"သာလိကာ"
=========
#နေဝင်းမြင့်
ဟော ... ဦးလေးက သည်မှာလား။ ဟင်း … ဦးလေးကြီးတို့ အခန်းကလည်း ညစ်ပတ်လိုက်တာ ကြည့်ပါဦး။ စားပွဲ အစုတ်ကြီးရော၊ ဝါလုံးတွေရော၊ သည်ဗီရို အဟောင်းကြီးက ဦးလေးကြီးတို့ ဟာလား။ စက်ရုံက ပိုင်တာပေါ့နော်။ ဘာတွေ ထည့်တာလဲ စာအုပ်တွေလား၊ ဘာလုပ်တာလဲ ရောင်းစားပါလား။ အဟောင်းတွေဆို နှစ်ဆယ့်လေးကျပ်တောင် ရတယ် တစ်ပိဿာကို။ သမီး ကျောင်းစာအုပ် အဟောင်းတွေရောင်းတာ ငါးဆယ်သားကို ဆယ့်နှစ်ကျပ် ဆိုတော့ နှစ်ဆယ့်လေးကျပ် ဈေးပေါ့ ဦးလေးရဲ့ ရောင်းလိုက်ပါလား၊ ရောင်းလို့ ဘယ်ရမလဲနော်။ အစိုးရဟာတွေလား၊ ဦးလေးတို့က ဘာလုပ်တာလဲ၊ အုတ်ကားတွေ ထွက်လာရင် ဦးလေးတို့က စစ်ရတာ ဟုတ်လား။ အုတ်တွေက အများကြီးနော်။ ကားပေါ်မှာ တင်ထားတာကို ဘယ်လို ရေသလဲ၊ သမီးတို့ ဆိုရင် တော်တော် စိတ်ညစ်မှာပဲ။ အခု ကောက်ညှင်းထုပ် ရောင်းတာတောင် တစ်ခါ တစ်ခါလေ ဘယ်နှစ်ခု ထည့်မိမှန်း မသိဘူး။ အမေက မနက်က အထုပ် ၅၀ ဆိုတော့မှ ပြန်ရေ ရတယ်။ တစ်ခါ တစ်ခါလည်း မှားတာပဲ။ အမေက ဦးလေးကြီး သိသားပဲ၊ တစ်ခါ တစ်ခါ ရေတာ သူ့ဟာသူ မှားလည်း သမီး မှားတာပဲ လုပ်တာ။ ဦးလေးတို့ အမေ့ကို မှတ်မိလား မကြည်ညွန့် လေ။ ဦးလေးတို့ တန်းလျားမှာ နေတုန်းက မသန်းမြင့်တို့နဲ့ အခန်းချင်း ကပ်နေတာ မဟုတ်လား။
သူတို့အခန်း သည်ဘက်က ဦးကုလား၊ မလှမြိုင် ယောက်ျား ကိုကုလား လေ၊ ခဏ ခဏ စကားတွေ များတယ်လေ၊ နောက်တော့ မလှမြိုင်က လင်နောက် လိုက်သွားတယ်လေ၊ အဲသည်အခန်း ပြီးတော့ နောက်တစ်ခန်းက လူမရှိဘူးလေ မှတ်မိလား။ ပြီးတော့မှ သမီးတို့ အခန်း၊ အဖေက ဦးသန်းညွန့် လေ၊ မီးဖိုကလေ၊ အုတ်တွေ မီးဖုတ်တဲ့ ဌာနလေ၊ ဟိုအောက်စက်ကလေ ဦးလေးကြီးတို့ စက်က မဟုတ်ဘူး အောက်စက်က။ အဖေက ခြေထောက်တစ်ဖက် မကောင်းဘူး။ နှိပ်တော့လည်း နှိပ်တာပါပဲ ဦးလေးရယ် မပျောက်ပါဘူး။ မြန်မာဆရာ ကြူစန်းမှာ ကောင်းတယ် ဆိုလို့လည်း အမေက သွားတာပဲ။ ပိုက်ဆံ ကုန်တာပဲ။ လှော်ကားက ပျောက်တယ်ဆိုလည်း အမေက သွားတာပဲ ပိုက်ဆံ ကုန်တာပဲ၊ အခု ဆရာဝန်နဲ့ ဆေးထိုး နေတာလည်း ခြေထောက်က လေးတုန်းပဲတဲ့၊ လမ်းသွားလို့တော့ ရပါတယ် လေးတာ။ အဖေက လေးတာကြီးကို မကြိုက်ဘူးတဲ့။ လေးတာ ဘာဖြစ်လဲနော်။ လမ်းသွားရရင် ပြီးတာပဲ၊ မဟုတ်ဘူး တစ်နေ့ တစ်နေ့ စိတ်ညစ်လို့တဲ့ အမေ့ကိုလည်း ရန်လုပ်တယ်။ အမေက ရန်ဖြစ်တဲ့နေ့ဆို ဆေးခန်းကို မပို့တော့ဘူး။ အဖေကလည်း မသွားတော့ဘူး။ ရန်မဖြစ်တဲ့ နေ့ဆို အမေက ပို့ ပြန်ရော။ ဆေးတစ်လုံး ထိုးရင် အစိတ်တဲ့ ဆေးလုံးပါရင် လေးဆယ်လောက် ကုန်တယ်တဲ့၊ အဖေ ဦးသန်းညွန့်ကို သိတယ် မဟုတ်လား။ သူ့ မိန်းမလေ မကြည်ညွန့် လေ။ ဦးလေး မှတ်မိမှာပါ။ အခု ဦးလေးတို့ ဘယ်မှာ နေတာလဲ၊ ရွှေပြည်သာ မှာလား။ ရွှေပြည်သာ ဘယ်နားမှာလဲ၊ ခေါင်းသုံးလုံးလား၊ ကားကြီးဂိတ်လား၊ တံတားကြီးလား၊ သမီး ရောက်ဖူးသားပဲ၊ တံတားကြီးကတော့ ဝေးတယ်နော်။
ဒါလား တစ်ခု တစ်ကျပ်ပဲ ရောင်းတာပါ။ မပါးပါဘူး ဦးလေးရဲ့ ထူပါတယ်။ အမယ် တစ်ခုတစ်ကျပ် ရတာ ကံကောင်း၊ ကောက်ညှင်းတစ်ပြည် ဘယ်လောက် မှတ်လို့တုန်း၊ အဲဒါ မပြောနဲ့ ဖက်တောင် ဈေးကြီးတယ်။ အုန်းသီးကလည်း ဈေးကြီးတယ်။ ငှက်ပျောသီးနဲ့ လုပ်တဲ့ ကောက်ညှင်းထုပ်က လူသိပ်မကြိုက်ဘူး။ ရိုးရိုးပဲ လူတွေက စားတာ၊ အရင်ကလား၊ ဒီပေါ် တစ်ခါမှတောင် တက်မရောင်းဖူးပါဘူး။ သမီး ညီမလေးတွေ လာတယ်။ လင်ဂန်းလေ၊ ကုလားလေးလေ၊ သူတို့ လာရောင်းတယ်။ နောက်သည်ထဲက မိန်းမကြီးတွေကလည်း သူတို့အိမ်က မုန့်တွေ လုပ်လာပြီး ရောင်းတယ်။ ဦးလေး မတွေ့ဘူးလား။ မြေပဲလှော်တွေ၊ ငှက်ပျောသီးတွေ၊ ရွှေချည် ဆနွင်းမကင်းတွေ ရောင်းနေတာ။ ဦးလေး ဝယ်စားတယ် မဟုတ်လား။
သမီး ကောက်ညှင်းထုပ်လည်း ဝယ်စားဦး၊ ဒါပဲ၊ မရဘူး။ စိတ်တောင် ပျက်ပါတယ် ဦးလေးရယ်။ ရောင်းလည်း မရောင်းရဘူး။ လေး ငါးခုပဲ ရောင်းရတယ်။ သည်မှာ ကြည့်ပါလား၊ ဘာရှိသေးလို့လဲ၊ နေဦး ဆယ့်ငါးကျပ်တန်ရယ်၊ ဆယ်တန်ရယ်၊ အခုရောင်းတဲ့ ကျပ်တန်တွေရယ် နှစ်ဆယ့်ကိုးကျပ်ဖိုးပဲ ရောင်းရသေးတယ်။ အခု ဘယ်နှစ်နာရီလောက် ထိုးပြီလဲ၊ မကုန်ရင်တော့ မောကြောပဲ။ အမေကတော့ ခေါက်မှာပဲ။ ဘူတာရုံမှာ ခါတိုင်းရောင်းတာ ရောင်းရတယ် ဦးရဲ့၊ လင်ဂန်းက သည်မှာ တက်ရောင်းပါလား ဆိုလို့၊ အလကား ကုလားလေး၊ ဟုတ်တာလည်း မဟုတ်ဘူး။ သူက ကနေ့ ဒီကို မလာဘူးလေ။ သမီးကို ပတ်ပြီး သူက ဘူတာရုံကို သွားနေလားမှ မသိတာ။ လင်ဂန်းကလည်း သနားပါတယ်။ သူ့ အမေကို လုပ်ကျွေးနေတာ။
အောင်မယ် ဒီကောင်က အရုပ်လည်း ပိုက်ဆံကြေး ပစ်တယ်။ လူကြီးတွေနဲ့ ပစ်တာ။ နေ့တိုင်း ရှုံးတာပေါ့။ လက်မှ မတည့်တာ။ ရှုံးတာတောင် နည်းသေးတယ်။ သူ့ အမေကို သမီးတိုင်ရင်လည်း သူ့ အမေက ရိုက်တာပဲ။ ဒါလည်း မမှတ်ဘူး။ သမီးကတော့ အကုန် ပြန်ပေးတာပါ။ ကျောင်းနေတုန်းကတော့ နည်းနည်းပါးပါး ခိုးထားတယ်။ ခိုးတယ် ဆိုတာက သမီး စားလိုက်တာ ဆိုပြီးတော့ ပိုက်ဆံ ယူလိုက်တာပါ။ အခု ကျောင်းထွက်လိုက်တော့ မခိုးတော့ပါဘူး။ တစ်ခါတလေ ရေခဲထုပ်နဲ့ လဲစားရင်တော့ စားတယ် ဒါပဲ။ အခုကျောင်းက ထုတ်လိုက်တာ နှစ်နှစ်တောင် ရှိပြီ။ စာတော့ တော်ပါတယ်။ ဆက်နေရင် အခု လေးတန်း ရောက်ပြီလေ။ သမီးလည်း ကျောင်းဆက်နေရင် လေးတန်းပဲ။ ကျောင်းမနေချင်ပါဘူး ဦးလေးရယ်။
ကျောင်းတက်တာ ပိုက်ဆံ မရပါဘူး။ ဈေးရောင်းတာက ပိုက်ဆံရတာ၊ အမေက ညည်းသဘော ဆိုတော့ သမီး ထွက်လိုက်တာပဲ။ အဖေနဲ့ အစ်ကိုက ရိုက်သေးတယ်။ အမေက တားလို့၊ အခုတော့ အဖေက ခြေထောက်လည်း လေဖြတ်ရော တော်သေးတယ် ငါ့သမီး ဈေးရောင်းလို့ တဲ့။ အစ်ကိုကြီးကတော့ စစ်ထဲ ဝင်သွားပြီ၊ သူလည်း ကျောင်းကောင်းကောင်း မနေရဘဲနဲ့ လှည်းတွန်းလိုက်၊ ဟိုသွားလိုက်၊ သည်သွားလိုက်နဲ့ အခုတော့ စစ်တပ်ထဲ ရောက်သွားပြီ။ အရင်လက စာလာတယ်။ သင်တန်းဆင်းပြီး သွားပြီတဲ့ ဓာတ်ပုံလည်း ပါတယ်။ အသားတွေလည်း မည်းလို့ ရှေ့ တန်း သွားရတော့မှာလား မသိဘူး။ အစ်ကိုကြီးတော့ သနားပါတယ်။ အမေက အစ်ကိုကြီး ဓာတ်ပုံကို ထရံမှာ ညှပ်ထားတယ်။ တစ်ခါ တစ်ခါ ငိုတယ်။ အလတ်ကောင် အစ်ကိုကြီး အောင်ကျော်ညွန့်ကို သိလား။ ဦးလေးတို့ တန်းလျားမှာ နေတုန်းက သူများအိမ်အောက်က ပိုက်ဆံတွေ၊ ဇွန်းတွေကျရင် လိုက်လိုက် ကောက်တဲ့ ကောင်လေ သိလား။ သွားနည်းနည်း ပဲ့နေတဲ့ ဟာလေ။ သူက အခု ဝပ်ရှော့မှာ ထမင်းစား တစ်နေ့ သုံးဆယ်တောင် ရတယ်။ တစ်လကိုးရာ။ အဲဒါကိုတောင် ကောင်းကောင်း မလုပ်ချင်ဘူး။ ပြန်လာချင်တယ်။ မလုပ်ချင်ဘူး ဆိုတော့ အမေက ဆဲတော့မှ ဆက်လုပ်တယ်။
ကိုင်းလေ ကိုးရာ နည်းသလား၊ အခု ရည်းစား ထားတယ်တဲ့၊ ပိုက်ဆံတွေ ခဏခဏ တောင်းတယ်တဲ့။ ဝပ်ရှော့က ဦးလေးက အမေ့ကို တိုင်တယ်။ သမီးအစ်မကော မှတ်မိလား။ ဦးလေးတို့ အိမ်ကို ငယ်ငယ်က လာလာ ကစားတာလေ။ သူက ကုန်စိမ်း ရောင်းတယ်။ ခေါင်းလျှော်ရည် ရောင်းတယ်။ သူ့ဟာသူ ခေါင်းလျှော်ရည် လုပ်တတ်သွားပြီ။ အောင်မယ် မြတ်တယ်။ ကန်စွန်း တစ်စည်းကို ပြားရှစ်ဆယ်နဲ့ ယူပြီး တစ်ကျပ်ခွဲနဲ့ ရောင်းတာ မမြတ်ဘဲ နေပါ့မလား။ ဒါပေမယ့် သူ့ ပိုက်ဆံက အိမ် မပါဘူး။ တော်ကြာရင်း အင်္ကျီစ မှာလို့၊ တော်ကြာရင်း မိတ်ကပ်ဘူး မှာလို့၊ တော်ကြာရင်း စနိုး မှာလို့နဲ့ ပြီးနေတာ။ အမေက သူ့ သမီးကျ ဘာမှ မပြောဘူး။ သူရှာတာ သူဝတ်ပါစေအေ တဲ့။ လူကဖြင့် ဆယ့်နှစ်နှစ်တောင် မရှိသေးဘူး။ ရည်းစားထားလို့တဲ့ အမေသတ်တာ ဘာပြောကောင်းမလဲ။ ထားဦးဟ ထားဦးဟ နန့်ဦးဟ ဆိုပြီး သတ်တာ။ အခုတော့ မထားတော့ဘူး။ ထားတာကလည်း ကြည့်ဦး ဆိုက်ကားသမားကို ထားတာ။
အဲဒီ ကောင်လေးက လူက ငယ်ငယ်လေး အရက် သောက်တယ်တဲ့။ ပိုက်ဆံတော့ တော်တော်ရတယ်။ ဒါပေမယ့် ဘယ်သဘောတူမှာလဲ။ အစ်မက ငယ်ငယ်လေး ရှိသေးတာ။ လုပ်ပါဦး ဦးလေးရဲ့ ဝယ်စားစမ်းပါဦး။ နှစ်ဆယ့်ကိုးခုပဲ ရောင်းရသေးတယ်။ အများကြီးကို ကျန်သေးတယ်။ လင်ဂန်းလေ သေနာကောင် ချောက်တွန်းတာ။ ရောင်းလဲ မရောင်းရဘဲနဲ့။ အိမ်မှာတော့ အဖေကလည်း လုပ်တယ်။ အစ်ကိုလတ်လည်း လုပ်တယ်။ အစ်မလည်း ဈေးရောင်းတယ်။ အစ်ကိုကြီးကတော့ ထားလိုက်တော့ အဝေးမှာ ဆိုတော့၊ အဲဒါ မလောက်ဘူး။ တစ်ခါလာလည်း ချဉ်ပေါင်ရွက် တစ်ခါလာလည်း ချဉ်ပေါင်ရွက်ပဲ၊ ငါးပိရေကတော့ နေ့တိုင်း။ အမေက မစားနိုင်တဲ့လူ အိမ်ပေါ်က ဆင်းကြ၊ လင်ယူကြ၊ မယားယူကြတဲ့၊ သမီးက ဘယ်နှယ့်လုပ် လင်ယူမလဲနော်။
အမေက စိတ်ညစ်လို့ ပြောတာ နေမှာပေါ့။ သူ့ ညီမတွေက တန်းလျားခန်းကို ဘေးက အဖီတွေနဲ့ နေတဲ့လူက နေတယ်။ ဒေါ်လေးနဲ့ သမီးတို့ အဘွားက နောက်ဖေးမှာ အခန်းလေးနဲ့ နေတယ်။ သူတို့ မရှိဘူး ဆိုရင်လည်း အမေပဲ။ သူတို့ ဟင်းမရှိဘူး ဆိုရင်လည်း အမေပဲ။ နေမကောင်းလို့ ဆေးထိုးမယ် ဆိုလည်း အမေပဲ။ အမေက သူ့ အမေကိုတောင် ပြန်ဆဲတယ်၊ ပြန်အော်တယ်။ အဘွားက ဆဲပါအေ၊ ညည်းက ဆဲရမယ့် နေရာမှာကိုတဲ့၊ ဘုန်းကြီးပါစေ။ သက်ရှည်ပါစေတဲ့၊ ဆုတောင် တောင်းလိုက်သေးတယ်။ မျက်ရည်တော့ ကျတယ်။ တစ်ခါတော့ ဒေါ်လေးနဲ့ အမေနဲ့ သတ်ကြရော။ ပြီးလည်းပြီးရော အမေက အားလုံးကို နှင်ထုတ်တော့တာပဲ။ သွားကြ တစ်ယောက်မှ မနေနဲ့ ဆိုတော့မှ ငြိမ်သွားတော့တယ်။ အခုတော့ အတူတူပါပဲ။ ဒေါ်ကြီးမြအေး ကလည်း ကောက်ညှင်းထုပ် ထုပ်ရောင်းရတာပဲ။ သူက သည်မှာ မရောင်းဘူး။ ဖော့ကန်ဈေး သွားရောင်းတယ်။
မနက်ပိုင်း ရောင်းတယ်။ ပြန်လာမှ ဆန်ဝယ်လာပြီး ချက်တယ်။ သူ့ ယောက်ျားက သေပြီလေ။ ကြာလှနေပြီ။ ဦးလေးကလည်း တောမှာ နေကြတာ ဦးလေး ဘယ်သိမှာလဲ။ သမီးတောင် မတွေ့ဖူးဘူး။ သဘောကောင်းတယ်တဲ့။ စပါးရိတ်ရင်း မြွေကိုက်တာတဲ့။ ဆေးရုံတောင် မရောက်ဘူး သေရော။ ဒေါ်ကြီးက တောမှာ လုပ်ကိုင်စားသေးတယ်။ လေးငါးနှစ် တောမှာပဲ နေတာ။ သားနှစ်ယောက် ရှိတယ်။ ဇော်လင်း တဲ့၊ အောင်လင်း တဲ့၊ နှစ်ယောက်။ အဲဒီ ကလေးတွေကတော့ တောမှာ သူတို့ ဘိုးအေတွေက မွေးစားလိုက်တော့ ဒေါ်ကြီးပဲ ကျန်တာ။ နောက်တော့ အမေက သည်လာခဲ့ပါလား ဆိုတော့ ခဏရယ်လို့ လာတာ။ မပြန်ဖြစ်တော့ဘူး။ တစ်လောက ပြဿနာ တက်တာ ဦးလေး ကြားလား၊ မကောင်းတာ လုပ်စားတယ် ဆိုပြီး ရပ်ကွက်လူကြီးတွေက နှင်မယ် လုပ်တော့ ကောက်ညှင်း ပြန်ထုပ်တာ၊ အမေက ဟဲ့ ... ငါတို့ အမျိုးထဲမှာ ဒါမျိုး မရှိဘူးဟဲ့ ...မရဲ့၊ ...မရဲ့ နဲ့ အော်တာ၊ လူတွေ ဆိုတာမှ ထွက်ကြည့်ကြတာ အများကြီးပဲ။
အမှန်က ကောင်လေးတွေနဲ့ ရုပ်ရှင် သွားကြည့်တာတဲ့။ ကောင်လေးက သုံးယောက် ဒေါ်ကြီးက တစ်ယောက်တဲ့။ ရုပ်ရှင်က ပြန်လာတော့ ရထားလမ်းက ပြန်လာတယ်တဲ့၊ ရထားလမ်းက မှောင်ပိန်းနေတာ၊ အဲသည်က ပြန်လာသတဲ့။ အဲဒါကို ဘယ်သူမှ မသိဘူး။ နောက်မှ သိတာ။ အမေက ဘာမှ မပြောဘူး။ ဒေါ်ကြီးကိုပဲ ဆူတယ်။ ဒေါ်ကြီးကလည်း ပြန်ရန်တွေ့တာပဲ။ ငါ့ဟာငါ သွားတာ ဘာဖြစ်လဲ၊ ငါ့ကို ဘယ်ကောင်မက လာ ကတုံးကတိုက် လုပ်တာလဲ၊ ပါးဆွဲချမယ်လို့ အော်တော့ အမေက သူ့ ညီမကို ပါးရိုက်ရော။ အဘွားကလည်း ငိုရော။ ဆူညံ သွားတာပဲ။ နောက်လည်း ဟိုလူနဲ့သွား၊ ဒီလူနဲ့သွား သွားတာကို လူတွေက ပြောတာပေါ့။ အဲဒါကို ဦးလေးရယ် မကောင်းတာ လုပ်စားတယ်တဲ့။ လူတွေက သွားပုပ်လေလွင့် ပြောတာပါ ဦးလေးရယ်။
တစ်နေ့တော့ အမေက ညဘက် ဒေါ်ကြီးကို ခေါ်မေးတယ်။ ညည်းတဲ့ လင်ယူရင်လည်း သင့်တော်တဲ့လူကို ယူပါလား တဲ့။ ညည်း ကောက်ညှင်း မထုပ်ဘဲ ဘာနဲ့ စားနေတာလဲ တဲ့။ မဟုတ်တာ မလုပ်နဲ့နော် တဲ့။ ကောင်းကောင်း ပြောတာကို ငါ့ဟာငါ ဘာဖြစ်လဲ၊ ညည်းအပူ တစ်ပြားသားမှ မပါဘူး ဆိုတော့မှ အမေနဲ့ ရန်ဖြစ်ရော၊ ရပ်ကွက်လူကြီးတွေက လာပြီး နှင်ထုတ်ရော၊ အဲဒီတော့မှ ဒေါ်ကြီးကလည်း ကောက်ညှင်း ပြန်ထုပ်တာ။ အခုလည်း အိမ်မပြန်တာ လေးငါးရက် ရှိပြီ။ မလာပြန်ဘူး။ ခါတိုင်းတော့ တစ်ရက်တလေပဲ မလာတာ။ ကောက်ညှင်းထုပ်တော့ ပြန်ထုပ်သေးတယ်။ အခုတော့ ကောက်ညှင်း ဘယ်မှာ သွားထုပ်လဲ သမီးလည်း မသိဘူး။ အဝတ်အစားလည်း လာမလဲဘူး။ ရေလည်း လာမချိုးဘူး။ နေတတ်တယ် တကယ်ပဲ။
ဟော … စားပါဦး ဦးလေးရဲ့ ရွံလို့လား၊ တန်းလျားတုန်းက ဦးလေး စားပါတယ်။ အခု ရွှေပြည်သာ ပြောင်းသွားတော့မှ ရွံသွားတာလား။ သန့် ပါတယ်နော်။ အမေက သန့်ရှင်းမှ ကြိုက်တာ။ ကောက်ညှင်းဆိုလည်း ကောင်းတာမှ လုပ်တာပါ။ ဒေါ်လေးက အုန်းသီး ခြစ်ပေးတယ်။ ဒေါ်လေးကိုတော့ ဦးလေး သိပါတယ်။ ဦးအေးသောင်း မိန်းမလေ၊ ဦးအေးသောင်းလည်း ဦးလေးသိတယ် မဟုတ်လား။ ပန်းချီပုံတွေ ဆွဲတာလေ သိလား။ သူနဲ့ ကွဲသွားပြီ။ ဦးအေးသောင်း မိဘတွေ လာခေါ်လို့ တောပြန်သွားတာ ခုထိ ပြန်မလာတော့ဘူး။ ဒေါ်လေးက သားတစ်ယောက်နဲ့ ကျန်ရစ်ခဲ့တယ်။ တော်တော်ကြီးပဲ ကြီးလှပေါ့။ နေဦး နှစ်နှစ်လား မသိဘူး ရှိပြီ။ မောင်ရေအေး တဲ့၊ ပန်းချီပုံဆွဲတဲ့ ဦးအေးသောင်းကြီးက ပေးသွားတဲ့ နာမည်လေ။ ဒေါ်လေးရယ်။ အဘွားရယ်၊ ရေအေးရယ် အတူတူ နေတယ်။ နောက်ဖေးခန်းလေးမှာ နေတာ။
ဒေါ်လေးက စံပယ် သီတယ်။ တစ်ထောင်ကို ငါးမူးလား၊ တစ်ကျပ်လား မသိဘူး။ တစ်ခါ တစ်ခါတော့ သမဝါယမမှာ ဆန် လိုက်ရွက်တယ်။ ဒေါ်လေးက လှတော့ ဦးလေးကြီးတွေ လာလာ လည်တာကို အဖေက မကြိုက်ဘူး။ ဒေါ်လေးကလည်း ဦးလေးကြီးတွေ လာရင် စကား သိပ်မပြောပါဘူး။ သူက ကိုတောက်ကို ကြိုက်တာ။ ကိုတောက်ဆိုတာ ဆံပင်ညှပ်တဲ့ လူကြီး၊ မိန်းမ မရှိဘူး၊ သူဆံပင် ညှပ်တာကလည်း ဆိုင်ရှိတာ မဟုတ်ဘူး။ သားရေအိတ်လေးနဲ့ လိုက်ညှပ်တာ၊ ညှပ်ရင်လည်း စစ်သားပုံ ညှပ်တာ၊ သိပ်မညှပ်ရဘူး။ ဆိုင်ဖွင့်ရင်တော့ ညှပ်ရတယ်တဲ့။ ဆိုင်ဖွင့်ဖို့က လေးငါးထောင် ရှိမှတဲ့။ စက်ကပ်ကြေးကလည်း ဈေးကြီးတယ်တဲ့ ပြောနေတာပဲ။ အဘွားကတော့ ဒေါ်လေးကို ညည်း ယောက်ျားကို စိတ်မနာဘူးလားအေ တဲ့။ ညည်းသားလေးကိုပဲ လူဖြစ်အောင် မွေးပါတဲ့ ပြောတယ်။ ဒေါ်လေးက အားကိုးပေါ့ အမေရယ်။ အမေ့ကိုလည်း ပြုစုနိုင်တာပေါ့ တဲ့။ အဘွားက ကျုပ်ကြောင့်များတော့ လင်မယူပါနဲ့ အေ။ ညည်း မနေနိုင်ရင် မနေနိုင်ဘူး ပြောပါ။ အခုတော့ မယူသေးပါဘူး။ ဒါပေမယ့် ဦးရဲ့ကိုတောက်ကြီးနဲ့ မဖြစ်ခင် ဒေါ်လေး လူတစ်ယောက်နဲ့ ဖြစ်သေးတယ်။ စာ သွားသွား ပေးရတာ သမီးဆိုတော့ ဘယ်သူမှ မသိဘူး။ အမေတို့လည်း မသိဘူး။ သိရင် ဘယ်သက်သာ မှာတုန်း။ ကျောကွဲမှာ။
အဲသည်လူက ဦးစောတဲ့၊ လက်သမား လုပ်တာ၊ ဒေါ်လေးကို စာတွေ ပေးရင်းက ဒေါ်လေးက ဦးစောကြီးနဲ့ ကြိုက်တာ။ အဘွားလည်း မသိဘူး။ တစ်ခါ တစ်ခါ ချိန်းတွေ့တယ် ပြောတာပဲ။ နောက်တော့ ပျက်သွားတယ်။ ဒေါ်လေးလည်း တော်တော် နေမကောင်းဖြစ်တော့ သမီးလည်း စာမပို့ ရတော့ဘူး။ ဒေါ်လေးလည်း အခုတော့ ဦးတောက်ကိုပဲ ယူတော့မှာ တူပါတယ်။ အဘွားက လင်ယူရင် ငါ့အလောင်းသာ ကြည့်တော့ ဆိုတော့ မယူရဲတာလား မသိဘူး။ သနားပါတယ်။ ရေအေးလေးကတော့ လူလည်၊ သူ့ အိမ်ကို လာတဲ့ လူတွေကို မုန့်ဖိုး တောင်းတတ်နေပြီ။ လူကြီးတွေကလည်း မူးနေတာ မဟုတ်လား။ ပေးရင် တစ်ဆယ်တန်၊ ဆယ့်ငါးကျပ်တန်တွေ ပေးတာ။ ဒါပေမယ့် တော်တော်နဲ့ မပြန်ဘူး။ ရေနံဆီဖိုးကို တော်တော်ကုန်မှာ။ တစ်ခါ တစ်ခါ အဖေက ဝုန်းဒိုင်းဆို လုပ်မှ ပြန်ကြတယ်။
ဒေါ်လေး ဝင်ငွေကတော့ ပန်းသီတာချည်း မဟုတ်ဘူး။ ပန်းတုံးတော့ ဆီးထုပ် ယူထုပ်တာလည်း ပါတယ်။ တစ်ခါ တစ်ခါ ကြယ်သီးတံ တပ်တယ်။ ဈေးရောင်းမယ်လည်း ပြောတယ်။ လူကြီးတစ်ယောက်က ဈေးရောင်းရင် အရင်းအနှီးပေးမယ် ဆိုတော့ ဦးတောက်က မယူရဘူးတဲ့။ အခုနေ ဦးအေးသောင်းကြီး ပြန်လာရင်တော့ ကောင်းမှာပါ။ ရေအေးလေးက သူ့ အဖေနဲ့ မတွေ့ရတာ ကြာလှပြီ။ သမီးတို့က မောင်လေး ဆိုတော့လည်း ကျွေးပါတယ်။ မနက်ဆို ကောက်ညှင်းထုပ် တစ်ထုပ် ပေးတယ်။ အောင်မယ် မစားဘူး ဦးလေးရဲ့၊ မနည်းကျွေးမှ စားတာ။ အမေကတော့ အဘွားရော၊ ဒေါ်ကြီးရော၊ ဒေါ်လေးရောကို ကြည့်နေရတာပေါ့။ အမေမှ မထားရင် ဘယ်မှာ သွားနေမလဲ။ အမေ့အစ်ကို ဦးဘာဘာကြီး ကြည့်ပါလား။ နေစရာ မရှိတော့ အရက်ဆိုင်မှာပဲ အိပ်တယ်။ လမ်းဘေးမှာ မူးလဲပြီး လဲတဲ့နေရာ နေတာပဲ။ ထမင်း ဘယ်မှာ စားမှန်းလည်း မသိဘူး။ အလုပ်တော့ ဆင်းတယ်။ ဘားမားဒွေး ( Burma Rail-Way ) မှာတဲ့။ ဘာမားဒွေး ဆိုတာမှာလေ ဦးလေး သိလား။ ဦးဘာဘာကိုရော သိလား။ မူးမူးနေတဲ့ ဟာပေါ့။ ဦးလေးကလည်း သူက အင်္ကျီကို သုံးထပ် ဝတ်တယ်။ ပုဆိုးက တစ်ထည်တည်း ဝတ်တယ်။ အင်္ကျီသုံးထည်က သူ့မှာ ရှိတာ အကုန်ပဲ။ အဟောင်းတွေပါ။ ဘာမားဒွေး အင်္ကျီတွေပါ။ ကျောတွေ ကွဲနေပြီ။ အဲဒါကို သုံထပ်ပူး ဝတ်တာ။ အဲဒါ ငါ့ပစ္စည်း အကုန်ပဲတဲ့။ ငါ့ပစ္စည်းကို မထိနဲ့ တဲ့။ မူးရင် အော်ရော။
အဘွားက ဟုတ်ပါပြီတော်၊ မထိပါဘူး သူဌေးမင်းရယ်တဲ့ ပြောရော။ ဦးဘာဘာကြီးက အိမ်တော့ မလာပေမယ့် နေရာတိုင်းမှာ မူးလဲနေတာပဲ။ သမီးတို့လည်း အရင်ကတော့ သနားတယ်။ နောက်တော့ မသနားတော့ဘူး။ သောက်မြင်တောင် ကပ်တယ်။ သူ့ လခရော၊ သူ ရတဲ့ ဆန်ရော ဘယ်မှာမှန်း မသိဘူး။ အရက်နဲ့ လဲသောက်သလားမှ မသိတာ။ တစ်ခါတုန်းကလည်း သမီးတို့နဲ့ ခင်တဲ့ ဦးခင်ဖေက ဦးဘာဘာကြီးကို သူ့ ခြံထဲ လာနေလှည့်လို့ ခေါ်တယ်။ ဦးဘာဘာကြီးက ခြံစောင့်သဘော နေရတာပေါ့။ ခြံက ဘူးသီး၊ ခဝဲသီး၊ ပဲတောင့်ရှည်သီးတွေ စိုက်တဲ့ခြံပါ။ တဲလေးက သေးသေးလေး၊ အဲဒါကို ကောင်းကောင်း မနေဘူး။ ဘူးသီးတွေ ခိုးရောင်းတယ်။ ဘူးညွန့်တွေ ဖြတ်ရောင်းတယ်။ ဦးခင်ဖေကြီးက ဘာမှ မပြောဘူး။ ဦးခင်ဖေကြီး မိန်းမက နှင်ထုတ်တော့တာပဲ။ အဲဒီညက သေမလိုတောင် ဖြစ်တာ၊ မူးပြီး လဲနေတာ မထနိုင်ဘူး။ သေပြီဆိုပြီး အမေ့ကို လာပြောတော့ အမေရော၊ အဘွားရော ပြေးကြတာ လုံးနေတာပဲ။ ဒါပေမယ့် မသေဘူး၊ သူ့ ဘာမားဒွေး အင်္ကျီက သုံးထပ်မို့လို့ လေမဖြတ်တာတဲ့၊ အမေက ပြောတယ်။ အခုတော့ သောက်တုန်းပဲ၊ ရေမြောင်းထဲ လဲနေရင်လည်း ရေမြောင်းထဲမှာ တစ်ည အိပ်လိုက်တာပဲ။ လမ်းဘေးမှာ လဲနေရင်လည်း လမ်းဘေးမှာ အိပ်လိုက်တာပဲ၊ စောင်လည်း မခြုံ၊ ဘာလည်း မခြုံဘဲနဲ့ နေတာကိုပဲ မသေနိုင်ဘူး။ အရက်သောက်ရင် သမီးတော့ မုန်းတယ်။ တကယ်ပြောတာ၊ ဦးလေးရော အရက် သောက်သလား၊ တန်းလျားတုန်းကတော့ မသောက်ဘူး၊ သမီး မှတ်မိတယ်။
ဘယ်နှစ်နာရီ ထိုးပလဲ။ နေတောင် မြင့်ပြီလား မသိဘူး။ မုန့်ကလည်း မကုန်ဘူး။ စိတ်ညစ်တယ်။ လင်ဂန်း မသာကောင်ကို နင်းပြောဦးမယ် တကယ်။ အောင်မယ် ဒီကုန်းကြီးပေါ်ကို တက်ရတာကလည်း မလွယ်ဘူး။ လုံခြုံရေး ဦးလေးကြီးကို ကြောက်ရသေးတယ်။ ဂိတ်က ဝင်တာ မဟုတ်ဘူး။ ဒီဘက် ခြံစည်းရိုးက ခိုးတက်လာတာ၊ တွေ့ရင် ဖမ်းတယ်ဆို။ အလကားပါ ဦးလေးရာ၊ သမီးတို့ ဈေးရောင်းတာကျ ဖမ်းတယ်။ သမီးတို့က ဘာလုပ်မှာ မို့လို့တုန်း။ ပစ္စည်း မခိုးရင် ပြီးတာပဲ မဟုတ်ဘူးလား။ ပစ္စည်း ခိုးတာဆိုလို့ အမေ သူများ ပစ္စည်းကို မခိုးရဘူးလို့ မှာထားတယ်။ ကျောင်းတက်တုန်းက ပိုက်ဆံခိုးတယ် ဆိုတာလည်း ဦးလေးကို ပြောသားပဲ၊ သူများ ပစ္စည်းမှ မဟုတ်တာ။ အမေ့ပိုက်ဆံကို ခိုးတာပဲ။ ဘာဖြစ်လဲနော်။ သွားတော့မယ် ဦးလေးရယ်၊ ဝယ်လည်း မစားဘူး။ အုန်းသီးမျှင်လေးတွေနဲ့ မွှေးနေတာပဲ။ သမီးတို့ ကတော့ ကောက်ညှင်းဆို အသံတောင် မကြားချင်ဘူး။ ကောက်ညှင်းထုပ်ဆို ပိုဆိုးသေးတယ်။ အပြင်က မြေကြီးသယ်တဲ့ အစ်မကြီးကို တွန်းရောင်းမယ်၊ မကုန်ရင် ဘူတာကို သွားထိုင်မယ်။
ဪ … ဦးလေး ဒီထဲက အစ်မကြီး တစ်ယောက်နဲ့ အစ်ကိုကြီး တစ်ယောက်လေ၊ ဘူတာကို လာလာပြီး စကားပြောတယ် သိလား။ သမီးက ဘယ်ကလဲလို့၊ ကနေ့ မနက်မှ တွေ့တော့ ဒီက အစ်မကြီး ဖြစ်နေတယ်။ အတွဲတွေလည်း လာတယ်။ သမီးတို့ အိမ်ကိုတောင် အဖေ့သူငယ်ချင်းရဲ့ အတွဲ လာသေးတယ်။ ဦးလေးကြီးက အဖေ့လောက် ရှိနေပြီ။ အစ်မကြီးက ငယ်ငယ်လေး၊ လက်ကောက်တွေနဲ့ ချမ်းသာတယ်။ ဦးလေးကြီးက မည်းချိတ် နေတာပဲ။ အသက်ကလည်း ကြီးတာကို ဘာကြိုက်မှန်းလည်း မသိဘူး။ စကားတွေ ပြောပြီးရင် ညနေဘက်ဆို ပြန်တာပဲ။
ပြီးရင် အမေ့ကို ရေစင်ဖိုး ပေးတယ်။ နတ်မကြိုက်မှာ စိုးလို့။ အမေက ရေစင်ဖိုးယူပြီး ဘာလုပ်တယ် မသိဘူး။ တစ်ခါပေးရင် အဲဒီအစ်မကြီးက ငါးဆယ်ပေးတာ။ သမီးကိုလည်း သူတို့နဲ့ နေမလားတဲ့။ မနေချင်ပါဘူး။ ကိုယ့်မိဘနဲ့ပဲ ကိုယ် နေမှာပေါ့နော်။ ဘာလုပ်မှာလဲ အလကား။ ကိုယ့်သားသမီးမှ မဟုတ်တာ ဘယ်ကောင်းမှာလဲ။ အခုတော့ မလာတော့ပါဘူး။
အမေက အဖေ့ကို ပြောနေတာ တော့်သူငယ်ချင်း ကိုချစ်မောင်ကလည်း လူရှုပ်ပဲတဲ့။ ဒါ ဘယ်ကမိန်းမလဲ ဆိုတော့ အဖေက သူဌေးမိန်းမ တဲ့။ ကိုချစ်မောင်က ကားမောင်းတာ တဲ့။ ဘာတွေမှန်းလည်း မသိဘူး။ ကားမောင်းတဲ့ လူကို သူဌေးမိန်းမက ကြိုက်တာတဲ့။ ရယ်ရတယ်နော် ဦးလေး။ သွားတော့မယ်။ စကားလည်း တစ်ခွန်းမှ မပြောဘူး။ ရွှေပြည်သာကို လာလည်ဦးမယ်။ သမီး တစ်ခေါက်တော့ ရောက်ဖူးတယ်။ ခေါင်းသုံးလုံးကို သွားတာ။ တံတားကြီးကား စီးရတာနော်။ အဝေးကြီးပါလား။ ဦးလေးပြန်တော့ ကားရလား။ ကားက ကျပ်တယ်နော်။ ကောက်ညှင်းထုပ် ရောင်းတဲ့လူတွေ ရှိလား။ အဲဒီမှာလည်း ရောင်းကြမှာပေါ့နော်။ ကောက်ညှင်းထုပ်သည် ကတော့ ဘယ်နေရာမဆို ရှိမှာပဲ။ သမီး နည်းနည်း ကြီးလာရင်တော့ ဒီရှေ့က အစ်မကြီးတွေလို မြေကြီး ရွက်မယ်၊ အုတ်စိမ်း တိုက်မယ်။ အုတ်စိမ်း တိုက်တာက တစ်ထောင်ကို လေးဆယ်တဲ့ သမီး မေးပြီးပြီ။ အခုတော့ မနိုင်သေးဘူး။ အုတ်စိမ်းက လေးတယ်နော်။ ဦးလေးကော ကားသမားတွေက ပိုက်ဆံပေးလား၊ လက်ဖက်ရည်တော့ သောက်ရမှာပေါ့။ တိုက်ရင် သောက်ပေါ့ ဦးလေးရ၊ ပိုက်ဆံ ပေးရင်လည်း ယူပေါ့။ အောက်ဆိုက် ရတာပေါ့။ အခုက အောက်ဆိုက် ရမှ၊ အောက်ဆိုက် မရစင် ဘယ်လို စားမလဲ၊ အဖေ့အလုပ်က မီးဖိုဆိုတော့ ဘာအောက်ဆိုက်မှ မရှိဘူးတဲ့။ အမေက တစ်ခါ တစ်ခါလည်း အောက်ဆိုက် မရလို့ အဖေ့ကို ဆူတယ်။ အခုတော့ အဖေ့ခြေထောက်က ဆိုးဆိုးလာတော့ မပြောတော့ပါဘူး။ ဆေးပဲ ကုနေရတာပဲ။
တစ်ခါက ဆေးဆရာနောက် အမေ လိုက်သွားရော။ အမေ ပြန်လာတာ နောက်ကျလို့ အမေ့ကို အဖေ ဆူတယ်။ ဆေးဆရာက အဝေးကြီးမှာ နေတာ၊ လိမ်းဆေး လိုက်ယူတာပါ။ အဲဒါကို အမေက သူ့ ကို ဆေးဆရာနဲ့ ပေးစားတယ် ထင်လို့လား မသိဘူး။ ငိုတယ်။ ညောင်ရေအိုးက ရေတွေလည်း သောက်တယ်။ အဖေက အဲ့ဒီဆေးလည်း မလိမ်းဘူး။ သေချင် သေပစေတဲ့။ အမေက ညောင်ရေအိုးရေ သောက်တော့မှ အလိမ်းခံတယ်။ အဖေက တစ်ခါ တစ်ခါ ဂဂျီဂဂျောင်နဲ့ ဦးလေးရယ်။ အမေက အဲဒီနေ့က ငိုရင်းပြောတယ်။ ကျုပ်အမေရော၊ ကျုပ်ညီမတွေရော၊ ကျုပ်အစ်ကိုရော ကျုပ်ကို မှီခိုနေကြတာ တဲ့။ ကျုပ်က ဆင်းရဲပေမယ့် လေးစားအောင် နေပြနေတာတဲ့။ ကျုပ် မဟုတ်တာ ဘယ်တော့မှ မလုပ်ဘူး တဲ့။ တော်ပြီ ဒီစကား ဒီတစ်ခါပဲ ပြောတဲ့။ ပြောနေတာ သမီးတော့ သနားတောင် သနားတယ်။ နောက်တော့ အဖေလည်း မပြောတော့ပါဘူး။ သမီးတို့ ကတော့ တန်းလျားမှာ နေရတုန်းပါ။ အိပ်ခန်း ကျဉ်းကျဉ်းလေးထဲမှာ လူတွေ အများကြီးပဲ၊ အဖေ ပင်စင်ယူရင် ဘယ်သွားနေရမှန်း မသိဘူး။ သမီးတို့ ပြောင်းရင် အဘွားရော၊ ဒေါ်ကြီးရော၊ ဒေါ်လေးရော၊ ရေအေးလေးတို့ရော ဘယ်ကို သွားနေမလဲ။ သမီးကသာ ပူနေတာပါ။ အမေတို့က မပူဘူး။ ဒေါ်ကြီးတို့ရော၊ ဒေါ်လေးတို့ရော မပူဘူး၊ ရောက်ရာပဲ တဲ့။
သွားတော့မယ်နော်။ မယူချင်ပါဘူး။ ဦးလေးက မုန့်ဖြင့် မဝယ်စားဘဲနဲ့ ပေးတာချည်းကို မယူချင်ပါဘူး။ နေပါစေ၊ ဟာ ဦးလေးကလည်း ဒါဖြင့်လည်း သမီး ဘတ်ထားရမှာပဲ။ ဒါ ခိုးတာ မဟုတ်ဘူးနော်။ သမီး သုံးချင်လို့ အမေ မသိအောင် ယူထားတာ၊ သမီး နာမည်က ဝိုင်းဝိုင်းပု တဲ့။ တန်းလျားမှာ နေတုန်းပဲ။ လာလည်ပါလား ဦးရဲ့။
နေဝင်းမြင့်
ရတနာသစ် မဂ္ဂဇင်း၊
အတွဲ (၁) အမှတ် (၁)၊
နိုဝင်ဘာ၊ ၁၉၉၃။
(မနုဿီဟ ဝတ္ထုတိုများ)
No comments:
Post a Comment