တုတ်ကြီးချောင်းတံတားပေါ်က ဇာတ်ဝင်ခန်း
။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။။
....
အမေ့မေတ္တာဟာ ပြင်းထန်အေးမြလှပါတယ်။ အဲယားကွန်းခန်းထဲက သင်းပျံ့အေးမြမှုလည်းမဟုတ်။ ပူလောင်တဲ့ လွင်တီးခေါင်အလယ်က တစ်ပင်တည်းသောသစ်ရိပ်ရဲ့ အေးမြမှုလည်းမဟုတ်။ အမေ့မေတ္တာက အေးမြမှုတွေရဲ့ထွဋ်ခေါင်၊ အေးမြမှုတွေရဲ့သရဖူ။ အမေဆိုတာ အေးမြမှုတွေ ထုတ်လုပ်ပေးတဲ့ စက်ရုံကြီး။ စားသုံးသူသားသမီးတွေကို ဈေးပေါပေါနဲ့ ရောင်းချပေးနေလေရဲ့။
✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏
ကျွန်တော် ဇာတ်ကွက်ဇာတ်လမ်းတွေနဲ့ ဝတ္ထုမရေးဖူးပါ။ ဆန်းကြယ်တဲ့၊ စာဖတ်သူ စွဲလမ်းသွားစေမယ့် ဇာတ်ဝင်ခန်းတွေကိုလည်း မဖန်တီးနိုင်သေး။ ဒါပေမယ့် ကိုယ်တိုင်ဇာတ်လိုက်ဖြစ်နေတဲ့ ကိုယ့်ဘဝဇာတ်လမ်းမှာတော့ မမေ့နိုင်စရာဖြစ်ရပ်ကလေးတွေ ရှိနေပါတယ်။ အတိတ်စီဒီထဲမှာ ပြန်ရစ်ကြည့်လိုက်ရင် တချို့ဖြစ်ရပ်ကလေးတွေဟာ ထင်ထင်ရှားရှားပေါ်လာတတ်တယ်။ ကျွန်တော်နဲ့ အမေနဲ့ အစ်ကိုဝမ်းခွဲတစ်ယောက်နဲ့ တုတ်ကြီးချောင်းတံတားပေါ်က ဇာတ်ဝင်ခန်းကတော့ ကြည်နူးစရာလား၊ ကြေကွဲစရာလား မဝေခွဲနိုင်အောင်ပါပဲ။
ကျွန်တော် ဘာမှန်းမသိခင်အချိန်ကတည်းက ကျွန်တော့်အဖေနဲ့အမေ အိမ်ထောင်ကွဲခဲ့ပြီ။ နောက် ကျွန်တော် ဘာမှနားမလည်သေးခင် ခြောက်နှစ်သားလောက်မှာပဲ အမေက တစ်ပင်ထပ်ထူခဲ့တယ်။ ကိုယ်တိုင် မဖန်တီးလိုက်ရဘဲ၊ ကိုယ်တိုင် မတည်ဆောက်လိုက်ရဘဲ ရောပြွမ်းမိသားစုတစ်ခုကို ကျွန်တော် လက်ခံလိုက်ရတယ်။ ရောပြွမ်းမိသားစုလို့ ဆိုလိုက်ရတာက ကျွန်တော်တို့ဘက်က အမေတစ်ခု သားတစ်ခု၊ ဟိုဘက်က အဖေတစ်ခု သားတစ်ခု သမီးတစ်ခုမို့လို့ပါ။
ရောပြွမ်းမိသားစုဆိုပေမယ့် နာကျည်းမုန်းတီးစရာ မနာလိုဝန်တိုမှုတွေ မရှိခဲ့ပါ။ ညီညွတ်မျှတစွာ နေထိုင်ခဲ့ကြပါတယ်။ ပထွေးက နှိပ်စက်လို့တို့၊ မိထွေးက အကျင့်ယုတ်လို့တို့ ဆိုတာတွေ ဝေလာဝေး။ "ပထွေး၊ မိထွေး"ဆိုတဲ့ အသုံးအနှုန်းတွေကိုတောင် မသုံးခဲ့ကြ။ အဖေ၊ အမေလို့ပဲ လေးလေးစားစားခေါ်ဆိုခဲ့ကြတယ်။ ဒါပေမယ့် စင်းလုံးချော ငြိမ်သက်နေတာတော့လည်းမဟုတ်။ အဖေ့ဘက်က သားသမီးတွေအပေါ် အမေက သဘောမတွေ့စရာရှိတတ်တဲ့အခါ လက်ရင်းဖြစ်တဲ့ သားအရင်းကျွန်တော့်ကို နာနာထောင်းတော့တယ်။ နာနာထောင်းတော့ ကျွန်တော်ကလည်း ဂျောင်းပြီပေါ့။
✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏
နာကျင်မှုနဲ့ အားငယ်မှု ပေါင်းစပ်လိုက်တဲ့အခါ ကျွန်တော်ဟာ မျက်ရည်ကို တိတ်တိတ်ကလေး ညှစ်ထုတ်တတ်လာတယ်။ ချောင်တစ်ချောင်မှာ ကျွန်တော့်ရဲ့ဝေဒနာတွေကို စုပုံထားတတ်လာတယ်။ အဲဒီအချိန်တွေဆိုရင် ကမ္ဘာကြီးမှာ လူဦးရေသန်းခြောက်ထောင်မရှိတော့။ ကမ္ဘာကြီးနဲ့ ကျွန်တော်တစ်ယောက်တည်း။ အရာအားလုံးဟာ မှောင်မည်းပိတ်ဆို့နေတယ်။ အမေ့ရဲ့အဖိအဖော့ကို မသိတော့ အမေ့ရဲ့မေတ္တာကိုလည်း နားမလည်နိုင်တော့ဘူး။
ကျွန်တော် မဟုတ်တာတွေလုပ်မိတဲ့အခါ အဖေက ကျွန်တော့်ကို ဆူမှာစိုးလို့. အမေက ဦးအောင်ဆူတတ်တယ်။ တဖြည်းဖြည်း အမေဆူတာတွေ၊ အမေရိုက်တာတွေ များများလာတယ်လို့ ထင်လာရတယ်။ တစ်နေ့တစ်နေ့ ဘယ်အချိန် အမေ ကျွန်တော့်ကို ဆူမလဲ။ ဘယ်အချိန် ကျွန်တော့်ကို ရိုက်မလဲ။ စိုးထိတ်လာတယ်။ ကျွန်တော့်ရဲ့ပျော်ရွှင်မှုတွေ တဟုန်ထိုး စိုက်ဆင်းသွားပြီ။ ကျွန်တော့ရဲ့ဘေးမှာ အမေရှိပေမယ့် ကျွန်တော့်ရဲ့အဝေးကို အမေ ရောက်သွားပြီ။
ကျွန်တော့်ကိုယ်မှာ ဝမ်းနည်းတိတ်ဆိတ်မှုတွေ စွဲကပ်သွားပြီ။ ကျွန်တော် သတ္တိမရှိတော့။ ကျွန်တော် အရာရာကိုကြောက်တတ်တဲ့ လူကြောက်ကလေးတစ်ယောက်ဖြစ်သွားတော့တယ်။ အခုအချိန်ထိ အဲဒီကြောက်စိတ်ဟာ ကျွန်တော့်ရဲ့ကိုယ်တွင်းတစ်နေရာမှာ ရှိနေတုန်း။ ကျွန်တော် ဘယ်ကိုသွားရမလဲ။ မသွားတတ်သေး။ ကျွန်တော့်အသက်ဟာ ရှစ်နှစ်လောက်ပဲရှိဦးမယ်။
အဲဒီအချိန်မှာ ကျွန်တော် အမေနဲ့ဝေးရာကိုသွားရဖို့ အကြောင်းတစ်ခုဖန်လာတယ်။ အမေ့ရဲ့အစ်မ ကြီးကြီးလှစိန်က အလှူပေးမလို့တဲ့။ ကျွန်တော့်ကို ရှင်ပြုပေးဖို့ အမေ့ဆီကတောင်းတော့ အမေကလည်း ခွင့်ပြုပေးလိုက်ပါတယ်။ ကျွန်တော် ဝမ်းသာသွားတယ်။ ကိုရင်ဝတ်ချင်တာထက် အမေ့အရိုက်မခံရတော့ဘူးဆိုပြီး ပျော်သွားတာ။ ကျွန်တော်သွားရမယ့်ရွာကလည်း ကျွန်တော်နဲ့အမေ အတူနေခဲ့တဲ့ အောက်ကင်းရွာ။ အမေက နောက်အိမ်ထောင်နောက် လိုက်ခဲ့လို့သာ ဝေးကွာခဲ့ရတာ။ ပြီးတော့ အောက်ကင်းရွာမှာ ကျွန်တော်သိပ်ချစ်ရတဲ့ ကြီးကြီးလှစိန်ရဲ့သား ညီလေးထွန်းဝင်းနိုင်လည်း ရှိပါတယ်။
✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏
အောက်ကင်းရွာဆိုတာ ရွာကြီးတစ်ရွာပါ။ ရွာမြောက်ဘက်ပိုင်းတို့ ရွာအနောက်ဘက်ပိုင်းတို့ ပြောရလောက်အောင် ကျယ်ဝန်းပါတယ်။ ဒါပေမယ့် ဘုန်းကြီ်းကျောင်းကတော့ တစ်ကျောင်းတည်း။ ရွာနဲ့ ဘုန်းကြီးကျောင်းကို ဆက်သွယ်ထားတာက တုတ်ကြီးချောင်းတံတား။ ဒီတုတ်ကြီးချောင်းတံတားကို မဟေသီမဂ္ဂဇင်းမှာပါတဲ့ ကျွန်တော့်ရသစာတမ်းတစ်ပုဒ်မှာလည်း ထည့်ရေးဖူးပါတယ်။
ကျွန်တော် သင်္ကန်းတောင်းကျက်ဖို့၊ ဘုန်းကြီးစာ သင်ဖို့ အောက်ကင်းရွာကို အရင်ရောက်နှင့်တယ်။ အမေက အလှူနားနီးမှလာမှာ။ အမေမလာခင်ကြားမှာ ကျွန်တော်က အောက်ကင်းရွာမှာ ပျော်နေပြီ။ ရွာဘုန်းကြီးကျောင်းမှာ စာသင်ရင်း ဘုန်းကြီးကျောင်းသားလုပ်နေပြီ။ မနက်တိုင်း "ဆွမ်းတော်ဗျို့ ဆွမ်းတော်ဗျို့ "နဲ့ ညီလေးထွန်းဝင်းနိုင်နဲ့အတူတူ တကြော်ကြော်။ တုတ်ကြီးချောင်းတံတားပေါ် ပြေးလွှားဆော့ကစားပျော်ပါးလို့ အမေ့ကိုလည်း သတိမရလှ။ အမေကတော့ ဘယ်လိုနေမယ်မသိ ကျွန်တော့်စိတ်တွေကတော့ ပေါ့ပါးလန်းဆန်းလို့။
ဒီလိုနဲ့ အလှူပွဲရောက်။ ကိုရင်ဝတ်။ ကိုရင်ဝတ်ဖို့ ဘုန်းကြီးထံ သင်္ကန်းတောင်းစာရွတ်တော့ အမေက ကြည်နူးမဆုံး၊ ဂုဏ်ယူမဆုံးတဲ့။ ကျွန်တော်ကတော့ မသိ။ ဘယ်လိုမျက်ဝန်းတွေနဲ့ အမေ ကျွန်တော့်ကို ကြည့်နေသလဲ ကျွန်တော် ဂရုမစိုက်မိပါ။ ရှင်လောင်းငယ်တွေထဲ ကျွန်တော်တစ်ယောက်ပဲ သင်္ကန်းတောင်းရတာကိုတော့ မှတ်မိနေပါတယ်။
အမေကတော့ သားနုထွေးကိုရင်လေးကို ပြန်လည်သိမ်းပိုက်ဖို့ ညို့ဓာတ်ကြီးတွေနဲ့ ကြည့်နေခဲ့ပါသလား။ ရင်ခွင်ထဲကို ဆွဲသွင်းဖို့ သူ့လက်နှစ်ဖက်ကို ဖြန့်ကားထားပါသလား။ ကျွန်တော်ကတော့ အမေနဲ့ပြန်လိုက်ဖို့ စဉ်းစားမထား။ နေ့စဉ်ထိတ်လန့်မှုတွေရဲ့အဝေးမှာ ကျွန်တော်ဟာ နွားပေါက်ကလေးလို မြူးခုန်နေမိတယ်။ ကိုရင်ဝတ်ကလေးအတိုင်း ကျွန်တော့်ကို ပြန်ခေါ်လို့မရတဲ့အခါ လူထွက်မှ ပြန်လာခေါ်မယ်ဆိုပြီး အမေက မှာကြားသွားခဲ့တယ်။
✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏ ✏
ကျွန်တော် လူထွက်ခဲ့ပါပြီ။ ကိုရင်လူထွက် ငါးပိချက်ကလေးကျွန်တော်။ ဂျာနယ်ကျော်မမလေးရဲ့ "သွေး"ဝတ္ထုထဲက ဘုန်းကြီးကျောင်းသားလေး ဂျပန်လိုပါပဲ။ ဒါပေမယ့် ဂျပန်လောက်တော့ သတ္တိမရှိပါ။ အားလုံးရဲ့အနိုင်ကျင့်ခံဘဝရောက်နေပေမယ့် ကျွန်တော် အမေ့ဆီကို ပြန်မပြေးလိုတော့။ ဂွေလိမ့်တယ်၊ ထွေပစ်တယ်၊ တုတ်ကြီးချောင်းတံတားပေါ်ကနေ ဒိုင်ဗင်ပေါက်စလေးတွေတောင် ပစ်တတ်နေပါပြီ။ ကျွန်တော့်ရဲ့ ဘဝအစိတ်အပိုင်းလေးတစ်ခုကို မိဘမဲ့ကလေးတစ်ယောက်လို ကုန်ဆုံးနေခဲ့တယ်။
မကြာပါဘူး။ အမေ ပေါက်ချလာတယ်။ အမေရောက်တဲ့အချိန်မှာ ကျွန်တော်က ကြီးကြီးအိမ်မှာမရှိ။ တုတ်ကြီးချောင်းထဲမှာ ရေကူးနေတယ်။ အမေကလည်း ကျွန်တော် ပြန်အလာကို မစောင့်နိုင်။ ကျွန်တော်ရှိရာကို လိုက်လာတယ်။ အမေ့ဘေးမှာ ကျွန်တော့်အစ်ကို ဝမ်းကွဲတစ်ယောက်လည်း ပါလာတယ်။ ကျွန်တော် ရေကူးနေတာက ဘုန်းကြီးကျောင်းကမ်းပါးဘက် တံတားဘေး။ အမေက ကျွန်တော်နဲ့မျက်နှာချင်းဆိုင် ရွာကမ်းဘက်ရောက်တော့ "သား"ဆိုပြီး တုန်ယင်တဲ့အသံကြီးနဲ့ လှမ်းခေါ်လိုက်တယ်။ ရုတ်တရက် ကျွန်တော် ရပ်ဆိုင်းသွားတယ်။ နောက် လူက အလိုလိုကမ်းပေါ်ရောက်သွားပြီ။
ကျွန်တော်က ရှေ့ကပြေးတယ်။ ထိတ်လန့်မှုနဲ့ပြေးတယ်။ အမေက နောက်ကလိုက်တယ်။ နွေးထွေးမှုနဲ့လိုက်တယ်။ ကျွန်တော်တို့ရဲ့ ပြေးတမ်းလိုက်တမ်းပွဲကြီးဟာ ဘုန်းကြီးကျောင်းဝင်းထဲမှာ တဝုန်းဝုန်း။ တဖြည်းဖြည်း မောလာတော့ ကျွန်တော်လည်း ကြာကြာမပြေးနိုင်။ တုတ်ကြီးချောင်းတံတားပေါ်အရောက်မှာ အမေက ကျွန်တော့်ကို မီလာတယ်။ အစ်ကိုက ကျွန်တော့်ကို ဖမ်းမိသွားတယ်။
တုတ်ကြီးချောင်း တံတားပေါင်ကို ကျွန်တော် မလွတ်တမ်းသိုင်းဖက်ထားလိုက်တယ်။ အစ်ကိုက ကျွန်တော့်ခန္ဓာကိုယ်ကို ပွေ့ဖက်လိုက်တော့ ကျွန်တော်က လေထဲမှာ တန်းလန်းကြီး။ ကျွန်တော့်လက်နှစ်ဖက်က တံတားပေါင်မှာ၊ ကျွန်တော့်ခြေထောက်နှစ်ချောင်းက အစ်ကို့လက်ထဲမှာ။ အမေက ဘေးမှာ ဒူးထောက်လို့ ။ ပြန်လိုက်ခဲ့ဖို့ သနားစဖွယ်တောင်းပန်တယ်။ အမေ့မျက်ဝန်းမှာလည်း မျက်ရည်တွေအပြည့်။ ကျွန်တော်လည်း တင်းမခံနိုင်တော့။ အမေနဲ့ ပြန်လိုက်သွားဖို့ ခေါင်းညိတ်လိုက်တော့တယ်။ ဒါပေမယ့် အမေ့ဆီက ကတိတစ်ခုကိုတော့ ရအောင်တောင်းလိုက်သေး။ "အမေ သားကို မရိုက်ရဘူး"လို့။
အမေကလည်း ကတိတည်ပါတယ်။ အဲဒီအချိန်ကစပြီး အမေ ကျွန်တော့်ကို ဘယ်တော့မှ မရိုက်တော့။ ။
ရင်ရိုး
ပေဖူးလွှာ မဂ္ဂဇင်း၊ သြဂုတ်လ၊ ၂၀၁၂ခုနှစ်။
No comments:
Post a Comment