တစ်ဆစ်ချိုးမှာ အားတင်းခြင်း

“ တစ်ဆစ်ချိုးမှာ အားတင်းခြင်း ”

(၁)

သြော်….အစ်ကိုပါလား၊ ဘယ်လိုလဲဗျ လေဘာ လာလဲတာလား။
အစ်ကို မြင်တဲ့အတိုင်းပဲလေ၊ ကျွန်တော်လည်း ဒီလိုပဲပေါ့၊ ဒါပေမဲ့ အားမလျော့ပါဘူးဗျာ။ ဒီတစ်ခါနဲ့ပါဆိုမှ (၃) ခါ ရှိသေးတာပဲ၊ အစ်ကိုက (၇) ခါရှိပြီ၊ ဟုတ်လား။ ကျွန်တော့်လက်မှတ်က အပေါ်ဆုံးမှာ၊ ခေါ်ဖို့ အတော် စောင့်ရဦးမယ်။ လာဗျာ၊ ထိုင်ပါဦး၊ အေးအေးဆေးဆေးပေါ့။
ကျွန်တော်လား၊ ကျွန်တော်က မနှစ်က ဆယ်တန်း အောင်တာလေ။ သြော် ခင်ဗျား အဲလေ အစ်ကိုက ဘွဲ့ရတစ်ယောက်ကိုး၊ အစ်ကိုတို့ကမှ မျှော်လင့်စရာ ရှိပါသေးတယ်။ ကျွန်တော် ကျွန်တော်ဗျာ ဆယ်တန်းအောင်ရင် ဒေသတက်ရမယ် မှန်းထားတာ၊ ခုတော့ အားလုံးသွားပါပြီ။ ဘွဲ့တစ်ခုထက် အလုပ်တစ်ခုခုကသာ ကျွန်တော့်အတွက် လောလောဆယ် အရေးအကြီးဆုံးပါပဲ။
ခုလို လေဘာရုံး လာရတိုင်း စာမေးပွဲ အောင်စာရင်းထွက်စက ဆေးရုံမှာ ဆေးစစ်ဖို့ တန်းစီစောင့်ခဲ့ကြတာ သတိရတယ်ဗျာ။ အဲဒီတုန်းကဆိုရင်လေ မျှော်လင့်ချက် အပြည့်နဲ့ဗျ။ ရင်တထိတ်ထိတ်နဲ့ပေါ့။ ကိုယ့်နှလုံးခုန်သံ ကိုယ်ပြန်ကြားနေရတယ်။ ဆရာဝန်က ဘာများ ပြောလိုက်မလဲလို့၊ အသက်မှ မရှူဝံ့ဘူးဗျ။ ထားပါတော့လေဗျာ။ အစ်ကိုတို့ကတော့ ကျွန်တော့်ထက် အတွေ့အကြုံရှိမှာပါပဲ။ တက္ကသိုလ်ကို ကျွန်တော် သိပ်ရောက်ဖူးချင်တာပဲဗျာ။ ဘွဲ့မရချင်နေပစေ၊ နေဖူး ရောက်ဖူးချင်တာပါ။
အိမ်မှာတော့ ကျွန်တော်က အထွေးဆုံးဗျ။ ကျွန်တော့်အစ်ကိုတွေက ကျွန်တော့်ကို “ ချာတိတ် ” လို့ ခေါ်ကြတယ်။ ကျွန်တော်တို့က ညီအစ်ကို (၆) ယောက်ရှိတာ၊ ညီအထွေးဆုံးဆိုတော့ ချစ်လည်း ချစ်၊ အလိုလည်း လိုက်ပေါ့ဗျာ။ အဖေနဲ့ အမေကတော့ ကျွန်တော့်ကို စာလည်းအတော်ဆုံးမို့ တက္ကသိုလ်ပို့မယ်လို့ ခဏခဏပြောကြတယ်။ ကျွန်တော့် အစ်ကိုတွေကတော့ ကျွန်တော့်လို နှစ်ချင်းပေါက် မအောင်ကြဘူးဗျ။ အနည်းဆုံး (၃) နှစ်တော့ ဖြေရတာချည်းပဲ။ ခုတော့ သူတို့လည်း သူတို့အိမ်ထောင်နဲ့ သူတို့ပေါ့ဗျာ။ သူတို့ကိုယ်တိုင်လည်း ရုန်းကန်နေကြတော့ ကျွန်တော့်ကို ထောက်နိုင်ဖို့ဆိုတာ မလွယ်ပါဘူး။
အဲ ကျွန်တော့်အစ်ကို အကြီးဆုံးက စစ်တပ်ထဲကဗျ၊ မင်္ဂလာဒုံက တပ်ထဲမှာ တပ်ကြပ်ကြီးပေါ့။ စစချင်းတော့ဗျာ ကျွန်တော်လည်း ဒေသတက်ဖို့ ရန်ကုန်တောင် သွားခဲ့သေးတယ်။
ဒီလိုလေဗျာ၊ ကျွန်တော့်အစ်ကိုတွေက တစ်ယောက် ၅၀ စီထောက်မယ်ဆိုပြီး ကျွန်တော့်ကို ရန်ကုန် ပို့လိုက်တာပါပဲ။ တကယ်တမ်းကျတော့ဗျာ….။

(၂)

အစ်ကိုကြီးတို့က တန်းလျားမှာ နေရတာဗျ။ အခန်းကလေးတွေကလည်း နံရံတစ်ထပ်သာ ခြားတော့ တစ်ခန်းနဲ့တစ်ခန်း ဘာပြောပြော ကြားနေရတာပဲဗျ။ မိသားစုများတော့ အိမ်ခန်းကလေးထဲမှာ ပြည့်ကျပ်နေတာပဲ။ ကျွန်တော့်အတွက် အိပ်စရာမရှိလို့ အိမ်ရှေ့ဝရန်တာမှာ ထွက်အိပ်ရတယ်။ အိပ်ရာကနိုးတာနဲ့ ကမန်းကထန်း ထ ပြီး ရေဆွဲရတယ်ဗျ။ မနက် မျက်နှာသစ်ရင် ကြားရတဲ့အသံကတော့ ကျွန်တော့်မရီးရဲ့ ထမင်းကြော်သံပဲဗျ။ ထမင်းကြော်နံ့ကလေး ရလာရင် ဗိုက်ထဲမှာ ဟာလာ ဆာလာတယ်။ ဒါပေမဲ့ သူတို့မှာ ကလေးက (၅) ယောက်ရှိတာဆိုတော့ ထမင်းကျန်နည်းရင် ကလေးတွေကို ဝေပုံကျခွဲပေးလိုက်တာနဲ့ ကုန်တာပဲ။ ဒါနဲ့ ထမင်းရည် ကပျာကယာသောက်၊ အစ်မကြီး ထည့်ပေးလိုက်တဲ့ ထမင်းဘူးကလေးဆွဲပြီး (၉) ကားဂိတ်ကို ပြေးရတာပဲ။
ကျောင်းဝင်စကလား၊ လေးရာလောက် ကုန်တယ်ဗျ။ ကျွန်တော့်အစ်ကိုကြီးက ငွေနှစ်ရာလောက် စိုက်ထားရတော့ မရီးကလည်း မကြည်ဘူးပေါ့ဗျာ။ အိမ်ပေါ်မှာ လူပိုတစ်ယောက် တင်ကျွေးထားရတယ်ဆိုတော့ ဘယ်ကျေနပ်ပါ့မလဲ။ ဒါပေမဲ့ ဘယ်တတ်နိုင်ပါ့မလဲ၊ ဒီလိုပဲ ကုတ်ကတ်နေရတာပဲလေ၊ ကိုယ်က ပညာလိုချင်တာကိုး။
ဒေသ(၂)ဆိုတာက ပျားအုံကြီးလိုပဲဗျာ၊ အတန်းတွေက အများသား။ စစချင်းတော့ ကျွန်တော် ဘယ်သိမလဲ၊ နောက်တော့လည်း အသားကျသွားတာပါပဲ။ ဘတ်စ်ကား စီးရတာ နည်းနည်းခက်ပေမဲ့ ယောက်ျားလေးပဲ ကိစ္စမရှိပါဘူး။
ကျွန်တော့်ဘော်ဒါတွေက မြို့ထဲကဗျ။ သူတို့က အပြင်မှာ ကျူရှင်လည်းတက်ကြတယ်။ ကျောင်းတစ်ဖက်နဲ့ပေါ့။ ကျွန်တော်က သင်္ချာယူတော့ သင်္ချာက နည်းနည်းခက်တယ်။ သမိုင်းဝင်းထဲမှာဆိုတော့ (RIT)နဲ့လည်း သိပ်မဝေးပဲဗျာ။ ကျွန်တော်လည်း အင်ဂျင်နီယာ ဖြစ်ချင်တာပေါ့ဗျ။ ပေါ်ပြူလာဖြစ်တဲ့ လိုင်းမို့ မဟုတ်ပါဘူးဗျာ။ တကယ့်ကို ၀ါသနာပါတာပါ။ ကျွန်တော့်တူကလေးတွေကို သံတိုသံစလေးတွေနဲ့ သင်္ဘောလေးတွေ၊ မော်တော်ကားလေးတွေ လုပ်ပေးရင် လက်မြောက်တယ်လို့ ကျွန်တော့် မရီးတွေက ချီးကျူးတတ်ကြတယ်။
အတန်းထဲက မိန်းကလေးတွေလား၊ မဆိုးပါဘူး၊ အလှသားပဲဗျ။ တက္ကသိုလ်ကျောင်းသူတွေတော့ မသိဘူး။ ဒေသက မိန်းကလေးတွေက ပိုပြီးပျိုမျစ်တယ်၊ လန်းဆန်းတယ် ဆိုရမလားပဲ။ ကျွန်တော်တို့အတန်းထဲက ကောင်မလေးတွေနဲ့တော့ သိပ်မကြည်လှပါဘူး။ စွာတယ်ဗျ။ ဒါပေမဲ့ ကျွန်တော်က သူတို့ကို စိတ်မ၀င်စားပါဘူး။ ကျွန်တော့်မှာ ကောင်မလေးရှိတယ်ဗျ။ ကျွန်တော်တို့ မြို့ကပါပဲ။ သူက ဒီနှစ် ဆယ်တန်းကျတယ်။ ထုံးစံအတိုင်း ရန်ကုန်ရောက်သွားရင် မမေ့ရဘူး၊ ဘာဘူး စာရေးတာပေါ့ဗျာ။
ညနေကျောင်းဆင်းလာရင် အိမ်မှာနေရတာ ကျဉ်းကျပ်လွန်းလို့ ကျွန်တော့်စိတ်တွေ အချဉ်ပေါက်လာရင် သီချင်းအော်ဆိုလိုက်တာပဲဗျ။ အစ်ကို သီချင်းဝါသနာပါသလား။ ကျွန်တော့်မှာ ဂစ်တာတစ်လတ် ရှိတယ်။ ကျွန်တော့်အဖော်ပဲပေါ့ဗျာ။ ကျွန်တော့်သူငယ်မဆီက စာလာရင်ဖြစ်ဖြစ်၊ ကျွန်တော့်စိတ်ထဲမှာ တစ်ခုခုပြင်းပြင်းထန်ထန် ခံစားရရင်ဖြစ်ဖြစ် သီချင်းဆိုပြီး ရင်ဖွင့်ပစ်လိုက်တယ်ဗျာ။
အဲဒီ ၀ါသနာကြောင့် ကျွန်တော့်မရီးနဲ့ ထိပ်တိုက် တွေ့ခဲ့တာပေါ့။ ကျွန်တော့်အစ်ကိုကတော့ ကျွန်တော့်ကေကို နည်းနည်းရှည်လို့တဲ့၊ မကြည်ဘူး။ ဒါလည်း ဘယ်လောက်မှ မဟုတ်ပါဘူးဗျာ။ သူ့လို ခေါင်းတုံးဆံတောက်မထားတာနဲ့ အပြစ်ပြောတာပါပဲ။ အဲ ကျွန်တော့်မရီးကတော့ နေ့ရှိသရွေ့ ကျွန်တော့်ဂစ်တာကို မျက်စောင်းထိုးနေတာပဲ။
ကျွန်တော့်ကို “ လတ်လျားလတ်လျားနဲ့ ပေါ့ပေါ့နေ ပေါ့ပေါ့စားတဲ့အကောင် ” လို့ဆိုတယ်။ ကျွန်တော်လည်း သူ့အပြောအဆိုမှ လွတ်ပါစေတော့လို့ တနင်္ဂနွေနေ့တိုင်း မီးဖိုထဲမှာ ကူညီပြီး ရှင်းပေး၊ ၀ိုင်းချက်ပေး လုပ်ပါတယ်ဗျာ။ သူက ဘာကို သဘောမကျသလဲ မဆိုနိုင်ပါဘူး။ ကျွန်တော့် တူမကလေးတွေကလည်း သူ့ကို ကူညီနိုင်ပြီပဲဗျာ။ ပြီးတော့ ကျွန်တော့်ကို ပြောစရာရှိရင်လည်း တိုက်ရိုက်မပြောဘူး၊ ကလေးတွေကတစ်ဆင့် ပြောတယ်။ ဆိုချင် ဆဲချင်လည်း ရွဲ့ပြီး ကလေးတွေကို ဆဲတယ်ဗျ။ ကျွန်တော် အနာဆုံးကတော့ ဘ၀မေ့တယ်၊ ဘ၀မေ့တယ်နဲ့ ပြောတဲ့ စကားပဲ။ ဘ၀မေ့ရအောင် ကျွန်တော်က ဘယ်လိုဘ၀က လာတဲ့ကောင်လဲ၊ လူဆိုတာ ကိုယ့်ကိုယ်ကို သိပါတယ်ဗျာ။

(၃)

ကျွန်တော့်အဖေက လ-၀-က က မြို့နယ်ဦးစီး တစ်ယောက်ပါ။ ကျွန်တော် ဆယ်တန်းမအောင်ခင် အရင်တစ်နှစ်ကပဲ ပင်စင်ယူလိုက်ရတယ်။ အဖေ ပင်စင်ယူတော့ အသက်မစေ့သေးပါဘူး။ အလုပ်ထဲမှာတင် လေဖြတ်ပြီး ကိုယ်တစ်ခြမ်းသေသွားလို့ ပင်စင်ယူလိုက်ရတာ။
အဖေ ပင်စင် မယူခင်ကတည်းက ကျွန်တော်တို့ အိမ်ကြီးတစ်ဆောင် ဆောက်ထားပြီးသားမို့ ပင်စင်ယူတော့လည်း နေစရာတော့ မပူရဘူးပေါ့။ ဒါပေမဲ့ ကျွန်တော်တို့ ရှိသမျှလည်း အဖေ့ဆေးဖိုးနဲ့ အိမ်ဆောက်တဲ့ကြွေးနဲ့ လုံးပါးပါးတာပါပဲ။
အဖေ့ရောဂါကလည်း မသက်သာပါဘူး၊ တရှောင်ရှောင်ပါပဲ။ နောက်တော့ မျက်စိကွယ်သွားတယ်။ စိတ်တွေလည်း ကယောင်ကတမ်းနဲ့၊ အဖေက သူ့အလုပ် သူ စွဲလမ်းလွန်းတယ်။ အိမ်နေရင်းနဲ့ ရုံးမှာ၊ ရွာတွေမှာ ထင်ချင်ထင်နေတတ်တယ်။ တစ်ခါတလေလည်း ယောင်ယမ်းပြောတယ်။
အမေကတော့ သားတွေချည်း မွေးထားလို့လား မသိဘူး။ ယောက်ျားတစ်ယောက်နဲ့ တူတယ်ဗျ၊ စိတ်လည်း ဆတ်တယ်။ ချွေးမတွေနဲ့လည်း တည့်လှတယ် မရှိပါဘူး။ သူက အပြောကြမ်းတော့ တော်ရုံ ဒဏ်မခံနိုင်ကြဘူး။ ဒါပေမဲ့ အမေက ကျွန်တော့်ကို အချစ်ဆုံးပါ။ အဖေ့ရောဂါကို အမေနဲ့ကျွန်တော်ပဲ အနွံအတာခံ ပြုစုခဲ့ကြတာပဲလေ။ ကျွန်တော်တို့လည်း အိမ်ကြီးပေါ်မှာ နေပေမဲ့ တစ်နေ့မှ စိတ်ချမ်းသာလှတယ် မရှိပါဘူးဗျာ။ အဖေ့ကို နေ့တကြည့်ကြည့်၊ ညတကြည့်ကြည့်ပေါ့။ အဖေက တစ်ခါတလေ ကျွန်တော့်ကိုတောင် မှတ်မိချင်မှ မှတ်မိတာ။
ဒါပေမဲ့ အဖေက အစားအသောက်လည်း မပျက်ဘူး၊ ၀၀ဖြိုးဖြိုးပဲဗျ။ ရောဂါကြောင့် မျက်စိကွယ်တာ၊ ကိုယ်လက် မလှုပ်ရှားနိုင်တာကလွဲလို့ အရင်ကထက်တောင် ပိုစားနိုင်၊ ပိုပြောနိုင်သလား အောက်မေ့ရတယ်။ သူ့စိတ်ထဲ ထင်တာ မြင်တာ မှန်သမျှ တတွတ်တွတ် ပြောနေတာပဲ။
ကျွန်တော် ဆယ်တန်းအောင်တော့ အဖေ့ခမျာ ၀မ်းသာရမှန်းတောင် မသိတော့ပါဘူးဗျာ။ သတိလက်လွတ်နေပြီပဲ။ ကျွန်တော်နဲ့အမေ ပြောသမျှကို နားထောင်ပြီး အင်း အင်းနဲ့ လိုက်နေတယ်။ အမေကတော့ ကျွန်တော့်ကို အစ်ကိုတွေအားလုံးဆီ စာရေးခိုင်းတယ်။ အဖေ့ ကျန်းမာရေးကော၊ ကျွန်တော့် ပညာရေးကော ထည့်လိုက်ပေါ့။ ဆယ်တန်းအောင်စကတော့ ကျွန်တော့် အစ်ကိုတွေက အတော်လေး ဂရုစိုက်ကြသားဗျာ။ ကျွန်တော်က ဂုဏ်ထူး(၃)ခုနဲ့ အောင်တာကိုး။ ကျွန်တော့် အစ်ကိုငယ်ကဆို မဖြစ်မနေ ဒေသပို့မယ်နဲ့ ကြုံးဝါးခဲ့တာ၊ ကျွန်တော် နားလည်ပါတယ်ဗျာ။ သူများ သဒ္ဓါမှ ပညာရမယ်ဆိုတာ၊ ကျွန်တော် ကလေးမှ မဟုတ်တော့တာပဲ။

(၄)

သြော်…ပြောရဦးမယ်ဗျာ၊ ကျွန်တော့် အိပ်ရာကလေးက အိမ်ရှေ့ ၀ရန်တာမှာလို့ ပြောခဲ့တယ်မို့လား၊ အိမ်ခန်းကလေး တစ်ခန်းရှိတော့ ကျွန်တော့်တူမကလေးတွေက အိမ်အတွင်းခန်းထဲမှာ အိပ်ကြတယ်။ ကလေးအငယ်တွေနဲ့ ကျွန်တော့်အစ်ကိုတို့ လင်မယားကတော့ အိမ်ရှေ့ကြမ်းပြင်မှာ စီတန်း အိပ်ကြတယ်။ ဒီတော့ ကျွန်တော့်အတွက်နေရာက ၀ရန်တာက ဂမုန်းပင်ကလေးတွေ ကြားထဲမှာ၊ ဖိနပ်ချွတ် ၀ရန်တာမှာ ဖြစ်သွားရတာပေါ့။
တစ်ညတော့ဗျာ၊ ကျွန်တော်လည်း တောင်တွေး မြောက်တွေးနဲ့ အိပ်မပျော်ဘူး။ စိတ်က အမေတစ်ယောက်တည်း လူမမာ အဖေကြီးနဲ့ ထားခဲ့ရတာ ကြောင့်ကြနေမိတယ်။ ညဥ့်ဦးပိုင်းမှာ တလက်လက် လင်းနေတဲ့ ကြယ်ကလေးတွေနဲ့ ဖြည်းဖြည်းလေး ရွေ့လျားနေတဲ့ လခြမ်းကွေးကလေးကို ကြည့်ရင်း အိပ်ပျော်ဖို့ ကြိုးစားရတယ်။
ဒါနဲ့ မှေးခနဲ အိပ်ပျော်သွားတယ်။ သွပ်မိုးပေါ်က မိုးသံ တဖြောင်းဖြောင်းနဲ့ မိုးစက်တွေ စဉ်လာမှ လန့်နိုးလာတယ်။ ညဥ့်ဦးက ကြယ်တွေ လင်းနေသားနဲ့ဗျာ။ မိုးက တဗြုန်းဗြုန်း တဒိုင်းဒိုင်း သဲကြီးမဲကြီး ရွာချတယ်။
အိမ်ထဲက ကလေးတွေရော၊ ကျွန်တော့်အစ်ကိုကြီးတို့ရော တုတ်တုတ်မှ မလှုပ်ကြဘူးဗျာ၊ မနိုးဘူး။ သူတို့က ရုပ်ရှင်ကြည့်ပြီး ပြန်လာကြတာဆိုတော့ အိပ်ပျော်စပဲ ရှိဦးမယ်။
သူတို့က သူခိုးကြောက်လို့ အတွင်းကနေ တံခါးပိတ် အိပ်ကြတယ်ဗျ။ ကျွန်တော့် စောင်တွေလည်း မိုးရေနဲ့ စိုရွှဲကုန်တယ်။ လေတိုက်လာတော့ မိုးစက်တွေနဲ့ လှမ်းပက်လိုက်သလိုပဲဗျာ။ ညက ဖတ်လက်စ စာအုပ်ကလေးလည်း ရေတွေ စိုရွှဲကုန်တယ်။ စောင်တွေကို ကမန်းကတန်း လုံးထွေးပြီး တံခါးကို အတင်းထုရတယ်။
အစ်ကိုကြီး…အစ်ကိုကြီးနဲ့ ဘယ်လောက် ခေါ်ခေါ် မကြားဘူးဗျာ။ အိပ်မောကျနေလို့လား၊ မိုးသံကြောင့်ပဲလား မပြောတတ်ဘူး။
ကျွန်တော်လည်း တံခါးထုလိုက်၊ အော်ခေါ်လိုက်၊ မိုးပက်လို့ နေရာရွှေ့လိုက်နဲ့ နာရီဝက်မက ကြာတယ်။ မိုးကလည်းစို၊ စိတ်လည်းပျက်၊ ချမ်းချမ်းနဲ့ ဂမုန်းပင်ကလေးတွေ ကွယ်ပြီး ထိုင်နေရတယ်။ ကျွန်တော်ဆံပင်တွေ၊ စောင်တွေလည်း ရွှဲရွှဲစိုကုန်ပြီ။ ဂီတာကြိုးတွေပေါ်ကလည်း မိုးရေစက်တွေ တစ်စက်ချင်းကျသံ ကြားနေရတယ်။
ကြာတော့ ကျွန်တော် ၀မ်းနည်းလာတယ်။ အော်ခေါ်ရင်း အသံတွေလည်း ပြာလာပြီ။ ကျွန်တော့်စိတ်ကို လျှော့လိုက်တယ်။ မိုးကလည်း တအား သည်းတာပဲဗျာ။ ဖြန်းခနဲ ဖြန်းခနဲနဲ့ ကျွန်တော့် ကျောပြင်ကို ၀ါးခြမ်းပြားသေးသေးနဲ့ ခပ်စပ်စပ် ရိုက်နေသလိုပဲ။ ကျွန်တော့်ရင်ထဲမှာ ဒေါသလည်းထွက်၊ စိတ်အားငယ်တာလည်း အရမ်းပဲဗျာ။
ငါ့ဘ၀ဟာ ခွေးကတက်က ခွေးတစ်ကောင်လောက်မှ တန်ဖိုးမရှိပါလားလို့လည်း တွေးမိတယ်။ ဒါနဲ့ ဂစ်တာကို ကောက်ကိုင်လိုက်မိတယ်။
ခွေးကလေးအို့….ခွေးကလေးအို့
အတူတူနေမယ်လို့….ခွေးကလေးအို့….အိမ်ပိုင်ရှင် အဒေါ်ကြီး တံခါးဖွင့်လို့ကြည့်တဲ့ခါ….ပါလာရာ လေလွင့်ခွေး၊ ငါ့တိုက်ထဲ ပေးမ၀င်ပါ….အလိုက်မသိတဲ့ လူတစ်ကောင်မို့ ခွေးကလေးကို မစာနာပါ….အတူတူနေမယ်လို့….။
ကျွန်တော့်အသံက ရင်ထဲက ပွင့်အံထွက်လာတယ်။ ဂစ်တာသံကလည်း အိပ်ပျော်နေတဲ့ ညကို လှုပ်နှိုးလိုက်သလိုပဲ။ မိုးက တစ်စတစ်စ စစ်သွားတယ်။ ကျွန်တော့် သီချင်းသံနဲ့ ဂစ်တာသံက ပိုပြီး ကျယ်လောင်လာတယ်။ တီးလုံးတစ်ပိုဒ်ပြီး တစ်ပိုဒ်၊ သီချင်း တစ်ပိုဒ်ပြီးတစ်ပိုဒ် ဂျာအေး သူ့အမေရိုက်သလို ဆက်ကာဆက်ကာ ဆိုမိတယ်။
ကျွန်တော် တစ်ချိန်လုံး ဟစ်အော် ထုရိုက်ပြီး ဖွင့်ခိုင်းလို့ မရခဲ့တဲ့ တံခါးဟာ ၀ုန်းခနဲ ပွင့်သွားတယ်။ အထဲက ကျွန်တော့်အစ်ကိုရဲ့ စည်ပိုင်းကြီးလို ကိုယ်လုံးကြီး လိမ့်ထွက်လာတယ်။
“ ဒါ အိပ်ချိန်ကွ…မင်း လူလို နားမလည်ဘူးလား ” တဲ့ဗျာ။
လှမ်းကန်လိုက်ုတဲ့ အစ်ကို့ခြေထောက်က ကျွန်တော့်ပခုံးစွန်းကို ခပ်ပြင်းပြင်း ထိသွားတယ်။ ပူဆွေးလို့ မဟုတ်တဲ့ နာကြည်းလို့ကျလာတဲ့ မျက်ရည်ပူတွေဟာ ကျွန်တော့်ပါးပြင်ပေါ် စီးဆင်းလာတယ်။

(၅)

နောက်တော့ အဖေ ဆုံးသွားတယ်။ ကျွန်တော်လည်း ကျောင်းဆက်မတက်ဖြစ်တော့ဘူး။ အဖေ ဆုံးတဲ့ညက မိုးသိပ်သည်းနေလို့ အမေဟာ အဖေ့အလောင်းကို ပိုက်ရင်း မိုးအလင်းကို တစ်ယောက်တည်း ထိုင်စောင့်ခဲ့ရတယ်လို့ ပြောတယ်။ တိုက်ဆိုင်လိုက်တာဗျာ။
အဖေ ဆုံးတာလည်းတစ်ကြောင်း၊ ကျွန်တော် ကျောင်းထွက်လိုက်ရတာလည်း တစ်ကြောင်းကြောင့် အမေ့စိတ်တွေ ခပ်ကြောင်ကြောင် ဖြစ်သွားသေးတယ်။ ခုတော့ အဖေ့ဆေးဖိုးတွေ မကြေလို့ ကျွန်တော်တို့ အိမ်ကြီးလည်း ရောင်းပစ်လိုက်ပြီလေဗျာ။ ရတဲ့ငွေလား…အင်း…တချို့တစ်ဝက်လည်း ကျွန်တော်တို့ အစ်ကိုတွေ အမွေခွဲတယ်ဆိုပြီး ဝေယူလိုက်ကြတယ်။ သူတို့မလဲ မချောင်လည်ကြဘူးဗျ။ လိုချင်ငမ်းတက်တယ်လို့ ပြောလို့ ဘယ်ဖြစ်မလဲဗျာ။ အဖေ့ အသုဘစရိတ်ကလည်း အတော့်ကို ကုန်သေးတာကိုး။
တကယ်ပါပဲဗျာ၊ ဟိုအလင်္ကာထဲကလိုပေါ့။ မီးဘယ်သွား၊ ရေနဲ့ငြိမ်းလို့ ကုန်ပြီ။ ရေဘယ်သွား၊ ဆင်ကြီးသောက်လို့ ကုန်ပြီ ဆိုတာလိုလေ။ အေးဗျာ…ကျွန်တော်တို့ သားအမိကို အစ်ကိုတွေက သူတို့အိမ် လိုက်နေဖို့ ခေါ်ကြပါရဲ့။ တော်ပါပြီဗျာ၊ သူများအိမ်နေရတဲ့ အရသာကို ကျွန်တော် ရေရေလည်လည် သိပြီးပြီပဲ။ ထပ်မမြည်းချင်တော့ပါဘူး။
အမေလား၊ နည်းနည်းတော့ သက်သာလာပါပြီဗျာ။ အမေက စိတ်ကြည်လင်ရင် ကြည်လင်သလို နေကောင်းပါတယ်။ ကျွန်တော့်ကိုတော့ အမေက အတော် အားကိုးသဗျ။
အဖေ ရှိစဉ်ကတော့ အဖေ့ကို ပြုစုရင်း ကျွန်တော်တို့သားအမိ တစ်ယောက်ကို တစ်ယောက် အပြန်အလှန် အားပေးနေကျဗျ။
ခုတော့ ကျွန်တော် တစ်ယောက်တည်း….အဲလေ ကျွန်တော့်ကောင်မလေး…သူလည်း အမေ့ကို အတော် ဂရုစိုက်တယ်ဗျာ။ ကျွန်တော်တို့ ဘ၀တူတွေပါ။ ကျွန်တော် စိတ်မပျက်ပါဘူးဗျာ။ သူ့ကြောင့် ကိုယ့်ကိုယ်ကို ပိုပြီး ယုံကြည်လာတယ် ထင်မိတယ်။ ဟော…ကျွန်တော့်နံပါတ် ခေါ်ပြီ။ ရှေ့အပတ်ဆို အစ်ကိုနဲ့တွေ့ချင်မှ တွေ့တော့မယ်။ မန်းရေနံမှာ နေ့စားဝင်လုပ်ဖို့ စုံစမ်းထားတယ်ဗျ။ အဲဒီက အလုပ်ရရင်တော့ လေဘာစောင့်ရဖို့ မလိုတော့ဘူးဗျို့၊ သွားမယ်ဗျာ။
အစ်ကိုအလှည့်လည်း ရောက်တော့မှာပါ။

ခင်မြဇင်
မိုးဝေမဂ္ဂဇင်း၊ သြဂုတ်လ၊ ၁၉၈၀