“ ခြင်းထဲက ကြက် ”
“ တို့ကတော့ ပေးပြီးသားဆိုတာ သေချာတယ်။ ဒါပေမယ့် ထားလိုက်ပါ။ ပိုက်ဆံလေး ဒီလောက်နဲ့တော့ ဘာမှ ထိခိုက်မသွားပါဘူး ”
စကားအဆုံးမှာ ထောင်းခနဲထလာသော မာနစိတ်သည် ကောင်တာပေါ် လွင့်ခနဲကျလာသည့် ငွေစက္ကူတစ်ရွက်။ ကျွန်မဘာသာပင် ဝေခွဲမရခင် ထိုအမျိုးသမီးရှေ့ ချက်ချင်းပြန်တွန်းရွှေ့ပေးလိုက်မိပြီး ဖြစ်နေခဲ့သည်။ ‘ မပြောနဲ့ ’ ဟု ကိုယ့်စိတ်ကိုယ် အမြန်ချုပ်တီးလိုက်ပေမယ့် မမီတော့။
“ ဟုတ်ကဲ့ အစ်မသိအောင်ပြောရရင် ကျွန်မအနေနဲ့လည်း ကိုယ့်ဘက်က မှားမှားမှန်မှန် သူတစ်ပါးမကြည်ဖြူဘဲ ပေးလာမယ့်ပိုက်ဆံမျိုးတော့ လုံးဝမမက်တာ အမှန်ပါပဲ။ အခု အစ်မစိတ်ထဲမှာ တကယ်ပေးပြီးသားလို့ ယုံနေရင် ပေးစရာမလိုပါဘူး။ အားပေးမှုအတွက် တကယ်ကျေးဇူးတင်ပါတယ်။ ဒါပေမယ့် အစ်မပိုက်ဆံကို ပြန်ယူသွားလိုက်ပါ ”
“ တို့က လူကြီးတစ်ယောက်ပါ။ ဘာမဟုတ်တဲ့ပိုက်ဆံလေး တစ်ပဲခြောက်ပြားနဲ့ မင်းကိုမလိမ်ပါဘူး။ ခုလိုအချေအတင် ပြောနေရတာကိုက အလုပ်မဟုတ်တော့ဘူး ”
ပြောပြောဆိုဆို ပိုက်ဆံကို ဆတ်ခနဲ ပြန်ကောက်ယူကာ တင်းမာသောမျက်နှာထားဖြင့် လှည့်ထွက်သွားသော အမျိုးသမီးကို ကျွန်မ ပြုံးရုံသာပြုံးကြည့် ကျန်ရစ်ခဲ့ပါသည်။ နံဘေးမှ မသိမသာ အကဲခတ်နေကြသော အခြား ခွေငှားသမားတွေကတော့ ကျွန်မတို့နှစ်ယောက်အပေါ် ဘယ်လိုမြင်ကြ မည်မသိ။ “ ဆက်ဆံရေးညံ့လိုက်တာ ” ဟု ကျွန်မအပေါ် ဝေဖန်သူလည်း ပါကောင်းပါမည်ပင်။ ပြီးလျှင် သံသယ။ ကျွန်မနှင့် ထိုအမျိုးသမီးသာ အမှန်အတိုင်း သိနိုင်ကြသော ပြဿနာတစ်ခုအပေါ် ဘေးလူတွေက ဘယ်လိုအတွေးမျိုးတွေးပြီး ဘယ်သူ့ဘက် ရပ်တည်လိုက်ကြမလဲ။
တစ်ခါတလေကျတော့လည်း သက်သေပြခွင့်မရသည့် အမှန်တရားဆိုတာ တစ်ဆိတ်တော့ လူကို အောင့်သက်သက်ဖြစ်စေသလားဟု ထင်သည်။ ကိုယ့်ဘက်မှ မှန်နေတာကို သိသည်။ ထိုမှန်နေသည့်အကြောင်းသည် တစ်ဖက်သာအတွက် အမှားဖြစ်နေသောအခါ တစ်ဖက်သား လက်မခံသည့် ကိုယ်တင်ပြချင်သော ‘ အမှန်တရား ’ က မရိုးသားသော သံသယအဖြစ် ခံရကော။ ထင်ချင်သလိုထင်ကြပါစေလေ။ လူဆိုတာ ကိုယ့်လိပ်ပြာ ကိုယ်သိသည်။ ကိုယ့်သိက္ခာကိုယ် ကြည့်မိနေသည်ပင်။ ဆိုင်ဖွင့်သက်တမ်းလည်း အတန်အသင့်ရှိပြီမို့ ခံနိုင်ရည်က ထူသင့်သလောက် ထူနေပါပြီ။ ကြုံဖူးခဲ့သမျှ အတွေ့အကြုံတွေက ကျွန်မ၏စိတ်ကို ရင့်ကျက်သင့်သလောက်လည်း ရင့်ကျက်စေခဲ့ပြီ။ လူဆိုတာ အမှားနှင့်မကင်းသည်မို့ ကိုယ့်ဘက်က မှားသည့်အခါလည်း ရှိတတ်ပေမယ့် ကိုယ်မှန်သည့်အခါတွေမှာ ကိုယ့်အမှားမဟုတ်မှန်း သိပါလျက်နှင့် ဆိုင်၏ ရေရှည်အကျိုးကို မျှော်ကိုးပြီး မျိုသိပ်ခေါင်းငုံ့နေခဲ့ရသည့်အကြိမ်က ပိုများလှသည် ထင်သည်။ မှန်သည်ထင်လျှင် တစ်စက်ကလေးမှ ခေါင်းမငုံ့တတ်သော ငယ်စိတ်သည်လည်း ဆိုင်ဖွင့်သက်တမ်းတစ်လျှောက် ဘယ်အချိန်ကတည်းက ကျပျောက်သွားခဲ့မှန်း မသိလိုက်တော့။ လုပ်ရင်းနှင့် သိလာရတာကတော့ မာနက မာနသက်သက်။ အလုပ်က အလုပ်သတ်သတ်။ လျှော့သင့်သည်ထင်လျှင် လျှော့။ မလျှော့လျှင်ကော။ ဘာမှတော့ မဖြစ်ပါ။ တစ်ဦးနှင့်တစ်ဦး အပြိုင်အဆိုင် လုပ်ကိုင်နေကြရသော အနေအထားတစ်ခုမှာ ကိုယ့်ဆိုင်က ၀န်ဆောင်မှုအားနည်းလျှင် ကိုယ့်ထက် ၀န်ဆောင်မှုပိုသာသော အခြားတနေရာကို လူတွေ ရောက်သွားကြမည်သာ။ ကိုယ်က မှန်တယ်ထင်၍ ခံစားတုံ့ပြန်လိုက်ခြင်းက ဘေးလူတွေအမြင်၌ “ ဒီဆိုင်က ဆက်ဆံရေးကျဲတယ် ” ဆိုတာမျိုး ဖြစ်ဖြစ်သွားတတ်တော့ ဆိုင်ကို ထိခိုက်သည်။
သို့နှင့် တော်ရုံခံစားချက်ဆိုလျှင် အပြင်ရောက်မခံတော့ဘဲ ရင်ထဲမျိုသိပ်ပစ်လိုက်တတ်သည့်အကျင့် ရလာသည်။ မျိုသိပ်ပါများတော့ စိတ်တင်းကျပ်လာသည်။ ထစ်ခနဲဆို အထိအရှမခံနိုင်သလို ဖြစ်လာသည်။ မဖြစ်သေးပါဘူး။ လာမည့်တစ်ရက်မှာ သူငယ်ချင်းတစ်ယောက်ထံ စိတ်ပြေလက်ပျောက် အလည်အပတ် သွားဦးမည်ဟု အတွေးရောက်သည်။ မိုးလင်းမိုးချုပ် ဒီအလုပ်ထဲမှာ နစ်မြုပ် အချိန်ကုန်ရင်း ဘယ်ကိုမှ မရောက်ဖြစ်ခဲ့တာတောင် အတော်ကြာပြီ မဟုတ်လား။
(၂)
လောလောဆယ် ကိုယ့်အနီးအပါးမှာ သူငယ်ချင်းရယ်လို့ များများစားစားမရှိလှသော ကျွန်မအတွက် အထွေအထူး ခေါင်းစားနေစရာပင် မလို ကျောင်းပြီးကတည်းက အဝေးမှာ အလုပ်သွားလုပ်သူက လုပ်၊ အပြင်အမြဲထွက်လုပ်နေသူက လုပ်နှင့် တစ်ကွဲတစ်ပြားစီ ဖြစ်ကုန်သော ကျွန်မတို့အုပ်စုထဲမှာ ကျွန်မလိုပဲ မနက်မိုးလင်းတာနှင့် ဆိုင်အပါးက တစ်ဖ၀ါးမှ မခွာစတမ်း ကျောက်ချထိုင်နေရသော သူငယ်ချင်းမေသက်ထံ ရောက်ဖြစ်ခဲ့သည်။ သူ့ဆိုင်က ကျောင်းသုံးပစ္စည်းနှင့် မုန့်ပဲသရေစာတွေအပြင် အလှကုန်ပစ္စည်း တိုလီမုတ်စတွေပါ တင်ထားသဖြင့် စုံစုံလင်လင်ရှိလှသည်။ ပစ္စည်းပုံတွေကြားမှာ မှောင်ရိပ်ထဲ စာရင်းထိုင်တွက်နေသော သူငယ်ချင်းကို အပြင်ကနေမြင်အောင် မနည်း ရှာကြည့်ယူရသည်။
“ ဟယ်….လာ လာ ပေါ်တော်မူကြီး ”
သူကလည်း ရှားရှားပါးပါး ကျွန်မအလည်ရောက်လာ၍ ၀မ်းသာမဆုံးဖြစ်နေသည်။ ကျောင်းပြီးကတည်းက သူ့အလုပ်နှင့်သူ၊ ကိုယ့်အလုပ်နှင့်ကိုယ် ရှုပ်နေသဖြင့် ကျွန်မတို့ သိပ်မတွေ့ဖြစ်ခဲ့ကြတာ ကြာပြီမို့ဖြစ်သည်။
“ ဘာ…ပေါ်တော်မူကြီးလဲ။ သူကော ဘယ်တုန်းက လာတာမှတ်လို့ ”
ကျွန်မထိုင်ဖို့ရာ ခုံတစ်လုံးချဖို့ ကြမ်းပေါ်ပုံနေသော ပစ္စည်းပစ္စယတွေကို တစ်နေရာ ရွှေ့ကပ်ပေးနေသော မေသက်ကရယ်ရင်း “ အေးဟာ စိတ်ကတော့ အမြဲရောက်နေပါတယ်။ လူကသာ မလာအားတာ ” ဟု ဆိုသည်။ ဒါလည်းဟုတ်သည်။ ကျွန်မလည်း အဲဒီလိုပင်။ အရင်တုန်းကများ တစ်ရပ်ကွက်ခြားသည့် မေသက်တို့အိမ်နှင့် ကျွန်မတို့အိမ်ကို အိမ်ဦးနှင့်ကြမ်းပြင်လို တစ်ရက်ဘယ်နှခေါက် ဘယ်နှခါ ကူးနေကြမှန်းမသိ။ ဘယ်သွားမယ်ဟေ့ ဆိုလျှင်လည်း တစ်ယောက်နှင့်တစ်ယောက် ချိတ်ဆက် ချိန်းဆိုထားနှင့်စရာမလို။ အချိန်မရွေး ကောက်ခနဲထသွားကြရုံသာ။ ယခုတော့ဖြင့် ဘ၀ကိုယ်စီမှာ ကိုယ့်အလုပ်နှင့်ကိုယ် ရုန်းကန်ကျင်လည်နေကြရင်း သူငယ်ချင်းတွေကိုပင် အချိန်မပေးနိုင်ကြတော့။ ကိစ္စ၀ိစ္စရှိလျှင်တောင် သွားသွားပြန်ပြန် တက်သုတ်ရိုက်နေရသည်။ အလုပ်တွေကို နောက်ဆံတင်းနေရသည်။
“ ဆိုင်ကို ဘယ်သူနဲ့ ထားခဲ့တာလဲ ”
“ ငါ့ ညီမလေးနဲ့ ”
“ လွှဲလို့ရပြီပေါ့ ”
အကြောင်းသိပီပီ မေသက် မေးခြင်းဖြစ်သည်။ ကျွန်မက ဘာမှမဖြေဘဲ နှာခေါင်းတစ်ချက်သာ ရှုံ့ပြတော့ သူရယ်ရင်းနှင့် ပြန်ညည်းပြပါသည်။
“ အေး….၊ ငါလည်း တစ်ခါ တစ်ခါ အဲ့ဒါ သိပ်စိတ်ညစ်တာပဲ၊ ငါ့ဆိုင်အကြောင်း ငါတစ်ယောက်တည်းပဲသိနေရတယ်၊ အပြင်ခဏတစ်ဖြုတ်ထွက်ဖို့ရာတောင် အိမ်ကလူတွေနဲ့ ထားခဲ့ရတာ စိတ်မချရဘူး၊ ပိုက်ဆံမှားအမ်းရတာနဲ့၊ တစ်ရာတန်ပစ္စည်းကို နှစ်ရာမှားရောင်းလို့ရောင်းရတာနဲ့၊ သူများ ပစ္စည်းလာစပ်ရင်လည်း ဆိုင်နဲ့အဆင်ပြေ သင့်တော်မယ့် ပစ္စည်းလေးတွေကြည့်ကျက် ရွေးမ၀ယ်တတ်ကြဘူး၊ ပြောလိုက်ရင်လည်း “ ငါတို့မှ မသိတာ ” ချည်းပဲ၊ မသိရင်လည်း သိအောင်လုပ်ကြမယ် စိတ်မကူးကြဘူး၊ ငါ့ခေါင်းပေါ်ချည်းပဲ အကုန်တင်ထားပေးကြတာလေ၊ ငါ့မှာဟယ်၊ အခုမှ တကယ်ခြေချုပ်မိနေတော့တာ၊ ထမင်းစားဖို့ရာတောင် ထမင်းစားခန်းထဲ ၀င်မစားရဘူး၊ ဆိုင်ထဲအထိ ခူးခပ်လာ စားရတယ်၊ မရိုသေ့စကားပြောရရင် အိမ်သာတက်ချင်တာတောင် အပြေးအလွှားဖြစ်နေတာ၊ ဆယ်တန်းတုန်းကများ ကျောင်းစာကို ဒီလိုနှုန်းနဲ့ မခွဲမခွာ တွယ်ကပ်ခဲ့ရရင် ခုဆို ဒေါက်တာမကြီး ဖြစ်နေလောက်ပြီ ”
အဖြစ်ကတူလွန်း၍ ကျွန်မနှင့်လည်း ဘာမှမထူးဘူး မဟုတ်လား။
“ ငါလည်း အဲဒီ့အတိုင်းပါပဲ မေသက်ရယ်၊ ဆိုင်စဖွင့်ကတည်းက ငါ့ခြေ၊ ငါ့လက်နဲ့ တောက်လျှောက်လုပ်ကိုင်လာတာဆိုတော့ ဆိုင်ရဲ့အထာကို ငါပဲသိတယ်လေ၊ ကိစ္စရှိလို့ အပြင်ခဏထွက်နေတုန်း သူများ ခွေလာရောင်းရင် အိမ်ကလူ ပျာနေပြီ၊ ပြီးတော့ ခွေငှားတဲ့လူတွေကလည်း သူတို့အထာနဲ့သူတို့၊ တချို့ ဒရာမာကြိုက်တယ်၊ တချို့က မကြိုက်ဘူး၊ ကိုယ့်စိတ်ကူးနဲ့ကိုယ် စိတ်တိုင်းကျ ရွေးချင်တာ၊ ဘယ်သူကဖြင့် ခွေအသစ်မှ ကြည့်တာ၊ ဘယ်သူကဖြင့် ဇာတ်လမ်းအကျဉ်းကို ရှင်းပြမှ၊ တချို့ ‘ အဲဒီခွေ ကောင်းတယ် ’ လို့ ပြောရုံနဲ့ ဟုတ်လားဆိုပြီး ရှောရှောရှူရှူ ယူသွားပေမယ့် တချို့ကျတော့ ဘယ်လိုကောင်းတာလဲဆိုပြီး စစ်စစ်ပေါက်ပေါက် မေးတာ၊ အမှန်အတိုင်းပြောရရင် ခွေငှားဆိုင်သာဖွင့်တာ ငါလည်း အဲ့ဒီလောက်အထိ ရှိသမျှခွေ အကုန် ဘယ်ကြည့်ထားနိုင်ပါ့မလဲ၊ ဒီတော့ မဂ္ဂဇင်းထဲမှာပါလာတဲ့ ဇာတ်လမ်းအကျဉ်းတွေ မှတ်ထားတန် မှတ်ထား၊ ဒါမှမဟုတ် ခွေငှားသမားတွေကို ဇာတ်လမ်းသဘောတရား ပြန်မေးပြီး နောက်လူကို ညွှန်းတာမျိုး လုပ်ရတာပေါ့၊ တချို့ကျတော့ ‘ ဒါကောင်းတယ်၊ ဒါမကောင်းဘူး ’ လို့ မညွှန်းရဘူး၊ ကိုယ်ကတော့ တကယ်ကြိုက်လို့ ညွှန်းတာဖြစ်ပေမယ့် လူဆိုတာ တစ်ယောက်နဲ့ တစ်ယောက် အကြိုက်မတူတတ်ကြတော့ လာပို့တဲ့အခါ ကောင်းတယ်ဆိုလို့ ယူသွားတာ၊ ကောင်းလည်း မကောင်းဘဲနဲ့ဆိုပြီး ပိုက်ဆံမပေးချင်ကြတာမျိုးလည်း ကြုံရတယ် ”
“ မလွယ်ဘူးတော်၊ နင့်အလုပ်လည်း ” မေသက်က တွေးတွေးဆဆနှင့် ၀င်ပြောသည်။
“ အံမယ်လေး အဟုတ်ကိုမလွယ်တာ မေသက်ရေ၊ အစတုန်းကတော့ အဲ့ဒီလို စာအုပ်အငှားဆိုင်တို့၊ အခွေငှားဆိုင်အလုပ်တို့ဆိုတာ ဆိုင်ထဲ အေးအေးဆေးဆေးထိုင်ပြီး သက်သောင့်သက်သာ ရှိလှတဲ့အလုပ်တွေလို့ ထင်ခဲ့တာ၊ ခုလို တကယ်ကိုယ်လုပ်ကြည့်ဖူးတော့မှ ဘယ်လောက် စိတ်ရှုပ်ရတဲ့ အလုပ်မှန်း သိတယ် ”
“ ဟုတ်မှာ ဟုတ်မှာ၊ ငါဆိုရင်လည်း….. ”
ပြောနေတုန်းတန်းလန်း ဈေးဝယ်သူရောက်လာ၍ “ ခဏနော် မိလွန်း ” ဆိုပြီး မေသက် ခဏထသွားသည်။ ၀ယ်သူ ချာတိတ်မလေးက ကော်ဖီမစ် တစ်ထုပ်တဲ့။ နှစ်ရာတန်တစ်ရွက် ထုတ်ပေးသည်။ မေသက်က ပိုက်ဆံသေတ္တာနား လျှောက်လာသဖြင့် ပိုက်ဆံအမ်းရမည်ဟု ထင်ပြီး ကျွန်မက အလိုက်တသိနှင့် သေတ္တာလေးကို သူ့ဘက် တွန်းရွှေ့ပေးတော့ မေသက်က “ အသာနေ ” ဟု မျက်ရိပ်ပြကာ ကောင်တာပေါ်တင်ထားသော စာအုပ်တစ်အုပ်ကို လှမ်းယူသည်။ ထိုစာအုပ်ကို ဖွင့်လိုက်တော့ ဟောင်းနွမ်းပေမယ့် ပြန့်ရန့်နေသော ပိုက်ဆံတွေ၊ မေသက်က ထိုပိုက်ဆံတွေထဲမှ ရာတန်တစ်ရွက်ကို အသေအချာရွေးကာ ချာတိတ်မလေးကို သွားအမ်းသည်။ ထိုပိုက်ဆံကိုကြည့်ပြီး ချာတိတ်မလေးမျက်နှာ မဲ့သွားကာ တွေ့ရသည်။
“ ဟင်…အစ်မပိုက်ဆံကြီးကလည်းနော် ဒီထက်ကောင်းတာလေး မရှိတော့ဘူးလား ”
“ အဲ့ဒါ ပြီးခဲ့တဲ့စနေနေ့က ညီမလေး လာဝယ်သွားတဲ့ ပိုက်ဆံပဲလေ ”
ချာတိတ်မလေး အိုးတိုးအမ်းတမ်းနှင့် ဘာပြောရမှန်းမသိ ဖြစ်သွားကာ ‘ သြော် ’ ဟု မပီမသ ရေရွတ်ရင်း ပြန်လှည့်ထွက်သွားသည်။ မေသက်က ကျွန်မကို ပခုံးတွန့်၍ လက်ဝါးနှစ်ဖက် ဖြန့်ပြသည်။
“ မတတ်နိုင်ဘူးဟ၊ တစ်ခါတလေကျတော့လည်း လူတွေက အဲ့ဒီလို ပြန်မလုပ်ချင်လို့ကို မရတော့ဘူး၊ ကိုယ့်ဆီလာဝယ်တော့ ပိုက်ဆံအစုတ်တွေနဲ့ လာဝယ်ကြပြီး ကိုယ်ပြန်အမ်းတော့ ဘယ်သူမှ ပြန်မယူချင်ကြတော့ဘူး၊ ငါလည်း ရလာတဲ့ပိုက်ဆံနဲ့ ပစ္စည်းတွေ ပြန်ဝယ်ခြမ်း၊ အရင်းအနှီးပြန် လုပ်ရတဲ့ဥစ္စာ၊ ဆိုင်ကြီးတွေက လက်မခံတော့ ငါအားနာလို့ လက်ခံထားသမျှ ပိုက်ဆံအစုတ်တွေက ငါ့လက်ထဲမှာ ပုံနေရော၊ စားရမယ့်အမြတ်က မစားရတော့ဘူး၊ ကြာတော့ ငါလည်း ဘယ်တောင့်ခံနိုင်တော့မှာလဲ၊ မရှိလို့ ဆိုင်ဖွင့်စားတာကြီးကို ”
မေသက် စိတ်တိုချင်နေပုံကိုကြည့်ပြီး ကျွန်မ ရယ်ချင်နေသည်။ ကျောင်းတုန်းကများ မေသက်လောက် သဘောမနောကောင်းပြီး စိတ်ရှည်တာ မေသက်ပဲရှိတာလေ။ ဘယ်သူနှင့်ပဲဖြစ်ဖြစ် တည့်အောင်ပေါင်းသည်။ သူငယ်ချင်းတွေအပေါ်လည်း အလွန်သည်းခံနိုင်လွန်းသူ။
“ နင်က ဘယ်သူဝယ်တဲ့ပိုက်ဆံဆိုတာကော မှတ်မိလို့လား ”
“ တကယ်ကို မရှိလို့ ရှိတာလေးနဲ့ လာဝယ်ရသူတွေကိုတော့ ငါ မပြောလိုပါဘူး၊ နောက်ဆုံး အလကားပေးနိုင်ရင်တောင် ပေးလိုက်ဦးမယ်၊ နင် ငါ့စိတ်ကို သိပါတယ်၊ ရှိရက်သားနဲ့ တမင်တကာ ပိုက်ဆံအစုတ်နဲ့ လာဝယ်တာကို စိတ်ညစ်တာ၊ ၀ယ်တဲ့သူနာမည်ကို ခဲတံနဲ့ဖွဖွခြစ်ထားပြီး ကြုံတဲ့အခါ ပြန်အမ်းပေးလိုက်တော့ သူတို့လည်း ငြင်းလို့မရတော့ဘူးလေ ”
“ ဟောတော် ” မေသက်အကြံကို ကျွန်မရယ်မိတော့သည်။
“ ပြောလို့ပြောတာမဟုတ်ဘူး၊ ငါတို့လိုဈေးဆိုင်ဖွင့် ဈေးရောင်းစားရတဲ့ အလုပ်က သိပ်သည်းညည်းခံရတာပဲနော်၊ လူအမျိုးမျိုး စိတ်အထွေထွေဆိုတဲ့အတိုင်းပဲ၊ စဉ်းစားကြည့်လေ အိမ်တစ်အိမ်မှာ မိသားစုတစ်စုတည်း ရှိတာတောင် အခန့်မသင့်ရင် တစ်ယောက်တစ်ပေါက် ဖြစ်ကြသေးတာ၊ ငါတို့မှာက တစ်ရက်ကို လူလေးငါးခြောက်ဆယ်လောက်နဲ့ ပြောဆိုဆက်ဆံရတာ၊ ပျမ်းမျှ လူသုံးဆယ်ပဲထားဦး၊ စိတ်ပေါင်းသုံးဆယ်၊ ၀ယ်သူဘက်က အမြဲ မှန်၏ ဆိုတဲ့ ဆောင်ပုဒ်က အထင်အရှားရှိနေတော့ အဲ့ဒီ့သုံးဆယ်လုံးနဲ့ အဆင် ပြေအောင်ကြိုးစားရမှာက ကိုယ့်ဝတ္တရား၊ ၀ယ်သူတွေအနေနဲ့ကတော့ ကိုယ့် တစ်ယောက်တည်းကို ပြောဆိုဆက်ဆံရတာ၊ ကိုယ်ကတော့ အပူအအေးစုံတဲ့ စိတ်အမျိုးမျိုးနဲ့ လိုက်လျောညီထွေဖြစ်အောင် ဆက်ဆံရတယ်၊ နှစ်ဆယ့်ကိုးယောက်နဲ့ အဆင်ပြေတာကို “ ဒီဆိုင် ဆက်ဆံရေးကောင်းတယ် ” လို့ အသံထွက် ဖို့ မသေချာပေမယ့် တစ်ယောက်နဲ့အဆင်မပြေရင် “ ဒီဆိုင် ဆက်ဆံရေး ညံ့တယ် ” ဆိုတဲ့အသံ ထွက်သွားဖို့ကတော့ ကျိန်းသေတယ် ”
ကျွန်မစကားကို မေသက် ထောက်ခံသည်။
“ ဟုတ်တယ်နော်၊ လူဆိုတာကလည်း အမျိုးမျိုးရှိတာကိုး၊ ကိုယ်မလုပ်ဖူးပေမယ့် အဲ့ဒီအလုပ်အပေါ် ကိုယ်ချင်းစာနားလည်ပေးတတ်တဲ့ လူတွေရှိသလို ကိုယ်မလုပ်ဖူးတိုင်း အဲ့ဒီအလုပ်အပေါ် ကိုယ်ချင်းမစာပေးတတ်တဲ့ လူမျိုးတွေလည်း တစ်ခါတလေကြုံရတာပဲ၊ လူတိုင်းကို ကိုယ့်အလုပ်နဲ့ပတ်သက်ပြီး အစအဆုံး တစ်ယောက်ချင်းစီ လိုက်ရှင်းပြနေဖို့ဆိုတာလည်းမဖြစ်နိုင်တော့ မျိုသိပ်ပါများတဲ့ ရင်ဘတ်ထဲက မွန်းကျပ်ပိတ်လှောင်ခံနေရသလို ဖြစ်လာရော၊ ၀ယ်သူ၊ အားပေးသူတွေရှိလို့ ကိုယ်နေရာရ ရပ်တည်နေနိုင်တာဆိုပြီး ကျေးဇူးသိတတ်နားလည်မိပေမယ့် စိတ်ထဲ သိပ်ထိခိုက်စရာကြုံရတော့လည်း တရားမရနိုင်သေးတဲ့ ပုထုဇဉ်ပီပီ ကိုယ်ပေးဆပ်လိုက်ရတဲ့ ခံစားချက်နဲ့ ကိုယ်ပြန်ရတဲ့တန်ဖိုး မညီမျှတာကို ချိန်ထိုးမိတဲ့အခါ စိတ်ထဲ တမြည့်မြည့် ဖြစ်မိတာ ရှိတာပေါ့……..
‘ ဒီလောက်လေးနဲ့ မပြောတော့ပါဘူး။ ရေရှည်အတွက် ကြည့်ရဦးမယ်’ ဆိုပြီး ငုံ့ခံ။ ပြောခွင့်မသာတဲ့ ဝေဒနာတွေက ရင်ထဲ တဖြည်းဖြည်းအုံခဲပြည့်သိပ်လာ။ တစ်ခါတစ်ခါ မအောင့်နိုင်လို့ ဗြုန်းခနဲ ပြောထွက်မိရင်တော့ ခံရတဲ့သူအဖို့ မသက်သာဘူး။ ပိဿလေး ဘေးပစ်ဖြစ်ကုန်ရော ”
တူလိုက်တာ၊ အတူတူပါပဲလား။
“ အင်းလေ မေသက်ရယ်၊ ငါ့ကိုဆိုရင် အခုနောက်ပိုင်းမှာ အိမ်ကလူတွေက သိပ်ပြောတာပဲ၊ ‘ မိလွန်းတစ်ယောက် အခုမှ ပိုစိတ်တိုတတ် လာသလိုပဲ၊ အိမ်သားတွေအပေါ်မှာလည်း စိတ်မရှည်ဘဲ ထစ်ခနဲရှိ အော်ချင်၊ ငေါက်ချင်၊ ဘုကလန့်တိုက်ချင်နေတာ ဘာသဘောမှန်းကို မသိဘူး’ တဲ့၊ ငါလည်း ကိုယ့်ကိုယ်ကို သတိထားမိလို့ နည်းနည်းပြန်ဆင်ခြင်နေရတယ်၊ တကယ်တော့ ကိုယ့်စိတ်နဲ့ကိုယ့်ကိုယ် အဆင်မပြေတာကြာတော့ ထွက်ပေါက် ပိတ်ပြီး မဆိုင်တဲ့လူတွေအပေါ် လျှောက်မဲမိတာမျိုး ဖြစ်ဖြစ် သွားတတ်တာ၊ စိတ်ထဲမှာ ဘယ်သူဘယ်ဝါကို မကျေနပ်တာ ဆိုတာမျိုးရယ်လို့တော့ မဟုတ်ဘူး၊ ဘယ်သူကမှ ကိုယ့်အပေါ် ထိခိုက်နစ်နာအောင် တမင်တကာ ထိုးဆွနေကြ လို့မှလည်း မဟုတ်ဘူး၊ ၀ယ်သူဘက်ကတော့ သူတို့အလုပ် သူတို့လုပ်မှာပဲ၊ ငါတို့လည်း ၀ယ်သူဆိုရင် ကိုယ်ပေးလိုက်ရတဲ့ငွေနဲ့ ထိုက်တန်တဲ့ ၀န်ဆောင်မှုကို ရချင်မှာပဲ။ အခုပြောချင်တာက ဘယ်သူမှားတယ်၊ ဘယ်သူမှန်တယ် ဆိုတဲ့ကိစ္စ မဟုတ်ဘူး၊ နိစ္စဓူဝ ကိုယ့်စိတ်ကိုယ် ပိတ်လှောင်ပြီး လူအများ စိတ်နဲ့တည့်အောင် ကြိုးစားနေရတာ ကြာတော့ စိတ်အဆင်မပြေ ဖြစ်လာတာကို ဆိုလိုချင်တာ ”
“ သိတယ်…သိတယ်၊ နင်ပြောချင်တာကို ”
“ အလုပ်က စိတ်ချလက်ချ ပစ်ထားခဲ့လို့မရတော့ တစ်နေ့တစ်နေ့ ဒီဆိုင်ထဲမှာပဲ ထောင်ကျသလို ခြေချုပ်မိနေတော့ လူက ငြီးငွေ့လာရော၊ အပေါင်းအသင်းတွေနဲ့လည်း အဆက်ပြတ်၊ အပြင်လောကလည်း မထွက်ဖြစ်၊ ဒီတော့ အဆင်မပြေမှုတစ်ခုခုကြုံရင် စိတ်က ပုံမှန်ထက်ပိုပြီး ထိရှတုံ့ပြန်ခံစားလွယ်တဲ့ သဘောမျိုး ဖြစ်နေတယ်၊ ဘယ်လိုပြောရမလဲ စိတ်အချဉ်ပေါက်နေတာလို့ပဲ ဆိုရမလား မပြောတတ်ဘူး ”
ထိုနေရာအရောက်မှာ မေသက်က ဘာကိုတွေးသည်မသိ ‘ ခွိ ’ ခနဲ ရုတ်တရက် ထရယ်သည်။
“ ဘာရယ်တာလဲ နင်က ”
“ သြော် ငါ့အဖေပြောဖူးတဲ့အကြောင်းလေးတစ်ခု ပြန်စဉ်းစားမိလို့ပါ၊ ဒီလိုဟ အဖေတို့ငယ်ငယ်တုန်းက အဖေတို့ရွာထိပ်မှာ ကုန်စုံဆိုင်ဖွင့်တဲ့ တရုတ်ကြီးတစ်ယောက် ရှိတယ်တဲ့၊ အဲ့ဒီတရုတ်ကြီးက ဆက်ဆံရေးသိပ်ကျဲတယ်၊ ဘယ်သူ့ကိုမှ စိတ်မရှည်ဘူး၊ သူနဲ့အဆင်ပြေတဲ့ ဈေးဝယ်သူဆိုလို့ ရှားတယ်၊ မ၀ယ်ရအောင်ကလည်း တစ်ရွာလုံးမှာ သူ့တစ်ဆိုင်ပဲ လောက်လောက်လားလားရှိတော့ မတတ်နိုင်ကြဘူး၊ အမြဲ ရှစ်ခေါက်ချိုးနေတဲ့မျက်နှာကို မကြည့်ချင်လျက်နဲ့ပဲ ၀ယ်နေကြရတယ်၊ အဲ့ဒါ တစ်ရက်ကျတော့ သူကြီးက ဈေးသွားဝယ်ရင်း မေးတယ်တဲ့၊ ‘ အရင်တုန်းကဆို မင်းလောက်သဘောကောင်းပြီး မင်းလောက် စိတ်ရှည်တဲ့သူ မင်းပဲရှိတာ။ အခုလို ဆိုင်ဖွင့်ပြီးမှ ဒီလောက်ဒေါသကြီးပြီး စိတ်တိုတတ်လာတာ ဘာကြောင့်လဲ တရုတ်ကြီးရယ် ’ ပေါ့၊ တရုတ်ကြီးက ချက်ခြင်းမဖြေပဲ ခဏစဉ်းစားနေပြီးတော့ ‘ သိချင်ရင် ကျုပ် နောက်လိုက်ခဲ့သူကြီး ’ ဆိုပြီး သူ့ခြံနောက်ထဲ ခေါ်သွားတယ်။ ခြံထဲမှာက နတ်တင်ဖို့ဆိုပြီး ခြင်းထဲ ၀ယ်ထည့်ထားတဲ့ ကြက်တစ်ကောင်ရှိတယ်။ ၀ါးခပ် ကျဲကျဲနဲ့ရက်ထားတဲ့ ကြက်ခြင်းကို နင်မြင်ဖူးတယ်မလား ”
ကျွန်မမျက်စိထဲ ပုံဖော်ကြည့်မိရင်း ခေါင်းညိတ်မိသည်။
“ အဲဒါ တရုတ်ကြီးက သူ့ကြက်ခြင်းထဲက ကြက်ကို လက်ညှိုးထိုးပြပြီးတော့ ‘ သူကြီး….ဟော့ဒီခြင်းထဲကကြက်ကို ခြင်းပတ်လည်အပေါက်လေးတွေကနေ တုတ်တစ်ယောက်တစ်ချောင်းစီနဲ့ ၀ိုင်းထိုးကြည့်ကြစမ်းပါ၊ ဒီကြက် ဘယ့်နှယ်ဖြစ်လာမယ် ထင်တုံး ’ တဲ့၊ ဒီတော့ သူကြီးက ‘ ဟ….ခြင်းထဲမှာ ထွက်ပေါက်မရှိဘဲ ပိတ်လှောင်ခံထားနေရတဲ့ကြားထဲ ဘေးပတ်လည်ကနေ တုတ်တွေနဲ့ ၀ိုင်းထိုးတာပါ ခံနေရဦးမယ်ဆိုရင် ဒီကြက် ဒေါကန်ပြီး ကတော်ကတော်နဲ့ အော်တော့မှာပေါ့ တရုတ်ကြီးရ ’ လို့ ပြန်ဖြေလိုက်တော့ တရုတ်ကြီးက ဘာပြန်ပြောတယ်မှတ်သလဲ ”
“ အင်း….၊ ဘာတဲ့လဲ ”
“ ကျုပ် စိတ်တိုတတ်လာတာလည်း အဲ့ဒီလိုကြောင့်ပဲပေါ့ သူကြီးရာ” တဲ့ ။
“ ဟောတော် ”
မေသက်စကားအဆုံးမှာ ကျွန်မ ရယ်မိတော့သည်။ တရုတ်ကြီး၏ ပြောင်မြောက်သော ဥပမာကို သဘောကျလွန်း၍ဖြစ်သည်။ ရယ်ရင်းနှင့် နာရီငုံ့ကြည့်တော့ ကျွန်မထွက်လာတာ အတော်ကြာသွားပြီဖြစ်ကြောင်း သိလိုက်ရသည်။
“ စကားပြောရတာတော့ ကောင်းပါရဲ့ မေသက်ရယ်….၊ အိမ်ကို ပြန်ကြည့်ဦးမှ၊ စိတ်ပြေလက်ပျောက်ဖြစ်အောင် ထွက်လာလိုက်တာ၊ အချိန်က သိတဲ့အတိုင်းပဲ ”
“ စိတ်ပြေလက်ပျောက် လာလည်တဲ့လူကိုမှ ငါကလည်း ဒီကနေ စိတ်ရှုပ်စရာ အခက်အခဲတွေ ဆီးကြိုပြောပြနေမိတယ်ဟေ့ ”
“ သြော်….အဲ့ဒီလိုပြောချင်တာပြောခွင့်ရလိုက်တော့လည်း ရင်ပေါ့သွားတာပေါ့၊ ငါတို့မှာလည်း တစ်ယောက်နဲ့တစ်ယောက် အကြာကြီးနေလို့မှ တစ်ရက် နာရီဝက်လောက်လေး ပြောဆိုတွေ့ဆုံဖို့ရာတောင် အလုပ်တွေက နောက်ဆံငင်နေတယ်၊ ထွက်ပြေးရအောင်ကလည်း ခြင်းနဲ့ အပိတ်ခံထားရတဲ့ ကြက်လိုဖြစ်နေတော့ ပြောလို့ပြောတာမဟုတ်ဘူး၊ ငါတို့ဘေးနားပတ်လည်ဝိုင်းနေတဲ့ တာဝန်တွေက ဘယ်အချိန်ကဘယ်လို ငါတို့နား ရောက်လာမှန်း သိကို မသိလိုက်သလိုပဲနော်၊ သိပ်မြန်တာပဲ၊ အခု သတိထားကြည့်မိချိန်ကျတော့ ခြေကော လက်ကော တစ်နေရာမှ မလွတ်တော့ဘူး၊ ဘ၀ဆိုတာ အဲ့ဒါပဲနေမှာပဲနော် ”
ပြောပြောဆိုဆိုနှင့်ပင် အိမ်ပြန်ဖို့ရာ ထရပ်ရပါသည်။ နို့ဆို စကားစက ဖြတ်ဖို့ရာ မလွယ်။
(၃)
မေသက်အိမ်မှ ပြန်လာပြီးနောက်ပိုင်း မနက်အိပ်ရာထ၍ မှန်ကြည့်ဖြစ်တိုင်း ကျွန်မ၌ သတိထားကြည့်မိစရာ အလုပ်တစ်ခု ပိုလာသည်။
ဘာရယ်တော့မဟုတ်။ ကိုယ့်ကိုယ်ကို ခြင်းထဲကကြက်နှင့်များ တူလာပြီလားဟု….။
ငွေဇင်ယော်ဦး(မိုးကုတ်)
ရွှေအမြုတေမဂ္ဂဇင်း၊ ဇန်န၀ါရီလ ၊ ၂၀၀၉
No comments:
Post a Comment