" ဧပြီအရူး "
*********
#မစန္ဒာ
ဧပြီတစ်ရက်။
စင်စစ်တော့ အနောက်တိုင်းဓလေ့ဖြစ်သည်။ မည်သည့်နိုင်ငံတွင် မည်သည့်အချိန်ကစပြီး မြန်မာပြည်ကို မည်ကဲ့သို့ ပြန့်နှံ့ခဲ့သည်ကိုကား ညို ကောင်းစွာမသိ။
ဧပြီ တစ်ရက်တွင် ခင်မင်သူအချင်းချင်း အရူးလုပ် ကျီစယ်လေ့ရှိကြသည်။ ထိုနေ့ ထိုရက်တွင် သူငယ်ချင်း၊ ကျောင်းသူ ကျောင်းသားများ အချင်းချင်း အငိုက်ဖမ်း အရူးလုပ်လေ့ရှိသည်ကား နှစ်စဉ်ပင်။
ဒီနှစ် ဧပြီတစ်ရက်နေ့တွင်ကား မိမော်မော်နှင့် ဝေဝေတို့ကို ကောင်းကောင်းကြီး အရူးလုပ်လိုက်မည်ဟု ညိုတို့ သူငယ်ချင်းတစ်စုလုံး တိုင်ပင်ထားကြသည်။
*
မတ်လ ဧပြီလဆိုလျှင် ညိုတို့ စက်မှုတက္ကသိုလ်ကျောင်းသူ ကျောင်းသားအားလုံး စက်ရုံများ၊ ရုံးများတွင် လုပ်အားပေးဆင်းကြရသည်။ ထိုအချိန်တွင် ညိုတို့ကျောင်းရှေ့က လက်ပံပင်ကြီးလည်း ရဲရဲနီအောင် ပွင့်လေသည်။
လက်ပံပွင့်ချိန် ခွေးရူးချိန်ဟု ပြောကြသည်။ ခွေး ရူးမရူးတော့မသိ၊ လက်ပံပွင့် နီနီရဲရဲများကိုတွေ့တိုင်း ငယ်ဘဝကို တမ်းတရင်း ညို ရူးမိသည်ကတော့ အမှန်ပင်။ ညိုတို့ ငယ်ငယ်တုန်းကဆိုလျှင် နီလွင်သော ပေါက်ပန်းပွင့်များကိုခူးပြီး အကုံးရှည်ဆက်ကာ လည်ဆွဲသဖွယ် ဆွဲလေ့ရှိသည်။ ခေါင်းပေါ်တွင်လည်း ပေါက်ပန်းကုံး သရဖူဆောင်းကာ လူရိုင်းမင်းသမီး လုပ်ကစားလေ့ရှိသည်။ တုတ်ချောင်းတွင် ကျော်ပြားပြား ကပ်ချည်ထားသော ပုဆိန်ကိုထမ်းပြီး ကွိကွိကွကွ အော်ရင်း ခုန်ဆွခုန်ဆွနှင့် လူရိုင်းက ကရသည်ကို ပျော်မဆုံးအောင်ရှိတော့သည်။ ငယ်ငယ်တုန်းကဆိုတော့ ဟန်ဆိုသည်မှာ မရှိ၊ အလှအပကိုလည်း ဘေးချိတ်ထားသည်။ နေပူ စပ်ခါးဆော့ချင်တိုင်းဆော့ပြီး မည်းမည်းတူတူနှင့် တစ္ဆေရုပ်ပေါက်နေတတ်လေသည်။
ယခုတော့ ညိုတို့ မငယ်တော့ပါ။ လာမည့်နှစ်ပိုင်းအတွင်း၌ပင် ဘွဲ့ယူပြီး အလုပ်ခွင်ဝင်ရတော့မည့်သူများ ဖြစ်နေချေပြီ။ သို့သော်လည်း ဘတ်စ်ကားဆိပ်နားက လက်ပံပင်ကြီးတွင် လက်ပံပွင့်နီနီများ ဝေလေတိုင်း ရဲရဲနီသော ပေါက်ပွင့်များကို ဖျက်ခနဲ သတိရမိတတ်သည်။ အကုံးရှည်ဆက်ပြီး လည်ဆွဲလုပ်ချင်သော စိတ်ရူးကလေး ဝင်လာတတ်သည်။
'လက်ပံပွင့်ချိန် ခွေးရူးချိန် လက်ပံပွင့်ချိန် ထွေး ရူးချိန် ထွေးရူးချိန်'
နီတျာတျာအပွင့်များကို ညိုနဲ့ထွေးက ပြေးကောက်သောအခါ ဝေဝေသည် ပြောင်စပ်စပ်နှင့် ရေရွတ်နေတတ်လေသည်။ ခွေးလိုလို ထွေးလိုလိုနှင့် စကားကို လုံးချရင်း ဒေါသအိုး မရွှေထွေးကို စလေ့ရှိသည်။ ထွေးတစ်ယောက် စိတ်ကောင်းဝင်နေလျှင်တော့ ရယ်ရယ်မောမောနှင့် သည်းခံတတ်လေသည်။ တစ်ခါတစ်ရံတွင်မူ ဝေဝေ့ခမျာ ထွေးထုသမျှ ကျောကော့အောင် ခံရရှာလေသည်။
'ဟ ခွေးရ၊ နင်က ထွေးမို့လို့ နာရတာလား အဲ အဲ ထွေးရ၊ နင်က ခွေးမို့လို့လား၊ ငါက ခွေးရူးချိန်လို့ ပြောတာ၊ ဘာလို့ ထုရတာလဲ၊ ရှူး အား တကယ်ဆိုးတဲ့ ခွေး အဲလေ ထွေး'
ဝေဝေက အလျှော့မပေးဘဲ တွေ့ကရာရှစ်သောင်း အော်ကာ ထွေးကို ဆက်စလေ့ရှိသည်။ နောက်ဆုံး၌ ထွေးလည်း မနေနိုင်တော့ဘဲ ရယ်ရတော့သည်သာ ဖြစ်၏။
ညိုတို့အဖွဲ့တွင် လူစုံပါသည်။ ခင်ခင်က လူကြီးဆန်သည်။ လတ်က အေးဆေးသည်။ ထွေးက ဒေါသကြီးသည်။ မိက ကြောက်တတ်သည်။ အဝါက ရန်လိုသည်။ ဝေဝေကတော့ လူပြောင်ဖြစ်သည်။ မမော်ကလည်း ဝေဝေနှင့် တွဲမိလေသည်။ သူများကို နောက်ရပြောင်ရမည်ဆိုလျှင် သူတို့နှစ်ဦး ထိပ်ဆုံးကဖြစ်၏။ တစ်ခါကလည်း ကွန်ကာယားဝမ်း (မိစ္ဆာများကို အောင်နိုင်ခြင်း) အမည်ရှိ ရုပ်ရှင်ကားကို ကျောင်းပြေးပြီး ကြည့်လာခဲ့ကြလေသည်။ ထို့နောက် ညိုတို့အတွက်ပါ လက်မှတ်ဝယ်လာလေသည်။ အလွန်ကောင်းသောရုပ်ရှင်ဖြစ်၍ မကြည့်မည်ကို စိုးရိမ်သောကြောင့်ဟု ဆိုလေသည်။ မိ ကြိုက်သော ရှုမျှော်ခင်းလှလှများ ပါသည်။ ကြည့်ဖြစ်အောင် ကြည့်ဟု စေတနာ တစ်ခွဲသားနှင့် တိုက်တွန်းလှသောကြောင့် ညို၊ မိနှင့် လတ်တို့ သုံးယောက်သား ဝဇီရာရုံသို့ ရောက်ဖြစ်ကြလေသည်။ ဘုမသိ ဘမသိနှင့် ကောင်းလှချည့်ဆို၍ လာကြည့်သော ညိုတို့လည်း ဇာတ်ကားစပြမှ မိဝေတို့ လှိမ့်လွှတ်လိုက်သည်ကို ရိပ်မိတော့သည်။ အင်္ဂလန်ပြည်တွင် ရှေးခေတ်က စုန်းဟု စွပ်စွဲခံရသူများကို ရေနှစ်၊ မီးရှို့၊ ကြိုးဆွဲချ အမျိုးမျိုးနှိ်ပ်စက်ညှင်းပန်းပြီး သတ်ဖြတ်သည်များကို ဇာတ်အိမ်ဖွဲ့၍ အကျယ်ချဲ့ရိုက်ကူးထားခြင်းဖြစ်သည်။ သေခါနီးလူတို့၏ ကြောက်လန့်တကြား အော်ဟစ်သံသည် စူးစူးဝါးဝါးနှင့် နှလုံးတုန်ဖွယ် ကောင်းလှသည်။ ရောက်မိမှတော့ မပြန်ချင်တော့သည့်အတွက် ဝေဝေနှင့်မိမော်တို့နှစ်ဦးကို ကျိန်ဆဲရင်း ဇာတ်ကားပြီးသည်အထိ ထိုင်ပြီးဒုက္ကရစရိယာ ကျင့်ကြရလေသည်။ သွေးဆိုလျှင် လက်ဝါးရှရာက သွေးပင် ရဲရဲမကြည့်ဝံ့ရှာသည့် မိ တစ်ယောက်ခမျာတော့ မျက်နှာကို လက်ဝါးနှင့်တွင်တွင်အုပ်ထားရှာလေသည်။
မမော်နှင့် ဝေဝေတို့ပေးသော ဒုက္ခသည် ရုံထဲတွင် အစမသတ်ချေ။ ညအထိ ဆက်သေးသည်။ 'ညိုရယ် ထပါဦး၊ မိ အိပ်လို့မပျော်ဘူး၊ ရုပ်ရှင်ထဲကဟာတွေ မြင်နေတယ်။ အဲဒီထဲက အသံတွေကြားနေရတယ်'ဟု မိက တုန်တုန်ယင်ယင် လာနှိုးသည့်အတွက်ကြောင့် ဖြစ်ပါသည်။ မိ အိပ်မပျော်မချင်း ညိုလည်း ငုတ်တုတ်ထထိုင်နေရလေသည်။ မိသည်မျက်လုံးအကြောင်သားနှင့် စိပ်ပုတီး တဂျောက်ဂျောက် စိပ်နေရရှာသည်။ ညဥ့်နက်သန်းခေါင် မီးကြီးအလင်းထွန်းပြီး အိပ်ငိုက်ငိုက်နှင့်ထထိုင်နေရသော ညို့အဖြစ်သည်လည်း ဆိုးလှပါသည်။ ထိုအချိန်တွင် မိစ္ဆာနှစ်ကောင်မှာကား အေးအေးဆေးဆေး စက်တော်ခေါ်နေကြလေသည်။ သူတို့အိပ်လေ ညိုလည်းအိပ်ချင်လေနှင့် စိတ်အတိုကြီးတိုပြီး သူတို့နှစ်ဦးကို ညဥ့်သိပ်ရေအေးအေးနှင့် လောင်းချချင်စိတ်ပေါက်လာပါသည်။ သူတို့သာမက မွေ့ရာကိုပါ ရွှဲနစ်နေအောင် ရေနှင့်လောင်းသော်လည်း သူတို့က စိတ်ဆိုးမည်တော့ မဟုတ်ပါချေ။ ဝူးဝူးဝါးဝါးအော်ရင်း ရယ်နေမည်သာဖြစ်၏။ အစအနောက်သန်လှသော်လည်း သူငယ်ချင်းချင်း သည်းညည်းတော့ခံလေ့ရှိပါသည်။
မှတ်မိပါသေးသည်။ တစ်ညနေက ဖြစ်၏။ ထမင်းစားအပြီး ညိုတို့ အမည်ပေးထားသော ခရေလမ်းလေးသ်ို့ လမ်းလျှောက်ထွက်ခဲ့ကြသည်။ ညိုတို့ကျောင်းရောက်စက မြေတွင် ပုဝပ်နေသော ခရေပင်လေးများသည် ယခုအခါ အရွက်စိမ်းများ အုပ်ဆိုင်းပြီး အတော်ကြီးမြင့်မားနေပြီဖြစ်သည်။ ထိုခရေပင်ရိပ်နှင့် ညိုနေသော ခရေလမ်းကိုမှ ညိုတို့က စွဲစွဲမြဲမြဲလျှောက်လေ့ရှိသည်။ ခရေပွင့်ချိန်တွင် ခရေနံ့သင်းသင်းဝေ့ပျံနေသော လမ်းညိုညိုလေးသည် ကြည်နူးနှစ်သက်ဖွယ် ကောင်းလှပါသည်။ လက်လှမ်းမီသမျှ ခရေပန်းများကိုခူးပြီး ကုံးလျှင်ပင် သုံးလေးကုံးစာလောက်တော့ ရမည်ဖြစ်၏။ သို့သော် အပင်ဖျားတွင်ရှိသော ခရေပန်းကိုမှ အမြဲတစေပို လှသည်ဟုထင်သူက ညိုဖြစ်ပါသည်။ ခါတိုင်း လူရှင်းလျှင် ညိုတစ်ယောက် ခရေပင်ပေါ်ရောက်မြဲဖြစ်သော်လည်း ထိုနေ့က ညို့လက်တွင် ဓားရှထား၍ သစ်ပင်မတက်နိုင်ချေ။ ထိုအခါ ညိုက မမော်ကို အနိုင်ကျင့်တော့သည်။ ညိုတို့ ခူးပေးသမျှပန်းများကို မြက်ပင်ရှည်နှင့် အေးအေးဆေးဆေး ထိုင်သီနေသောမော်မော့်ကို သစ်ပင်ပေါ်သို့တက်ခိုင်းပါတော့သည်။ ညို့လက်ကလည်း အမှန်တကယ် နာနေသည်မို့ မမော်ခမျာ ညည်းညည်းညူညူနှင့် ခရေပင်ပေါ် တက်ရ ရှာလေသည်။ မကြာမီ မိရွှေမော်ဆီမှ အော်သံကြားရပါတော့သည်။
'ဟ ကိုက်တယ်ဟ၊ အောင်မယ်လေး ပုရွက်ဆိတ်တွေတော့ အနီတွေတော့၊ အား နာလိုက်တာ၊ မြတ်စွာဘုရား အုံလိုက်ကြီး'
ကံဆိုးချင်တော့ မိမော် ပေါက်ကရအော်ပြီး တဝုန်းဝုန်းဖြစ်နေချိန်တွင်မှ ညနေခင်း လမ်းလျှောက်သော ကျောင်းသားတစ်အုပ်က အနားမှဖြတ်သွားလေသည်။
'မော် လူတွေလာနေတယ်၊ ငြိမ်ငြိမ်လေးနေ၊ ခဏလေးငြိမ်ငြိမ်နေ'
အောက်ဘက်မှ ညိုတို့က သတိပေးနေသဖြင့် သစ်ပင်ပေါ်မှ မရွှေမော်လည်း ရောက်ရာအကိုင်းပေါ်တွင် ခြေကားရား လက်ကားရားနှင့် ငြိမ်ငြိမ်ကလေး ရပ်နေရရှာလေသည်။ ခရေရွက်များက သိပ်သည်းထူထပ်လှသဖြင့် သတိထားမကြည့်မိလျှင် သစ်ပင်ပေါ်တွင်လူရှိကြောင်း မသိနိုင်ပါချေ။ မိမော် ကံကောင်းသေးသည်ဟု ညိုတို့ထင်မိသည်။ သို့သော် မကြာမီ ကံဆိုးရှာပါတော့သည်။ ပုရွက်နီများက အင်္ကျီထဲ၊ လုံချည်ထဲကိုပါဝင်ပြီး စစ်စစ်ပါအောင် ကိုက်လေသောအခါ မော် အငြိမ်မနေနိုင်တော့ချေ။ သစ်ပင်ပေါ်မှ ခြေကားရား လက်ကားရားနှင့် ဝုန်းခနဲ ခုန်ချလေတော့သည်။ နားကင်းမပါ၊ မကိုဋ်မပါနှင့် မိုးပေါ်မှလေစီးပြီး လေးဖက်ထောက်ဆင်းလာသော မော်ကို ကျောင်းသားများကကြည့်ရင်း မင်သက်မိနေကြသည်။ ညိုတို့လည်း ဘယ်လိုလုပ်ရမည်မသိဘဲ ဟိုက်ခနဲ မျက်လုံးများ ပြာသွားသည်။ ထိုစဉ်တွင် မိမော်သည် နေရာမှ ဖုတ်ဖက်ခါပြီး ကမန်းကတန်း ထနိုင်သေးသည်။ အဟဲခနဲ ရယ်သွမ်းသွေးနိုင်သေးသည်။ တစ်မျက်နှာလုံး တစ်ကိုယ်လုံး ပုရွက်နီများနှင့်ခဲနေသော်လည်း လက်တွင်တင်းတင်းဆုပ်ထား၍ ကြေမွနေသော ခရေပန်းများကို မလွှတ်သေးချေ။ ဒူးကို လက်သီးဆုပ်နဲ့ ပွတ်ရင်း 'အဟဲ သစ်ပင်ပေါ်က ပုရွက်ဆိတ်က ပိုနာတယ်' ဟု ပြောမိပြောရာ ယောင်ချာချာ ပြောသောအခါတွင်ကား မည်သူမျှ အိနြေ္ဒမဆောင်နိုင်တော့ပေ။
ထိုနေ့မှစ၍ ကျောင်းသားများသည် မော်မော့်ကိုတွေ့တိုင်း ပြုံးစေ့စေ့ ဖြစ်သွားတတ်ကြသည်။ 'သစ်ပင်ပေါ်က ပုရွက်ဆိတ်က ပိုနာတယ်ကွ' ဟု ရယ်မော အော်ဟစ်တတ်သည်။ ထိုအခါ မိမော်က ညို့ကို ကျိတ်ပြီး ဆိတ်တတ်လေသည်။
'မိညို ရော် ပေး နင့်ကြောင့် နင့်ကြောင့်'
'ကောင်းတယ် ကောင်းတယ်၊ ဒါမှကောင်းတာ၊ တစ်ခါတလေလည်း မော်တို့ ခံအလှည့်ရှိဦးမှပေါ့'
မော်မော် ရှက်ရမ်းရမ်းသောအခါ အဝါက ဝမ်းမြောက်ဝမ်းသာ ဖြစ်နေလေသည်။ အဝါ့ခမျာ မမော်နှင့် မဝေတို့၏ဒဏ်ကို မကြာခဏ ခံရသောကြောင့်ဖြစ်၏။ တစ်ခါကလည်း အဝါတို့အိမ်က လာပို့သော လက်ဖက်သုပ်များကို ချိုင့်လိုက် ခိုးပြေးပြီး နှစ်ယောက်တည်း ကုန်အောင် နင်းသိပ်စားပစ်ခဲ့ဖူးလေသည်။ ဆင်အော်၍ပင် မနိုးအောင် အအိပ်ကြီးသော အဝါက်ို အိပ်ပျော်နေစဉ် အခွင့်ကောင်းယူပြီး ပုံဆွဲမင်နက်နှင့် နှုတ်ခမ်းမွှေးကားကားကြီး ဆွဲထားသည်မှာလည်း သူတို့နှစ်ယောက်ပင် ဖြစ်ပါသည်။ အဝါ၏ ဖြူဝင်းနုနယ်သောမျက်နှာလေးတွင် နှုတ်ခမ်းမွှေးမည်းမည်းကြီးက်ို ကော့နေအောင် စိတ်ကြိုက်ဆွဲပြီးမှ အိပ်ရာမှလှုပ်နှိုးကာ အောက်ထပ်တွင် ဧည့်သည်ရောက်နေသည်မှာ ကြာလှပြီဟု အရေးတကြီး ပြောသည်။ အဝါတို့အ်ိမ်မှ ပိုက်ဆံပို့ခိုင်းလိုက်သော လူထင်သည်ဟု ထင်ကြေးပေးသည်။ လကုန်ရက်မို့ ဘိုင်ကျနေသော အဝါသည် ပိုက်ဆံသံကြားရသဖြင့် ဝမ်းသာအားရနှင့် အောက်ထပ်သို့ ဆင်းပြေးလေသည်။ ပါးတွင် ပါးကွက်ထူထူကွက်ကာ နှုတ်ခမ်းမွှေးကြီးတကားကားနှင့် ခုန်ပေါက်ဆင်းလာသော အဝါခမျာ ဧည့်သည်မတွေ့ရဘဲ တဝါးဝါးသာအရယ်ခံရပြီး မဟာအရှက်တော် ကွဲခဲ့ရလေသည်။ ဒေါသအိုး မရွှေဝါသည် သူတို့အခန်းရှေ့တွင် တီစကွဲယားဘေးချပြီး သနပ်ခါးတုံးကိုင်ကာ စောင့်နေသဖြင့် မော်မော်နှင့် ဝေဝေတို့အခန်းသို့ ပြန်မလာရဲကြဘဲ သူများအခန်းတွင် ပုန်းလျှိုးကွယ်လျှိုးနှင့် နှစ်ညအိပ်ခဲ့ကြရလေသည်။
'နင်တို့ နှစ်ကောင်တော့လား သိမယ်၊ သိမယ်'
သနပ်ခါးတုံးနှင့် မခေါက်ရလေတိုင်း အဝါက အံတကြိတ်ကြိတ်နှင့် ကြိမ်းခဲလေသည်။ စီခနဲဆိုလျှင် တရားခံမှာ ဝေဝေနှင့် မော်မော်ပင်ဖြစ်သည်ကို ညိုတို့အားလုံး နားလည်ထားကြသည်။ ကုလားလူမျိုး ကျောင်းသူ ဖြူဖြူခင်ကိုပင် ဝက်သားစင်းကောကို ကြက်သားဟူ၍ ညာကျွေးသည်အထိ အကျီစားသန်သူများဖြစ်လေသည်။ ညိုတို့စက်မှုတက္ကသိုလ်ကျောင်းသူများသည် ယောက်ျားလေးများနှင့်အတူ ထာဝစဉ်ပြေးလိုက်၊ လွှားလိုက်၊ တူထုလိုက်၊ လွှတိုက်လိုက် လုပ်နေကြရ၍ထင်သည် ယောက်ျားလေးများကို ရှက်ကြောက်မနေတတ်ပေ။ ရှက်နေလျှင်လည်း နေစရာရှိတော့မည် မဟုတ်ပါ။ မိန်းကလေးဆောင်ရှေ့က ဖြတ်လျှောက်သော ကျောင်းသားကို ဘယ်ညာ စည်းကျကျ အော်ပေးပြီး ခြေလှမ်းမှားအောင် မဟားဖူးသောကျောင်းသူ ရှားလိမ့်မည် ထင်သည်။ တစ်ခါတစ်ရံ စိတ်ပေါက်လျှင်လည်း 'ဘဲဥခြမ်းဖြူတူတူ၊ ဆားရေနဲ့ကူ၊ စက်မှုမောင် အမှုတုံး၊ ဘဲဥနဲ့ဖုံး' ဟု အော်ချင်လျှင် အော်လွှတ်ကြသူများဖြစ်၏။ ထိုကဲ့သို့သော ကျောင်းသူများကြားထဲတွင် မော်မော်နှင့်ဝေဝေသည် ထူးကဲပြီး အချင်းချင်းပင် နေစရာမရှိအောင် အစအနောက် အကျီစားသန်လွန်းသဖြင့် ညိုတို့အားလုံး လက်မြှောက်ထားရပေသည်။ ထွေးကမူ 'သူတို့တစ်တွေ အမေ့ဝမ်းက ကျွတ်ကျွတ်ချင်း အူဝဲ အူဝဲနဲ့ မငိုဘဲ ဟဲဟဲ ဟဲဟဲနဲ့ ရယ်ပြီး မွေးလာကြတယ်ထင်တယ်' ဟု မှတ်ချက်ချဖူးလေသည်။
သူတို့နှစ်ဦး ချောက်တွန်းသမျှကို ညိုတို့အားလုံး တစ်လှည့်စီခံကြရသည့်အတွက် တစ်နေ့နေ့တော့ မှတ်လောက်သားလောက်အောင် ဆုံးမရမည်ဟု စိတ်ထဲတွင် တေးထားကြသည်။ ပြီးခဲ့သော ဆောင်းတွင်းကပင် ညိုတို့တစ်ဖွဲ့လုံး ကသိကအောင့်နှင့် ငိုချင် ရယ်ချင်ဖြစ်ခဲ့ကြရသည် မဟုတ်ပါလား။ ထိုနေ့က ကျောင်းပိတ်ရက်ဖြစ်ပါသည်။ သူ့ကိုယ်သူ ပြိုင်ဘက်မရှိ တင်မြှောက်ထားသော အားကစားမှူး ခင်ခင်က နံနက်ငါးနာရီ လမ်းလျှောက်ထွက်ကြရန် နှိုးဆော်ပါသည်။
နှင်းမှုန်မှုန်ကြားတွင် တပျော်တပါး လမ်းလျှောက်ပြီး အင်းလျားကန်စောင်းမှ ဘူးသီးကြော် ကြွပ်ကြွပ်ရွရွ သွားစားမည်ဆိုတော့ ညိုတို့အားလုံး သဘောတူကြပါသည်။ အလွန်အအိပ်မက်သော လတ်နှင့်အဝါပင် ခင်ခင့် ဩဝါဒကြောင့် နံနက်စောစောထရန် သဘောတူလေသည်။ သို့ရာတွင် လေးနာရီခွဲ နှိုးစက်ပေးထားသော ခင်ခင့်နာရီကြီးသည် ညဥ့်နှစ်ချက်တီး၌ 'ကလောင် ကလောင်' နှင့် နားညည်းအောင် ထအော်လိမ့်မည်ဟုကား မည်သူမျှ မထင်မှတ်မိခဲ့ပေ။ ကလောင် ကလင် အော်နေသော နှိုးစက်သံကြောင့် ခင်ခင်လည်း အိပ်ရာမှ လူးလဲထကာ တစ်ခန်းဝင် တစ်ခန်းထွက်နှင့် လိုက်နှိုးပါတော့သည်။ ည်ိုတို့တစ်တွေလည်း ချမ်းချမ်းစီးစီး အိပ်မှုန်စုံမွှားနှင့် မျက်နှာသစ်ကြရသည်။ အင်္ကျီလဲကြရသည်။ သနပ်ခါးလိမ်းကြရသည်။ အဆင်သင့် ပြင်ဆင်ပြီး ထွက်လာသော မိက အဆောင်နာရီကြီးကို ဦးစွာကြည့်မိသည်။ နှစ်ချက်ခွဲဖြစ်နေသဖြင့် သူ့မျက်လုံးကိုသူပွတ်ကြည့်သည်။ အထပ်ထပ်အခါခါ ကြည့်သည်။ ထို့နောက် ညိုတို့ကို ခေါ်ပြသည်။ ညိုတို့အားလုံး အ်ိပ်ချင်မူးတူးဖြစ်နေသော မျက်လုံးများကို အတင်းပြူးပြီး အသေအချာကြည့်သည်။ နာရီကြီးက မတုန်မလှုပ် နှစ်ချက်ခွဲတိတိ။
'ခင်ခင် နှိုးစက်ပေးထားတာ အသေအချာ လေးနာရီခွဲပါ ညိုရယ်၊ မအိပ်ခင်ကတောင် ကြည့်မိသေးတယ်၊ ဘယ်လိုဖြစ်တယ်မသိဘူး'
ခင်ခင်က ဝေခွဲမရဟန်နှင့် ပြောနေသည်။ ခင်ခင့် မျက်နှာငယ်လေးကိုကြည့်ရင်း ညိုတို့ စိတ်မဆိုးရက်ပါ။ စိတ်ပင်မဆိုးသော်လည်း အောင့်သက်သက်နှင့် ကျွဲမြီးတော့ တိုမိကြပါသည်။ အိပ်မှုန်စုံမွှားနှင့် နှုတ်ခမ်းနီကို အစွန်းစွန်းအထင်းထင်း ဆိုးထားသော မိကမူ နှုတ်ခမ်းစူနေပါသည်။ ညဥ့်နှစ်ချက်ထိုးကြီး မျက်နှာထသစ်ကြသော ညိုတို့လည်း အိပ်ရာထဲဝင်ပြီ ပြန်နွေးအောင် ကွေးကြရလေသည်။ တကယ့်တကယ် လေးနာရီခွဲသောအခါတွင်ကား မည်သူမျှ မထဖြစ်တော့ချေ။
'အဟဲ မနက်က လမ်းလျှောက်မထွက်ကြဘူးလား၊ ဘူးသီးကြော်ကရော ကောင်းရဲ့လား'
နံနက်ရောက်သောအခါ မော်မော်က ပြုံးစပ်စပ်နှင့် လာမေးသည်။ ဝေဝေ့မျက်နှာကလည်း အပိုးမသေလှပါ။ ခင်ခင်သည် သူတို့နှစ်ဦးက်ိုကြည့်ရင်း မျက်မှောင်ကြီးကြူတ်လာကာ အလန့်တကြား ထအော်ပါတော့သည်။
'ကြည့်စမ်း၊ နင်တို့နှစ်ကောင် နေမှာပဲ၊ ငါအ်ိပ်ခါနီး စာအုပ်လာယူတာပါဆိုပြီး ဘာလုပ်ခဲ့ကြသလဲ၊ နာရီနှိုးစက်ကို လှည့်သွားတာ နင်တို့ပဲ ဖြစ်မှာပဲ၊ ဟင်း ခွေးမလေးတွေ'
ခင်ခင်က ဗလုံးဗထွေးအော်နေစဉ် သူတို့နှစ်ဦးသည် ဟက်ဟက်ပက်ပက်ရယ်ကာ သုတ်ခြေတင် ဆင်းပြေးပါတော့သည်။ အစသန်သလို အပြေးလည်း သန်လှသဖြင့် ညိုတို့မိအောင် မဖမ်းလိုက်နိုင်ပါ။
ထိုသို့ မကြာခဏ အရူးဖြစ်ရလေ့ရှိသော ညိုတို့အားလုံး သူတို့နှစ်ဦးကို မိမိရရ ချောက်တွန်းချင်စိတ် တညီတညာတည်း ရှိကြသည်မှာ မဆန်းလှပါ။ ဧပြီတစ်ရက် ဧပြီအရူးနေ့တွင် ဒဿဂီရိနှင့် လှည့်ခြောက်ပြီး အရူးလုပ်ရန် အဝါက အကြံပေးသောအခါ ကန့်ကွက်သူမရှိ အားလုံး သဘောတူကြလေသည်။ သူများနာမည်ကို ခုတုံးလုပ်ရသည်မှာ ကောင်းတော့ မကောင်းလှ။ သို့သော် ဧပြီတစ်ရက်သည် ခင်မင်သူအချင်းချင်း အရူးလုပ်ကျီစယ်လေ့ရှိသောနေ့ဖြစ်၍ အပြစ်မရှိဟု ကိုယ့်ဟာကိုယ် အာပတ်လွတ်လိုက်ကြသည်။ ဝေဝေတို့ ကြောက်သည်မှာလည်း ဤကမ္ဘာပေါ်တွင် 'ဒဿဂီရိ' နှင့် 'ခေါင်းမဆံ့' တို့ နှစ်ဦးသာ ရှိသည်မဟုတ်ပါလော။
ဒဿဂီရိဟူသည်မှာ ခေါင်းဆယ်လုံးရှိသော ဘီလူးအမည်မဟုတ်ပါ။ ခေါင်းတစ်လုံးတည်းရှိသော လူအမည်ဖြစ်ပါသည်။ တစ်ချိန်တည်းမှာပင် မိန်းကလေးဆယ်ဦးကို ရည်းစားစကားပြောနိုင်သည်ဟု မိန်းကလေးလောကတွင် နာမည်ကြီးလှသူဖြစ်၍ 'ခေါင်းဆယ်လုံးရှိလို့ ဆယ်ယောက်ကို တစ်ပြိုင်တည်း ပြောနိုင်တာထင်တယ်' ဟု ထွေးက အူကြောင်ကြောင် မှတ်ချက်ချဖူးသဖြင့် 'ဒဿဂီရိ' ဟု အမည်တွင်သွားရသော ကျောင်းသားဖြစ်လေသည်။ သူနှင့်အတွဲ ကျောင်းသားသည်ကား ရှည်လျားမြင့်မားလှသော အရပ်ကြောင့် 'ခေါင်းမဆံ့' ဟု ကင်ပွန်းတပ်ခံရရှာလေသည်။ သူတို့နှစ်ဦးသည် မိစ္ဆာတေလေမလေးများဖြစ်သော ဝေဝေနှင့် မော်မော်ကို အကောင်းထင်ပြီး အကြိုက်ကြီး ကြိုက်နေကြသည်။
'ငါတို့ကိုများ ဘာကြိုက်တာလဲ မသိ' ဟု မော်မော်က ရယ်ကျဲကျဲနှင့် ပြောဖူးသည်။ ပြောလည်း ပြောစရာပါပေ။ သူတို့နှစ်ဦးသည် သနပ်ခါးပင် ညီအောင် လိမ်းတတ်သူများ မဟုတ်ပါ။ အလှပြင်ကိရိယာဆို၍ နှစ်ယောက်ပေါင်းမှ ကျောင်ပျဉ်တစ်ချပ်။ အပွေးကုန်နေသော သနပ်ခါးသုံးတုံး၊ မျက်ခုံးမွှေးခြစ်သော သွားပွတ်တံ အကျိုးတစ်ခုနှင့် မှန်တစ်ချပ်သာ ပိုင်ဆိုင်ကြလေသည်။ ဒီကြားထဲ အိပ်ရာပေါ်တွင် မှန်ချထားသည်ကိုမကြည့်မိဘဲ မရွှေလတ် တက်ထိုင်လိုက်၍ မှန်လေးလဲ လေးစိတ်လေးမွှာ ကွဲသွားရရှာသည်။ မျက်ခုံးမွှေး သွားပွတ်တံလည်း အထားမှားပြီး ရှာမတွေ့သည်မှာ ကြာချေပြီ။ ယခုအခါ သူတို့ဆီတွင် ကျောက်ပျဉ်ကြီးတစ်ချပ်သာ ကျန်လေတော့၏။
'ဝေဝေရေ ဒဿဂီရိနဲ့ ခေါင်းမဆံ့တို့က်ို တွေ့ခဲ့တယ်သိလား'
မဝေတို့ အယုံသွင်းရေးကို တာဝန်ယူသော ခင်ခင်နှင့် လတ်တို့က ပြောသောအခါ မဝေက ပြောင်စပ်စပ်နှင့် 'အဟတ် ကျန်းမာရဲ့လား မောင်တော်တို့ နှုတ်မဆက်လိုက်ဘူးလား' ဟု ပြောနေသေးသည်။
သို့သော်လည်း ခင်ခင်က 'ရယ်မနေစမ်းနဲ့ ဝေဝေ၊ ဒါဟာ ရယ်စရာမဟုတ်ဘူး။ နက်ဖြန်ကျရင် တွေ့ရာအရပ်က ကားတင်ပြေးမှာပဲလို့ ကြိမ်းနေတယ် သိရဲ့လား' ဟု စိုးရိမ်တကြီး ဆက်သောအခါတွင်ကား ဝေဝေ မရယ်နိုင်တော့ချေ။
'ခေါင်းမဆံ့ကလည်း ထောင်ကျကျ တန်းကျကျ ဖြစ်ချင်ရာဖြစ်တဲ့၊ ချစ်သူက မချစ်တဲ့ဘဝမှာတော့ ထင်ရာစိုင်းမှာပဲတဲ့'
အဝါက မျက်နှာငယ်လေးနှင့် ဝင်ပြောပါသည်။
'ဂိုက်ကလည်း လူမိုက်ဂိုက်ကြီး၊ လုပ်မယ်ဆိုရင် တကယ်ကိုလုပ်မယ့်ရုပ်'
'ဘေးကလူတွေကလည်း မြှောက်ပေးနေလိုက်ကြတာ၊ ကူညီမယ့်လူတွေကလည်း အများကြီး'
'မေ့ဆေးနဲ့အုပ်ပြီး ကားပေါ်ဆွဲတင်သွားရင် ဒုက္ခ၊ အော်နိုင်မှာတောင် မဟုတ်ဘူး၊ တစ်ခါတည်း ပါသွားမှာ ဘုရား ဘုရား ကယ်ပါ'
ညိုတို့ လတ်တို့ကပါ ဝင်ပြီးတစ်ယောက်တစ်ခွန်း ဘေးတီးကြသောအခါ မဝေနှင့် မမော်တို့ မျက်နှာလေးများသည် ဆီးရွက်ထက်ပင် ငယ်သွားဦးမည်ထင်ပါသည်။ မျက်တောင်လေးများ ပုတ်ခတ်ပုတ်ခတ်နှင့် ကြောင်တောင်တောင်လေးဖြစ်နေကြ၏။ လူတကာကိုနိုင်သော မော်မော်နှင့် ဝေဝေတို့သည် 'ဒဿဂီရိ' နှင့် 'ခေါင်းမဆံ့' ဆိုလျှင်ကား အသေအလဲ ကြောက်ကြလေသည်။ တွေ့ရာမရှောင် ရည်းစားစကားလိုက်ပြောတတ်၍ ကဆုန်ပေါက်ပြေးခဲ့ကြရသည်မှာလည်း မကြာခဏပင်။
'ခင်ခင်ရဲ့ တကယ်ပဲလား'
ငိုမဲ့မဲ့ဖြစ်လာသော ဝေဝေကိုကြည့်ရင်း ညို ရယ်ချင်လာပါသည်။ 'မှတ်ပလား မှတ်ပလား' ဟု စိတ်ထဲက ရေရွတ်နေမိသည်။ လတ်တို့ ဝါတို့ အိုက်တင်ကလည်း အကယ်ဒမီ ရှုံးပါသည်။ မျက်နှာပိုးက သေလှပါသည်။
'ကိုယ်က ကြည့်ရှောင်ရမှာပေါ့ကွယ်၊ လူမိုက်နဲ့ ပြိုင်မိုက်လို့တော့ ဘယ်ရမလဲ၊ နက်ဖြန်ခါကျရင် ဘယ်မှမထွက်နဲ့ပေါ့၊ အဆောင်ပေါ်တက်ဆွဲလို့ ရတာမှမဟုတ်ဘဲ၊ ကုန်ကုန်ပြောမယ်၊ ထမင်းတောင်ဝယ်စား ဆိုင်မှာသွားမစားနဲ့'
ခင်ခင်က လူကြီးလုပ်ပြီး ဆုံးမပါသည်။ ကံကောင်းချင်တော့ ထိုအချိန်တွင်မှ တိုက်တိုက်ဆိုင်ဆိုင် ဒဿဂီရိနှင့် ခေါင်းမဆံ့တို့ (ကြမ္မာငင်ပြီး) အဆောင်ရှေ့မှာ(စောင်းကန်း စောင်းကန်းနှင့်) ဖြတ်သွားကြလေသည်။ 'တွေ့လား တွေ့လား အရိပ်အကဲ လာကြည့်နေကြတာ' ဟု အဝါက ပြူးတူးပြဲတဲ ပြောသောအခါ မဝေတို့ ဒူးများပင် တုန်လာလေ၏။ လက်ဖျား ခြေဖျားများအေးကာ ငိုမဲ့မဲ့ဖြစ်နေကြလေသည်။
နောက်တစ်နေ့။ ဧပြီ တစ်ရက်နေ့တွင် တကယ်ပင် အခန်းအပြင်သို့ မထွက်ရဲကြတော့ပေ။ သူတို့စားရန် ထမင်းကြော်ကိုပင် ညိုတို့ လုပ်အားပေးရုံးသို့မသွားမီ ဝယ်ပေးခဲ့ရပါသည်။ ထိုအခါ မိတို့ အကြိုက်တွေ့တော့သည်။ ထမင်းထုပ်ကို ဖွင့်ပြီး အကျအန ဆားနှင့်ဖြူးပါတော့သည်။ ထို့နောက် ပုံမပျက် ပြန်ထုပ်ကာ ပေးသည်။
'ဟင် တရုတ်ပုပ်တွေ ဘယ်လိုကြော်လိုက်တယ် မသိဘူး၊ ထမင်းက ငန်လိုက်တာ တူးလို့'
ထမင်းတစ်လုတ် စာပြီးတိုင်း ရှုံ့ရှုံ့မဲ့မဲ့နှင့် တစ်ခါပြောလေသည်။ ညိုတို့က ရယ်ချင်စိတ်ကို မြိုသိပ်ပြီး တစ်လုတ် နှစ်လုတ် ဟန်မပျက် ဝင်စားကြည့်သည်။ ငန်လွန်းသဖြင့် မျက်နှာ မရှုံ့မိအောင် မနည်းသတိထားနေရပါသည်။
'မငန်ပါဘူး မဝေရဲ့၊ မှန်းစမ်း မော့်ထမင်းရော၊ ဟာ ဘယ်မှာငန်လို့တုန်း၊ ကောင်းလို့ပဲ နင်တို့ပါးစပ်တွေ ဘယ်လိုဖြစ်နေတာတုံး'
ထိုအချိန်တွင် အဝါက အလုပ်စတော့သည်။ သောက်ရေအိုးထဲတွင် ဆားတစ်ဆုပ်ပက်ထည့်ပြီး အသာမွှေထားလိုက်လေသည်။ ပိုမို စိတ်ချရလေအောင် ညိုတို့ လတ်တို့ အခန်းက ရေအိုးတွေကိုပါ ဆား ထည့်ထားရသည်။
'တကယ်ပဲ မငန်ဘူးလားဟင်၊ မော်တို့ပါးစပ်တွေထဲမှာတော့ ငန်လိုက်တာကိုတူးလို့'
'နင်တို့ သိပ်ကြောက်နေလား၊ တစ်ခါ စာအုပ်ထဲမှာ ဖတ်ဖူးတယ် ၊ စိတ်က သိပ်ပြီးကြောက်နေရင် ထွက်တဲချွေးမှာ ဆားဓာတ်မပါတော့ဘဲ လူ့လျှာကြောထဲ ရောက်သွားတယ်ဆိုလား ဘာလား၊ သေချာတောင် မှတ်မိပါဘူး ၊ ဟိုတစ်ခါ မဝေတို့ကြည့်ခိုင်းတဲ့ ရုပ်ရှင်ကြီး ကြည့်ပြီးတဲ့ညကရော မိ သိပ်ကြောက်နေတာ မဟုတ်လား၊ အဲဒိတုန်းကလည်း ရေသောက်ရတာ ငန်လိုက်တာ လွန်ရော'
မိကလည်း အတည်ပေါက်နှင့် ပေါက်ကရ ဝင်ဟောလေသည်။ ဝေဝေနှင့် မော်မော်တို့ နှစ်ဦးသည် ယုံရအခက် မယုံရအခက်နှင့် မျက်မှောင်ကြုတ်နေကြလေသည်။ သို့သော် ထမင်းစားအပြီး ရေသောက်သောအခါတွင်ကား ယုံချင်ချင်ဖြစ်လာဟန်ရှိသည်။
'အာပါးပါး ဖွီး ငန်လိုက်တာလွန်ရော၊ ရေကလဲ ဘယ်လိုဖြစ်တာလဲ'
ဝေဝေက ရေကို ထွေးထုတ်ပြီး အော်လေသောအခါ အဝါနှင့်အထွေးတို့သည် အခန်းအပြင်သို့ ယောင်လည်လည်ထွက်သွားကြလေသည်။ အပြင်ရောက်သောအခါမှ ပါးစပ်ပိတ်ပြီး အသံမထွက်အောင် ကျိတ်ရယ်နေကြ၏။
'လတ်တို့ အခန်းက ရေကလဲ ငန်တာပဲ ခင်ခင်ရဲ့၊ သောက်ကြည့်ပါဦး၊ ဘယ်လိုဖြစ်နေလဲ မသိဘူး'
လက်လှမ်းမီသမျှ ရေအိုးတွေ ဆားထည့်ထား၍ တော်တော့သည်။ လတ်တို့အခန်းက ရေကို သွားသောက်သော မော်က ခင်ခင့်ကို သောက်ကြည့်ခိုင်းသောအခါ ခင်ခင်လည်း ငန်ငန်တူးတူးရေကို ကျိတ်မှိတ်သောက်ရလေသည်။
'ငန်ပါဘူး မမော်ရဲ့ ၊ ချိုလို့ အေးလို့'
ခင်ခင်က မချိသွားဖြဲနှင့် ဇွတ်ကြီးပြုံး၍ နေသောအခါ ညိုသည် ဖွီးခနဲရယ်မိမည်စိုး၍ ကိုယ့်လျှာကို ကိုယ်ကိုက်ထားရပါသည်။ မိ၏ မျက်နှာသည်လည်း ရယ်ချင်လွန်းသဖြင့် နီရဲနေပါသည်။
ရေငတ်တိုင်း ရေငန်ငန်ကြီးကို ခုတင် ခုသောက်လိုက် ဖွီးခနဲ ထွေးထုတ်လိုက်နှင့် ကောင်းကောင်းကြီး ဒုက္ခများနေသော မဝေတို့သည် ရယ်စရာကောင်းလှပါသည်။ ခုတင်ကို မှီရင်း စိတ်ပျက်လက်ပျက်လး ထိုင်နေကြသောအခါတွင်ကား သနားစရာပင် ကောင်းနေပါတော့သည်။
'ကြောက်ရင် စားသမျှငန်တယ်ဆိုတာ အခုမှသိတယ်၊ အရင်က သိပ်မကြောက်ဖူးလို့ထင်တယ်' ဟု ငိုသံပါလေးနှင့်ပြောသောအခါတွင်ကား ညိုလည်း ရယ်ချင်စိတ်ကို မအောင့်နိုင်တော့၍ အခန်းအပြင်သို့ ကမန်းကတန်း ထွက်လာရသည်။ ညိုတို့ အခန်းထဲ၌ မိဝါနှင့် လတ်တို့သည် ဗိုက်နှိပ်ရင်း လိမ့်နေအောင် ရယ်နေကြ၏။ အသံအကျယ်ကြီး ထွက်မည်စိုး၍ ခေါင်းအုံးနှင့် မျက်နှာအပ်ထားကြရသည်။
ထိုနေ့တစ်နေ့လုံး အဝါပျော်နေလေသည်။ အဝါတင်မက ညိုတို့တစ်ဖွဲ့လုံး ခြေထောက်နှင့် မြေကြီးထိသည်မထင်။ တစ်သက်လုံး ခံခဲ့ရသမျှ ပြန်လည်းအရူးလုပ်ထားခဲ့ရသဖြင့် အကျေနပ်ကြီး ကျေနပ်နေလေသည်။
'ညနေကျရင် ကြို့ကုန်းရွာထဲ သွားရမယ်၊ ဝေဝေတို့က အဲဒီက ဒေါ်အေးလှဆိုတာကို လက်ပံပွင့်တွေ လာပ်ို့မယ်လို့ ပြောထားခဲ့တယ်တဲ့။ အဲဒါ သူတို့ အပြင်မထွက်ရဲတော့ ခင်ခင်တို့တွေပဲ သွားပို့ပေးပါတဲ့'
'အေးလေ တို့တွေပဲ သွားပို့ပေးတာပေါ့၊ ဒီတစ်နေ့တော့ အခန်းထဲအောင်းပြီး ရေငန်တွေ သောက်ပါစေဦး'
ဘတ်စ်ကားဆိပ်နားက လက်ပံပင်ကြီးနား အရောက်တွင် ခင်ခင်က ပြောသောအခါ ဝေဝေတို့အစား လက်ပံပွင့်သွားပို့ရန် အားလုံး သဘောတူကြသည်။ ဒီနေ့ ဒီရက်တွင် သူတို့အပြင်မထွက်လျှင်ပြီးရော ငရဲပြည် သွားခိုင်းလျှင်လည်း ညိုတို့က သွားပေးမိမည်လား မပြောတတ်။
'တစ်သက်လုံး သူများကိုချည်း အရူးလုပ်လာတာ ဒီတစ်ခါတော့ မှတ်ကရော့၊ ညကျမှ အရူး အရူး ဧပြီအရူးလို့ ခေါ်ရင်း ရယ်ဦးမယ်'
'သူတို့မျက်နှာလေးတွေက ဆီးရွက်လောက်ပဲ ရှိတော့တယ်၊ သနားတောင် လာရော'
'အို မသနားနဲ့၊ ဆယ်ခါတစ်ခါလောက်ပဲ သူတို့ကို ပြန်အရူးလုပ်ရတာ၊ တို့တွေ တစ်သက်လုံး ခံနေရတဲ့ဟာကို'
'ခါတိုင်း ဧပြီတစ်ရက်ဆို သူတို့နှစ်ယောက်ပဲ ကြောက်နေရတာ၊ ဒီနှစ်တော့ သတိမရကြတော့ဘူး ထင်တယ်'
'ဒဿဂီရိကြောက်တာနဲ့ မေ့သွားပြီထင်ရဲ့'
ညနေစောင်းတွင် ယခင်ကတည်းက မဝေတို့ကောက်ထားသည်ဆိုသော လက်ပံပွင့်အထုပ်ကြီးကို ပိုက်ရင်း ကြို့ကုန်းရွာထဲသို့ ထွက်ခဲ့ကြပါသည်။ တစ်ယောက်တစ်ပေါက်ပြောရင်း အကျေနပ်ကြီး ကျေနပ်သဖြင့် ညောင်းမှန်းပင်မသိကြပါ။ ဝေဝေနှင့် မော်မော် အသေအချာ ဆွဲပေးလိုက်သော လမ်းညွှန်မြေပုံကိုကြည့်ရင်း ဘယ်ချိုးလိုက် ညာကွေ့လိုက်နှင့် တပ်ဦးမှ ချီတက်နေသော ခင်ခင့်နောက်မှ စကားကိုဖောင်ဖွဲ့ရင်း တကောက်ကောက်လိုက်နေကြသည်။
ဝေဝေတို့မြေပုံအရ သူတို့ ရတနာ လက်ပံပွင့် များကို ပေးရမည့်အိမ်သည် ရွာစွန်နားရှိ အိမ်မည်းကြီးဖြစ်ပါသည်။ ခြံဝင်းကျယ်ကြီးတွင် မြက်ရိုင်းပင်များနှင့် အုပ်ဆိုင်းနေပါသည်။
'ဒီအိမ်က ဒေါ်အေးလှနဲ့ ဘယ်တုန်းကများ လာပြီးအသိဖြစ်လိုက်ကြတယ် မသိပါဘူး၊ နောက်ပြီး လက်ပံပွင့်ထဲ ရွှေများထည့်ပေးလိုက်လား မသိပါဘူးဟယ်၊ ဒေါ်အေးလှ လက်ထဲရောက်အောင်ပေးပါတဲ့၊ အတော် စပ်စပ်စုစုနိုင်တဲ့ ကောင်မလေးတွေ'
ခင်ခင်က မကျေမနပ်ပြောရင်း တံခါးခေါက်လေသည်။
'ကျူပ်နာမည်က အေးလှ၊ အေးလည်း အေးတယ် လှလည်း လှတယ်'
တံခါးလာဖွင့်သူသည် ဒေါ်အေးလှကိုယ်တိုင် ဖြစ်ပါသည်။ အသက်လေးဆယ်ကျော်ခန့်ရှိပြီး သနပ်ခါး အဖွေးသားလူးထားသည်။ နှုတ်ခမ်းကို နီရဲနေအောင်ဆိုးထားကာ ဒေလီယာပန်းအဝါတစ်ပွင့် ပန်ထား၏။ တန်းစီရပ်နေသော ညိုတို့ကိုကြည့်ရင်း မျက်စောင်းတစ်ချက်ထိုးကာ မပြုံးမရယ်နှင့် သူ့ကိုယ်သူ မိတ်ဆက်စကား ဆိုလေသည်။
'ဝေဝေနဲ့ မော်မော်က ပေးခိုင်းလိုက်လို့ပါ'
ခင်ခင်က ပြုံး၍ လေပျော့ကလေးနှင့်ပြောသောအခါတွင် ခါးကို ဆတ်ခနဲထောက်ကာ နှုတ်ခမ်းကို မဲ့လိုက်လေသည်။
'ဘယ်က ဝေဝေတုံး'
မိုးချုန်းသလို အော်လိုက်သောအသံကြောင့် ညိုသည် လန့်ပြီး နောက်တစ်လှမ်းဆုတ်လိုက်မိပါသည်။ အဝါက တအံ့တသြနှင့် အငေးသားဖြစ်နေမိ၏။ မိနှင့် လတ်တို့လည်း မျက်လုံးအဝိုင်းသားနှင့် ပါးစပ်အဟောင်းသား ဖြစ်နေကြသည်။ တပ်ဦးမှ ခေါင်းဆောင်သွားခဲ့သော ခင်ခင်လည်း မျက်စိမျက်နှာပျက်နေသည်။
'ကျောင်းကပါ ကြို့ကုန်း စက်မှုတက္ကသိုလ်က ဝေဝေပါ၊ အဲဒါ ဒေါ်ဒေါ့်ကို လက်ပံပွင့်တွေ ပေးခိုင်းလိုက်တာပါ။ လက်ပံခေါင်း ချဉ်ရည် ချက်စားဖို့တဲ့၊ ဒီနေ့ သူတို့မလာနိုင်လို့ ကျွန်မတို့က လာပို့ပေးတာပါ'
ခင်ခင်သည် တံတွေးတနင်နင်နှင့် ဇာတ်စုံခင်းနေသည်။ ဒေါ်အေးလှသည် နားမထောင်ဘဲ ခင်ခင့်လက်ထဲမှ အထုပ်ကိုဆွဲယူလိုက်သည် ကြိုးကို ဆက်ခနဲ ဖြေလိုက်သောအခါ မြေပေါ်တွင် လက်ပံပွင့် နီနီများ ကြဲပြန့်ကုန်ပါသည်။
'မြတ်စွာဘုရား ကယ်ပါ ဘယ်လိုတုံး'
ဒေါ်အေးလှ အပြုအမူကြောင့် ထွေးက ခပ်အုပ်အုပ်အော်လိုက်သည်။ ညိုလည်း နားမလည်နိုင်အောင် ဖြစ်နေပါတော့သည်။ ဒေါ်အေးလှသည် လက်ပံပွင့်နီနီများကို သိမ်းကျုံးကောက်ပြီး ဘာမပြော ညာမပြော ထငိုပါတော့သည်။
'အောင်မယ်လေး မောင်ဟိုဒင်းရဲ့၊ သတိရလှချေရဲ့လေး၊ အဟေးဟေ့'
ခုနှစ်သံချီပြီး ရင်ဘတ်စည်တီး အော်လေသော ဒေါ်အေးလှကို ကြည့်ရင်း ခင်ခင်သည် ထိုင်ရမလို ထရမလို ကုန်းကွကွ ဖြစ်နေပါသည်။ ညို့ရင်ထဲတွင် တဒိုင်းဒိုင်းခုန်လာသည်။ ညို့လက်ကိုလာဆုပ်ကိုင်သော မိ၏ လက်များသည်လည်း တုန်ယင်အေးစက်နေ၏။ နဂိုက ပြူးသောထွေး၏မျက်လုံးများသည် ကြည့်ရင်းးကြည့်ရင်း ပို၍ပို၍ပြူးလာဟန်ရှိသည်။ လတ်တစ်ယောက်သည်ကား ဘယ်အချိန်က ဘယ်လိုဆုတ်ခွာလိုက်သည်မသိ၊ ခြံဝသို့ရောက်သွားပါသည်။
'အဟဲ ဟဲ ဟက် ဟက်၊ လက်ပံပွင့်ချိန် ခွေးရူးချိန်၊ ဟား ဟား ဟား လက်ပံပွင့်ချိန် ခွေးရူးချိန်၊ နင်တို့ထက် ငါပိုလှတယ်၊ ပိုလှတယ်'
ခုနှစ်သံချီပြီး အော်နေရာမှ ရုတ်ခနဲ ထထိုင်လိုက်သောအခါ ညိုတို့ လန့်သွားပါသည်။ ဆတ်တောက် ဆတ်တောက်နှင့် အောင်မောင်းခြေထိုး ကကာ ညိုတို့ဆီကို ဦးတည်လာသောအခါတွင်ကား တပ်ပျက်သလို နောက်သို့ ရုတ်ရုတ်သဲသဲ ဆုတ်မိကြသည်။ အကြောက်သည်းသော မိက ညို့လက်ကိုဆွဲကာ ခြေကုန်သုတ်သောအခါတွင်ကား ကျောက်ခဲနှင့်ခလုတ်တိုက်ကာ နှစ်ယောက်သား ဒလိမ့်ခေါက်ကွေး လဲပါတော့သည်။ ဗန္ဓုလဝင်စားသော အဝါနှင့် ထွေးတို့သည် ညိုတို့ကို ကူဖို့နေနေသာသာ ကျော်ခွခုန်လွှားပြီး အိုလံပစ်စံချိန်နှင့် ပြေးပါချေသည်။ ညိုနှင့်မိလည်း ကိုယ့်ကိုယ်ကို ပက်လက်လဲလား၊ မှောက်လျက်လဲလားပင် မသိ၊ နေရာမှ လူးလဲထပြီး ကဆုန်ပေါက် ပြေးလိုက်ကြသည်မှာ အဝါတို့ရှေ့ပင် ရောက်သွားပါသည်။ ကိုယ့်ကိုယ်ကို အပြေးသန်မှန်း ယခုမှ သတိရတော့၏။
'ညိုရဲ့ စောင့်ဦး၊ ထွေးကို စောင့်ပါဦး' ညိုတို့လဲစဉ်က ထူဖို့ သတိပင်မရသော ထွေးက နောက်ဆုံးက ကျန်သောအခါ အော်ပါတော့သည်။
'ဟ ပြေးဟ ပြေး၊ စောင့်နိုင်ဘူး'
ညိုနှင့်မိကလည်း ဗလုံးဗထွေး ပြန်အော်ကြသည်။ ခြေထိုးကရင်း နောက်ဘက်မှ တောက်လျှောက်လိုက်လာသော ဒေါ်အေးလှနှင့် သူနှင့် အနီးဆုံးဖြစ်နေ၍ ထွေးခမျာလည်း အသဲတယားယားနှင့် ကြောက်ရှာမည်ဖြစ်၏။
သို့သော် ခြံဝရောက်သောအခါ ဒေါ်အေးလှသည် ဆက်၍မလိုက်တော့ချေ။ သီချင်းလေး တအေးအေးဆိုကာ နေရစ်လေသည်။ နားမလည် ပါးမလည်နှင့် ခွေးပြေး ပြေးခဲ့ရသော ညိုတို့လည်း တုန်တုန်လှုပ်လှုပ်နှင့် မောဟိုက်နေကြသည်။ ဒေါ်အေးလှ ဆက်လိုက်လဲ မီတော့မည် မထင်ပါ။ ညိုတို့အားလုံး ဂျင်မီနှင့် မခင်ပု စံချိန်ကျိုးလေအောင် အလုအယက် စံချိန်သစ် တင်ကြမည်သာ ဖြစ်၏။
'မိန်းကလေးတို့က ကြံကြံဖန်ဖန် နောက်တာကိုးကွယ်'
ဖုတ် အလ်ိမ်းလိမ်းကပ်ကာ မျက်လုံးပြူး မျက်ဆန်ပြူးနေကြသော ညိုတို့ကို တစ်ဖက်အိမ်မှ အဘိုးကြီးတစ်ဦးက ဆင်းလာပြီးပြော၏။ ဒူးဆစ်အထိ ထဘီထက်ခြမ်းကွဲသွားသော ညိုနှင့် ခြေဆစ်လွဲပြီး ထော့ကျိုးဖြစ်နေသော မိတို့ကိုကြည့်ကာ ရယ်ချင်ဟန်ရှိသည်။ ထင်မိထင်ရာစွတ်ပြေးပြီး ခွေးချေးပုံ တည့်တည့်တက်နင်းထားသော ထွေးဆီမှလည်း ရနံ့က ကြိုင်သင်းလှပါသည်။ နောက်မကြည့်ဘဲ လမ်းထိပ်အထိ တောက်လျှောက်ပြေးသော လတ်နှင့်အဝါသည် ယခုမှ ကြောက်ဆုတ် ကြောက်ဆုတ်နှင့် ပြန်လျှောက်လာနေကြ၏။
'ဘာဖြစ်လို့လဲ ဘကြီးရယ်၊ ကျွန်မတို့သူငယ်ချင်းက လက်ပံပွင့်ပေးခိုင်းလို့ လာပေးတာပါ၊ လက်ပံခေါင်း ချဉ်ရည် ချက်စားဖို့တဲ့'
'ဟင် ဒေါ်အေးလှဟာ ဝမ်းတွင်းရူးဆိုတာ မသိဘူးလား၊ ငယ်ငယ်ရွယ်ရွယ် မိန်းကလေးတွေဆိုရင် သူက ကြည့်လို့ရတာမဟုတ်ဘူးကွဲ့၊ အံ့ရောဗျာ အံ့ရော၊ မအေးလှအကြောင်း မိန်းကလေးတို့တကယ့်ကို မသိဘူးလား'
ဘကြီးက တအံ့တသြ ပြောသောအခါမှ တစ်ပတ်ကျော့အရူးလုပ်ခံလိုက်ပြီကို ရိပ်မိတော့၏။ အကောင်ကြီး ထင်းထင်းတွေ့ကာမှ အရိပ်ကို မြင်ရတော့သည်။ မော်မော်နှင့် ဝေဝေတို့၏ ပြောင်စပ်စပ် ရယ်ကျဲကျဲ မျက်နှာကို မြင်ယောင်ရင်း ချုံးချငိုချင်စိတ် ပေါက်လာပါသည်။
'သေဟ မှတ်ဟ၊ ဒီလောက်တောင် အတာ ၊ ခံဟ' အဝါက ကြိတ်မနိုင်ခဲမရနှင့် မြက်ပင်များကို ဖနောင့်နှင့်ပေါက်နေလေသည်။
နံနက်က ထမင်းကြော်ထဲတွင် ကနခို ထောင်းမထည့်လိုက်မိသည်ကိုကား အားလုံး နောင်တရနေကြပါသည်။ ထဘီအပြဲ ဒူးအကွဲနှင့် ခွေးချေးနံ့လေး တသင်းသင်းမွှေးနေသော ညိုတို့တစ်တွေ အဆောင်ကို ဘယ်လို ပြန်ရမည်ပင်မသိ။
ရှက်လိုက်ပါဘိ။
ခက်ပါဘိ။
မစန္ဒာ
ငွေတာရီမဂ္ဂဇင်း၊ ဧပြီလ ၁၉၇၂
No comments:
Post a Comment