#အချစ်ရေ့
#ငြိမ်းကျော်
(၁)
ကျွန်တော် ကျောင်းမနေရသေး။ ရွာထဲက သက်တူရွယ်တူတွေ၊ ကျောင်းတက်နေသူတွေနှင့် ရွာရိုးကိုးပေါက် လည်တတ်ပြီ။ အလည်လွန်လျှင် အမေရိုက်သည်ကို မကြာခဏ ခံရသည်။ ကုလားမန်ကျည်းသီးနှင့် ရေသဖန်းပင်ကြီးပေါ်သို့ တက်သောကြောင့် အဖေ့ကြိမ်ချက် ခဏခဏမိသည်။ ရေသဖန်းသီးမှည့်ကို ကျွန်တော်ကြိုက်သည်။ မပြတ်သီး၊ မပြတ်မှည့်တတ်၍ ရေသဖန်းပင်ကြီးရှိရာသို့ မကြာခဏရောက်သည်။ လက်တစ်ကမ်းမှစ၍ အကိုင်းကြီးတွေဖြာနေသဖြင့် တက်ရသည်မှာ လှေကားနင်းရသလို အရသာရှိသည်။ အခက်အလက် အရွက်တွေအုပ်ဆိုင်းကာ ပင်စည်အလယ်ခွကြားကိုင်းဖျားအထိ အသီးတွေခဲနေ၏။ သီးကင်းတွေ၊ သီးစိမ်းတွေ၊ ၀င်းရောင်တွေ၊ အမှည့်တွေ ကျွန်တော်တို့အတွက် ရတနာသိုက်။
ရေသဖန်းပင်ကြီးပေါ်တွင် ထိုင်ကာ ဆွတ်စားသည်။ ထိုအချိန်တွင် အပင်နှင့် စည်းရိုးကပ်နေသော အိမ်မှအသံကို နားယဉ်စပြုနေပေပြီ။ ဘကြီး ဦးဘကြင် ဒေါပွနေပြီ။ ကြီးကြီးဒေါ်ရွှေက ပြန်ဟောက်နေပြီဟု သိနေကျ။ ဘကြီး ဦးဘကြင်သည် ငါးမိုင်လောက်ဝေးသော ဘူတာတွင် အလုပ်ဆင်းရသည်။ ရထားသံလမ်း အလုပ်သမား။ ကြီးကြီးဒေါ်ရွှေက ခြံထွက်ပစ္စည်း ကုန်စိမ်းရောင်းသည်။ ထိုနှစ်ယောက်သည် တကျက်ကျက်။
(၂)
ကျွန်တော်လေးတန်းအောင်သောအခါ ဘူတာရုံအရှေ့ဘက် အစိုးရကျောင်းတွင် ကျောင်းဆက်တက်ရသည်။ ငါးတန်းသမား လေးငါးယောက်နှင့်အတူ ငါးနာရီကျော်ကျော်လောက်တွင် ရွာမှထွက်ရသည်။ ထိုသို့ ကျောင်းသွားရတိုင်း ဘကြီး ဦးဘကြင်တို့အိမ်ရှေ့မှ ဖြတ်၍ လျှောက်ရသည်။ “ ဟေ့…မယ်ရွှေ၊ ရေနွေးကြမ်းက ဘယ်ကမ္ဘာကျမှရမှာလဲ။ အိုးထဲထည့်ထားတာ ကြာလှပကော ” “ ရှင်လာယူတော့ ဘာဖြစ်မလဲ ” “ ငါခူးပေးထားတဲ့ ဒန့်ဒလွန်သီးတွေ စည်းတော့လေ၊ ဘယ်အချိန်ရောင်းမှာလဲ ” “ ညကတည်းက သင်အူနဲ့ စည်းထားတာ ရှင်မမြင်ဘူးလား ” “ ရှင့်ဘာသာရှင် ညက ဘုတ်အုပ်ဖတ်ပြီး ဘုရားစင်တင်ထားတာ ကျုပ်ကို ဘာလို့မေးနေရသတုန်း ” အချီအချသံတွေ ကြားနေကျ။
(၃)
ဆယ်တန်းအောင်စာရင်း မျှော်ရစဉ်အတွင်း သံချောင်းနှင့် ညိုကြီးတို့၏အိမ်သို့ ကျွန်တော်သွားသည်။ ကျွန်တော်၏သူငယ်ချင်းတွေက ကျောင်းဆက်မနေကြ။ သံချောင်းက ကျွန်တော် ကိုးတန်းအရောက်တွင် မိချောင်းအိုင်ရွာမှ အမျိုးသမီးနှင့် အိမ်ထောင်ပြုလိုက်သည်။ မိဘရိုးရာ လယ်ယာကိုင်းကျွန်း လုပ်ကိုင်နေသည်။ ညိုကြီးက မီးရထားသံလမ်းဘက်တွင် အလုပ်ဝင်သည်။ ညိုကြီး အိမ်ထောင်မကျသေး။ ညိုကြီးကိုခေါ်ကာ သံချောင်း၏လယ်တဲသို့သွားသည်။ ရောက်ရာရာ စကားပြောကြသည်။ ကလေးဘ၀ကအကြောင်းတွေပြောကြရင်း ရေသဖန်းသီး၊ ကုလားမန်ကျည်းသီးနှင့် ပုတ်သင်ညိုတို့အကြောင်း စကားရောက်သည်။ ဘကြီး ဦးဘကြင်တို့ လင်မယားအကြောင်းကို စကားဆိုက်လာသည်။ ညိုကြီးက ….
“
သူတို့ကြည့်ရတာ မတည့်အတူနေကွ နော် … ငပါ ”
ကျွန်တော့်ကိုပြောသည်။ “ အင်း ” ဟု ကျွန်တော်ပြောသည်။ သံချောင်းက ….
“
အသွင်မတူ အိမ်သူမဖြစ်တဲ့ ”
သံချောင်း၏ စကားပုံသည်လည်း မှန်သည်။ ကျွန်တော်က ….
“
ငါတို့ ကလေးပေါက်စကတည်းက တစ်ယောက်နဲ့တစ်ယောက် မျက်နှာချင်းမဆိုင်နဲ့၊ ဆိုင်တာနဲ့ ဗျစ်တောက် ဗျစ်တောက်၊ နားရော ပါးစပ်ရော မသက်သာလိုက်တာ။ သူတို့လင်မယားကြည့်ပြီး အိမ်ထောင်ပြုရမှာ ကြောက်တောင်ကြောက်လာတယ်။ လင်မယားဆိုတာ လင်က မယားကိုဆူ၊ မယားက လင်ကိုမာန်၊ စိတ်ညစ်စရာကြီး …. ”
သံချောင်းက ခေါင်းခါသည်။ မည်းချိပ်ချိပ်မျက်နှာကို ရှုံ့ပြီး ….
“
ငါလည်း မိန်းမယူမယ့်သာ ယူရတာ၊ ဘကြီး ဦးကြင်တို့ လင်မယားလိုဆို ဒုက္ခပဲလို့ တစ်ခါတစ်ခါ တွေးမိတယ်ဟ ”
ညိုကြီးက ကောက်ကွေးနေသော ဆံပင်ကိုကုတ်ကာ တဟားဟားရယ်၏။
(၄)
ဥပစာအပိုင်း(ခ) စာမေးပွဲကို ဇွန်လတွင် ပြန်မဖြေရအောင် ကိစ္စဖြတ်ခဲ့ပြီး ရွာမှာပြန်နေသည်။ ရွာမှာ အပြောင်းအလဲတွေ ဖြစ်စပြုနေ၏။ ဘုန်းတော်ကြီးကျောင်းသည် ကျွန်တော် စာသင်ရာကျောင်း ဖြစ်ခဲ့သော်လည်း ယခုအခါ မူလတန်းကျောင်းတစ်ကျောင်း ဆောက်ပြီးပေပြီ။ ဆရာတော်ကြီးကျောင်းဝင်းထဲ၌ လက်ဆွဲတုံကင်ရေစက် တပ်ပြီးပေပြီ။ စူဠာမဏိစေတီတော်နှင့် ဆရာတော်ကြီးကျောင်းတွင် လျှပ်စစ်မီးစက် ရှိနေပေပြီ။ ကားလမ်းနှင့် ရထားလမ်းသို့သွားရာ လှည်းလမ်းသည် ကျောက်ခင်းလမ်း ဖြစ်နေပေပြီ။
မီးခြစ်ဆန် ကြဲထားသလိုဖြစ်နေသော အိမ်နှင့်လမ်းကို အကွက်ပြန်ရိုက်သည်။ တုံးကုလားဖြင့် အိမ်ရွှေ့ကြသည်။ လမ်းသည် အရှေ့ အနောက် တောင် မြောက် တည့်တည့်။ အိမ်တွေ ညီညီညာညာ။ ကျားလန်ဝါးချွန်စည်းရိုးတွေ သပ်သပ်ရပ်ရပ်။ လမ်းဖောက်လိုက်သောကြောင့် ကုလားမန်ကျည်းသီးပင်ကား မရှိတော့။ ရေသဖန်းပင်ကြီးသည် ဘကြီး ဦးဘကြင်တို့၏ အ်ိမ်ဝိုင်းထဲသို့ ရောက်သွား၏။
“
ရှေ့နှစ်ဆို ဒီမှာ အလယ်တန်းကျောင်း ရမယ်ကွ ”
အဖေက ၀မ်းသာအားရ ပြောသည်။ အမေက ….
“
မြေပဲနှင့် နှမ်း အစမ်းချကြည့်တာ အောင်တယ် သားရေ့ ”
အမေက စိုက်ပျိုးရေးအကြောင်း ပြောသည်။ ညိုကြီးက အဖေ့ကို ….
“
ဒါပေမဲ့ ဦးရီးရ၊ မပြောင်းလဲတာကတော့ ဦးဘကြင်တို့ လင်မယားပဲဗျနော် ”
ကျွန်တော် ရယ်လိုက်သည်။ အမေက …..
“
အစ်မဒေါ်ရွှေက ခြံထဲမှာ စိုက်ထားတာတွေ့လား၊ ဒန့်ဒလွန်ပင် အပင်သုံးဆယ်ကျော်။ မနှစ်ကစပြီး ငှက်စာဆော်ပြီ။ စားပင်သီးပင်တွေလည်း မနည်းပါဘူး။ အစ်ကိုဘကြင် ပင်စင်နဲ့က ဘယ်စားလောက်မှာလဲ။ အစ်ကိုဘကြင်က တရားစာအုပ်တွေဖတ်၊ ဆရာတော်လေးနဲ့ တရားဆွေးနွေး။ အင်း…ပြီးတော့ အစ်မဒေါ်ရွှေနဲ့ ဆူညံဆူညံလုပ်၊ ဒါပဲလေ ”
အဖေက ဆေးငုံသံဖြင့် ရယ်သည်။
(၅)
ကျွန်တော် စိတ်ဝင်စားသော အမျိုးသမီး၏အမည်ကို ကျွန်တော် မသိရသေး။ အင်းလျားဆောင်မှာနေသည်ဟုလောက်သာ ကျွန်တော်သိရသည်။ သူငယ်ချင်းတစ်ယောက်က စုံစမ်းပေးသည်။ ‘ ဒီပဲယင်းသူ ’ ဟု ပြောသည်။ နာမည်က မသေချာ။ စိန်စိန်လား၊ ခင်ခင်စိန်လား၊ ရင်ရင်စိန်လား မသိ။ ပဲခူးဆောင်သား သူငယ်ချင်းက “ ကျားခင်စိန်၊ ဓားခင်စိန်၊ ဒါမှမဟုတ် ကန်တော်မင် မမင်းစိန်ပဲ ဖြစ်မယ် ” ပြော၏။ သူသည် အရပ်ကောင်းသည်။ ဆံဖျား ဖ၀ါးထိသည်။ ညိုချော။ ကျွန်တော်က ၀လာသည်။ အသားပိုဖြူလာသည်။ ဦးစွန်းဆံပင် ပါးသည်ထက်ပါးလာသည်။ ထို့ကြောင့် “ လိုက်ပါ့ကွာ ” ဟု ဒက္ခိဏအဆောင်နေ အခန်းဖော် သူငယ်ချင်းကပြောသည်။ “ နေပါဦး တင့်လွင်ရာ၊ မင်းကစကားပြောရင် လေသံလေး ဖယောင်းပေါ်ဂွမ်းတင်ထားသလို၊ သွားတာလာတာကအစ နမ်းမတော်မယ်နု။ ကျားခင်စိန်က စစ်သမီးလား ထင်ရတယ်၊ ဆတ်ဆတ်ကြဲ။ ပြောင်းပြန်ကြီး၊ မင်းပြောဖူးတဲ့ မင်းတို့ရွာက ဘကြီးဦးဘကြင် လင်မယားလက်သစ် ဖြစ်နေပါဦးမယ် ” ဟု ပြောသည်။
မကြာမီ စိန်နှင့် ကျွန်တော် သိသည်၊ ခင်သည်၊ ရင်းသည်။
အချစ်ကို ကျွန်တော် တွေးတောရပေပြီ။
(၆)
ဂုဏ်ထူးတန်းတက်ခွင့်ရသည်။
ပါမောက္ခက ကြိုးစားရန် အလားအလာရှိသည့်စကား ခေါ်ပြောသည်။
တက္ကသိုလ်၏ စိန်ပန်းပွင့်တွေကို စတုတ္ထအကြိမ် မြင်ရမည့်နှစ်တွင် ရွာသို့ ကျွန်တော်ပြန်ဖြစ်သည်။ သံချောင်းက ဘူတာတွင် နွားလှည်းဖြင့် ဆင်းကြိုသည်။ ရွာတွင် အုန်းပင်တွေ၊ ကွမ်းသီးပင်တွေ အုပ်ဆိုင်းနေ၏။ အိမ်ခေါင်အမြင့် မကတော့။ သွေ့ခြောက်သောအဆင်း ရွာတွင်မရှိတော့။ ရွာ၏ စည်ကားသောလက္ခဏာတွင် အိမ်ကြီးအိမ်ကောင်း၊ သစ်ရိပ်ဝါးရိပ်သာမက ရောင်းရေးဝယ်တာပါ ဖွံ့လာလေ၏။
“
ဒါထက် ဘကြီး ဦးဘကြင်ခြံထဲက သဖန်းသီးကောမှည့်လောက်ပြီ သံချောင်း ”
“
မင်း စားမလို့လား ငပါ ”
“
အေး…. ”
“
သဖန်းလည်း မှည့်ပါ့၊ ဘကြီးတို့လင်မယားလည်း ခုထိ ဆူပါ့ပူပါ့ ”
ခုနှစ်ဆယ်ကျော်၊ ရှစ်ဆယ်တွင်းတော့ ရှိမည်ဟု ဘကြီး ဦးဘကြင်တို့ လင်မယား၏အသက်ကို မှန်းသည်။
“
ညနေကျရင် သွားလည်ရအောင် သံချောင်း ”
“
ညိုကြီး အလုပ်ပြန်တဲ့အထိစောင့်ပြီး သူ့ပါ ခေါ်သွားရအောင် ”
“
အပင်ကြီးက အတော်အိုပြီ ”
“
မနှစ်က သေမလို ရွက်ဖျားတွေ ခြောက်လာတယ်။ ကြီးကြီးဒေါ်ရွှေက ဓာတ်မြေသြဇာထည့်၊ နှမ်းဖတ် ကြက်ချေးထည့်၊ ရေမှန်မှန်လောင်းလို့ ဒီနှစ် ကိုင်းသစ်တွေ တအားထွက်လာတယ်။ သီးတာမှ အကိုင်းကျိုးမတတ်ပဲ ”
ကျွန်တော်က နှုတ်ခမ်းပါးနား လျှာသိမ်းသံပြုပြီး …
“
ပြောတာနဲ့ သွားရည်တောင်ယိုပြီ သံချောင်းရာ ”
သံချောင်း ရယ်သည်။ ရယ်သံနှင့်အတူ ….
“
အဲဒီအပင်က ဘကြီးတို့ အိမ်ထောင်ကျစ အဲဒီိကို ပြောင်းလာတဲ့နှစ် စိုက်ထားတာ ”
“
ဟေ….ဟုတ်လား ”
“
မနှစ်က အပင်ပြုပြင်နေတုန်း ငါမေးတော့မှ သိရတာ ”
(၇)
ချိန်တော့ ချိန်ဆရသည်။ မေးလည်း မေးချင်၏။ ဆဲလွှတ်မှာလည်း စိုးရ၏။ မသိလျက်လည်း မနေနိုင်။
ကြီးကြီးဒေါ်ရွှေက ထန်းလျက်ပုလင်းနှင့် လက်ဖက်ရည်ကြမ်းဗန်း လာရောက်ချပေးပြီး “ ငပါ…မင်း တယ်ဝနေပါလား ” ဟုပြော၏။ “ ကြီးကြီးရွှေ စိုက်တဲ့ သဖန်းသီးတန်ခိုးပေါ့ဗျာ ” ဟု ကျွန်တော် ပြောလိုက်၏။ ဘကြီး ဦးဘကြင်ကပါ ရယ်လေသည်။ သူတို့နှစ်ယောက်၏ ရယ်မောသံတွင် သွားကြားလေထွက်သံ၊ ပါးစောင်ပျဉ်းကျသံတွေပါနေ၏။ အဘိုးကြီးနှင့် အဘွားကြီးသည် နှစ်ဦးစလုံး ခါးကိုင်းကိုင်း၊ မျက်လုံးမွဲမွဲ၊ ပါးရည်နားရည် ခပ်တွဲတွဲ၊ ဆံပင်ဖြူ ထွက်မစဲ။
“
ကျွန်တော် မေးချင်လို့ ”
ဘကြီး ဦးဘကြင်က သံကွမ်းဆုံအထောင်းရပ်ပြီး “ ဆိုလေကွာ ” ဟုပြော၏။
“
ဘကြီးတို့က မိဘ ပေးစားတာလား ”
သွားကျိုးတွေပေါ်အောင် ရယ်ကာ “ ဘယ်ဟုတ်ပါ့မလဲကွာ၊ တို့ချင်းကြိုက်လို့ပေါ့ ငပါရ။ မင်းနှယ်…ပြာသိုလကြီး ညနေရွာထိပ်ရေတွင်း သူ ရေခပ်ဆင်းတုန်း ငါက လက်တင်ပြီး ခိုးပြေးတာ ” ဟုပြော၏။ “ အို ရှင်…ကလေးတွေကို ” ဟု ကြီးကြီးဒေါ်ရွှေက ဟန့်၏။ ညိုကြီးက …
“
ဘာတုန်းဗျ၊ လက်တင်ပြီး ခိုးပြေးတယ်ဆိုတာ…. ”
ကျွန်တော်ပါ နားမရှင်း။ ဘကြီးဦးဘကြင်က ဦးပြည်းခေါင်းပေါ်မှ မျက်နှာသုတ်ပ၀ါကို ဖြေချပြီး ….
“
ဒီမှာ ကားမရှိဘူးလေကွာ။ နွားလှည်းနဲ့လာလည်း လူမြင်တယ်။ သူ့မိဘတွေက မြို့ပိုင်ရုံးက ယပ်ဆွဲနဲ့ ပေးစားတော့မှာ၊ ကပ်နေပြီ။ ဒါနဲ့ ပွေ့ပြီး ထမ်းပြေးရတာ။ နောက်ကြောင်းလှည့်မကြည့်ဘဲ ပြေးတာ၊ မင်းနှယ် ကျိုက္ကလိရွာကို ရောက်ရော။ လေးမိုင်ကျော် ဝေးတာဟ ”
ကြီးကြီးဒေါ်ရွှေက ရှက်ကိုးရှက်ကန်း မျက်နှာနှင့်….
“
ကဖိုးကြင်…ရှင် အရှက်မရှိဘူးလား ”
ဘကြီး ဦးဘကြင်က တဟားဟားရယ်ပြီး….
“
မတီးဘဲမြည်တာ မဟုတ်ဘူး၊ တီးလို့မြည်တာ။ မမြည်ရင် စည်အ,ကြီး ဖြစ်မယ်။ နို့ နေစမ်းပါဦး၊ အေးမောင်သားရဲ့ … ဘာလို့ မေးတာလဲဟ ”
ကျွန်တော် အစဉ်းစားရ ကျပ်သွားသည်။ “ ပြောလေကွာ ” ဟု သံချောင်းက တံတောင်ဖြင့် တွက်ပြီး ကျွန်တော့်ကို ဆို၏။
“
ဘကြီးတို့လင်မယား ဘာလို့ နေ့တိုင်း တကျက်ကျက် ဖြစ်ရတာတုန်း ”
“
သြော…. ” ဟု ရင်ခေါင်းသံကြီးဖြင့် ဘကြီး ဦးဘကြင် မြည်သည်။ ထို့နောက် ခေါင်းတုံးကို လက်ဖ၀ါးဖြင့် ပွတ်ပြီး…..
“
ငါတို့လင်မယားက ရန်ဖြစ်တာ မဟုတ်ဘူး ငပါ ”
ကျွန်တော်တို့ အံ့သြရ၏။ ကွမ်းဆုံထဲမှ ကွမ်းကို လက်ဖ၀ါးထဲသို့ သွန်သည်။ နှီးဖျားဖြင့်ခြစ်ပြီး အကျန်မထား။ ကွမ်းကို ဘယ်မှ ညာပါးစောင်သို့ လျှာဖြင့်လှိမ့်ရင်း … “ အင်း…. ” ဟု သံရှည်မြည်၏။
“
မင်းသိတဲ့အတိုင်း ငါတို့မှာက သားထောက်သမီးခံ မရှိဘူးကွ။ အရင်က ငါက အစိုးရအလုပ်သမား၊ လင်မယား ဆုံရတယ်မရှိဘူး။ မင်းတို့ကြီးတော်ကလည်း အိမ်ဆိုင်နဲ့။ တစ်ယောက်နဲ့တစ်ယောက် တစ်လတစ်ခါ၊ နှစ်လတစ်ခါ ထမင်းလက်ဆုံ စားရတယ်မရှိဘူး။ နောက် ငါက တရားစာအုပ်ဖတ်၊ ပင်စင်ယူပြီးတော့ ရပ်ရေးရွာရေးဘက်လည်း တတ်အားသရွေ့ ၀င်ကူရတယ်။ မင်းစဉ်းစားကြည့် ငပါ ”
လေကြောက လျော့လာ၍ ခဏနားသည်။ ကြီးကြီးဒေါ်ရွှေက အကြမ်းပန်းကန်တွေထဲသို့ လက်ဖက်ရည်ကြမ်း ငှဲ့ထည့်ပေးသည်။
“
ငါတို့လင်မယား မျက်ရည်ပေါက်ကြီးငယ်ကျအောင် တစ်ယောက်ကိုတစ်ယောက် မပြုဖူးဘူး။ ရှာရသမျှ သူ့လက်အပ်တာ။ သူလည်း ချက်ပြုတ်ကျွေးမွေး၊ တစ်ဖက်က ရှာရသေးတယ်။ တစ်ခါတလေ မင်းတွေးကြည့်လေကွာ။ စကားထိုင်ပြောရတယ် မရှိဘူး။ အိမ်က တိတ်နေတာ၊ မွေးထားတဲ့ ခွေးဟောင်သံက လွဲရင်။ ဒီတော့ ‘ ငါရှိမှရှိရဲ့လား၊ သူရော၊ နှစ်ယောက်စလုံး သေလို့ တစ္ဆေပြည်မှာ သေမှန်းမသိဘဲ နေနေကြသလား ’ လို့ ထင်ထင်လာတယ်ကွ။ မင်းတို့ကြီးတော်လည်း ဒီလိုပဲ သိလား ”
ကျွန်တော် ခေါင်းညိတ်လိုက်သည်။ ဘကြီး ဦးဘကြင်က ကွမ်းသွေးကို ထွေးခံထဲသို့ လှမ်းထွေးသည်။ စွပ်ကျယ်စုတ်အ၀တ်စဖြင့် နှုတ်ခမ်းကို သုတ်သည်။
“
ငါ တကယ်မကျေနပ်စရာရှိလို့၊ သူကလည်း တကယ် သဘောမကျလို့ ဇွန်းဆောင့်ချ၊ စလောင်းဖုံးပစ်ချတာ မဟုတ်ပါဘူးကွာ။ ငါ့အသံ သူကြားတော့ ငါရှိနေတာရော၊ သူလည်းရှိနေတာရော သူသိတာပေါ့။ ငါလည်းဒီလိုပဲ။ ငါ့အသံ ငါကြားတော့ ‘ ငါရှိနေသေးတယ်။ သူလည်း ငါနဲ့အတူ ရှိနေပါလား ’ လို့ ငါတို့နှစ်ယောက်စလုံး စိတ်အေးကြရတာပေါ့ ငပါ ”
ကျွန်တော် စကားမတုံ့ပြန်နိုင်။ အသိရခက်သော ဘာသာစကားတစ်ခုကို စူးစမ်းပြီး သိလိုက်ရဘိသို့ရှိ၏။ ကျွန်တော့်ရင်ထဲတွင် လေးနက်စွာ ဖိစီးသော ဝေဒနာသစ်တစ်ခုကို ခံစားလိုက်ရသည်။
“
ငါ့မိန်းမ ငါ ချစ်တာပေါ့ကွ ”
“
အို…ကဖိုးကြင်….ကလေးတွေရှေ့….” ဟုဆိုကာ ကြီးကြီးဒေါ်ရွှေက ခင်ပွန်းသည်၏ ရင်ဘတ်ဆီသို့ ထန်းလျက်ခဲတစ်ခဲဖြင့် လှမ်းပစ်လိုက်လေသည်။ ။
#ငြိမ်းကျော်
ချယ်ရီမဂ္ဂဇင်း အမှတ်(၇)၊ ဖေဖော်ဝါရီလ၊ ၁၉၈၅ ခုနှစ်
No comments:
Post a Comment