည်းနဲ့ ကြိုးစားကြည့်ပါလို့ တိုက်တွန်းချင်ပါတယ်။

                                        ဝင်းငြိမ်း
                                 ရွှေအမြုတေမဂ္ဂဇင်း
                            ၂ဝ၁၁ ခုနှစ်၊ အောက်တိုဘာ။

  
           *********%%%%%%*******

"၀ထ္ထုတစ်ပုဒ်ကို စကားပြောနဲ့ စလို့ ရပါသလား "
============================

                                               #ဝင်းငြိမ်း                                                                                                                                                                                                        

လစဉ်နဲ့အမျှ ရွှေအသစ် ကဏ္ဍကို ရောက်ရှိလာတဲ့ ၀ါသနာရှင်များရဲ့စာမူ ပေါင်းများစွာကို ဖတ်ရပါတယ်။
ဒါပေမဲ့ ကျွန်တော် ဖတ်ခဲ့ရတဲ့ စာမူ အားလုံးမှာ နေရာ အခင်းအကျင်းကို ဖော်ပြတဲ့ အရေးအသား များနဲ့သာ စတင်ပြီး ၀တ္ထု ကို ဖွင့်တတ်ကြပါတယ်။
Writers မဂ္ဂဇင်းမှာ ၀တ္ထု အဖွင့်နဲ့ ပတ်သက်ပြီး ၀ါသနာရှင် တစ်ယောက်က “၀တ္ထု အဖွင့်ကို စကားပြောနဲ့ ဖွင့်လို့ ရပါသလား” လို့ မေးပါတယ်။ ဒီအခါ ၀ါသနာရှင်များ သိလိုတဲ့ အချက် အလက်များကို ပြန်ကြား ပေးနေတဲ့ ကဏ္ဍမှ စာရေးဆရာမ Brandi Reissenweber က ပြန်လည် ဖြေကြား ပေးခဲ့ပါတယ်။ သူ့အဖြေများကို လေ့လာ ကြည့်ခြင်းအားဖြင့် ၀ါသနာရှင် ရွှေအသစ်များ အနေနဲ့ ဇာတ်အဖွင့် ပုံစံ တစ်ခုကို တွေ့နိုင်မှာ ဖြစ်လို့ နှစ်ကြောင်းရေး တစ်ကြောင်းခြစ် ကဏ္ဍမှ ဖော်ပြ ပေးလိုက်ပါတယ်။
ဝတ္ထု အဖွင့်ကို စကားပြောနဲ့ ဖွင့်လို့ ရပါသလား မေးလာရင် ကျွန်မကတော့ ရပါတယ်လို့ ဖြေမှာ ဖြစ်ပါတယ်။ ဥပမာအားဖြင့် အင်တန်ချက်ကော့ဗ် ရေးခဲ့တဲ့ My Life ၀တ္ထုရဲ့အဖွင့်ကို ဥပမာ ပေးချင်ပါတယ်။ သူက ဒီလိုရေးထားပါတယ်။
ဒါရိုက်တာက ကျွန်တော့်ကို “မင်းကို ဒီမှာထားတာ မင်းအဖေရဲ့ သိက္ခာကို လေးစားလို့၊ အဲဒီလိုမှ မဟုတ်ဘူး ဆိုရင်တော့ ဒီနေရာကနေ မင်းကို ကန်ထုတ်လိုက်တာ ကြာပြီ” ဟုဆိုသည်။
Guilt ဆိုတဲ့ ၀တ္ထုတိုမှာလည်း စာ ရေးဆရာမ ဂျူဒီဘတ်နစ်ဇ်က ဒီလိုရေး ခဲ့တာ ဖတ်ခဲ့ရဖူးပါတယ်။
“မင်းက ဘယ်လိုသားလဲ” ဟု အန်တီဖရန်က ဆိုသည်။
ဒီဝတ္ထု နှစ်ပုဒ်ရဲ့အစကို ကြည့်မယ် ဆိုရင် နှစ်ပုဒ် စလုံးက ပြဿနာ တစ်စုံတစ်ခုနဲ့ စထားတယ် ဆိုတာ သိသာပါတယ်။ ဂျူဒီ ဆက်ရေးတာကို လေ့လာ ကြည့်ရအောင်ပါ။ အန်တီနီနာကလည်း “ဒါ မင်းရဲ့ သွေးရင်း သားရင်းပါနော်”ဟု ဆိုပြန်သည်။
“မင်းအမေကဖြင့် မင်းအတွက် ဆိုရင် ဘာမဆို လုပ်မယ့် မိန်းမ၊ မင်းနဲ့ ပတ်သက်လာရင် ကမ္ဘာပေါ်မှာ သူ မလုပ်နိုင်တဲ့ အလုပ် ဘာမှ မရှိဘူး”ဟု အန်တီဖရန်က တဖျစ်တောက်တောက် ဆက်ပြောပြန်သည်။
“တကယ်ဆိုရင် မင်းက အခု မင်း အမေအတွက် နည်းနည်းလေးတော့ စောင်းငဲ့ ကြည့်သင့်ပါတယ်...ရှက်စရာ ကောင်းလိုက်တာ”ဟု အန်တီနီနာက စကားဆက်ပြန်သည်။
“တော်ပါသေးရဲ့၊ ငါ့မှာ ကလေး တစ်ယောက်မှ မရှိတာကိုဘဲ ၀မ်းသာရ သေးတယ်။ ကလေးတွေကို လူတစ်လုံး သူတစ်လုံး ဖြစ်အောင် ကြိုးစား မွေးလာပြီးမှ သူ့လို သားသမီးမျိုးနဲ့ တွေ့ရင်တော့ ရင်ကျိုးရချေရဲ့”ဟု အန်တီဖရန် က ငိုသံကြီးနှင့် ပြောလိုက်သည်။ ရာသီ ဥတုက ပူနေသော်ငြားလည်း အန်တီက သူ့ဆွယ်တာကို ဆွဲပြီး ရင်ဘတ်ကို စေ့လိုက်သည်။
စာဖတ်သူ အနေနဲ့ ဒီအခြေအနေကို ဖတ်လိုက်ရင် ညီအစ်မ နှစ်ယောက်က မိခင် အပေါ်မှာ မသိတတ်တဲ့ သားတစ်ယောက်ကို ပြောဆို နေကြတယ် ဆိုတာ သိသာ နိုင်ပါတယ်။ ဇာတ်လမ်းက ဒီလိုပါ။ အာနီရဲ့အမေက အသည်းရောဂါဖြစ် နေတယ်။ ရိုးရိုးဆေးဝါးနဲ့ ကုလို့ မရ တော့ဘူး။ အသည်းအစားထိုးတဲ့ နည်း နဲ့သာ ကုမှရတော့မယ်။ ဒါကြောင့် အန်တီဖရန်နဲ့ အန်တီနီနာတို့က အာနီ အနေနဲ့ သူ့အသည်းကို အမေ အသက် ရှင်ဖို့အတွက် ပေးသင့်တယ်လို့ ယူဆကြပြီး တိုက်တွန်းနေကြတဲ့ ဇာတ်ဝင်ခန်းပါ။ ဒီဝတ္ထုမှာ စကားပြောနဲ့ ဖွင့်လိုက်ပြီး ပဋိပက္ခကို မြင်သာစေပါ တယ်။ ညီအစ်မနှစ်ယောက်က သူတို့ အစ်မ အသက်ရှင်ဖို့ အတွက် တူဖြစ်သူကို အသည်းလှူဖို့ နားချနေကြပေမယ့် တူဖြစ်သူက မလှုပ်တဲ့ အတွက် အားမလို အားမရ ဖြစ်နေတာကို သိသာစေပါတယ်။
တခြားအခန်းကို ဆက်မသွား ခင်မှာဘဲ ဇာတ်ဝင်ခန်းရဲ့ အခြေအနေကို စာဖတ်သူက သိသွား စေပါတယ်။ ဒါ ကြောင့် စကားပြောနဲ့ စဖွင့်တဲ့ ၀တ္ထုများက အဓိက အားဖြင့် ဘာပြောတယ် ဆိုတာကို အားပြုပါတယ်။ ဘယ်နေရာမှာ၊ ဘာကြောင့်ပြောတယ် ဆိုတာကို အလေးထားစရာ မလိုတော့ပါဘူး။
စကားပြောနဲ့ စတဲ့ ၀တ္ထုများကို လေ့လာကြည့်မယ်ဆိုရင် ဒီသဘော အတိုင်း ဖြစ်တယ်ဆိုတာကို တွေ့ပါလိမ့်မယ်။ စာရေးသူ အတော်များများက ၀တ္ထု တစ်ပုဒ်ကို စတယ်ဆိုရင် စာဖတ် သူ သိအောင် ပတ်ဝန်းကျင် အခြေအနေ ကစပြီး ရေးတတ်ကြတာ တွေ့ရပါလိမ့်မယ်။ စာရေးဆရာ ရေမွန်ကာဗာ ရေးခဲ့တဲ့ Whoever was Using This Bed မှာဆိုရင် စကားပြောတွေကို အား ပြုပြီး တောက်လျှောက် ရေးဖွဲ့ထားတာ တွေ့နိုင်ပါတယ်။ သူ့ဝတ္ထု အစက ဒီလိုပါ။
ညဥ့်နက်သန်းခေါင် မနက် ၃ နာရီ ခန့်တွင် တယ်လီဖုန်း မြည်လာခြင်းက ကျွန်တော်တို့ကို ထိတ်လန့် သွားစေခဲ့သည်။
“ဖြေလိုက်လေ...ဖြေလိုက်” ကျွန်တော့် ဇနီးသည်က ကမန်းကတန်း ပြောလာသည်။ “ဘုရား...ဘုရား၊ ဘယ်သူများပါလိမ့်...၊ ရှင် ဖုန်းကိုင် လိုက်လေ”
နေရာ ဌာနနဲ့ အချိန်ကို ဖော်ပြလိုက် ခြင်းအားဖြင့် ပထမ စာကြောင်း တစ်ကြောင်းတည်းနဲ့ပင် စာဖတ်သူက ဇနီးသည်ဟာ ထိတ်လန့်တုန်လှုပ်တတ်သူ ဖြစ်ကြောင်း သိသွားပြီ ဖြစ်ပါတယ်။
ဂျူဒီဘတ်နစ်ဇ်ကလည်း သူမ ၀တ္ထုတို တစ်ပုဒ်ဖြစ်တဲ့ Dog Days မှာ ဒီလို ရေးဖွဲ့ခဲ့ဖူးပါတယ်။
ဆု(တ)၀တ်ထားတဲ့ လူတစ်ယောက်က တံခါးပေါက်ဝမှာ ရပ်လာ သည်။
“လာပြန်ပြီလား”အမေက သက်ပြင်းချရင်း ဆို၏။
“ငါ့သေနတ် ဘယ်မှာလဲ”အဖေ့ အသံကို ကြားရသည်။
အစ်ကိုက “ဒီတစ်ခါတော့ ကျွန်တော်တို့ ရှင်းမှ ဖြစ်တော့မယ်”ဟု ပြောသံကြားလိုက်ရသည်။
ဒီစာပိုဒ်မှာတော့ စာကြောင်းလေး ငါးကြောင်း ဖတ်ရုံနဲ့ စာဖတ်သူက တံခါးဝမှာ ရပ်နေတဲ့ လူအကြောင်းကို မသိနိုင်သေးပါဘူး။ အိမ်ထဲမှာ ရှိတဲ့ ဇာတ်ကောင် သုံးယောက်ရဲ့ မလိုလားတဲ့ စကားသံများကိုသာ ကြားနေရတာ ဖြစ်ပါတယ်။
ဒါကြောင့် ၀တ္ထုတစ်ပုဒ်ကို စတော့ မယ်ဆိုရင် ပတ်ဝန်းကျင် အခြေအနေ ဖော်ပြတဲ့ အခင်းအကျင်းနဲ့သာ မကဘဲ စကားပြောများနဲ့လည်း စနိုင်ကြောင်း သတိ ထားသင့်ပါတယ်။

    

                                    ၀င်းငြိမ်း
                             ရွှေအမြုတေ မဂ္ဂဇင်း၊
                           စက်တင်ဘာလ ။၂၀၁၁။