" နံ့သာကုန်းမှာ "
========
#ဒေါင်းနေမင်း
၁၃ နှစ်အရွယ် ခင်သိုက်ဆိုတဲ့ မိန်းကလေးရဲ့ စိတ်စွမ်းအင်ဟောပြောမှုဟာ သွေးထွက်အောင်မှန်တယ်လို့ မဂ္ဂဇင်းတစ်စောင်ကနေ ရုပ်ရှင်မင်းသမီးတစ်ဦးနဲ့ တွေ့ဆုံခန်း အင်တာဗျူးမှာ သူမ ကိုယ်တွေ့အနေနဲ့ ဖော်ပြပေးလိုက်တဲ့အခါ တိတ်ဆိတ်ငြီးငွေ့ဖွယ်ကောင်းလှတဲ့ နံ့သာကုန်းရွာလေးဟာ လှုပ်လှုပ်ရွရွ ဖြစ်သွားတယ်။
၁။
နံ့သာကုန်းရွာဆိုတာ ရွာငယ်ဇနပုဒ်လို့တောင် ပြောလို့ရတဲ့ တကယ့်သေးသေးကွေးကွေး ဖရိုဖရဲလေး။ အလွန်ဆုံးရှိမှ အိမ်ခြေရှစ်ဆယ် တစ်ရာပဲ။ ရွာထဲမှာ ထည်ထည်ခံ့ခံ့ သွပ်မိုး ပျဉ်ထောင်အိမ်ဆိုလို့ သုံးလေးအိမ်လားပဲ ရှိမယ်။ ကျန်တာတွေက ဖြစ်သလို ဆောက်ထားကြတဲ့ သက်ငယ်မိုး ထရံကာတွေချည်းပါ။
ရှေ့မီနောက်မီ လူကြီးတွေ ပြောသားအလိုရဆို အလျင်က နံ့သာကုန်းဟာ ရွာတောင်မဟုတ်ဘူးတဲ့။ တဲစုလေးဆိုပဲ။ အဲဒါကြောင့် ဘုန်းကြီးကျောင်းတောင် မရှိဘူး။ ရွာ့မြောက်ဘက် (တစ်ဆက်တည်းလို့လည်း ပြောလို့ရတဲ့) ရေပြာရွာဘုန်းကြီးကျောင်းကို နံ့သာကုန်းရွာသားတွေ ကိုးကွယ်ကြရတာ။ ရေပြာရွာက ရွာကြီးပေါ့လေ။ အုပ်ချုပ်ရေးပိုင်းအရလည်း နံ့သာကုန်းနဲ့ ရေပြာကို အုပ်စုတစ်စုတည်းပဲ သတ်မှတ်တယ်။
ရေပြာထက်စာရင် နံ့သာကုန်းဟာ လမ်းပန်းဆက်သွယ်ရေး ပိုကောင်းတယ်လို့ ပြောလို့ရမယ်။ ဘာဖြစ်လို့လဲဆိုတော့ နံ့သာကုန်းဟာ ဟိုင်းဝေးလမ်းမကြီး နံဘေးတင် ကပ်နေတာကိုး။ ရေပြာရွာသားတွေ မြို့သွားချင်ရင် နံ့သာကုန်းကို ဖြတ်ပြီးမှ လမ်းမပေါ်ကိုရောက်ရတာ။
နံ့သာကုန်းရွာနဲ့ ဟိုင်းဝေး လမ်းမကြီးကြားမှာတော့ အရိပ်ကောင်းကောင်း ပေးနိုင်တဲ့ ကုက်္ကိုလ်ပင်ကြီးတစ်ပင် ရှိတယ်။ စိတ်ကူးကောင်းတဲ့ လူတစ်ယောက်က ဝါးလုံးလေးတွေကို တန်းလျားလေးလို ရိုက်ပြီးထားတာမို့ အညောင်းပြေ ထိုင်နားလို့လည်းရတယ်။ ဒါမှမဟုတ် အမောပြေ ရေသောက်ချင်တယ်ဆိုရင်လည်း အနားမှာ ရေအိုးစင်လေးက အဆင်သင့်။
ခပ်လှမ်းလှမ်း ကားလမ်းဘေးမှာတော့ ဆေးသားတွေ ကွဲအက်ထွက်နေပြီး ဖုန်အလိပ်လိပ်တက်နေတဲ့ နံ့သာကုန်းရွာဆိုတဲ့ ဆိုင်းဘုတ်လေးဟာ ကားပေါ်က ခရီးသည်တွေ လျှပ်တစ်ပြက် ဖတ်မိရင် ဘာရေးထားမှန်း မသိနိုင်လောက်အောင်ကို ရုပ်ပျက်ဆင်းပျက် ဖြစ်နေပြီ။
ရေအိုးစင်ကနေ လှမ်းကြည့်ရင် ခင်သိုက်ဆိုတဲ့ ကောင်မလေးနေတဲ့အိမ်ကို လှမ်းမြင်နိုင်တယ်။ သပ်သပ်ရပ်ရပ်လေးပါ။ ခင်သိုက်မှာ မိဘနှစ်ပါးစလုံး မရှိဘူး။ ငယ်ငယ်ကတည်းက အဖေနဲ့အမေဟာ အိမ်ထောင်ပျက်ပြီး ကစဥ့်ကလျား ဖြစ်သွားတယ် ပြောတာပဲ။ ဘယ်ရောက်ကုန်မှန်းလဲ မသိဘူး။ အဲဒါကြောင့် အဘွားက စောင့်ရှောက်ထားရတာ။ လူပျိုကြီး ဦးလေးတစ်ယောက်ကလည်း သူတို့နဲ့ အတူနေတယ်လေ။ ဝိုင်းလုပ် ဝိုင်းစားပေါ့။
ထူးခြားတာက ခင်သိုက် ငယ်ငယ်လေးကတည်းက စကားကို သွက်သွက်လက်လက် ပြောတာမဟုတ်ဘူး။ တခြားကလေးတွေနဲ့ အရောတဝင် ဆော့ကစားတာလည်း မရှိသလောက်ကို နည်းတာ။ ဘာသာနေတာပဲ။ ဂျီလည်း မကျဘူး။ အရွယ်လေးရောက်လာတော့ အဘွားဈေးရောင်းတာ ဝိုင်းကူ၊ အိမ်မှုကိစ္စလုပ်။ အားရင် ဘုရားစာတွေရွတ်၊ ဘုရားရှိခိုး၊ ဒါပဲ။ ရွာထဲမှာတော့ သူ့ကို သိုက်ကလာတာ၊ ဥစ္စာစောင့်၊ လူဝင်စားဆိုပြီး အမျိုးမျိုး ပြောကြတယ်။ တစ်ခါတစ်ခါ ခင်သိုက် တစ်ယောက်တည်းနေရင်း ပါးစပ်က တတွတ်တွတ် ရွတ်နေတာမျိုး တစ်စုံတစ်ယောက်နဲ့ စကားပြောသလိုမျိုး လုပ်နေတာကို မြင်တဲ့လူက မြင်လာတာကိုး။ အစကတော့ ခင်သိုက်ကို နောက်နောက်ပြောင်ပြောင်နဲ့ ဟိုမေးဒီမေး လုပ်တဲ့လူကလည်း မရှားဘူး။ ရွှေငွေတောင်းတဲ့လူလည်း ရှိရဲ့။ အတိတ်ကို ပြန်ပြောခိုင်းတဲ့လူကလည်း အပျင်းပြေပေါ့လေ။
ခင်သိုက်ကို သိပ်ရင်းနှီးနေတဲ့လူဆိုရင် ဟိုပြောသည်ပြောနဲ့ ပြန်နောက်တတ်တာမျိုးတော့ ရှိတာပေ့ါ။ သူ့ကို လူတွေ အထူးအာရုံစိုက်လာစေတဲ့ အချက်တစ်ချက်ကတော့ တစ်ခါက ရွာမှာ နွားခိုးခံရတဲ့ ပြဿနာတစ်ခု ကြုံရတယ်။ ဘယ်မှာမှ ရှာမတွေ့လို့ စိတ်ပျက်နေတဲ့ နွားရှင်နဲ့ လိုက်ရှာတဲ့လူတစ်စုဟာ ခင်သိုက်တို့အိမ်ရှေ့မှာ စုမိကြတယ်။ တစ်ယောက်တစ်ခွန်း ပြောကြဆိုကြ တာလည်း ပွက်လောကို ရိုက်နေတာပဲ။ အဲဒီမှာတင် ခင်သိုက်က ကောက်ကာငင်ကာ ဝင်တဲ့ပြီး “ဦးကြီးတို့နွား အသတ်ခံရတယ်။ သင်္ချိုင်းက ဂူပျက်တစ်ခုမှာ ဝှက်ထားကြတယ်” လို့ ပြောတော့ အားလုံးက မယုံတစ်ဝက်ယုံတစ်ဝက်နဲ့။ တစ်ယောက်က သွားရှာတော့ တကယ်ပဲ အပိုင်းပိုင်းလှီးဖြတ်ထားတဲ့ နွားသေကို တွေ့တာ။ အဲဒီမှာတင် ခင်သိုက်ရဲ့ ကျော်ဇောသတင်းဟာ ပိုပြီး ကြီးသွားခဲ့တယ်။
ရွာနီးချုပ်စပ်ကဆို ကျွဲပျောက်၊ နွားပျောက်၊ ပစ္စည်းပျောက်၊ အိမ်ထောင်ရေး၊ စီးပွားရေးကအစ ခင်သိုက်ဆီ မမေးဖူးတဲ့လူဆို ခပ်ရှားရှား။ မှန်တဲ့အခါ ရှိသလို မှားတဲ့အခါလည်း ဘယ်သူကမှ ရေးကြီး ခွင်ကျယ်လုပ်ပြီး ပြောမနေဘူး။
ဖြစ်ချင်တော့ ရန်ကုန်ကနေ အညာဘက်ကို ရုပ်ရှင်ရိုက်ဖို့ အဖွဲ့တစ်ဖွဲ့က နံ့သာကုန်း ရွာထိပ်ရောက်တော့ ကားပျက်ပါလေရော။ ပျက်တာက မင်းသမီးကား၊ ပူညံပူညံဖြစ်လို့။ နေကလည်းပူ၊ အိုက်ကလည်းအိုက်မို့ ကားပြင်နေတုန်း အဖွဲ့သားတွေအားလုံး နေရိပ်ကောင်းတဲ့ ကုက်္ကိုလ်ပင်ကြီးအောက် ဝင်နားကြတယ်။ မီးထိုးသမားနဲ့ ရွာခံတစ်ယောက် စကားပြောဖြစ်ကြတယ်။ ဆိုပါစို့။
ခင်သိုက်အကြောင်း ရောက်သွားတယ်။
ကိုယ့်ရွာရဲ့ ဂုဏ်သိက္ခာကို တင်ချင်လွန်းတဲ့ အဲဒီရွာသားဟာ ခင်သိုက်အကြောင်း တခမ်းတနား အမွှန်းတင်လိုက်တာ ယောက်ျားနဲ့ကွဲနေတဲ့ မင်းသမီး လွှတ်စိတ်ဝင်စားသွားတယ်။ သူ့အဖော် မိတ်ကပ်ဆရာ မိန်းမလျာကလည်း သဲသဲလှုပ်ဆိုတော့ သိပ်တောင် စဉ်းစားချိန်မရလိုက်ပါဘူး။ ခဏကြာ ခင်သိုက်အိမ် ချီတက်ကြပါလေရော။ စူပါမင်းသမီးတစ်ယောက် ဒီရွာကို ရောက်နေတယ်ဆိုတဲ့သတင်း ချက်ချင်း ပျံ့သွားတယ်။ ကြည့်ချင်လွန်းတဲ့ ရွာထဲက ပျိုပျိုအိုအို မှန်သမျှ လုပ်နေတဲ့အလုပ်တွေပစ်ပြီး ပြေးလွှားလာလိုက်ကြတာ တချို့ဆို ထဘီတောင် ကျွတ်ကျဆိုပဲ။ ရုပ်ရှင်မင်းသမီးကတောင် ခင်သိုက်ဆီကို လာမေးတယ်ဆိုတဲ့ သတင်းက ဟိုးလေးတကျော်ကျော်။ အမှန်က ကားပျက်လို့၊ ကြုံလို့ဝင်တာ။ ထားပါတော့။ ဘာပဲဖြစ်ဖြစ် မင်းသမီးရဲ့ ပါးစပ်ဖျားက “သွေးထွက်အောင် မှန်လိုက်တာ ဆရာရယ်” လို့ ဒါရိုက်တာကို ပြန်ပြောတာ အားလုံးကြားရတယ်။ မင်းသမီး ရန်ကုန် ပြန်ရောက်တော့ အင်တာဗျူးတစ်ခုမှာ အဲသည့်အကြောင်းကို ထည့်လိုက်တာ တီဗီမှာ ကြော်ငြာခမကုန်ဘဲ နေ့ချင်းညချင်း ဆိုသလို ခင်သိုက်သတင်းက ဟုန်းခနဲ နာမည်ကြီးသွားတယ်။ လာလိုက်တဲ့ လူတွေ လူတွေ။ တချို့က ကိုယ်ပိုင်ကားတွေနဲ့။ တချို့က လိုင်းကားနဲ့။ တချို့ဆို ကုန်းတစ်တန်၊ ရေတစ်တန် နေရာမျိုးကနေ ရောက်လာတဲ့ လူတောင်ရှိရဲ့။ အဲဒီမှာတင် နံ့သာကုန်းရွာဟာ လှုပ်လှုပ်ရွရွ ဖြစ်ကုန်ကြတယ် ပြောပါတော့။
၂။
နံ့သာကုန်းမှာ လက်ဖက်ရည်ဆိုင်တစ်ဆိုင် ကောင်းကောင်း ဖွင့်ဖုိ့ ပထမဦးဆုံး စိတ်ကူးပေါ်တဲ့လူက ရေပြာရွာက ကျောင်းဆရာ ကိုညိုမြ ဆိုတဲ့လူပဲ။ သူက ခေတ်ပညာတတ် ဘွဲ့ရတစ်ယောက်ဆိုတော့ မြို့ပြရဲ့လူနေမှုအကျင့်ကို သိနေတယ်။ ကြည့်လေ၊ ခုဆို ခင်သိုက်ဆီ မေးဖုိ့လာတဲ့ လူတွေဟာ အလျင်ကလို လွယ်လွယ်ကူကူနဲ့ ကိစ္စပြီးကြတာ မဟုတ်ဘူး။ များလွန်းလို့ တုန်ကင်နဲ့ ဖြစ်သွားပြီ။ နဂိုကတည်းက ခင်သိုက်ဟာ ရောဂါသည်။ ချူချာတာလည်း လွန်ပါရော။ ၁၃ နှစ်ထဲ ဝင်လာတာတောင် ဖွံ့ဖြိုးမှု အားနည်းလွန်းလို့ ပါးပါးကပ်ကပ်လေး။ နည်းနည်းလေး လှုပ်လှုပ်ရှားရှား လုပ်တာနဲ့ မောနေတတ်တာ။ လူကြီးတွေကို ကိုယ့်ကျန်းမာရေးကို ချိန်ဆတတ်တာ မဟုတ်ဘူး။ ဒါကြောင့် ရွာလူကြီးတွေက ဧည့်သည်တွေကို တောင်းတောင်းပန်ပန်ပြောပြီး နားနားနေနေ ခင်သိုက်ကို ဟောခိုင်းရတာ။ အဲဒီတော့ ကိုယ့်အလှည့်မကျခင် စောင့်ရတဲ့လူတွေက တစ်ပုံကြီး ဖြစ်လာတယ်။ နားခိုဖို့နေရာနဲ့ အချိန်ဖြုန်းနိုင်ဖို့ဆိုတာ မရှိမဖြစ် လိုအပ်လာပြီ။
အဲဒါကြောင့် လက်ဖက်ရည်ဆိုင်ဖွင့်ရင် တွက်ခြေကိုက်မယ်လို့ စိတ်ကူးမိတဲ့ ကိုညိုမြ တစ်ယောက် အပြေးအလွှား စီစဉ်ရပြီပေါ့။ ပြောမယ့်သာ ပြောတာပါ။ သူကိုယ်တိုင်က လက်ဖက်ရည် တစ်ခွက်ကို သောက်ရုံသာ သောက်တတ်တာ။ အစပ်အဟပ် တည့်အောင် ဖျော်တတ်တဲ့လူ မဟုတ်ဘူး။ ဒီတော့ လက်ဖက်ရည်သမား တစ်ယောက်ကို မြို့တက်ပြီး သွားငှားရတယ်။ တစ်ဖက်ကလည်း ကျောင်းမှာ စာသင်နေရသေးတာမို့ သားနှစ်ယောက်နဲ့ မိန်းမကို ဆိုင်မှာ တာဝန်ယူဖို့ လျာထားရတယ်။ နေရာအတွက်တော့ အားလုံးနဲ့ အဆင်ပြေရင် ကြိုက်တဲ့ နေရာဆောက်ပဲ။ ကိုယ့်ရွာနဲ့ ကိုယ်ဆိုတော့ ဘယ်သူကမှလည်း ကန့်ကွက်မယ့်လူ မရှိပါဘူး။ အဲဒီမှာတင် လက်ဖက်ရည်ဆိုင်လေး သပ်သပ်ရပ်ရပ် လှလှပပလေး ဖြစ်အောင် ကိုညိုမြတစ်ယောက် လုံးပန်းရပြီ ဆိုပါတော့။
ဘာပဲပြောပြော အရီးလေး မယ်တုတ်တောင် ဆန်တစ်ပြည်ချက်ကို ထမင်းကြော်ပြီး လက်တည့်စမ်းလိုက်တာ မနက်ပိုင်းမှာတင် ပြိုက်ခနဲ ကုန်သွားလို့ ဟန်ကျပြီဟဲ့ဆိုပြီး ထမင်းဖြူနဲ့ ဟင်းပါတွဲရောင်းတာ လက်မလည်ဘူးဆိုပဲ။ တစ်ယောက်တည်း မနိုင်မနင်းဖြစ်တာနဲ့ တူမလုပ်တဲ့ ဂွက်ထော်ကို နေ့စားနဲ့ ငှားထားရတယ်။
အမှန်က နံ့သာကုန်းဟာ မြို့နဲ့နီးတာ မဟုတ်ဘူး။ ဘယ်သကောင့်သားမှ ဓာတ်ဆီအကုန်ခံပြီး အစား တစ်လုပ်နဲ့ စားသောက်ဆိုင်ကောင်းကောင်း ရှာမှာ မဟုတ်ဘူး။ မရှိ ရှိတာစားမှာပဲ။ မယ်တုတ်ကို အားကျလို့ ရွာထဲက မိန်းမတွေလည်း စပါးရိတ်မလိုက်၊ မြေပဲပေါင်းသင် မထွက်တော့ဘဲ ကောက်ညှင်းထုပ်ကအစ မုန့်ဟင်းခါးအဆုံး လုပ်တတ်သလိုလုပ်ပြီး ရောင်းကြပါလေရော။ အဲဒါလည်း ကုန်တာပါပဲ။
အဲဒီလမ်းမကြီးပေါ်က ဖြတ်သွားတဲ့ ခရီးသည်တွေဆို ကားတွေ၊ လူတွေ အဖွေးသားတွေ့ရတဲ့ ဒီရွာကို ဘာလုပ်တာလဲလို့ မေးယူရလောက်ထိ စည်ကားနေတာ။ လူကုန်ထံတွေ ပါသလို သာမန် လက်လုပ်လက်စားတွေလည်း ပါတယ်။ လာမေးတဲ့လူကို ဉာဏ်ပူဇော်ခ ဘယ်ရွေ့ဘယ်မျှ သတ်မှတ်ထားတာ မဟုတ်ဘဲ စေတနာရှိသလောက် အလှူခံပုံးထဲ ထည့်ရတာဆိုတော့ လူတန်းစားမရွေး မျက်နှာမငယ်ရဘူး။ ရှိတဲ့လူကလည်း ကိုယ်တတ်နိုင်သလောက်လှူ၊ မတတ်နိုင်တဲ့လူကလည်း သဒ္ဓါသလောက်ပေါ့။ ခင်သိုက်အတွက် ရည်စူးပြီး ဘုရားတည်ဖို့၊ အလှူအတန်း လုပ်ဖို့ကလည်း သပ်သပ်အလှူခံပုံးနဲ့။ ဒီတော့ လူတန်းစားမရွေး ရောက်လာကြတာ မဆန်းပါဘူး။
နံ့သာကုန်းမှာ စီးပွားရေးပြေလည်တဲ့ ကိုရိုးကတော့ ရန်ကုန်ထိဆင်းပြီး မီးစက်တစ်လုံး ချက်ချင်းပြေးဝယ်တယ်။ သူလည်း အကွက်မြင်ပြီးသားမို့လား။ တချို့ဆို နံ့သာကုန်းရောက်လာပြီးမှ အချိန်မရှိတော့လို့ မထူးဘူးဆိုပြီး ညအိပ်စောင့်တဲ့လူက တစ်နေ့ကို မရှိဘူးဆိုတာတောင် သုံးလေးဆယ်ယောက်ရှိတာ။ အဲဒီတော့ ညအိပ်ဖို့ အခက်အခဲ ရှိလာတယ်။ ဘုန်းကြီးကျောင်းက မရှိပြန်၊ နီးစပ်ရာအိမ်မှာ တည်းခိုဖို့ဆိုတာလည်း တစ်ရက်တန်သည် နှစ်ရက်တန်သည် မဟုတ်တော့ လက်ခံဖို့တော့ မဖြစ်ပြန်ဘူး။
ဒီတော့ ကိုရိုးက ကနားဖျင်းတစ်လုံး ထိုးလိုက်တယ်။ ပြီးတော့ ညအိပ်ရင် ဘယ်လောက်၊ ဖျာတစ်ချပ်၊ စောင်တစ်ထည်ဆိုရင် ဘယ်လောက်ဆိုပြီး ငှားစားတယ်။ အလုပ်ဖြစ်တာ မကျန်ဘူး။ ဒါပေမယ့် ညဘက် မှောင်မှောင်မည်းမည်းဆိုတော့ သိပ်ဟန်မကျဘူး ဖြစ်နေတယ်။
ကိုညိုမြက သူ့လက်ဖက်ရည်ဆိုင်အတွက် မီးယူချင်တယ်။ မယ်တုတ်နဲ့ တခြားဈေးသည်တွေကလည်း မီးရမယ်ဆိုရင် ညဘက်ပါ ဈေးရောင်းလို့ရတယ်ဆိုတော့ ကိုရိုး စဉ်းစားသွားပြီ။ ပိုသေချာသွားတာက မြို့မှာ ဗီဒီယိုပြစားတဲ့ ကိုသောင်းစိန်ကပါ မီးစက် အဆင်ပြေရင် အဲဒီမှာလာပြမယ်လို့ ဆိုတာကြောင့် ကိုရိုးတစ်ယောက် မီးစက်ဝယ်ဖြစ်လိုက်တာ။
နောက်ပိုင်းမှာ နံ့သာကုန်းရွာလေးဟာ မြို့အသေးစားလေးနဲ့ ဘာမှမခြားတော့ဘူး။ အပူသောက်မလား၊ အအေး သောက်မလား အကုန်ရတယ်။ ညဆို ရွာထိပ်မှာ ကက်ဆက်သံ တညံညံ၊ အင်ဂျင်မီး တလက်လက်နဲ့။ တစ်ခါတစ်ခါ ဗီဒီယိုရုံက ဝေါခနဲ ဝေါခနဲ ရယ်မောလိုက်တဲ့ အသံတွေကလည်း မကြားချင်မဆုံး။ သိပ်မဝေးလှတဲ့ ရေပြာ၊ ဇီးကုန်း၊ အင်းမ၊ လက်တက်ကြီးရွာက ကာလသားတွေတောင် ညဘက် အပျင်းပြေ လက်ဖက်ရည် ထွက်သောက်သူရှိရဲ့။ ဖြစ်နေကြပုံများ ပြောပါတယ်။ ဘာပဲပြောပြော ခင်သိုက်ကြောင့် ဒီလိုဖြစ်လာတာကိုတော့ ဘယ်သူမှ မငြင်းနိုင်ပါဘူး။
ချက်ကြီးဆို နံ့သာကုန်းရဲ့ တိုးတက်ပြောင်းလဲလာတဲ့ အခြေအနေအရပ်ရပ်ကို အကဲဖြတ်ပြီး လူငှားအလုပ်က ထွက်လို့ ရေထမ်းရောင်းတယ်။ ရေတစ်ထမ်းကို ငါးကျပ်ဆိုလည်း ဟုတ်၊ တစ်ဆယ်ဆိုလည်း ဟုတ်နေတော့ ချက်ကြီးလက်မှာ ငွေသီးနေတယ်။ လက်ထဲမှာ ပိုက်ဆံလေး စိုစိုပိုပို သုံးလာရတော့ လက်ဖက်ရည်ဆိုင် ထိုင်တတ်တဲ့အကျင့်လေး ဖြစ်လာတယ်။ တစ်လနေလို့ တစ်ခါ သောက်ခွင့်မကြုံတဲ့ လက်ဖက်ရည်ကို မနက်တစ်ခွက် ညတစ်ခွက် ပုံမှန်သောက်ဖြစ်တယ်။ ကိုယ့်ရွာမှာ ဆိုင်ဖွင့်တာကြောင့်လည်း ပါတယ်။ ဒါတင် မကဘူး။ ဟဲပီးမယ်တယ် သီချင်းတွေပါ အရသာခံနားထောင်တတ်တဲ့အကျင့် ဖြစ်လာတယ်။
“ဟဲပီး မယ်တယ်”ဆိုတာ ဘာလဲလုိ့ ချက်ကြီးကို သွားမမေးနဲ့။ ကျောင်းဆရာကိုညိုမြ ဘာသာပြန်ပေးလို့ လေးလံသောသတ္တု ဒါမှမဟုတ် အပြင်းစား သီချင်းတွေ ဆိုတာလောက်ကလွဲရင် ပိုမသိဘူး။ Sound Box က ခုန်ထွက်ပျံ့လွင့်လာတဲ့ သီချင်းတစ်ပုဒ်ကို မျက်လုံးလေး မှေးစင်းထားပြီး ခပ်ဖွဖွလေး လိုက်အော်ရတာကိုက ချက်ကြီးအတွက်တော့ ဇိမ်ပဲ။
အစကတော့ နံ့သာကုန်း ရွာသားတွေဟာ ခပ်ရိုးရိုး ခပ်အအပါပဲ။ ဒါပေမဲ့ မြို့ပြဧည့်သည့်တွေ ရောက်လာတော့မှ အမြင်အမျိုးမျိုး ကြုံရပြီး အထူးအဆန်းဆို သတိထားတတ်လာတယ်။ အထူးသဖြင့် ရွာထဲက ကာလသား၊ ကာလသမီးတွေဟာ မြို့ရဲ့ဝတ်စားဆင်ယင်ပုံ၊ အပြုအမူအနေထိုင်ကအစ မသိမသာ အတုခိုးလာတယ်။ ပထမတော့ ယောက်ျားအရင့်အမာကြီး ဖြစ်ပါလျက်နဲ့ ဆံပင်ကို နောက်က စုစည်းပြီး ဖွတ်မြီးကျစ်ထားတာတို့၊ နားတစ်ဖက်တည်းမှာတင် နားကွင်းတွေ သုံးလေးကွင်း ဖောက်တပ်ထားတာတုိ့ကို ရယ်ပွဲဖွဲ့ စကားဝိုင်းမှာသာ ကဲ့ရဲ့ပြောကြပေမဲ့ အမြင်များလာတော့ ရိုးသွားတာပါပဲ။
မကြာပါဘူး။ နံ့သာကုန်း လူငယ်ပိုင်းမှာ ခေတ်စားလာတာကတော့ ဂျင်းဘောင်းဘီကိစ္စပဲ။ ပထမတော့ လူကြီးပိုင်းက မျက်စိထဲ အချိုးမကျပုံပေါ်တယ်။ ဒါပေမယ့် သပ်သပ်ရပ်ရပ် ဝတ်စားထားတာ တွေ့ပြန်တော့လည်း ဘာမှ မပြောတော့ပါဘူး။ အဟောင်းဆိုင်တစ်ဆိုင်က ဈေးပေါပေါနဲ့ ဝယ်လာတဲ့ ဂျင်းဘောင်းဘီတစ်ထည်ကို ချက်ကြီး ဝတ်ပြလိုက်တာက စတယ်လို့ ပြောလို့ရတယ်။ သူက အသားလတ်လတ်၊ သန်သန်မာမာ တုတ်တုတ်ခိုင်ခိုင် အရပ်မြင်ြ့မင့်မို့ ဘောင်းဘီနဲ့ လိုက်ဖက်တယ်။ သူ့ အကြောင်းပြချက် တွေကလည်း အများကြီး။ လယ်ထဲပဲ ဆင်းမလား။ တောင်ယာပဲ လုပ်မလား ဘာပဲလုပ်လုပ် ဘောင်းဘီနဲ့က အဆင်ပြေတယ်။ အကြမ်းခံတယ်။ ပုဆိုးလို ခဏခဏ ပြင်မဝတ်ရလို့ အလုပ်ရှုပ်တာလည်း သက်သာတာပေါ့။အဲဒါနဲ့ လူငယ်ပိုင်းတချို့က ချက်ကြီးအပေါ် အာရုံစိုက်လာကြတယ်။ နောက်တော့ ဂျင်းဘောင်းဘီ တစ်ခေတ် ထလာတော့တာပဲ။ ခက်တာက ကျေးရွာဆိုတာ တစ်ယောက်လုပ်တာကို တစ်ယောက်က အားကျရင် မကြာဘူး လိုက်လုပ်ကြတာ။
နံ့သာကုန်းတစ်ရွာလုံး ဂျင်းဘောင်းဘီဝတ်ပြီး ရှိုးနဲ့မိုးနဲ့ စတိုင်ထုတ်နေတာကို ရေပြာ၊ ဇီးကုန်း၊ အင်းမ၊ လက်တတ်ကြီး ရွာသားတွေတောင် အားကျပြီး လိုက်ဝတ်ကြတာ ဘောင်းဘီမရှိရင် ခေတ်မမီတော့တဲ့အထိ ဖြစ်သွားတာ။ ဒါပေမယ့် ဆံပင်အရှည်ကြီးထားပြီး မြင်မြီးလို စုစည်းတာတို့၊ နားရွက်တစ်ဖက်တည်းမှာ နားကွင်းတွေ အများကြီး ဖောက်တပ်တာတို့ကိုတော့ နံ့သာကုန်းရွာသားတွေ လိုက်မလုပ်ကြပါဘူး။ သူတို့နဲ့ သိပ်ပြီး အံမဝင်လှဘူးလေ။ သူတို့က အလုပ်ကြမ်းသမားတွေ။ ဒီလောက် ဆံပင်ရှည်ကြီးကို သန့်သန့်ပြန့်ပြန် ဖြစ်အောင်လည်း ဇယားအရှုပ်ခံပြီး ထားမနေနိုင်ဘူး။ ဖိုသီဖတ်သီနဲ့။ချက်ကြီးတစ်ယောက်သာ သူ စထွင်တာကို နောက်လူတွေ လိုက်လုပ်ကြလို့ သဘောတွေကျပြီး စတန့်ထွင်ဖက်ရှင်သမားအဖြစ် ခံယူချင်တယ်နဲ့ တူပါတယ်။ နားကွင်းတွေ တပ်ပြပြန်ပါလေရော။ ဒီတစ်ခါတော့ ရွာသားတွေက ချက်ကြီးကို အခြောက်စိတ်ဝင်သွားပြီ ဆိုပြီး ဝိုင်းနောက်ကြလို့ နားကွင်းတွေလည်း ဘယ်ပျောက်ကုန်မှန်း မသိတော့ပါဘူး။
ခင်သိုက် စန်းထတဲ့နှစ်မှာ ဧည့်သည်လူငယ်ပိုင်း ခပ်များများရဲ့ စိတ်ဝင်စားခြင်းကို ခံရတဲ့သူကတော့ ဂွက်ထော်ပဲ။ ကောင်မလေးက လှတယ်၊ အပြောသွက်တယ်။ ချက်ချက်ချာချာ ရှိတယ်။ ပြင်တတ်ဆင်တတ်တယ်။ ရွာခံ မိန်းကလေးချင်းတောင် ဂွက်ထော်ကို မနာလို မရှုစိမ့်နိုင်ကြတဲ့အထိ။ အရီးလေး မယ်တုတ်ကလည်း ဒါကိုသိလို့ ဂွက်ထော်ကို ထမင်းဆိုင်မှာ အချိန်ပြည့် ထိုင်ရောင်းခိုင်းတယ်။ ကောင်လေးတွေဆို သူ့ဆိုင်မှာပဲ စားတယ်။ တချို့က သိမ်သိမ်မွေ့မွေ့တွေ ပါသလို တချို့ကလည်း ခပ်နောက်နောက် ခပ်ပြောင်ပြောင်တွေပါ။ တချို့ဆို အချိန်တိုတို အတွင်းမှာ ဂွက်ထော်နဲ့ ရင်းနှီးမှုတွေရပြီး သူတို့ လိပ်စာတွေ ပေးလို့ ကမ်းလို့။
“တောသူတွေဟာ မြို့သူတွေလို ပဲမများဘူး။ ရိုးသားပွင့်လင်းတယ်” လို့များ ဂွက်ထော်ရှေ့မှာ မြှောက်ပြောရင် သဘောတွေများကျလုိ့။ ဘာပဲပြောပြော စီးပွားလုပ်နေရတာဆိုတော့ ဂွက်ထော်အနေနဲ့ကလည်း လူတိုင်းကို အဆင်ပြေအောင် ပေါင်းတတ်ပါတယ်။
ခြုံကြည့်ရင် နံ့သာကုန်းရွာလေးဟာ ကိုယ်ကျင်လည်ရာကို လုပ်ကိုင်စားသောက်ကြရင်း တချို့ဆို သိသိသာသာ စီးပွားရေးပြေလည်လာတာ တွေ့ရတယ်။ တခြားမကြည့်နဲ့။ ရွာထိပ်က ဆိုင်းဘုတ်လေးတောင် ပန်းချီဆရာနဲ့ မွမ်းမံ ပြင်ဆင်ထားလို့ သပ်သပ်ရပ်ရပ် ခံ့ခံ့ညားညားနဲ့ လူတိုင်း ဖတ်လို့ လွယ်ကူနေပြီလေ။
၃။
တစ်နေ့ ခင်သိုက်တို့ မြေးအဘွား ရန်ကုန်ပြောင်းပြီး နေကြမယ်ဆိုတဲ့ သတင်းက နံ့သာကုန်းရွာသားတွေရဲ့ နားရင်းကို ဖြတ်ရိုက်သလား အောက်မေ့ရအောင် ဖြစ်ကုန်တယ်။ အားလုံးက ထိတ်ထိတ်ပျာပျာ ဖြစ်လို့။ တကယ်ဆို သူတို့အားလုံး ခင်သိုက်ကို မှီခိုပြီး လုပ်စားနေကြရတာကိုး။ ဘယ်သူကမှ မပြောင်းစေချင်ကြဘူး ။ လက်ရှိ အဆင်ပြေနေတဲ့ဘဝကို မဆုံးရှုံးချင်ကြဘူးလေ။ အမျိုးမျိုး ဝိုင်းပြီး တောင်းပန်ကြတယ်။ ခင်သိုက်တုိ့ မြေးအဘွားအနေနဲ့ကလည်း ဟိုမှာနေဖို့ ထိုင်ဖို့ အားလုံး အဆင်သင့်ဖြစ်နေပြီ။ ဆန်္ဒအပြင်းပြဆုံးကတော့ ခင်သိုက်ဦးလေး ဆိုပါတော့။
နာမည်ကြီး သူဌေးတစ်ယောက်က ခင်သိုက်ကြောင့် စီးပွားဖြစ်တယ် ဆိုပြီး ကျေးဇူးဆပ်တဲ့အနေနဲ့ ရန်ကုန်မှာ မြေကွက်နဲ့အိမ်ကို တမင်ဝယ်ပေးတာ။ ဘဝပေး ကုသိုလ်ကြောင့် ကံထူးတဲ့ ခင်သိုက်လို ပါရမီရှင်တစ်ယောက်အနေနဲ့လည်း အသင့်တော်ဆုံးက ရန်ကုန်ပဲလို့ အားလုံးက တညီတညွတ်တည်း အကြံပေးကြတယ်။ တစ်နှစ်လောက် စုဆောင်းထားတဲ့ငွေကလည်း ခင်သိုက်လက်ထဲ နည်းတာမဟုတ်ဘူး။
ကိုင်း... မတတ်နိုင်တော့ နံ့သာကုန်းရွာသားတွေ လက်လျှော့လိုက်ရပြီပေါ့။ ခင်သိုက်တို့ ရန်ကုန် ပြောင်းသွားပြီးတဲ့နောက်မှာ နံ့သာကုန်းရွာဟာ ရုတ်ခြည်း ပြောင်းလဲသွားတယ်။ တိတ်တိတ်ဆိတ်ဆိတ်ကို ဖြစ်သွားတာ။ အလျင်ကဆို ကက်ဆက်သံ တညံညံနဲ့ ကျောင်းဆရာ ကိုညိုမြ လက်ဖက်ရည်ဆိုင်လေးဟာ ခုတော့ ဝါးကပ်လေးတွေကာလို့ ပိတ်ထားရတဲ့ အခြေရောက်ပြီ။ ဗီဒီယိုပြစက်ကတော့ နံ့သာကုန်းမှာ လူနည်းလို့ဆိုပြီး ဇီးကုန်းကို ပြောင်းသွားပါလေရော။ ကိုရိုး မီးစက်ကိုလည်း မိုးတွင်း လယ်ထဲရေတင်ဖို့ အလိုက်ရတာကြောင့် ရေစုပ်စက်နဲ့ ဖလှယ်လိုက်တယ်။ အရီးလေး မယ်တုတ်ကတော့ မြေပဲနုတ် ပြန်လိုက်နေပြီ။ လက်ဖက်ရည်မသောက်ရရင် မနေနိုင်အောင် စွဲနေတဲ့ ချက်ကြီးတစ်ယောက် မြို့တက်ပြီး လက်ဖက်ရည်ဆိုင်တစ်ဆိုင်မှာ စားပွဲထိုး ဝင်လုပ်တယ် ဆိုတာပဲ။ ဂွက်ထော်ကတော့ မြို့က ဂျင်မီနဲ့ လိုက်ပြေးတယ်လို့ ပြောသံကြားတယ်။ နံ့သာကုန်းမှာ အမှတ်တရအဖြစ် ကျန်ရစ်ခဲ့တဲ့ အရာကတော့ လူငယ်တိုင်းမှာရှိတဲ့ ဂျင်းဘောင်းဘီလေးတွေပဲပေါ့။
-------------------------------------------
ဒေါင်းနေမင်း
(ရွှေအမြုတေ ရုပ်စုံမဂ္ဂဇင်း၊ အမှတ် ၇၁၊ စက်တင်ဘာလ၊ ၁၉၉၅)
No comments:
Post a Comment